Zään 19

1Ɩ ‑kʋ bhɛ lä sɔɔ nä, kä Pilatö cii‑ nynä wa ‑lä Zozii ‑yä wa 'sɛpɩɔ. 2‑Mä 'sʋjaa ‑bhlä 'ŋocuë‑wugblë, 'nɩ wa yionya 'wluu 'ŋʋ. Wa ‑plɔɔ bhä 'sɩɩ ‑bänözlä.#19.2 Zɛɛ 'sɩɩ Makö 15.17. 3'Nɩ wa yi 'nɩ wa bhänöɔ bhä, wlä ‑ayoo 'Zufʋnyʋaa' 'loyo‑! 'Nɩ wa pɔɔ bhä 'kpeyi. 4Pilatö wlʋʋ‑ bʋkʋ ‑zɔɔ 'nɩ ɔ yi 'Zufʋnyʋa soo, ɔ lä a ni nyɩkpɔɔ 'mɔ n la'anyɩ lä ‑yä a 'kä sɔɔ yibhë nynä gbëgëdë laa‑ yio lä gbʋ klaa nä, nn' 'nia ‑wʋ. 5'Nɩ Zozii yi ‑zɔɔ 'wlʋ. Wa ŋʋɔ bhä 'ŋocuë‑wugblë 'wlu 'nɩ ɔ ‑plä bhä ‑bänözla. 'Nɩ Pilatö yi ci, ɔ lä a ni nyɩkpɔɔ! 6‑Mä sä 'Cibhisänyʋaa' 'cifinyʋa ‑yä waa' 'sʋjaa 'sɔ nio‑ lä 'yi nä, kä waa' 'kɛsɛ 'mɩä‑ 'kʋ. Wa woo bhɛ, wlä ‑n bhuo 'kusuu 'yii! ‑N bhuo 'kusuu 'yii! 'Nɩ Pilatö yiwa soo, ɔ lä ‑amʋ, nn' 'nio ‑wʋ gbëgëdü nyënyë yëku nä, anyɩ 'titii 'bhlüo 'kʋ ‑yä a 'kɔ bhoo! 7'Zufʋnyʋa lä kɔ laa‑ ɔ yëku Laagɔ ‑Yowli nä, ‑anyɩa ‑jlämaa' ‑za, ɩ ‑ŋwa 'kʋ nynä ɔ 'ku.#19.7 Zɛɛ 'sɩɩ Levi 24.16.

8Pilatö nuu‑ lä wälɩnɩ nä, kä ɔɔ' pleyii ‑ŋänöö 'ŋʋnöɔ‑ 'kʋ. 9Ɔ ‑plä ‑mɔɔ ‑gɔmnä ‑bhutuu 'mnö 'nɩ ɔ yi Zozii 'ylä, ɔ lä dä ‑n bha bhää? ‑Mä Zozii 'nöɔ ‑wʋ në ‑slä. 10'Nɩ Pilatö yio soo, ɔ lä ‑nn slä'ä ‑wʋ në ‑a? ‑Nn ‑wʋ sɔɔ ‑yi nynä n ‑kä 'päwä ‑yä n 'kä‑ä 'yi ‑taa, 'nɩ n ‑kä 'sɩɩ 'päwä ‑yä n 'kä‑ä 'kusu 'yi bhoo ‑a?

11Zozii lä ‑amʋ nä, ‑n nö'ö ‑lä bhɔɔ 'päwä 'kʋ kään ‑mä, 'päwaa ‑laa Laagɔ nyɛɛ‑ lä nä, amä ‑n ‑kä lä. ‑Nɩnɩ 'mɩɩ‑ ‑kä lä 'ŋnö 'nɩ ‑ɔ ‑pënö'ö lä nä, ɔɔ' nyenyii' ‑gesii ‑zu 'nɩ ɩ ‑zi lä ‑naa ‑lɩɩ 'kʋ.

12'Bhää bhɛ ‑lɔɔ 'kʋ nä, kä Pilatö tään bhɛ nynä ɔ 'kä Zozii 'yi taa. ‑Mä 'Zufʋnyʋa woo bhä, wlä ‑n gä nyɩkpɔyɩ 'yi ‑taa nä, ‑nn yɩɔ 'loyo 'kädɔɔ Sezaa 'nagɔ plöö‑! Nyɩkpɔɔ' lɔɔ ‑ɔ laa lä ɔ yëku 'loyo nä, ɔ ‑glö 'loyo Sezaa' ‑zɔbhlɛgbänyɔ. 13Pilatö nuu‑ lä sä wa cii‑ lä nä, kɔ ‑lä Zozii jlukʋ. 'Nɩ ɔ yi tlobinaa' këkpëa 'kʋ 'plöö 'nɩ ɔ yi sä kʋ. ‑Lɔɔ wa laa bhlä ‑Tʋkpaabhë 'kʋ, ‑mä Eblëë‑wälɩɩ' nä, wlä Gabataa#19.13 Gabataa: Kɩ sä lä ‑zɔɔ nynä ‑Lɔɔ mʋ ŋɔkʋ.. 14Pakö‑glɩsɩɩsɩɛ' ‑dʋdʋkʋ göglä ylʋʋ bhlä, 'nɩ 'ylʋ yä bhɛ yiosä ‑tii 'kʋ ŋëë.#19.14 Ylʋʋ 'yɩ 'kʋ nä, ʋʋ' ‑tii 'kʋ, ‑lɔɔ 'Zufʋnyʋä bhlä lä Pakö‑glɩsɩɩsɩɛɛ' 'bhabhlöö, 'nɩ wa sä bhlä ‑mɔɔ Laagɔ‑bhutu 'kädʋʋ 'mnö 'cibhie. 'Nɩ Pilatö yi 'Zufʋnyʋa soo, ɔ lä a ni anyɩa' 'loyoo! 15'Nɩ waa' 'kɛsɛ 'mɩä‑ 'kʋ bʋkʋ wlä, ɔ 'ku! Ɔ 'ku! ‑N bhuo 'kusu 'yii! Pilatö lä ‑mä, n bhoo anyɩa' 'loyoo 'kusu 'yii ‑a? Wlä ‑aa ‑wʋ bʋkʋ 'yigäda‑loyo ‑kä 'nɩ ‑ɔnö Sezaa ‑bhlo. 16Wa cii‑ bhɛ lä sɔɔ nä, 'nɩ Pilatö yiwa Zozii 'nyɛ ‑yä wa 'kɔ 'kusuu 'yi bhoo. 'Nɩ wamä ‑mä, wa yio 'kʋ 'bhlü, 'nɩ wa ‑yɔsɔ yi mʋ.

Wa ‑bhoo Zozii 'kusu 'yii

(Matie 27.32‑44; Makö 15.21‑32; Lukö 23.26‑43)

17Zozii 'titii' bhɛɛ‑ ɔɔ' 'kusuu, 'nɩ ‑gbäsɩɩ wa laa bhlä 'Wukɔfʋʋ' dä nä, ɔ yi ‑mɔɔ mʋʋ. Eblëë‑wälɩɩ' nä, ‑mɔɔ wa laa bhlä Glogotaa. 18‑Mɔɔ 'sʋjaa ‑bhonöɔ lä 'kusuu 'yii. Dä wa ‑bhonöɔ bhlä nä, wa ‑bhoo bhä 'sɩɩ ‑lɔɔ nyɩkpa 'sɔ. Wamä 'sɔ pää' ɔ ‑kʋ bhä. ‑Nɔnɔ ‑kʋ bhä Zozii' lüüklä 'kʋ, 'nɩ ‑nɔnɔ ‑kʋ bhä ɔɔ' mëëcë 'kʋ.

19 Pilatö ‑jɩjlä bhä 'sɩɩ kplupä 'klʋ, 'nɩ ɔ ‑bhua bhä 'kusuu 'yii. Ɔ ‑jɩjla bhä 'klʋ nynä Nazalɛtöö' Zozii, 'Zufʋnyʋaa' 'Loyoo! 20‑Gbäsɩɩ wa ‑bhuo bhlä nä, kä ‑mɔɔ mɛɛ‑ bhä 'duu yëku nä, 'Zufʋnyʋaa' bhutukpä ‑zɛɛ kplupaa 'yii. Wälɩklëa, wa ‑jɩjlänöa bhä Eblëëwälɩɩ', ɩyä Latɛɛwälɩɩ', 'nɩ wa ‑jɩjlänöa bhä 'sɩɩ 'Glɛköwälɩɩ'. 21'Nɩ 'Zufʋnyʋaa' 'Cibhisänyʋa, waa' 'cifinyʋa yi Pilatö soo, wlä ‑naa jɩjlä ‑lä ‑lɔɔ nynä 'Zufʋnyʋää' 'loyoo, ‑mä ‑n jɩjlä ‑lɔɔ nynä ‑mä, nyɩkpɔnɔ lä ɔmɔɔ‑ plöö‑ 'Zufʋnyʋää' 'loyo! 22'Nɩ Pilatö yiwa soo, ɔ lä sä n ‑jɩjlä lä nä, sɔɔ‑ too lä ‑lɔɔ.

23'Sʋjaa ‑wa ‑bhoo bhlä Zozii nä, wa bhlüü‑ ɔɔ' 'kwëtii 'kʋ 'nɩ wa ‑dënɩ 'ci ‑mɔɔnä 'kʋ. 'Sʋjäyu 'sʋjäyu nä, wa nyɩɔ‑ ɔɔ' dä. 'Nɩ wa yi ɔɔ' ‑bänaa 'kʋ 'bhlü. ‑Bänaa' bhɔɔ 'kplä 'kpläbɩ ‑kä. ‑Mä sä wa ‑bhlä lä aa' lokwie nä, sɔɔ a ‑kʋ ‑aaa, 'nɩ a gëë‑ ‑dʋdʋ. 'Nɩ 'sʋjaa yi sonö ‑sonö, 24wlä, ‑bänaa nä, ‑a 'nä 'ŋätlönöa ‑lä ‑mä ‑a 'paa ‑nügbe 'kʋ! Lɔɔ ‑ɔnö lɛɛ‑ ‑lü lä nä, ɔmɔɔ‑ ‑kaa. Kɩ plö bhlä sɔɔ 'kʋ ‑yä sɩɩ ‑jɩjlɔ bhlä ‑mɔɔ Laagɔ‑bɔɔgʋʋ 'mnö nä, sɔɔ 'kä bhä glää. Kɩ ‑jɩjlɔ bhlä nynä ‑mä

Wa ‑dëë 'naa 'kwëtii,

'Nɩ 'naa ‑bänaa wa paa‑ ‑nügbe 'kʋ!

Nä, a ni sä 'sʋjaa ‑nʋ lä nä.

25‑Lɔɔ' 'tänyɩɩ nä, Zozii ɔ 'nɔ Malii, ɩyä Malii ɔ bhɛŋnɔ, ɩyä Klopasö 'ŋnɔ Malii ɩyä Mali Madlɛɛ, wa ‑kʋ bhä ‑lɔɔ 'kusuu yëku. 26Zozii' nii‑ lä ɔ 'nɔ 'yi, 'nɩ ɔɔ' yëku, 'kʋgënyɔɔ ɔ ‑waa bhlä kpänyɩ nä, ɔ 'nynigo‑ bhlä ‑lɔɔ nä, kɔ cii‑, ɔ lä, ‑a 'nɔ! ‑N ni ‑n ‑yowli! 27'Nɩ ɔ yi 'sɩɩ ɔɔ' 'kʋgënyɔɔ soo, ɔ lä, ‑mɔɔ, ‑n ni ‑n ‑nɔɔ! 'Bhää bhɛ ‑lɔɔ 'kʋ nä, 'kʋgënyɔɔ' ‑gbäsɩɩ, ‑mɔɔ Malii ‑kʋ bhɛ.

Zozii yä 'ku

(Matie 27.45‑56; Makö 15.33‑41; Lukö 23.44‑49)

28‑Nɩnɩ 'fɩɩn plöö‑ ylä nä, Zozii ‑yi bhɛ lä sɔɔ nynä ‑mä lebhee 'fɩɩn ɔ ‑yi bhlä 'kʋ nä, ɛ yä bhɛ ‑zɔɔ bhɩɔ nä, kɔ cii‑, ɔ lä 'Mnätʋ bhlä'ä!#19.28 Zɛɛ 'sɩɩ Lɔlɔ 22.16; 69.22. Sɩ ‑jɩjlɔ lä Laagɔ‑bɔɔgʋʋ 'mnö ɔɔ' ‑za nä, sɔɔ yä bhɛ glää. 29Nä, ‑dɔkɔ 'kʋ a ‑lɔɔ yëku 'nɩ ʋ ‑kʋ bhä 'kälɩä kää nʋ 'mnö. Wa bhlüü‑ lä ‑dudukwë 'kʋ nä, kä wa ŋwaa‑ 'kälɩä kää nʋ 'mnö, 'nɩ suvaa wa laa lä yisɔpʋ nä, wa yia aa' ‑yukwe 'yi bezie, 'nɩ wa yio në koo. 30‑Mä ɔ ‑koo lä nʋʋ në nä, kɔ cii‑, ɔ lä wälɩɩ 'fɩɩn yä ‑zɔɔ bhɩɔ! Ɔ cii‑ lä sɔɔ nä, kɔ ‑lä 'wlu ‑dʋdʋkʋ, 'nɩ ɔ yi nyämʋ sä pään.

31 Sabaa‑gwlɛylʋʋ' ‑dʋdʋkʋ göglä‑tänyɩ bhɛ lä nä, 'Zufʋnyʋaa' 'ylä bhɔɔ nynä ‑gäzöö too‑ bhä 'kusii 'yii ‑yä Sabaa‑gwlɛylʋʋ 'kɩ ‑lɔɔ ŋëë.#19.31 Zɛɛ 'sɩɩ Detlo 21.22‑23. 'Nɩ Sabaa‑gwlɛylʋʋyɩ nä, ʋ ‑glö bhä 'sɩɩ ‑glɩsɩɩsɩylʋʋ 'kädʋ. Ɩ ‑kä 'ŋnö nä, kä 'Zufʋnyʋa ‑soo Pilatö nynä wa 'kätö nyɩkpaa bhɩ ‑yä wa 'kwa 'kusii 'yii ‑sä. 32'Nɩ 'sʋjaa yi yi 'nɩ wa yi tɛɛtɛɛlɔɔ bhɩ 'kätö 'nɩ 'sɔnalɔɔ, wa yio 'sɩɩ bhɩ 'kätö. 33‑Mä wa ‑ŋëë ylä Zozii 'kʋ nä, wa lä wa wloo nä, ɔ yä wɛzä 'ku. Ɩ ‑kä 'ŋnö nä, wa 'nöɔ yɩɔ bhɩ 'kätö‑ 34‑mä kä 'sujäyu ‑bhlo bhlüü‑ ɔɔ' 'lie 'kʋ 'nɩ ɔ ‑tlʋ Zozii' gbäköö. Ɔ ‑tlʋɔ lä gbäkö nä, kä 'nyu ‑yä dolu 'sɔ wlʋʋ‑ ‑zɔɔ.

35Nyɩkpɔɔ ‑ɔ lü lä ‑dläfʋɛnɛ nä, wälɩɩ ɔ ci lä nä, kɔ 'nii‑ ɩɩ' dä. Nä, ɔɔ' ‑dläfʋɛɛ ‑glö nyaasäsä. 'Nɩ ɔmɔ 'titi, ɔ ‑yi 'sɩɩ 'sɔɔ nynä ‑mä ‑nʋawlɛɛ‑ ɔ ci lä. ‑Nä kɔ ci lä ‑yä anyɩ ‑mä 'sɩɩ, a 'kä pɔlötɛtɛ kää. 36‑Nɩnɩ 'fɩɩn ‑ŋëë lä nä, kɩ ‑gbä 'nɩ Laagɔ‑bɔɔgʋʋ 'mnö wälɩɩ ‑glää. Kɩ ‑jɩjlɔ bhlä nynä ‑mä, Wa 'nöɔ ‑lä 'kɔɔn 'feye 'kätö.#19.36 Ɩ bha 'Nämʋ 12.46; 'Nɔblʋ 9.12; Lɔlɔ 34.21. 37'Nɩ ɩ ‑jɩjlɔ bhä 'sɩɩ nynä ‑mä, ‑Lɔɔ wa ‑tlʋʋ lä 'liee' nä, ɔmɔ wa 'kä lä ‑zee 'klʋ tlaa.#19.37 Ɩ bha Zaka 12.10.

Wa ‑zizie Zozii' ‑gɛzɛɛ

(Matie 27.57‑61; Makö 15.42‑47; Lukö 23.50‑56)

38‑Nɩnɩ 'fɩɩn plöö‑ bhɛ lä nä, Alimatee‑duu' nyɩkpɔɔ wa laa bhlä Zozɛfʋ nä, ɔ ‑glö bhä 'sɩɩ Zozii' 'kʋgënyɔ, ‑mä sä ɔ ‑guu bhlä 'Zufʋnyʋaa' 'cifinyʋa nä, ziziolɩɩ' ɔ 'gënöɔ bhlä 'kʋ. Ɔmɔ Zozɛfʋ nä, ɔ ‑mʋ 'nɩ ɔ ‑soo Pilatö nynä ɔ 'nyɩɔ Zozii' ‑gɛzɛɛ. Ɔ cii‑ lä sɔɔ nä, 'nɩ Pilatö yio ‑blɔ 'nyɛ nynä ɔ ‑sä ‑lɔɔ ‑gɛzɛɛ. 'Nɩ ɔ yi yi 'nɩ ɔ yie ‑lɔɔ ‑sä. 39'Nɩ nyɩkpɔɔ ‑ɔ ‑yi bhlä 'tänyɩ ‑bhloo' 'sabo Zozii yëku 'nɩ wa laa bhlä Nikodɛmʋ nä, 'nɩ ɔ ‑yi 'sɩɩ ‑lɔɔ yi. Ɔ bhɛɛ‑ bhä ‑kätawlɛɛ ‑yä 'ŋwänɩ‑nyakpɩ.#19.39 Nyäma ‑yä ‑kätawlɛɛ, ɛmɛ wa bʋä bhlä 'kulokwie yëku, 'nɩ wa gbëbie bhlä 'kuo. 'Fɩa, 'nɩ wa zizio bhlä. ‑Kätawlɛɛ wa laa lä 'milö nä, ɛ ‑yä ‑nyakpɩɩ wa laa lä alowɛsö 'sɔ. Ɔ 'bhläbhlänɩ‑ lä 'mʋ nä, ɩ yi bhä kilooyuëë' glʋ 'nɩ 'kʋgbä 'wɛɛ. 40'Nɩ wa yi Zozii' ‑gɛzɛɛ 'kʋ 'bhlü, 'nɩ wa yie lokwü yëku kpäpɩä, 'nɩ wa yie ‑daŋwɩɩkpü yëku bʋä. Sɔɔ 'Zufʋnyʋa nʋ bhlä 'fɩa waa' ‑gäzö 'nɩ wa zizii bhlä. 41Dä wa ‑bhoo bhlä Zozii nä, ‑gboo ‑kʋ bhä ‑lɔɔ yëku. Ʋmʋ 'mnö, lesi ‑kʋ bhä ‑mɔɔ 'nɩ wa 'nɩɛ ‑lä bhä tee ‑gɛzɛɛ' ‑zizie. 42Sä 'Zufʋnyʋaa' Sabaa' ‑gwlɛylʋʋ yä bhɛ lä 'mɛmɛ nä, 'nɩ lesie mɛɛ‑ bhlä 'sɩɩ ‑lɔɔ yëku nä, ɛmɛ 'mnö wa ŋʋʋ‑ yɩ Zozii' ‑gɛzɛɛ.#19.42 Zɛɛ 'sɩɩ 19.31.

Currently Selected:

Zään 19: god

Highlight

Copy