Lúkɩ 8
8
Nyʋaá à jɩ́ɛ́ wá Zozíi kʋ́
1Naa, lé Zozíi bháa ʋ́ Lagɔ a Léyibhlɩɛ́ a Námadìè a nyʋa srʋsrʋ́ɛ́ kʋ́. Bháa yɩ́ lɛ́ dikádɩ̀ɛ̀ fɩ́ɛ́ jɩ̀ lé kà disʋsʋ́ yà bìdí sɔ́ ŋnɩ, ɔ́ plɩ́ɩ ɩ́ lɔ̀fɩ́ɛ́ a mnɩ́ lé ɔ́ srʋ nyʋaá fɩ́ɛ́, ɔ yà ɔ́ kʋjɩ̀nyʋ̀àà kʋ́gbá sɔ́ɔ́ sɔ́, 2mà ŋwná a zùò kʋ a la nyièdɩ, ŋwnáá Zozíi sa nyumozìzi jɩ̀, lé ànàà ɔ́ yalɩma a: Malíi á wlele lɛ́ sáà Madɩlɛ́nɩ a, Zozíi sa wá mɔ́ nyumozìzi a gbàásɔ́ jɩ̀. 3Lóoó Elódʋ a kakalɩ a dɛdɛ̀nyɔ á wlele wá Kuzáa a, ɔ ŋwnɔ́ Zánɩ kʋ á nyièdɩ, lé Suzánɩ yà yígàdà ŋwná àna sɔ́ jɩ́ɛ́ wá Zozíi kʋ́, lé á bhá wá á mɔ̀glʋ̀ á kakalɩ lé á falɛ wá Zozíi yà ɔ́ kʋjɩ̀nyʋ̀àà sɔ́ kʋ́.
Lɛglɩ̀nyɔ a núnúó
(Matíe 13.1‑9; Málɩ́kɩ 4.1‑9)
4Yruú a múó kʋ́, nyʋa kɔ́kɔ́mnɩ́ wlʋ́ a dí a mnɩ́, lé á nynɩlɔ̀ Zozíi gɔ̀ wlú. Mà ámá nyʋa a klʋ́ jɩ̀ Zozíi pá núnúó a múó, 5ɔ́ anɩ́: «Lɛglɩ̀nyɔ a múó mʋ lɛglɩ kà, mà ɔ́ mʋ a, ɔ́ kʋ lɩ́ɛ́ a glɩda, lé lɩ́ ànɩ bhli nyúzɔ kʋ́, lé plɩ́plɩ́nyʋa námnɩlɩɩ́ jɩ̀ lé nimni li ànɩ. 6Ànɩ bhli cɔ́kpalɩ́dʋ̀dʋ a mnɩ́ lé ɩ́ wlʋ́, mà cémʋ́ nyú nɩ́ dʋ̀dʋʋ́ kʋ a, yrʋ́ sií. 7Lɩ́ ànɩ bhli nyníci kpakɩ́ a mnɩ́, ɩ́ wlʋ́ɛ́, bhè nyníci a sɛ́fʋ wlʋ́ɛ́, lé nynícié gbíi wlú. 8Mà lɩ́ ànɩ̀ɛ̀ ɩ̀ bhli náma dʋ̀dʋ̀ɔ̀ a mnɩ́ a, ɩ́ wlʋ́ lé ɩ́ trʋ námasa yʋ́ kɔ́kɔ́mnɩ́.» Zozíi bhɩa kɔ́ɔ̀kʋ́ cícíé zɔ̀ a, ɔ́ɔ pá wɔlɩ́, ɔ́ anɩ́: «Ɔ̀ nɩ̀ kà nyúkwlí ɔ̀ kà nú a, ɔ nú!»
Zozíi sa mɔ̀ɔ lɛglɩ̀nyɔ a núnúó a gba
(Matíe 13.10‑17; Málɩ́kɩ 4.10‑12)
9Bhʋ́ ɔ́ kʋjɩ̀nyʋ̀àà srʋ ɔ́ mà ɔ sa mɔ̀ɔ núnúó a gba. 10Lé ɔ́ srʋ á, ɔ́ anɩ́: «Nyɔ ka lé ɔ pá amɔ Lagɔ a Léyibhlɩɛ́ a dɔ̀, mà à nɩ ŋwɔ́ɔ nyʋa ànàà lɩ̀à a, níní á ka lé a ká á gɔ̀ pá a.
Á yi dʋdʋ̀, a nɩ́ ka kʋ́ yɛ́.
Á yi nyúkwlí pʋ, a nɩ́ ka nú. # 8.10 A zɛlɩɩ sáà Eza 6.9.
11Núnúó a gba ŋwɔ́ɔ mà: Glɩglɩlɩɛ́, Lagɔ̀wɔ̀lɩ̀ɛ̀ ɩ́mɩ́ kʋ̀ʋ. 12Nyʋaá kʋ̀ nyúzɔ̀ɔ̀ gɔ̀ a, ámá ŋwɔ́ɔ nyʋaá à núé Lagɔ̀wɔ̀lɩ̀ɛ̀ lé Dɩ́blʋ̀ɔ̀ yie lé ʋ́ sa à mɩ́ duo kʋ́ a, bhʋ́anɩ nyʋaá nɩ ka Lagɔ a fádùò ka, a nɩ ká ʋ́ neé wlʋ́. 13Cɔ́kpalɩ́dʋ̀dʋ̀ɔ̀ mʋ́ ŋwɔ́ɔ nyʋaá à núé Lagɔ̀wɔ̀lɩ̀ɛ̀ lé ɩ́ ka lɔlɔ kʋ́ a, mà zɔ̀bhɩ̀àdàà a, á Lagɔ̀wɔ̀lɩ̀ɛ̀ nɩ́ ŋwʋ́ sikplií, á ka flɛ́ɛsa Lagɔ a fádùò á, mà a nɩ yɛ́ nyakalɩ tòyipɛ Lagɔ̀wɔ̀lɩ̀ɛ̀ mnɩ́ a, áa wlʋ́lɛ Lagɔ gwá. 14Glɩglɩlɩɛ́ ɩ̀ bhli nyníci kpaká a mnɩ́ a, ɩ́mɩ́ ŋwɔ́ɔ nyʋaá à núé Lagɔ̀wɔ̀lɩ̀ɛ̀, lé zɩkpa zɔ̀ a bhobhoé, mɔ̀ɔ a léyri, mɔ̀ɔ a mɛ́nɩmɛɛ́ sɔ́ gbíé Lagɔ̀wɔ̀lɩ̀ɛ̀ wlú, ɩ́ nie lé ɩ nɩ́ trʋ bhí lé bhíé ká zalɩma. 15Glɩglɩlɩɛ́ ɩ̀ bhli námadʋ̀dʋ̀ɔ̀ mnɩ́ a, ɩ́mɩ́ ŋwɔ́ɔ nyʋaá núé Lagɔ̀wɔ̀lɩ̀ɛ̀ lé à bhlilií námasa kʋ́, lé à ŋwʋ́ɩ́ duo kʋ́ a, bhʋ́anɩ nyʋaá ka kɔ́ɔ̀kɔ́ Lagɔ a fádùò lé á trʋɛ námabhi.
Nápɛ a núnúóó
(Málɩ́kɩ 4.21‑25)
16Nyɔ nɩ́ ŋwʋ́ nápɛ klʋ́, lé ɔ kɛ́ɛ́ pápá wlú gbí, ɔ nɩ́ súleé sáà bɔ̀gɩ zɔ̀, mà zɩkpa a mnɩ́ ɔ́ ŋwʋ́ɛ́ lé nyʋaá pla gbó a, ɛ́ ŋana a kʋ́. 17Bhʋ́ lɩ́ɛ́ fɩ́ɛ́ ɩ̀ zúzùò a, á yɩ́ɩ́ lé wɔlɩɛ́ ɩ̀ nilo koti kʋ́ a, ɩ́ flʋɛ zɔ̀. 18A nɩ pʋ nyúkwlí a, a mányɩ, mà ɔ̀ nɩ̀ kà a, á yio sɔ́kʋ́ nyɛ́, ɩ́zà ɔ̀ nɩ́ ka a, tòyipɛɛ́ ɔ́ ka a, á yio mɛ́ gɔ̀ bhá.»
Zozíi ɔ nɛ́ lé ɔ nɩ́ayúó
(Matíe 12.46‑50; Málɩ́kɩ 3.31‑35)
19Tányɩ a múó Zozíi ɔ nɛ́, lé ɔ nɩ́ayúó sɔ́ yio gɔ̀, mà cémʋ́ nyʋa a zumole kʋ a, a nɩ́ míi lé a kɔ́ɔ́ gɔ̀ ŋnɩ. 20Bhʋ́ á cíeloó nyʋa gɔ̀, ɩ́mɩ́ ŋwɔ́ɔ mà: «Ɩ̀ nɛ́ yà ɩ̀ nɩ́ayúó sɔ́ kʋ ɔ̀ jrùkʋ́, á anɩ́ a ká mɔ̀ yɛ́.» 21Zozíi anɩ́: «Nyʋa à pʋɛ Lagɔ̀wɔ̀lɩ̀ɛ̀ nyúkwlí lé à nie ɩ sá a, ámá ŋwɔ́ɔ ɩ nɛ́ yà ɩ nɩ́ayúó sɔ́.»
Zozíi gáa vʋ̀vɔ̀lʋ kʋ́ lé ʋ́ dúo
(Matíe 8.23‑27; Málɩ́kɩ 4.35‑41)
22Yruú a múó, Zozíi yà ɔ́ kʋjɩ̀nyʋ̀àà sɔ́ pla gɔ́lʋ́ lé ɔ́ srʋ á mà: «A yi à kà nyíé a bɩ́ díi!» Lé á cíe sá lé á mʋ. 23Mà á kʋ nyí klʋ́ lé yrá kla Zozíi lé ɔ́ ŋwɔ́ɔ. Mà lúlúó à yie a, á yíe gɔ́lʋ́ɔ́ nyú kʋ́, kʋjɩ̀nyʋ̀àà ya jɛ̀mɩ̀. 24Bhʋ́ á ŋnɩ ɔ́ gɔ̀, lé á galɔ̀: «Másɛɛ̀, Másɛɛ̀, à yà tuo!» Lé Zozíi wlʋ́ yrá lé ɔ́ gáa vʋ̀vɔ̀lʋ̀ɔ̀ yà lákwʋɛ́ sɔ́ kʋ́, fɩɩ́n bhè ɩ́ mʋ dʋ̀dʋ kʋ́, lé nyíé a klʋ́ plɩ́ diin. 25Lé ɔ́ yrá kʋjɩ̀nyʋ̀àà mà: «Dɛ́gbá a ŋwʋ́ aa ditátɩ́ɛ́ à?» Ŋanɩmɛ yi la kʋ́, lé neé mnaá, lé á yráyra á nyoku mà: «Nyɩ́kpɔcegbá lɛ̀ bhè ɔ̀ cíle vʋ̀vɔ̀lʋ yà nyíé sɔ́ gɔ̀, lé ɩ́ ŋwʋ́ɛ́ ʋ́ a?»
Zozíi sa nyɔ nyumozìzi kɔ́kɔ́mnɩ́ jɩ̀
(Matíe 8.28‑34; Málɩ́kɩ 5.1‑20)
26Zozíi yà ɔ́ kʋjɩ̀nyʋ̀àà sɔ́ dí nyíé lé á ŋnɩ Zelazenɩ́nyʋa a bhlé. Mà a bhlɩ́ɛ́ yà Galiléebhlɩɛ́ sɔ́ mɛ́mɛ gɔ̀, nyíé dílaá mʋ́. 27Mà tányɩɛ́ mʋ́ a gɔ́lʋ́ɔ́ pɛ́ kɔ́ɔ̀kʋ́ lé Zozíi kwlíi a, dú a nyɔ a múó yio nyúzɔ kʋ́. Nyɔɔ́, nyumozìzi kʋ̀ ɔ̀ jɩ̀, bháa jɩ̀ lé ɔ nɩ́ pla kóti mʋ́ a, ɩ́ ya gwlɛɛ̀. Ɔ nɩ́ pʋ́ʋ sáà ghlɩ a mnɩ́, lésigwlè mʋ́ ɔ́ pʋ́lɛ. 28Mà ɔ́ yɩ́ bhli kɔ́ɔ̀kʋ́ Zozíi jɩ̀ a, ɔ́ bhɩa wɔlɩ́, lé ɔ́ blì lé ɔ́ bhliloó drɩ̀, ɔ́ anɩ́: «Wɔlɩ́ gbá ɩ̀ yrálɛ mɔ́ɔ mʋ́ a Zozíi, Lagɔ̀ɔ̀ ʋ̀ zi kʋ́ a Yuwliyʋʋ̀? Ɩ́bhìè, ɩ́ sra mɔ̀ wlú, nàa yɩa mɔ́ɔ kwlʋ́ àyé!» 29Zozíi srʋ nyumozùzùò mà ʋ wlʋ́ nyɔɔ́ jɩ̀. Nyumozùzùò ya nyɔɔ́ jɩ̀ gwlɛ, cɩ́ɩ á bhá lé á gʋa ɔ́ sɩɛ́, lé á ŋwʋ́ ɔ́ kpó, mà sɩ́tɛ̀ ɩ́ kʋ bhè ɔ́ díé cɩ́ɛ lé ɔ́ wlawla kpóó, lé nyumozìzìè fɔɔ́ bhlɩ́ɛ́ mnɩ́ lɛ́ nɩ́ wlʋ́ʋ a.
30Zozíi yrɔ́ɔ́ mà: «Nàa ŋnɩ́ à?» Ɔ́ anɩ́: «Ná ŋnɩ́ ŋwɔ́ɔ, à nɩ́ bɛ́.» Nyumozìzìè kʋ̀ ɔ jɩ̀ a, ɩ́ zù, ɩ́zà ɔ́ anɩ́ à nɩ́ bɛ́. 31Lé nyumozìzìè sra Zozíi wlú: «Ɩ́bhìè nàa fa àmɔ̀ nyakalɩgbàzrʋ̀ɔ̀ ʋ̀ nɩ́ bhlʋ́ʋdà ka a, mnɩ́ àyé!» 32Bhè gékpíbhuzàlɩ̀kpa kʋ ɔ̀ kíké wlú á mʋ́mɔ lelilɩ. Nyumozìzìè bhibhie Zozíi: «Ɩ́bhìè nyɛ́ àmɔ̀ nyúzɔ bhè à mʋ bhuzàlɩ̀kpàkádàà à kʋ̀ ɔ̀ kíké wlú a mnɩ́!» Lé Zozíi nyɩ́ɩ́ nyúzɔ lé ɩ́ mʋ mɔ̀ɔmɔ̀. 33Ɩ́ nɩ lé nyumozìzìè wlʋ́ nyɔɔ́ jɩ̀ lé ɩ́ pla bhuzàlɩ̀kpàà a mnɩ́. Nyumozìzìè pla kɔ́ɔ̀kʋ́ bhuzàlɩ̀ɛ̀ mʋ́ a, sóo mʋ́ ɩ́ kwlíi kíkéé lé ɩ́ kɔ́sɔ nyíé, bhuzàla nɩ́ kʋ́ ji ɩ́ lɔ̀fɩ́ɛ́ kú.
34Bhuzàlɩ̀ɛ̀ a dɛdɛ̀nyʋ̀àà yɛ́ wɔlɩɛ́ plɩ́ a, á gú lé á fa wɔlɩ́ɛ́ dú yà bìdíé fɩ́ɛ́ sɔ́ kʋ́. 35Ɩ́ nɩ lé nyʋa yi dʋdʋ̀ kà. Á yi a, nyɔɔ́ nyumozìzìè wlʋ́ jɩ̀ a, ɔ yíjɩ̀ ya gbɩ, ɔ́ ya yrʋ́ʋ̀ ɔ́ bɔ́ɔ Zozíi a bhɩɩ́ zɔ̀; wɔlɩ́ɛ́ la nyʋaá fɩ́ɛ́ à yi a, ŋanɩmɛ kʋ́. 36Nyʋaá à yɛ́ wɔlɩ́ɛ́ a dá a, lé cémʋ́ nyumozìzìè wlʋ́ nyɔɔ́ jɩ̀ a, á salɩɩ́ nyʋa ànàà à yi a, dí kʋ́. 37Ɩ́ ka ŋnɩ́ lé Zelazenɩ́bhlɩɛ́ a mnɩ́ a nyʋaá fɩ́ɛ́, ŋanɩmɛ yilaá kʋ́, ɩ́ ka ŋnɩ́ lé á srʋ Zozíi mà ɔ wlʋ́ a bhlɩ́ a mnɩ́. Lé Zozíi pla gɔ́lʋ́ lé ɔ́ yrɩ́bhà. 38Mà nyɔɔ́ nyumozìzìè wlʋ́ jɩ̀ a, Zozíi na ká mʋ a, ɔ́ srʋ ɔ́ mà ɔ yɔ̀sɔ́ ká mʋ, mà Zozíi nɩ́ ŋwnʋ́ʋ̀ ɔ́ srʋ ɔ́ mà: 39«Yrɩ́bha, mʋ nà nyʋa nyièdɩ, bhè cémʋ́ Lagɔ nɩ mɔ̀ a, kà a dí saà!» Ɔ́ srʋ ɔ́ a, nyɔɔ́ mʋ lé ɔ́ bhli dúó, lé ɔ́ sa mɔ̀ɔ a nyʋa dí wɔlɩ́ɛ́ Zozíi nɩ ɔ́ zà a.
Zozíi yalɩma ŋwnɔ́ lé ɔ́ galà Zayilúsʋ a ŋnɩ́keyʋ
(Matíe 9.18‑26; Málɩ́kɩ 5.21‑43)
40Zozíi dí nyíé a bɩ́ a, nyʋaá à glɔ́ɔ la a, á yió nyúzɔ kʋ́. 41Lé nyɔ a múó ŋnɩ ɔ́ gɔ̀, ɔ́mɔ́ á wlele Zayilúsʋ, zúfʋcɛcɩwlʋɔ́ a mnɩ́ a kámanyɔ kʋ̀ʋ. Ɔ́ bhli Zozíi a bhɔ kʋ́, lé ɔ́ srʋ ɔ́ mà ɔ yi ɔ gbó. 42Nyɔ a ŋnɩ́keyʋɔ́ a múó cocoó ɔ́ ka a, ɔ́mɔ́ ɔ̀ kúloó wlɩɩ́, ɔ́ ka lɩkpɩ a kʋ́gbá sɔ́.
Zozíi kʋ nyɔ a gbó a nyúzɔ kʋ́, lé nyʋa bhúbhuoloó, á loluo nyobhuo kʋ́. 43Mà ŋwnɔ́ a múó kʋ nyʋaá nyièdɩ lé lɩkpɩ kʋ́gbá lɩkpɩ sɔ́ lɛ̀ lé dòlú wlʋ́ɔ́ gɔ̀. Ɔ́ ya moníi sa àààn ɔ́ ya sɩa, ɔ ya ɔ́ kakalɩɛ́ fɩ́ɛ́ nyʋa wlɩ pɛ́lʋ́ ŋwʋ́ ɔ́ ká bhlɛ́ɛ yalɩma, mà ɔ nɩ́ yalɩma. 44Ɔ́mɔ́ ŋwnɔ́ɔ́ la Zozíi bɩ́, lé ɔ́ gbɔ́ dɩgàsa ɔ kotuó a nimnuó, mà ɔ́ gbʋ́ʋ́ kɔ́ɔ̀kʋ́ a, dòlúó wlʋ́ ɔ́ la gɔ̀ a, ʋ́ tɔ́pʋ. 45Lé Zozíi yrá: «Ɔ̀ gbɔ́ mɔ́ɔ áa?» Mà ɔ̀ nɩ̀ kʋ̀ a, ɔ́ɔ sa ɔ nyoku gbʋ́ wlú, bhʋ́ Pɩ́ɛ́lɩ sané: «Másɛɛ̀, bhè nyʋa zù, lé á ya mɔ̀ bhúbhuo!» 46Zozíi anɩ́: «Ná anɩ́, nyɔ ya mɔ́ɔ gbɔ́, fɩ́ wlʋ́ mɔ́ɔ mʋ́.» 47Mà ŋwnɔ́ɔ́ yɩbhlɩ Zozíi a yɩ́ a mnɩ́ a wɔlɩ́ a, ŋanɩmɛ yilo kʋ́, kpɩkpɩ tɩtɛlɔɔ́, lé ɔ́ yi lé ɔ́ bhli Zozíi drɩ̀, lé nyʋaá fɩ́ɛ́ a klʋ́ jɩ̀, wɔlɩ́ɛ́ kà ŋnɩ́ lé ɔ́ gbɔ́ɔ a, bhè cémʋ́ ɔ́ ya kakamnɩ́lɛ́ lɩ̀à yalɩma a, ɔ́ sa mɔ̀ɔ ɩ́ lɔ̀fɩ́ɛ́. 48Ɔ́ bhɩa zɔ̀ a, Zozíi srʋ ɔ́ mà: «Ná yʋ́ʋ̀, mɔ̀ mɔ̀glʋ̀ nàa fádùò ya mɔ̀ pʋ́a. Plɩ́ kà mʋ!»
49Zozíi kʋ cída lé nyɔ a múó wlʋ́ zúfʋcɛcɩwlʋɔ́ a kámanyɔ a gbó lé ɔ́ yio srʋ ka mà: «Nàa bhɩa flɛ́ɛsa Másɛɛ̀ kwlɩ́, mà nà ŋnɩ́keyʋɔ́ ya kú!» 50Mà Zozíi nú wɔlɩ́ɛ́ nyɔɔ́ cí a, ɔ́ srʋ Zayilúsʋ mà: «Ŋanɩmɛ ná bhlá mɔ̀, bhá fádùò mà nà yʋ́ɔ́ yi ʋ́ neé wlʋ́.»
51Zozíi ŋnɩ Zayilúsʋ a gbó a, ɔ́ wle Pɩ́ɛ́lɩ Záan lé Zákɩ lé ɔ wle ŋnɩ́keyʋɔ́ ɔ tʋ́ lé ɔ nɛ́ wlʋ a mnɩ́. 52Mà nyʋaá fɩ́ɛ́ kʋ̀ ʋ́ a, á ŋwíé, á bhɔtɔ yʋ́ɔ́ a zà. Lé Zozíi srʋ á mà: «A ná ŋwí mà ɔ nɩ́ kú, ɔ́ɔ ŋwɔ́mɛ!» 53Tányɩɛ́ mʋ́ ɔ́ cí sɩ́tɛ̀ a, nyʋa yì saá mà yʋ́ɔ́ ya kú a, áa bháa ʋ́ ɔ́ nyɩalɛ kʋ́.
54Lé Zozíi pla wlʋɔ́ a mnɩ́ lé ɔ́ bhli ŋnɩ́keyʋɔ́ a sɔ́ kʋ́ lé ɔ́ bhá niwɔlɩ kʋ́ lé ɔ́ wleó ɔ́ anɩ́: «Ná yʋ́ʋ, soglù!» 55Lé yʋ́ɔ́ la nyobhuo bɩ́, lé ɔ́ soglù. Lé Zozíi srʋ ɔ nɛ́ yà ɔ tʋ́ sɔ́ mà a nyɛ́ yʋ́ɔ́ lelilɩ ɔ́ ká li. 56Nee mna ɔ tinyʋa lé Zozíi nyɛ́ á tába: «Wɔlíɛ́ fɩ́ɛ́ ɩ̀ nilo lɛ́ dɛ́ a, a ná srʋ ɩ́ nyɔ!»
Currently Selected:
Lúkɩ 8: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
Lúkɩ 8
8
Nyʋaá à jɩ́ɛ́ wá Zozíi kʋ́
1Naa, lé Zozíi bháa ʋ́ Lagɔ a Léyibhlɩɛ́ a Námadìè a nyʋa srʋsrʋ́ɛ́ kʋ́. Bháa yɩ́ lɛ́ dikádɩ̀ɛ̀ fɩ́ɛ́ jɩ̀ lé kà disʋsʋ́ yà bìdí sɔ́ ŋnɩ, ɔ́ plɩ́ɩ ɩ́ lɔ̀fɩ́ɛ́ a mnɩ́ lé ɔ́ srʋ nyʋaá fɩ́ɛ́, ɔ yà ɔ́ kʋjɩ̀nyʋ̀àà kʋ́gbá sɔ́ɔ́ sɔ́, 2mà ŋwná a zùò kʋ a la nyièdɩ, ŋwnáá Zozíi sa nyumozìzi jɩ̀, lé ànàà ɔ́ yalɩma a: Malíi á wlele lɛ́ sáà Madɩlɛ́nɩ a, Zozíi sa wá mɔ́ nyumozìzi a gbàásɔ́ jɩ̀. 3Lóoó Elódʋ a kakalɩ a dɛdɛ̀nyɔ á wlele wá Kuzáa a, ɔ ŋwnɔ́ Zánɩ kʋ á nyièdɩ, lé Suzánɩ yà yígàdà ŋwná àna sɔ́ jɩ́ɛ́ wá Zozíi kʋ́, lé á bhá wá á mɔ̀glʋ̀ á kakalɩ lé á falɛ wá Zozíi yà ɔ́ kʋjɩ̀nyʋ̀àà sɔ́ kʋ́.
Lɛglɩ̀nyɔ a núnúó
(Matíe 13.1‑9; Málɩ́kɩ 4.1‑9)
4Yruú a múó kʋ́, nyʋa kɔ́kɔ́mnɩ́ wlʋ́ a dí a mnɩ́, lé á nynɩlɔ̀ Zozíi gɔ̀ wlú. Mà ámá nyʋa a klʋ́ jɩ̀ Zozíi pá núnúó a múó, 5ɔ́ anɩ́: «Lɛglɩ̀nyɔ a múó mʋ lɛglɩ kà, mà ɔ́ mʋ a, ɔ́ kʋ lɩ́ɛ́ a glɩda, lé lɩ́ ànɩ bhli nyúzɔ kʋ́, lé plɩ́plɩ́nyʋa námnɩlɩɩ́ jɩ̀ lé nimni li ànɩ. 6Ànɩ bhli cɔ́kpalɩ́dʋ̀dʋ a mnɩ́ lé ɩ́ wlʋ́, mà cémʋ́ nyú nɩ́ dʋ̀dʋʋ́ kʋ a, yrʋ́ sií. 7Lɩ́ ànɩ bhli nyníci kpakɩ́ a mnɩ́, ɩ́ wlʋ́ɛ́, bhè nyníci a sɛ́fʋ wlʋ́ɛ́, lé nynícié gbíi wlú. 8Mà lɩ́ ànɩ̀ɛ̀ ɩ̀ bhli náma dʋ̀dʋ̀ɔ̀ a mnɩ́ a, ɩ́ wlʋ́ lé ɩ́ trʋ námasa yʋ́ kɔ́kɔ́mnɩ́.» Zozíi bhɩa kɔ́ɔ̀kʋ́ cícíé zɔ̀ a, ɔ́ɔ pá wɔlɩ́, ɔ́ anɩ́: «Ɔ̀ nɩ̀ kà nyúkwlí ɔ̀ kà nú a, ɔ nú!»
Zozíi sa mɔ̀ɔ lɛglɩ̀nyɔ a núnúó a gba
(Matíe 13.10‑17; Málɩ́kɩ 4.10‑12)
9Bhʋ́ ɔ́ kʋjɩ̀nyʋ̀àà srʋ ɔ́ mà ɔ sa mɔ̀ɔ núnúó a gba. 10Lé ɔ́ srʋ á, ɔ́ anɩ́: «Nyɔ ka lé ɔ pá amɔ Lagɔ a Léyibhlɩɛ́ a dɔ̀, mà à nɩ ŋwɔ́ɔ nyʋa ànàà lɩ̀à a, níní á ka lé a ká á gɔ̀ pá a.
Á yi dʋdʋ̀, a nɩ́ ka kʋ́ yɛ́.
Á yi nyúkwlí pʋ, a nɩ́ ka nú. # 8.10 A zɛlɩɩ sáà Eza 6.9.
11Núnúó a gba ŋwɔ́ɔ mà: Glɩglɩlɩɛ́, Lagɔ̀wɔ̀lɩ̀ɛ̀ ɩ́mɩ́ kʋ̀ʋ. 12Nyʋaá kʋ̀ nyúzɔ̀ɔ̀ gɔ̀ a, ámá ŋwɔ́ɔ nyʋaá à núé Lagɔ̀wɔ̀lɩ̀ɛ̀ lé Dɩ́blʋ̀ɔ̀ yie lé ʋ́ sa à mɩ́ duo kʋ́ a, bhʋ́anɩ nyʋaá nɩ ka Lagɔ a fádùò ka, a nɩ ká ʋ́ neé wlʋ́. 13Cɔ́kpalɩ́dʋ̀dʋ̀ɔ̀ mʋ́ ŋwɔ́ɔ nyʋaá à núé Lagɔ̀wɔ̀lɩ̀ɛ̀ lé ɩ́ ka lɔlɔ kʋ́ a, mà zɔ̀bhɩ̀àdàà a, á Lagɔ̀wɔ̀lɩ̀ɛ̀ nɩ́ ŋwʋ́ sikplií, á ka flɛ́ɛsa Lagɔ a fádùò á, mà a nɩ yɛ́ nyakalɩ tòyipɛ Lagɔ̀wɔ̀lɩ̀ɛ̀ mnɩ́ a, áa wlʋ́lɛ Lagɔ gwá. 14Glɩglɩlɩɛ́ ɩ̀ bhli nyníci kpaká a mnɩ́ a, ɩ́mɩ́ ŋwɔ́ɔ nyʋaá à núé Lagɔ̀wɔ̀lɩ̀ɛ̀, lé zɩkpa zɔ̀ a bhobhoé, mɔ̀ɔ a léyri, mɔ̀ɔ a mɛ́nɩmɛɛ́ sɔ́ gbíé Lagɔ̀wɔ̀lɩ̀ɛ̀ wlú, ɩ́ nie lé ɩ nɩ́ trʋ bhí lé bhíé ká zalɩma. 15Glɩglɩlɩɛ́ ɩ̀ bhli námadʋ̀dʋ̀ɔ̀ mnɩ́ a, ɩ́mɩ́ ŋwɔ́ɔ nyʋaá núé Lagɔ̀wɔ̀lɩ̀ɛ̀ lé à bhlilií námasa kʋ́, lé à ŋwʋ́ɩ́ duo kʋ́ a, bhʋ́anɩ nyʋaá ka kɔ́ɔ̀kɔ́ Lagɔ a fádùò lé á trʋɛ námabhi.
Nápɛ a núnúóó
(Málɩ́kɩ 4.21‑25)
16Nyɔ nɩ́ ŋwʋ́ nápɛ klʋ́, lé ɔ kɛ́ɛ́ pápá wlú gbí, ɔ nɩ́ súleé sáà bɔ̀gɩ zɔ̀, mà zɩkpa a mnɩ́ ɔ́ ŋwʋ́ɛ́ lé nyʋaá pla gbó a, ɛ́ ŋana a kʋ́. 17Bhʋ́ lɩ́ɛ́ fɩ́ɛ́ ɩ̀ zúzùò a, á yɩ́ɩ́ lé wɔlɩɛ́ ɩ̀ nilo koti kʋ́ a, ɩ́ flʋɛ zɔ̀. 18A nɩ pʋ nyúkwlí a, a mányɩ, mà ɔ̀ nɩ̀ kà a, á yio sɔ́kʋ́ nyɛ́, ɩ́zà ɔ̀ nɩ́ ka a, tòyipɛɛ́ ɔ́ ka a, á yio mɛ́ gɔ̀ bhá.»
Zozíi ɔ nɛ́ lé ɔ nɩ́ayúó
(Matíe 12.46‑50; Málɩ́kɩ 3.31‑35)
19Tányɩ a múó Zozíi ɔ nɛ́, lé ɔ nɩ́ayúó sɔ́ yio gɔ̀, mà cémʋ́ nyʋa a zumole kʋ a, a nɩ́ míi lé a kɔ́ɔ́ gɔ̀ ŋnɩ. 20Bhʋ́ á cíeloó nyʋa gɔ̀, ɩ́mɩ́ ŋwɔ́ɔ mà: «Ɩ̀ nɛ́ yà ɩ̀ nɩ́ayúó sɔ́ kʋ ɔ̀ jrùkʋ́, á anɩ́ a ká mɔ̀ yɛ́.» 21Zozíi anɩ́: «Nyʋa à pʋɛ Lagɔ̀wɔ̀lɩ̀ɛ̀ nyúkwlí lé à nie ɩ sá a, ámá ŋwɔ́ɔ ɩ nɛ́ yà ɩ nɩ́ayúó sɔ́.»
Zozíi gáa vʋ̀vɔ̀lʋ kʋ́ lé ʋ́ dúo
(Matíe 8.23‑27; Málɩ́kɩ 4.35‑41)
22Yruú a múó, Zozíi yà ɔ́ kʋjɩ̀nyʋ̀àà sɔ́ pla gɔ́lʋ́ lé ɔ́ srʋ á mà: «A yi à kà nyíé a bɩ́ díi!» Lé á cíe sá lé á mʋ. 23Mà á kʋ nyí klʋ́ lé yrá kla Zozíi lé ɔ́ ŋwɔ́ɔ. Mà lúlúó à yie a, á yíe gɔ́lʋ́ɔ́ nyú kʋ́, kʋjɩ̀nyʋ̀àà ya jɛ̀mɩ̀. 24Bhʋ́ á ŋnɩ ɔ́ gɔ̀, lé á galɔ̀: «Másɛɛ̀, Másɛɛ̀, à yà tuo!» Lé Zozíi wlʋ́ yrá lé ɔ́ gáa vʋ̀vɔ̀lʋ̀ɔ̀ yà lákwʋɛ́ sɔ́ kʋ́, fɩɩ́n bhè ɩ́ mʋ dʋ̀dʋ kʋ́, lé nyíé a klʋ́ plɩ́ diin. 25Lé ɔ́ yrá kʋjɩ̀nyʋ̀àà mà: «Dɛ́gbá a ŋwʋ́ aa ditátɩ́ɛ́ à?» Ŋanɩmɛ yi la kʋ́, lé neé mnaá, lé á yráyra á nyoku mà: «Nyɩ́kpɔcegbá lɛ̀ bhè ɔ̀ cíle vʋ̀vɔ̀lʋ yà nyíé sɔ́ gɔ̀, lé ɩ́ ŋwʋ́ɛ́ ʋ́ a?»
Zozíi sa nyɔ nyumozìzi kɔ́kɔ́mnɩ́ jɩ̀
(Matíe 8.28‑34; Málɩ́kɩ 5.1‑20)
26Zozíi yà ɔ́ kʋjɩ̀nyʋ̀àà sɔ́ dí nyíé lé á ŋnɩ Zelazenɩ́nyʋa a bhlé. Mà a bhlɩ́ɛ́ yà Galiléebhlɩɛ́ sɔ́ mɛ́mɛ gɔ̀, nyíé dílaá mʋ́. 27Mà tányɩɛ́ mʋ́ a gɔ́lʋ́ɔ́ pɛ́ kɔ́ɔ̀kʋ́ lé Zozíi kwlíi a, dú a nyɔ a múó yio nyúzɔ kʋ́. Nyɔɔ́, nyumozìzi kʋ̀ ɔ̀ jɩ̀, bháa jɩ̀ lé ɔ nɩ́ pla kóti mʋ́ a, ɩ́ ya gwlɛɛ̀. Ɔ nɩ́ pʋ́ʋ sáà ghlɩ a mnɩ́, lésigwlè mʋ́ ɔ́ pʋ́lɛ. 28Mà ɔ́ yɩ́ bhli kɔ́ɔ̀kʋ́ Zozíi jɩ̀ a, ɔ́ bhɩa wɔlɩ́, lé ɔ́ blì lé ɔ́ bhliloó drɩ̀, ɔ́ anɩ́: «Wɔlɩ́ gbá ɩ̀ yrálɛ mɔ́ɔ mʋ́ a Zozíi, Lagɔ̀ɔ̀ ʋ̀ zi kʋ́ a Yuwliyʋʋ̀? Ɩ́bhìè, ɩ́ sra mɔ̀ wlú, nàa yɩa mɔ́ɔ kwlʋ́ àyé!» 29Zozíi srʋ nyumozùzùò mà ʋ wlʋ́ nyɔɔ́ jɩ̀. Nyumozùzùò ya nyɔɔ́ jɩ̀ gwlɛ, cɩ́ɩ á bhá lé á gʋa ɔ́ sɩɛ́, lé á ŋwʋ́ ɔ́ kpó, mà sɩ́tɛ̀ ɩ́ kʋ bhè ɔ́ díé cɩ́ɛ lé ɔ́ wlawla kpóó, lé nyumozìzìè fɔɔ́ bhlɩ́ɛ́ mnɩ́ lɛ́ nɩ́ wlʋ́ʋ a.
30Zozíi yrɔ́ɔ́ mà: «Nàa ŋnɩ́ à?» Ɔ́ anɩ́: «Ná ŋnɩ́ ŋwɔ́ɔ, à nɩ́ bɛ́.» Nyumozìzìè kʋ̀ ɔ jɩ̀ a, ɩ́ zù, ɩ́zà ɔ́ anɩ́ à nɩ́ bɛ́. 31Lé nyumozìzìè sra Zozíi wlú: «Ɩ́bhìè nàa fa àmɔ̀ nyakalɩgbàzrʋ̀ɔ̀ ʋ̀ nɩ́ bhlʋ́ʋdà ka a, mnɩ́ àyé!» 32Bhè gékpíbhuzàlɩ̀kpa kʋ ɔ̀ kíké wlú á mʋ́mɔ lelilɩ. Nyumozìzìè bhibhie Zozíi: «Ɩ́bhìè nyɛ́ àmɔ̀ nyúzɔ bhè à mʋ bhuzàlɩ̀kpàkádàà à kʋ̀ ɔ̀ kíké wlú a mnɩ́!» Lé Zozíi nyɩ́ɩ́ nyúzɔ lé ɩ́ mʋ mɔ̀ɔmɔ̀. 33Ɩ́ nɩ lé nyumozìzìè wlʋ́ nyɔɔ́ jɩ̀ lé ɩ́ pla bhuzàlɩ̀kpàà a mnɩ́. Nyumozìzìè pla kɔ́ɔ̀kʋ́ bhuzàlɩ̀ɛ̀ mʋ́ a, sóo mʋ́ ɩ́ kwlíi kíkéé lé ɩ́ kɔ́sɔ nyíé, bhuzàla nɩ́ kʋ́ ji ɩ́ lɔ̀fɩ́ɛ́ kú.
34Bhuzàlɩ̀ɛ̀ a dɛdɛ̀nyʋ̀àà yɛ́ wɔlɩɛ́ plɩ́ a, á gú lé á fa wɔlɩ́ɛ́ dú yà bìdíé fɩ́ɛ́ sɔ́ kʋ́. 35Ɩ́ nɩ lé nyʋa yi dʋdʋ̀ kà. Á yi a, nyɔɔ́ nyumozìzìè wlʋ́ jɩ̀ a, ɔ yíjɩ̀ ya gbɩ, ɔ́ ya yrʋ́ʋ̀ ɔ́ bɔ́ɔ Zozíi a bhɩɩ́ zɔ̀; wɔlɩ́ɛ́ la nyʋaá fɩ́ɛ́ à yi a, ŋanɩmɛ kʋ́. 36Nyʋaá à yɛ́ wɔlɩ́ɛ́ a dá a, lé cémʋ́ nyumozìzìè wlʋ́ nyɔɔ́ jɩ̀ a, á salɩɩ́ nyʋa ànàà à yi a, dí kʋ́. 37Ɩ́ ka ŋnɩ́ lé Zelazenɩ́bhlɩɛ́ a mnɩ́ a nyʋaá fɩ́ɛ́, ŋanɩmɛ yilaá kʋ́, ɩ́ ka ŋnɩ́ lé á srʋ Zozíi mà ɔ wlʋ́ a bhlɩ́ a mnɩ́. Lé Zozíi pla gɔ́lʋ́ lé ɔ́ yrɩ́bhà. 38Mà nyɔɔ́ nyumozìzìè wlʋ́ jɩ̀ a, Zozíi na ká mʋ a, ɔ́ srʋ ɔ́ mà ɔ yɔ̀sɔ́ ká mʋ, mà Zozíi nɩ́ ŋwnʋ́ʋ̀ ɔ́ srʋ ɔ́ mà: 39«Yrɩ́bha, mʋ nà nyʋa nyièdɩ, bhè cémʋ́ Lagɔ nɩ mɔ̀ a, kà a dí saà!» Ɔ́ srʋ ɔ́ a, nyɔɔ́ mʋ lé ɔ́ bhli dúó, lé ɔ́ sa mɔ̀ɔ a nyʋa dí wɔlɩ́ɛ́ Zozíi nɩ ɔ́ zà a.
Zozíi yalɩma ŋwnɔ́ lé ɔ́ galà Zayilúsʋ a ŋnɩ́keyʋ
(Matíe 9.18‑26; Málɩ́kɩ 5.21‑43)
40Zozíi dí nyíé a bɩ́ a, nyʋaá à glɔ́ɔ la a, á yió nyúzɔ kʋ́. 41Lé nyɔ a múó ŋnɩ ɔ́ gɔ̀, ɔ́mɔ́ á wlele Zayilúsʋ, zúfʋcɛcɩwlʋɔ́ a mnɩ́ a kámanyɔ kʋ̀ʋ. Ɔ́ bhli Zozíi a bhɔ kʋ́, lé ɔ́ srʋ ɔ́ mà ɔ yi ɔ gbó. 42Nyɔ a ŋnɩ́keyʋɔ́ a múó cocoó ɔ́ ka a, ɔ́mɔ́ ɔ̀ kúloó wlɩɩ́, ɔ́ ka lɩkpɩ a kʋ́gbá sɔ́.
Zozíi kʋ nyɔ a gbó a nyúzɔ kʋ́, lé nyʋa bhúbhuoloó, á loluo nyobhuo kʋ́. 43Mà ŋwnɔ́ a múó kʋ nyʋaá nyièdɩ lé lɩkpɩ kʋ́gbá lɩkpɩ sɔ́ lɛ̀ lé dòlú wlʋ́ɔ́ gɔ̀. Ɔ́ ya moníi sa àààn ɔ́ ya sɩa, ɔ ya ɔ́ kakalɩɛ́ fɩ́ɛ́ nyʋa wlɩ pɛ́lʋ́ ŋwʋ́ ɔ́ ká bhlɛ́ɛ yalɩma, mà ɔ nɩ́ yalɩma. 44Ɔ́mɔ́ ŋwnɔ́ɔ́ la Zozíi bɩ́, lé ɔ́ gbɔ́ dɩgàsa ɔ kotuó a nimnuó, mà ɔ́ gbʋ́ʋ́ kɔ́ɔ̀kʋ́ a, dòlúó wlʋ́ ɔ́ la gɔ̀ a, ʋ́ tɔ́pʋ. 45Lé Zozíi yrá: «Ɔ̀ gbɔ́ mɔ́ɔ áa?» Mà ɔ̀ nɩ̀ kʋ̀ a, ɔ́ɔ sa ɔ nyoku gbʋ́ wlú, bhʋ́ Pɩ́ɛ́lɩ sané: «Másɛɛ̀, bhè nyʋa zù, lé á ya mɔ̀ bhúbhuo!» 46Zozíi anɩ́: «Ná anɩ́, nyɔ ya mɔ́ɔ gbɔ́, fɩ́ wlʋ́ mɔ́ɔ mʋ́.» 47Mà ŋwnɔ́ɔ́ yɩbhlɩ Zozíi a yɩ́ a mnɩ́ a wɔlɩ́ a, ŋanɩmɛ yilo kʋ́, kpɩkpɩ tɩtɛlɔɔ́, lé ɔ́ yi lé ɔ́ bhli Zozíi drɩ̀, lé nyʋaá fɩ́ɛ́ a klʋ́ jɩ̀, wɔlɩ́ɛ́ kà ŋnɩ́ lé ɔ́ gbɔ́ɔ a, bhè cémʋ́ ɔ́ ya kakamnɩ́lɛ́ lɩ̀à yalɩma a, ɔ́ sa mɔ̀ɔ ɩ́ lɔ̀fɩ́ɛ́. 48Ɔ́ bhɩa zɔ̀ a, Zozíi srʋ ɔ́ mà: «Ná yʋ́ʋ̀, mɔ̀ mɔ̀glʋ̀ nàa fádùò ya mɔ̀ pʋ́a. Plɩ́ kà mʋ!»
49Zozíi kʋ cída lé nyɔ a múó wlʋ́ zúfʋcɛcɩwlʋɔ́ a kámanyɔ a gbó lé ɔ́ yio srʋ ka mà: «Nàa bhɩa flɛ́ɛsa Másɛɛ̀ kwlɩ́, mà nà ŋnɩ́keyʋɔ́ ya kú!» 50Mà Zozíi nú wɔlɩ́ɛ́ nyɔɔ́ cí a, ɔ́ srʋ Zayilúsʋ mà: «Ŋanɩmɛ ná bhlá mɔ̀, bhá fádùò mà nà yʋ́ɔ́ yi ʋ́ neé wlʋ́.»
51Zozíi ŋnɩ Zayilúsʋ a gbó a, ɔ́ wle Pɩ́ɛ́lɩ Záan lé Zákɩ lé ɔ wle ŋnɩ́keyʋɔ́ ɔ tʋ́ lé ɔ nɛ́ wlʋ a mnɩ́. 52Mà nyʋaá fɩ́ɛ́ kʋ̀ ʋ́ a, á ŋwíé, á bhɔtɔ yʋ́ɔ́ a zà. Lé Zozíi srʋ á mà: «A ná ŋwí mà ɔ nɩ́ kú, ɔ́ɔ ŋwɔ́mɛ!» 53Tányɩɛ́ mʋ́ ɔ́ cí sɩ́tɛ̀ a, nyʋa yì saá mà yʋ́ɔ́ ya kú a, áa bháa ʋ́ ɔ́ nyɩalɛ kʋ́.
54Lé Zozíi pla wlʋɔ́ a mnɩ́ lé ɔ́ bhli ŋnɩ́keyʋɔ́ a sɔ́ kʋ́ lé ɔ́ bhá niwɔlɩ kʋ́ lé ɔ́ wleó ɔ́ anɩ́: «Ná yʋ́ʋ, soglù!» 55Lé yʋ́ɔ́ la nyobhuo bɩ́, lé ɔ́ soglù. Lé Zozíi srʋ ɔ nɛ́ yà ɔ tʋ́ sɔ́ mà a nyɛ́ yʋ́ɔ́ lelilɩ ɔ́ ká li. 56Nee mna ɔ tinyʋa lé Zozíi nyɛ́ á tába: «Wɔlíɛ́ fɩ́ɛ́ ɩ̀ nilo lɛ́ dɛ́ a, a ná srʋ ɩ́ nyɔ!»
Currently Selected:
:
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.