Zään 20

Zozii yä 'kuëë glɔɔ

(Matie 28.1‑8; Makö 16.1‑8; Lukö 24.1‑12)

1'Sɔlɩɛ 'kʋʋ zëplü 'pii, 'cucukpä ‑kʋ ‑lätee ‑dʋdʋkʋ, 'nɩ Mali Madlɛɛ ‑bha 'kʋ 'nɩ ɔ ‑mʋ lesi 'kʋ. ‑Mä ɔ lɔ wloo nä, cɛkʋʋ wa 'suu‑ bhlä lesi‑këfëa në nä, ʋ yä bhɛ ‑lɔɔ ‑bha. 2'Nɩ ɔ yi paa 'nɩ, Simɔɔ Pɩɛlö ‑yä 'kʋgënyɔɔ Zozii ‑waa bhlä kpänyɩ nä, ɔ yiwa yëku mʋ 'nɩ ɔ yiwa soo, ɔ lä wa yä Kwlienyɔɔ lesie 'mnö ‑sä, 'nɩ ‑gbäsɩɩ wa ŋʋɔ‑ lä nä, ‑aa ‑wʋ ‑mɔɔ dä ‑yi! 3'Nɩ Pɩɛlö ‑yä ‑lɔɔ' 'kʋgënyɔɔ 'sɔ yi 'kʋ ‑bha 'nɩ wa yi ‑mɔɔ lesi 'kʋ mʋ. 4Wa paa bhä wamä 'sɔ. ‑Mä ‑lɔɔ' 'kʋgënyɔɔ ‑paa kpänyɩ 'nɩ ɔ ‑zi Pɩɛlö, 'nɩ ɔ ‑ŋëë tɛɛ lesie 'kʋ. 5'Nɩ ɔ yi 'kʋ kwlio 'nɩ ɔ yi ‑mɔɔ 'yi sä pee. Ɔ nii‑ lokupɛlɩɩ 'yi ‑mä ɔɔ' ‑wʋ lesie 'mnö kwlii‑. 6Simɔɔ Pɩɛlö‑ ‑kʋ bhlä klë nä, ɔmɔɔ‑ ‑yi 'nɩ ɔ kwlii‑ lesie 'mnö. Lokupɛlɩɩ ‑ɩ ‑kʋ bhlä ‑mɔɔ nä, ɔ nii‑ 'yi, 7'nɩ lokwie wa ‑kpäpɩä bhlä Zozii 'wlu yëku nä, ɔ nie‑ 'sɩɩ 'yi. Ɛ ‑yä lokupɛlɩɩ 'sɔɔ bhɔɔ 'kʋ 'wläwlä, ‑mä kɛ ‑gügënöɔ bhä, 'nɩ ɛ ‑kʋ bhä ɛɛ' dä. 8'Nɩ ‑lɔɔ' 'kʋgënyɔɔ ‑ɔ ‑ŋëë bhlä tɛɛ nä, ɔ yi 'sɩɩ ‑mɔɔ kwli. Ɔ nii‑ ylä ‑nɩnɩ 'fɩɩn 'yi nä, kɔ nii‑ yɩ pɔlötɛtɛ. 9Sɩ ‑kʋ bhlä naa, Laagɔ‑bɔɔgʋʋ 'mnö wälɩklëa ‑a ci bhlä nynä ‑mä, Zozii yi 'kuëë glɔɔ nä, wa 'nöa ‑lä bhä tee 'mʋ nuu‑.#20.9 Zɛɛ 'sɩɩ Lɔlɔ 16.10. 10'Kʋgënyʋa 'sɔ ‑wa ‑yi bhlä lesi 'kʋ nä, 'nɩ wa yi 'ylɩbhɔ.

Zozii ‑ghlä Mali Madlɛɛ 'yii

(Makö 16.9‑11)

11‑Mä Malii nä, ɔ 'nynigo‑ bhä ‑lɔɔ lesie yëku 'nɩ ɔ tu bhä. Ɔ ‑kʋ lä 'tudä nä, ɔ kwlio‑ 'kʋ 'nɩ ɔ ‑pee lesie 'mnö 'yi sä. 12Ɔ lɔ wloo nä, ‑Laagɔzizi 'sɔ. Ɩ ‑plä ‑bänö 'päpö, 'nɩ ɩ ‑kʋ ‑mɔɔ lesie 'mnö sä. Dä wa puë‑ bhlä Zozii' ‑gɛzɛɛ nä, ‑lɔɔ ɩ ‑kʋ bhlä. ‑Bhlo ‑kʋ bhä wluu' kpobhuu 'mnö, 'nɩ ‑bhlo ‑kʋ bhä bhɩɩ' 'kpobhuu 'mnö. 13'Nɩ ‑Laagɔzizi yio 'ylä nynä ‑mä 'ŋnɔɔ‑, ‑ɔnözä 'nɩ ‑n tu bhää? Malii lä nyɩkpaa yä 'naa Kwlienyɔɔ lesie 'mnö ‑sä 'nɩ nn' ‑wʋ dä wa ŋʋɔ‑ lä nä ‑yi! 14Malii ‑kʋ 'mʋ ‑säädä 'nɩ ɔ 'ylɩbha‑ 'wlu. Ɔ lɔ wloo nä, ‑n ni Zozii, ɔ 'nynigo‑. ‑Mä Malii 'nöɔ ‑wʋ ‑yibhë. 15'Nɩ Zozii yio 'ylä, ɔ lä 'ŋnɔɔ‑, ‑ɔnözä 'nɩ ‑n tu bhää? Lɔɔ ‑sä ‑n tään bhää? ‑Mä Malii ‑luë bhä nynä ‑gboo 'mnö lebhenʋnyɔ ylɔɔ nä, kɔ cii‑, ɔ lä bheeje! ‑Mɔɔ gɔ ‑fämʋ nä, ‑n panö'ö dä ‑n ŋʋɔ‑ lä nä, ɩyä n 'kä mʋ ‑yä n 'kɔ 'kʋ 'bhlü! 16'Nɩ Zozii yio laa, ɔ lä Malii! 'Nɩ Malii yi 'mʋ 'ylɩbhɔ, 'nɩ ɔ yi Eblëë‑wälɩɩ' 'kʋ ŋonö, ɔ lä Labunii! Kɩ sä lä ‑zɔɔ nynä Cɩanyɔ‑! 17Zozii lä ‑naa 'tanö'ö ‑lä ‑mä, nn' ‑lätee n 'Bä yëku gblää‑. ‑Mä ‑n mʋ ‑yä ‑n soo n bhelie nynä ‑mä, n 'Bä ɩyä 'naa Laagɔ ‑ʋ plöö‑ lä 'sɩɩ anyɩa 'Bä ‑yä anyɩa Laagɔ nä, kä n gblää ylä 'nɩ, n mʋɔ ylä yëku. 18Ɔ cii‑ lä sɔɔ nä, 'nɩ Mali Madlɛɛ yi mʋ, 'nɩ ɔ yi Zozii' 'kʋgënyʋa soo nynä ɔ nii‑ Kwlienyɔɔ. 'Nɩ sä Kwlienyɔɔ ‑sonöɔ lä nä, ɔ yiwa ‑lɔɔ' 'döö ‑sää.

'Kʋgënyʋa ‑kʋ ‑bhutuu' 'nɩ Zozii ‑ghlʋwa 'yii

(Matie 28.16‑20; Makö 16.14‑18; Lukö 24.36‑49)

19‑Lɔɔ' 'sɔlɩɛ ‑bhlobhlo 'kʋʋ ‑kugbësä, Zozii' 'kʋgënyʋa 'wlää‑ bhä ‑bhutu ‑bhlogbe 'mnö 'wlu. Wa ‑guu bhlä 'Zufʋnyʋaa' 'cifinyʋa nä, kwa ‑tʋ bhä ‑bhutuu. ‑Mä sɔɔ ɩ ‑kʋ 'nɩ Zozii ‑plä, 'nɩ ɔ yiwa nëëdë 'nynigo. Ɔ lä 'pʋpʋɛ ŋënö'anyɩ 'kʋ! 20Ɔ cii‑ lä sɔɔ 'nɩ ɔ yiwa ɔɔ' ‑klɔgböö ‑yä ɔɔ' gbäköö 'sɔ tlaa. ‑Mä wa nio‑ lä 'yi nä, kä ‑pʋpɛ ‑plʋwa. 21'Nɩ ɔ yiwa bʋkʋ soo, ɔ lä 'pʋpʋɛ ŋënö'anyɩ 'kʋ! Sä 'Bäɔ ‑lobho'o lä nä, ‑amʋ ‑mä 'sɩɩ kä n lobhu'anyɩ lä. 22Ɔ cii‑ lä sɔɔ nä, 'nɩ ɔ yiwa nyämʋ 'kʋ 'pä, ɔ lä a kään Kplɔɔkplɔɔ‑wugɔɔ! 23A kä nyɩkpɔɔ' nyenyi ‑cie nä, ‑lɔɔ' nyɩkpɔɔ yi cienöɔ. 'Ɩzä a kä cii‑ nynä ‑mä aa' ‑lä nyɩkpɔɔ' nyenyi ‑cie nä, ɔɔ' ‑lä cienöɔ.#20.23 Zɛɛ 'sɩɩ Matie 16.19; 18.18.

Zozii ‑ghlämʋ 'sɩɩ Tomaa 'yi

24‑Mä, 'kʋgënyʋa 'kʋgbä 'sɔ pää ‑lɔɔ ‑ɔ plöö‑ bhlä Tomaa, 'nɩ wa laa bhlä 'sɩɩ Poyuo nä, 'tänyɩɛ 'mnö Zozii ‑yi bhlä nä, ɔɔ' bhɔɔ ‑lɔɔ ‑kʋmʋ. 25Nä wa ‑mʋ lä nä, kwa ‑sänöɔ 'dö, wlä Tomaa, ‑a nii‑ Kwlienyɔɔ! Tomaa lä ‑amʋ 'titi, n 'nö 'fɩa ɔɔ' ‑klɔgböö 'mnö ‑lätöö' 'bɩɩ 'yi nii‑ nä, 'nɩ n 'nö 'fɩa ɩɩ' 'jüü 'mnö 'naa wliiye ‑koo nä, 'nɩ dä wa ‑slɔɔ lä 'sɩɩ 'lie gbäkö ‑zɔɔ nä, n 'nö 'fɩa ‑lɔɔ wlɩɩ 'taa nä, wälɩɩ 'fɩɩn a ci lä nä, n 'nɩɩ ‑lä 'kɔɔkɔ nyaasäsä laa.

26‑Maa, 'sɔlɩcë ‑bhlo plöö‑ ylä nä, 'kʋgënyʋa 'wlää‑ bhä bʋkʋ ‑bhutuu' 'wlu, 'nɩ Tomaa ‑kʋmʋwa bhä ‑pɛɛ pää. Wa ‑tʋ bhä bhutuu 'nɩ wa ‑kʋ ‑mɔɔ 'mnö. 'Nɩ Zozii yi yi, 'nɩ ɔ yiwa nëëdë 'nynigo. 'Nɩ ɔ yiwa soo, ɔ lä 'pʋpʋɛ ŋënö'anyɩ 'kʋ! 27'Nɩ ɔ yi Tomaa soo, ɔ lä Tomaa! ‑N yi ‑yä ‑n ‑koo ‑lää wliiye! Ɩyä ‑n wloo 'naa ‑klɔgböö! ‑N ‑lä 'sɩɩ sɔ 'yikʋ ‑yä ‑n fä 'naa gbäköö ‑zɔɔ wlɩ! Ɩyä ‑n gä ‑nʋ nä, ‑naa 'tɛmä ‑lä 'nyukwli ‑mä, ‑n kään pɔlötɛtɛ! 28Tomaa lä ‑mɔɔ ‑ɔ plöö‑ lä 'naa Kwlienyɔ ‑yä 'naa Laagɔ! 29Zozii lä ‑n yä'ä ylä 'yi 'ni nä, 'ɩzä ‑n ‑kä ylä 'naa pɔlötɛtɛ. Nyɩkpaa' ‑lʋämä ‑wa nö'ö ‑wʋ lä 'yi nii‑, 'nɩ ‑wa ‑kä lä 'naa pɔlötɛtɛ nä, 'nyupälɩ ŋënʋwa 'kʋ!

A ni 'bɔɔgʋnʋʋ' gba

30Zozii nä, ɔɔ' 'kʋgënyʋaa' 'klʋ, ɔ ‑nʋ bʋkʋ 'yiziziogbɩ ‑bhutukpää' 'sänalɩɩ 'nɩ ɩɩ' ‑wʋ 'bɔɔgʋnʋ 'mnö ‑jɩjlɔ. 31‑Mä ‑nɩnɩ nä, kɩ ‑jɩjlɔ lä ‑yä, ɩ 'kä gbä a 'kä pɔlötɛtɛ kään nynä ‑mä, Zozii 'mɔɔ‑ plöö‑ Klisö ‑yä Laagɔ ‑Yowli. Ɩyä a kä ɔɔ' pɔlötɛtɛ ‑kä nä, ɔɔ' 'ŋnöö 'mnö a 'kä 'pʋpʋɛ 'ni.

Currently Selected:

Zään 20: god

Highlight

Copy