Záan 19

Á ya Zozíi a bhlábhláwɔlɩ kʋ́ ŋwʋ́ʋ

(Matíe 27.26‑31; Málɩ́kɩ 15.15‑20; Lúkɩ 23.17‑25)

1Naa, Pilátɩ fa Zozíi lé ɔ́ nyɛ́ ɔ́ sʋ́jàà sɩ́àda. 2Sʋ́jàà bhá nyríci lé á bhla wlúgblè lé á ŋwʋ́ ɔ́ wlú. Lé á bhá bànɩ̀zàla lé á plɔɔ mʋ́. 3Lé á yio gɔ̀ lé á pɔ́ɔ́ yúó, á nie: «Àyúó Zúfʋnyʋa a lóò!» Lé á klálɛ ɔ nyúkwlí kpɩ́. 4Pilátɩ flʋ sɔ́kʋ́ zɔ̀, lé ɔ́ srʋ Zúfʋnyʋaá mà: «Náa ká amɔ mɔ́ laà lé a kɔ́ɔ́ yɛ́, mà wɔlɩdrèè ɔ ká lɛ́ nɩ bhè à kɔ̀ɔ̀ lɛ́ gbʋ gʋa a, nɩ́ yɛ́ a.» 5Lé Zozíi flʋ zɔ̀, nyníciwlùgblèè á ŋwʋ́ ɔ́ la wlú a, á kʋ ɔ wlú, lé á plɔɔ la sáà bànɩ̀zàlàà mʋ́, lé Pilátɩ srʋ á mà: «Nyɔɔ́ mɔ́ lɛ̀!» 6Tányɩɛ́ mʋ́ Lagɔ̀bʋ̀bɔ̀nyʋ̀àkádàà yà a sʋ́jàà sɔ́ yɛ́ ɔ́ a, á yrè mɩ́á kʋ́: «Kʋɔ́ kúsuó jɩ̀! Kʋɔ́ kúsuó jɩ̀!» Lé Pilátɩ srʋ á: «Mɔ́ɔ, nɩ́ yɛ́lɔɔ́ nyumowɔlɩ gɔ̀, amɔ mɔ̀glʋ̀ a fɔɔ́ a kɔ́ɔ́ kúsu jɩ̀ kʋʋ̀!» 7Zúfʋnyʋaá anɩ́: « Àmɔ̀ à ka jràmá, ɛ̀ nɩ̀ ŋwɔ́ɔ à jràmá a mnɩ́, ɔ́ ka lé ɔ kú, máà ɔ́ bhá ɔ nyoku Lagɔ a Yuwliyʋ kʋ́.#19.7 A zɛlɩɩ sáà Levíi 24.16.»

8Pilátɩ nú wɔlɩ́ɛ́ a, zuzu wlʋ́ɔ́ jɩ̀. 9Ɔ́ pla gɔ̀mnàwlʋ̀ɔ̀ a mnɩ́ lé ɔ́ yrá Zozíi mà: «Dɛ́gbá ɩ̀ wlʋ́ɛ́ a?» Zozíi nɩ́ ɔ́ né sra. 10Lé Pilátɩ srʋ ɔ́ mà: «Nɩɩ́ sra mɔ́ɔ né à? Nɩɩ́ saá yì mà ɩ́ yi míi lé ɩ́ yi nɩ lé á yi mɔ̀ɔ sá cíè, lé ɩ́ yi míi lé ɩ́ yi nɩ lé á yi mɔ̀ɔ kúsu jɩ̀ kʋʋ?»

11Bhʋ́ Zozíi srʋ ɔ́ mà: «Nà pɔ́waá nɩ́ pɩa mɔ́ɔ kʋ́, Lagɔ nɩ̀ nɩ́ mɔ̀ má nyɛ́ a. Ɩ́mɩ́ kà ŋnɩ́ a zà nyɔɔ́ ɔ̀ sa mɔ́ɔ a, ɔ nɩ nyumoé zù lé ɛ́ plɩ́ nà nɛɛ́ gɔ̀.»

12Bháa yɩ́ ʋ́ jɩ̀ a, Pilátɩ yrá yɩ́ la Zozíi a sá ciecú. Mà Zúfʋnyʋaá nɩ́ ŋwnʋ́ʋ̀, á sa yrè, á nie: «Nɩ̀ cíe nyɔɔ́ lɩ̀à sá a, nɩ́ yɩ́ lóo Sezáa ɔ bheyi ŋwɔ́ɔ! Nyɔ nɩ̀ wle ɔ nyoku lóo a, ɔ́ɔ gblɩ̀ Sezáa.» 13Pilátɩ nú wɔlɩ́ɛ́ á cíé a, ɔ́ɔ fle Zozíi jrùkʋ́ lé ɔ́ plɩ́ɩ ɔ tɩ́tɩ́plɔkpoó jɩ̀ lé ɔ́ bɔ́ɔ sá, bhʋ́ á wlele cazɩ zɔ̀, mà Ebléenyʋa nie Gabatáa. 14Flíiflíiglɩ̀sɩ́sɩ̀ɛ̀ a yrɩlɩlɛ a yruó kʋ́ɔ́, yrʋ́ a wlúnyɩ̀dɩ ŋnɩ lé Pilátɩ srʋɛ ɩ́ lɛ́ Zúfʋnyʋaá mà: «A lóo ɔ́mɔ́ lɛ̀!» 15Bhè a yrè mɩ́á sɔ́kʋ́ kʋ́: «Ɔ kú wee! Ɔ kú wee! Kʋlɔɔ kúsu jɩ̀!» Pilátɩ anɩ́: «Ɩ kʋ a lóo kúsu jɩ̀ɩ̀?» Lagɔ̀bʋ̀bɔ̀nyʋ̀àkádàà anɩ́: «À nɩ́ sɔ́kʋ́ lóo ànɔ ka, ɛ̀ nɩ nɩ́ Sezáa a múó ŋwɔ́ɔ a.» 16Bhʋ́ ɔ́ nyɛ́ à mɔ́ a kɔ́ɔ́ kúsuó jɩ̀ kʋ. Lé á bhli Zozíi kʋ́ lé á fɔɔ́.

Á kʋ Zozíi kúsu jɩ̀

(Matíe 27.32‑44; Málɩ́kɩ 15.21‑32; Lúkɩ 23.26‑43)

17Zozíi mɔ̀glʋ̀ gbɩdɩ̀ ɔ kúsuó lé á wlʋ́ dú lé á mʋ bhlɩ́ɛ́jɩ̀ á wlele Kúwlukofó a, mɔ̀ɔmɔ̀ Ebléenyʋa wlele wá Glɔgɔtáa. 18Mɔ̀mɔɔ á kʋlɔ kúsuó jɩ̀, á kʋ ɔ a, á kʋ sáà nyʋa àna a sɔ́ bhlɛ̀gbɩ́ kʋ ɔ lilie kʋ́, lé ànɔ kʋ ɔ kɔmɩa kʋ́.

19Pilátɩ srʋ nyʋa lé á jɩ́jrà kplipá jɩ̀, lé á kʋlaá kúsuó jɩ̀. Á jɩ́jrà mà: Nazalɛ́tɩ a Zozíi, Zúfʋnyʋa a lóo. 20Dɛ́ɛ́ mɔ̀ɔ á kʋlɔ a, mɔ̀ɔmɔ̀ mɛ́ du gɔ̀, ɩ́ ka ŋnɩ́ lé Zúfʋnyʋa kɔ́kɔ́mnɩ́ zɛ kplipáá jɩ̀, wɔlɩ́ɛ́ á jɩ́jrà a, á jíjràlɩ̀ɩ̀ Ebléewɔlɩ mʋ́, Latɛ́ɛwɔlɩ mʋ́, lé Glɛ́kɩwɔlɩ mʋ́. 21Zúfʋnyʋa a Lagɔ̀bʋ̀bɔ̀nyʋ̀àkádàà srʋ Pilátɩ mà: «Nàa jɩ́jrà ʋ́ jɩ̀ Zúfʋnyʋa a lóo, mà jɩ́jrà ʋ́, Nyɔɔ́ lɩ̀à anɩ́: Mɔ́ ŋwɔ́ɔ Zúfʋnyʋa a lóo!» 22Bhʋ́ Pilátɩ srʋ á mà: «Cémʋ́ ɩ́ jɩ́jrà lɛ́ a, ɩ́mɩ́ nà kà ʋ́ tuò.»

23Tányɩɛ́ mʋ́ sʋ́jàà kʋ Zozíi kúsuó jɩ̀ lé á bhɩa zɔ̀ a, á bhábha ɔ kótié mɔ̀na kʋ́, ànɔ a nʋ, ànɔ a nʋ. Lé á bhá sáà ʋ́ ɔ bànàà, á dʋdʋ̀ a, bhlɛ̀gbɩ́ kʋ́ á kplálaá, á bháa lagowlú àààn, lé á ŋnɩ zɔ̀. 24Lé sʋ́jàà srʋ srʋ, ɩ́mɩ́ ŋwɔ́ɔ mà: «Bànàà à ná yrayraá, mà à páa nɩ̀gbɩ kʋ́, nyɔɔ́ jɩ̀ ɩ́ na ká bhli a, ɔ́mɔ́ kà a.» Sɩ́tɛ̀ mʋ́ ɩ́ ka lé ɩ́ ká la plɩ́ɩ̀, bhʋ́alɛ́ Lagɔ̀bɔ̀gʋ̀ɔ̀ a mnɩ́ a jɩ́jràlɩ̀ɛ̀ yi neé sralɔɔ̀. Á jɩ́jrà wá mɔ̀ɔ mà:

Á bhábha ná kótié,

Ɛ̀ nɩ̀ ŋwɔ́ɔ ná bànàà a,

Nɩ̀gbɩ̀ kʋ́ á pálaá. # 19.24 A zɛlɩɩ sáà Lɔlɔ 22.19.

Sɩ́tɛ̀ mʋ́ sʋ́jàà nɩ.

25Bhʋ́ a tányɩɛ́, Zozíi ɔ nɛ́ Malíi, lé ɔ nɩ́ayʋ́ŋnɩkeyʋ, lé Klopásɩ a ŋwnɔ́ Malíi lé Malí Madɩlɛ́nɩ, á kʋ bhʋ́alɛ kúsuó gɔ̀. 26Zozíi yɛ́ ɔ nɛ́ lé ɔ́ kʋjɩ̀nyɔ̀ɔ̀ ɔ́ wà lɛ́ kpanyɩ a, ɔ́ nynʋ́vʋ̀ ɔ nɛ́ gɔ̀. Lé Zozíi srʋ ɔ nɛ́ mà: «Máà, lɛbhɛɛ nà yʋ́ lɛ̀ɛ̀!» 27Lé ɔ́ srʋ sáà ɔ́ kʋjɩ̀nyɔ̀ɔ̀ mà: «Mɔ̀, nà sɛ́fʋ, ɩ̀ nɛ́ lɛ̀ɛ̀!» Bhá yɩ́ ʋ́ jɩ̀ a, ɔ́ kʋjɩ̀nyɔ̀ɔ̀, ɔ́ɔ bhá yɩ́ Malíi lé ɔ́ fa yɩ́ mɔ́ ɔ gbó ɔ nyoku gɔ̀.

Zozíi ya kú

(Matíe 27.45‑56; Málɩ́kɩ 15.33‑41; Lúkɩ 23.44‑49)

28Bháa yɩ́ ʋ́ jɩ̀ a, Zozíi yì yɩ́ saá mà nɔnʋɔ́ fɩ́ɛ́ ɔ́ yi wá kʋ́ a, ʋ́ ya yɩ́ zɔ̀ bhɩɔ̀, bhʋ́ ɔ́ sa yɩ́ cɩɩ né, ɔ́ anɩ́: «Mnátʋ bhlá mɔ́ɔ!»#19.28 A zɛlɩɩ sáà Lɔlɔ 22.16; 69.22. Cémʋ́ ɩ jɩ́jrɔ̀ wá Lagɔ̀bɔ̀gʋ̀ɔ̀ mnɩ́ ɔ́ zà a, sɩ́tɛ̀ mʋ́ ɩ́ plɩ́ɩ̀. 29Bóo bɔ́ɔ dʋdʋ̀ kʋ́, a mnɩ́ kʋ kalɩma nʋ. Nyʋa bhá lokupɩʋ lé á gʋalʋʋ́ gblie zìzie yɩ́, lé á ŋwʋ́a bhʋanɩ nɔkalʋɔ́ a mnɩ́ lé á kʋ ʋ́ Zozíi né kʋ. 30Tányɩɛ́ mʋ́ ɔ́ yráa nʋ́ɔ́ a, bhʋ́ ɔ́ sané, ɔ́ anɩ́: «Wɔlíɛ́ fɩ́ɛ́ a zɔ̀ bhɩada lɛ̀!» Ɔ́ cíí lé ɔ́ bhle wlú sá a, ɔ́ɔ dí nyobhuo.

31Bhè Zúfʋnyʋa a nyɔbhleyruó ʋ́mʋ́ yie ŋnɩ ka, nyʋa yrɩlɩlɛ yɩ́, lé Zúfʋnyʋa nɩ́ yrá sáà lé bhʋ́ a tányɩɛ́, gàzɛ kʋ kúsu jɩ̀. Fɩ́ɛ́ lé bhʋ́anɩ nyɔbhleyruó ŋwɔ́ɔ yru kádʋʋ̀, ɩ́ ka ŋnɩ́ a, Zúfʋnyʋaá srʋ Pilátɩ mà, ɔ srʋ nyʋa lé a zɛzɩ̀à nyʋaá kʋ̀ kúsie jɩ̀ a bhɩɩ́ fɩ́ɛ́ lé a ká gàzɩ̀ɛ̀ ʋ́ sa à. 32Lé sʋ́jàà yi lé á zɛzɩ̀à nyʋaá sɔ́ɔ́ ɔ yàsɔ́ kʋ kúsie jɩ̀ a bhɩɩ́, á zɛ tagà anɔɔ́ a bhɩɩ́, lé á zɛ sɔ́anɔɔ́ a bhɩɩ́. 33Mà á ŋnɩ Zozíi jɩ̀ lé á dʋdʋ̀ a, ɔ́ ya kú. Ɩ́ ka ŋnɩ́ lé a nɩ́ ɔ́ yɩ́ bhɩɩ́ zɛzɩ̀à. 34Mà sʋ́jàà nyièdɩ a sʋ́jàyʋ a múó kpla ɔ jrɛ̀ɛ̀ lé ɔ́ gblúu Zozíi a gbakɩ, mà ɔ́ gblúo a, nyú yà dòlú sɔ́ ʋ̀ wlʋ́ ɔ́ mʋ́.

35Nyɔɔ́ ɔ̀ nɩ ŋwɔ́nɩ́srɩ̀lɛ a, wɔlɩ́ɛ́ ɔ́ cí a, ɔ́ɔ yɛ́ ɩ́ dá, lé ɩ́ ŋwɔ́ɔ sáà cɩ́cásaà. Naa ɔ ŋwɔ́nɩ̀srɩ̀lɛ̀ɛ̀ cɩ́cása ɛ́ ŋwɔ́ɔ. Lé ɔ́mɔ́ mɔ̀glʋ̀ ka sáà wɔlɩ́ɛ́ ɔ́ cí a ɩ cɩ́cása, naa ɔ́ɔ cíi lé a sɛ́fʋɔ́ a kɩ́ɩ́ duo tɔ̀. 36Wɔlíɛ́ fɩ́ɛ́ lɩ̀à, ɩ́ɩ ŋnɩ lé Lagɔ̀bɔ̀gʋ̀ɔ̀ a mnɩ́ a wɔlɩ́ɛ́ ká neé sralɔɔ̀: A nɩ́ ka ɔ fée zɛ.#19.36 A zɛlɩɩ sáà Lɔlɔ 34.21. 37Lé á jɩ́jrà wá sɔ́kʋ́ mà: Nyɔɔ́ kɔ̀ɔ gbakɩ á bhá jrɛ̀ lé á gblúu a, ɔ́mɔ́ á na ká kɛ́zɔ̀ klʋ́ gà.#19.37 A zɛlɩɩ sáà Zaka 12.10.

Á zízìè Zozíi a gàzɛ̀ɛ̀

(Matíe 27.57‑61; Málɩ́kɩ 15.42‑47; Lúkɩ 23.50‑56)

38Wɔlíɛ́ fɩ́ɛ́ lɩ̀à plɩ́ a, dúó ʋ̀ ŋwɔ́ɔ Alimatée a, mɔ̀ɔ a nyɔɔ́ á wlele wá Zɔ̀zɛ́fʋ a, lé ɔ̀ ŋwɔ́ɔ wá sáà Zozíi a kʋjɩ̀nyɔ a, mà cémʋ́ ɔ́ gúle wá Zúfʋnyʋa a cífɩnyʋa kʋ́ a, zúzùòlɩ̀ mʋ́ ɔ́ jɩ́ ɔ́ wá kʋ́. Ɔ́mɔ́ Zɔ̀zɛ́fʋɔ́, ɔ́mɔ́ ɔ̀ mʋ lé ɔ̀ srʋ Pilátɩ mà ɔ nyɛ́ ɔ́ Zozíi a gàzɛ̀ɛ̀. Ɔ́ cí saá a, Pilátɩ nɩ́ mɔ̀ɔ wɔlɩ́ sa à, ɔ́ɔ nyɛ́ ɔ́ lɔ̀. Lé Zɔ̀zɛ́fʋ mʋ ʋ́ gàzɛ̀ɛ̀ sa ka. 39Lé Nikodémʋɔ́ ɔ̀ mʋ wá tányɩ a múó a dɩ́bɩ Zozíi yɛ́ ka a, ɔ́ la nɔ́nʋ́nyokwié á wlele mílɩ a, lé nɔ́nʋ́nyokwi ànɩ̀ɛ̀ ɩ̀ ŋwɔ́ɔ alowɛ́sɩ a, lé ɔ́ bhlábhlalɩ mʋ́, ɩ́ zumole yi kilóoyuo a glɩ̀ gbɩ́ wɛ́ɛ̀. 40Lé áa sɔ́ɔ́ bháʋ́ Zozíi a gàzɛ̀ɛ̀. Á mʋ a, á bhá loku lé á pɩpɩɛ́ lé á bʋ́ɛ́ nɔ́nʋ́kpʋ cémʋ́ Zúfʋnyʋa nie a kúdùkuo lé á zízie áa. 41Mà á kʋ Zozíi kúsuó jɩ̀ a, zalɩdɛ́ɛgbo a múó kʋ ʋ́ gɔ̀, a mnɩ́ kʋ lésuyalʋ, a nɩ́ à zà mɔ̀ɔ nyɔ zízìè. 42Lé Zúfʋnyʋa a nyɔbhleyruó yie ŋnɩ ka, bhè lésuyalʋ mɛ́ ʋ́ gɔ̀ a, ɩ́ ka ŋnɩ́ lé Zɔ̀zɛ́fʋ yà Nikodémʋ sɔ́ zízìèlòò mɔ̀ɔ.

Currently Selected:

Záan 19: NEY

Highlight

Copy