Lúkɩ 8

Nyʋaá à jɩ́ɛ́ wá Zozíi kʋ́

1Naa, lé Zozíi bháa ʋ́ Lagɔ a Léyibhlɩɛ́ a Námadìè a nyʋa srʋsrʋ́ɛ́ kʋ́. Bháa yɩ́ lɛ́ dikádɩ̀ɛ̀ fɩ́ɛ́ jɩ̀ lé kà disʋsʋ́ yà bìdí sɔ́ ŋnɩ, ɔ́ plɩ́ɩ ɩ́ lɔ̀fɩ́ɛ́ a mnɩ́ lé ɔ́ srʋ nyʋaá fɩ́ɛ́, ɔ yà ɔ́ kʋjɩ̀nyʋ̀àà kʋ́gbá sɔ́ɔ́ sɔ́, 2mà ŋwná a zùò kʋ a la nyièdɩ, ŋwnáá Zozíi sa nyumozìzi jɩ̀, lé ànàà ɔ́ yalɩma a: Malíi á wlele lɛ́ sáà Madɩlɛ́nɩ a, Zozíi sa wá mɔ́ nyumozìzi a gbàásɔ́ jɩ̀. 3Lóoó Elódʋ a kakalɩ a dɛdɛ̀nyɔ á wlele wá Kuzáa a, ɔ ŋwnɔ́ Zánɩ kʋ á nyièdɩ, lé Suzánɩ yà yígàdà ŋwná àna sɔ́ jɩ́ɛ́ wá Zozíi kʋ́, lé á bhá wá á mɔ̀glʋ̀ á kakalɩ lé á falɛ wá Zozíi yà ɔ́ kʋjɩ̀nyʋ̀àà sɔ́ kʋ́.

Lɛglɩ̀nyɔ a núnúó

(Matíe 13.1‑9; Málɩ́kɩ 4.1‑9)

4Yruú a múó kʋ́, nyʋa kɔ́kɔ́mnɩ́ wlʋ́ a dí a mnɩ́, lé á nynɩlɔ̀ Zozíi gɔ̀ wlú. Mà ámá nyʋa a klʋ́ jɩ̀ Zozíi pá núnúó a múó, 5ɔ́ anɩ́: «Lɛglɩ̀nyɔ a múó mʋ lɛglɩ kà, mà ɔ́ mʋ a, ɔ́ kʋ lɩ́ɛ́ a glɩda, lé lɩ́ ànɩ bhli nyúzɔ kʋ́, lé plɩ́plɩ́nyʋa námnɩlɩɩ́ jɩ̀ lé nimni li ànɩ. 6Ànɩ bhli cɔ́kpalɩ́dʋ̀dʋ a mnɩ́ lé ɩ́ wlʋ́, mà cémʋ́ nyú nɩ́ dʋ̀dʋʋ́ kʋ a, yrʋ́ sií. 7Lɩ́ ànɩ bhli nyníci kpakɩ́ a mnɩ́, ɩ́ wlʋ́ɛ́, bhè nyníci a sɛ́fʋ wlʋ́ɛ́, lé nynícié gbíi wlú. 8Mà lɩ́ ànɩ̀ɛ̀ ɩ̀ bhli náma dʋ̀dʋ̀ɔ̀ a mnɩ́ a, ɩ́ wlʋ́ lé ɩ́ trʋ námasa yʋ́ kɔ́kɔ́mnɩ́.» Zozíi bhɩa kɔ́ɔ̀kʋ́ cícíé zɔ̀ a, ɔ́ɔ pá wɔlɩ́, ɔ́ anɩ́: «Ɔ̀ nɩ̀ kà nyúkwlí ɔ̀ kà nú a, ɔ nú!»

Zozíi sa mɔ̀ɔ lɛglɩ̀nyɔ a núnúó a gba

(Matíe 13.10‑17; Málɩ́kɩ 4.10‑12)

9Bhʋ́ ɔ́ kʋjɩ̀nyʋ̀àà srʋ ɔ́ mà ɔ sa mɔ̀ɔ núnúó a gba. 10Lé ɔ́ srʋ á, ɔ́ anɩ́: «Nyɔ ka lé ɔ pá amɔ Lagɔ a Léyibhlɩɛ́ a dɔ̀, mà à nɩ ŋwɔ́ɔ nyʋa ànàà lɩ̀à a, níní á ka lé a ká á gɔ̀ pá a.

Á yi dʋdʋ̀, a nɩ́ ka kʋ́ yɛ́.

Á yi nyúkwlí pʋ, a nɩ́ ka nú. # 8.10 A zɛlɩɩ sáà Eza 6.9.

11Núnúó a gba ŋwɔ́ɔ mà: Glɩglɩlɩɛ́, Lagɔ̀wɔ̀lɩ̀ɛ̀ ɩ́mɩ́ kʋ̀ʋ. 12Nyʋaá kʋ̀ nyúzɔ̀ɔ̀ gɔ̀ a, ámá ŋwɔ́ɔ nyʋaá à núé Lagɔ̀wɔ̀lɩ̀ɛ̀ lé Dɩ́blʋ̀ɔ̀ yie lé ʋ́ sa à mɩ́ duo kʋ́ a, bhʋ́anɩ nyʋaá nɩ ka Lagɔ a fádùò ka, a nɩ ká ʋ́ neé wlʋ́. 13Cɔ́kpalɩ́dʋ̀dʋ̀ɔ̀ mʋ́ ŋwɔ́ɔ nyʋaá à núé Lagɔ̀wɔ̀lɩ̀ɛ̀ lé ɩ́ ka lɔlɔ kʋ́ a, mà zɔ̀bhɩ̀àdàà a, á Lagɔ̀wɔ̀lɩ̀ɛ̀ nɩ́ ŋwʋ́ sikplií, á ka flɛ́ɛsa Lagɔ a fádùò á, mà a nɩ yɛ́ nyakalɩ tòyipɛ Lagɔ̀wɔ̀lɩ̀ɛ̀ mnɩ́ a, áa wlʋ́lɛ Lagɔ gwá. 14Glɩglɩlɩɛ́ ɩ̀ bhli nyníci kpaká a mnɩ́ a, ɩ́mɩ́ ŋwɔ́ɔ nyʋaá à núé Lagɔ̀wɔ̀lɩ̀ɛ̀, lé zɩkpa zɔ̀ a bhobhoé, mɔ̀ɔ a léyri, mɔ̀ɔ a mɛ́nɩmɛɛ́ sɔ́ gbíé Lagɔ̀wɔ̀lɩ̀ɛ̀ wlú, ɩ́ nie lé ɩ nɩ́ trʋ bhí lé bhíé ká zalɩma. 15Glɩglɩlɩɛ́ ɩ̀ bhli námadʋ̀dʋ̀ɔ̀ mnɩ́ a, ɩ́mɩ́ ŋwɔ́ɔ nyʋaá núé Lagɔ̀wɔ̀lɩ̀ɛ̀ lé à bhlilií námasa kʋ́, lé à ŋwʋ́ɩ́ duo kʋ́ a, bhʋ́anɩ nyʋaá ka kɔ́ɔ̀kɔ́ Lagɔ a fádùò lé á trʋɛ námabhi.

Nápɛ a núnúóó

(Málɩ́kɩ 4.21‑25)

16Nyɔ nɩ́ ŋwʋ́ nápɛ klʋ́, lé ɔ kɛ́ɛ́ pápá wlú gbí, ɔ nɩ́ súleé sáà bɔ̀gɩ zɔ̀, mà zɩkpa a mnɩ́ ɔ́ ŋwʋ́ɛ́ lé nyʋaá pla gbó a, ɛ́ ŋana a kʋ́. 17Bhʋ́ lɩ́ɛ́ fɩ́ɛ́ ɩ̀ zúzùò a, á yɩ́ɩ́ lé wɔlɩɛ́ ɩ̀ nilo koti kʋ́ a, ɩ́ flʋɛ zɔ̀. 18A nɩ pʋ nyúkwlí a, a mányɩ, mà ɔ̀ nɩ̀ kà a, á yio sɔ́kʋ́ nyɛ́, ɩ́zà ɔ̀ nɩ́ ka a, tòyipɛɛ́ ɔ́ ka a, á yio mɛ́ gɔ̀ bhá.»

Zozíi ɔ nɛ́ lé ɔ nɩ́ayúó

(Matíe 12.46‑50; Málɩ́kɩ 3.31‑35)

19Tányɩ a múó Zozíi ɔ nɛ́, lé ɔ nɩ́ayúó sɔ́ yio gɔ̀, mà cémʋ́ nyʋa a zumole kʋ a, a nɩ́ míi lé a kɔ́ɔ́ gɔ̀ ŋnɩ. 20Bhʋ́ á cíeloó nyʋa gɔ̀, ɩ́mɩ́ ŋwɔ́ɔ mà: «Ɩ̀ nɛ́ yà ɩ̀ nɩ́ayúó sɔ́ kʋ ɔ̀ jrùkʋ́, á anɩ́ a ká mɔ̀ yɛ́.» 21Zozíi anɩ́: «Nyʋa à pʋɛ Lagɔ̀wɔ̀lɩ̀ɛ̀ nyúkwlí lé à nie ɩ sá a, ámá ŋwɔ́ɔ ɩ nɛ́ yà ɩ nɩ́ayúó sɔ́.»

Zozíi gáa vʋ̀vɔ̀lʋ kʋ́ lé ʋ́ dúo

(Matíe 8.23‑27; Málɩ́kɩ 4.35‑41)

22Yruú a múó, Zozíi yà ɔ́ kʋjɩ̀nyʋ̀àà sɔ́ pla gɔ́lʋ́ lé ɔ́ srʋ á mà: «A yi à kà nyíé a bɩ́ díi!» Lé á cíe sá lé á mʋ. 23Mà á kʋ nyí klʋ́ lé yrá kla Zozíi lé ɔ́ ŋwɔ́ɔ. Mà lúlúó à yie a, á yíe gɔ́lʋ́ɔ́ nyú kʋ́, kʋjɩ̀nyʋ̀àà ya jɛ̀mɩ̀. 24Bhʋ́ á ŋnɩ ɔ́ gɔ̀, lé á galɔ̀: «Másɛɛ̀, Másɛɛ̀, à yà tuo!» Lé Zozíi wlʋ́ yrá lé ɔ́ gáa vʋ̀vɔ̀lʋ̀ɔ̀ yà lákwʋɛ́ sɔ́ kʋ́, fɩɩ́n bhè ɩ́ mʋ dʋ̀dʋ kʋ́, lé nyíé a klʋ́ plɩ́ diin. 25Lé ɔ́ yrá kʋjɩ̀nyʋ̀àà mà: «Dɛ́gbá a ŋwʋ́ aa ditátɩ́ɛ́ à?» Ŋanɩmɛ yi la kʋ́, lé neé mnaá, lé á yráyra á nyoku mà: «Nyɩ́kpɔcegbá lɛ̀ bhè ɔ̀ cíle vʋ̀vɔ̀lʋ yà nyíé sɔ́ gɔ̀, lé ɩ́ ŋwʋ́ɛ́ ʋ́ a?»

Zozíi sa nyɔ nyumozìzi kɔ́kɔ́mnɩ́ jɩ̀

(Matíe 8.28‑34; Málɩ́kɩ 5.1‑20)

26Zozíi yà ɔ́ kʋjɩ̀nyʋ̀àà sɔ́ dí nyíé lé á ŋnɩ Zelazenɩ́nyʋa a bhlé. Mà a bhlɩ́ɛ́ yà Galiléebhlɩɛ́ sɔ́ mɛ́mɛ gɔ̀, nyíé dílaá mʋ́. 27Mà tányɩɛ́ mʋ́ a gɔ́lʋ́ɔ́ pɛ́ kɔ́ɔ̀kʋ́ lé Zozíi kwlíi a, dú a nyɔ a múó yio nyúzɔ kʋ́. Nyɔɔ́, nyumozìzi kʋ̀ ɔ̀ jɩ̀, bháa jɩ̀ lé ɔ nɩ́ pla kóti mʋ́ a, ɩ́ ya gwlɛɛ̀. Ɔ nɩ́ pʋ́ʋ sáà ghlɩ a mnɩ́, lésigwlè mʋ́ ɔ́ pʋ́lɛ. 28Mà ɔ́ yɩ́ bhli kɔ́ɔ̀kʋ́ Zozíi jɩ̀ a, ɔ́ bhɩa wɔlɩ́, lé ɔ́ blì lé ɔ́ bhliloó drɩ̀, ɔ́ anɩ́: «Wɔlɩ́ gbá ɩ̀ yrálɛ mɔ́ɔ mʋ́ a Zozíi, Lagɔ̀ɔ̀ ʋ̀ zi kʋ́ a Yuwliyʋʋ̀? Ɩ́bhìè, ɩ́ sra mɔ̀ wlú, nàa yɩa mɔ́ɔ kwlʋ́ àyé!» 29Zozíi srʋ nyumozùzùò mà ʋ wlʋ́ nyɔɔ́ jɩ̀. Nyumozùzùò ya nyɔɔ́ jɩ̀ gwlɛ, cɩ́ɩ á bhá lé á gʋa ɔ́ sɩɛ́, lé á ŋwʋ́ ɔ́ kpó, mà sɩ́tɛ̀ ɩ́ kʋ bhè ɔ́ díé cɩ́ɛ lé ɔ́ wlawla kpóó, lé nyumozìzìè fɔɔ́ bhlɩ́ɛ́ mnɩ́ lɛ́ nɩ́ wlʋ́ʋ a.

30Zozíi yrɔ́ɔ́ mà: «Nàa ŋnɩ́ à?» Ɔ́ anɩ́: «Ná ŋnɩ́ ŋwɔ́ɔ, à nɩ́ bɛ́.» Nyumozìzìè kʋ̀ ɔ jɩ̀ a, ɩ́ zù, ɩ́zà ɔ́ anɩ́ à nɩ́ bɛ́. 31Lé nyumozìzìè sra Zozíi wlú: «Ɩ́bhìè nàa fa àmɔ̀ nyakalɩgbàzrʋ̀ɔ̀ ʋ̀ nɩ́ bhlʋ́ʋdà ka a, mnɩ́ àyé!» 32Bhè gékpíbhuzàlɩ̀kpa kʋ ɔ̀ kíké wlú á mʋ́mɔ lelilɩ. Nyumozìzìè bhibhie Zozíi: «Ɩ́bhìè nyɛ́ àmɔ̀ nyúzɔ bhè à mʋ bhuzàlɩ̀kpàkádàà à kʋ̀ ɔ̀ kíké wlú a mnɩ́!» Lé Zozíi nyɩ́ɩ́ nyúzɔ lé ɩ́ mʋ mɔ̀ɔmɔ̀. 33Ɩ́ nɩ lé nyumozìzìè wlʋ́ nyɔɔ́ jɩ̀ lé ɩ́ pla bhuzàlɩ̀kpàà a mnɩ́. Nyumozìzìè pla kɔ́ɔ̀kʋ́ bhuzàlɩ̀ɛ̀ mʋ́ a, sóo mʋ́ ɩ́ kwlíi kíkéé lé ɩ́ kɔ́sɔ nyíé, bhuzàla nɩ́ kʋ́ ji ɩ́ lɔ̀fɩ́ɛ́ kú.

34Bhuzàlɩ̀ɛ̀ a dɛdɛ̀nyʋ̀àà yɛ́ wɔlɩɛ́ plɩ́ a, á gú lé á fa wɔlɩ́ɛ́ dú yà bìdíé fɩ́ɛ́ sɔ́ kʋ́. 35Ɩ́ nɩ lé nyʋa yi dʋdʋ̀ kà. Á yi a, nyɔɔ́ nyumozìzìè wlʋ́ jɩ̀ a, ɔ yíjɩ̀ ya gbɩ, ɔ́ ya yrʋ́ʋ̀ ɔ́ bɔ́ɔ Zozíi a bhɩɩ́ zɔ̀; wɔlɩ́ɛ́ la nyʋaá fɩ́ɛ́ à yi a, ŋanɩmɛ kʋ́. 36Nyʋaá à yɛ́ wɔlɩ́ɛ́ a dá a, lé cémʋ́ nyumozìzìè wlʋ́ nyɔɔ́ jɩ̀ a, á salɩɩ́ nyʋa ànàà à yi a, dí kʋ́. 37Ɩ́ ka ŋnɩ́ lé Zelazenɩ́bhlɩɛ́ a mnɩ́ a nyʋaá fɩ́ɛ́, ŋanɩmɛ yilaá kʋ́, ɩ́ ka ŋnɩ́ lé á srʋ Zozíi mà ɔ wlʋ́ a bhlɩ́ a mnɩ́. Lé Zozíi pla gɔ́lʋ́ lé ɔ́ yrɩ́bhà. 38Mà nyɔɔ́ nyumozìzìè wlʋ́ jɩ̀ a, Zozíi na ká mʋ a, ɔ́ srʋ ɔ́ mà ɔ yɔ̀sɔ́ ká mʋ, mà Zozíi nɩ́ ŋwnʋ́ʋ̀ ɔ́ srʋ ɔ́ mà: 39«Yrɩ́bha, mʋ nà nyʋa nyièdɩ, bhè cémʋ́ Lagɔ nɩ mɔ̀ a, kà a dí saà!» Ɔ́ srʋ ɔ́ a, nyɔɔ́ mʋ lé ɔ́ bhli dúó, lé ɔ́ sa mɔ̀ɔ a nyʋa dí wɔlɩ́ɛ́ Zozíi nɩ ɔ́ zà a.

Zozíi yalɩma ŋwnɔ́ lé ɔ́ galà Zayilúsʋ a ŋnɩ́keyʋ

(Matíe 9.18‑26; Málɩ́kɩ 5.21‑43)

40Zozíi dí nyíé a bɩ́ a, nyʋaá à glɔ́ɔ la a, á yió nyúzɔ kʋ́. 41Lé nyɔ a múó ŋnɩ ɔ́ gɔ̀, ɔ́mɔ́ á wlele Zayilúsʋ, zúfʋcɛcɩwlʋɔ́ a mnɩ́ a kámanyɔ kʋ̀ʋ. Ɔ́ bhli Zozíi a bhɔ kʋ́, lé ɔ́ srʋ ɔ́ mà ɔ yi ɔ gbó. 42Nyɔ a ŋnɩ́keyʋɔ́ a múó cocoó ɔ́ ka a, ɔ́mɔ́ ɔ̀ kúloó wlɩɩ́, ɔ́ ka lɩkpɩ a kʋ́gbá sɔ́.

Zozíi kʋ nyɔ a gbó a nyúzɔ kʋ́, lé nyʋa bhúbhuoloó, á loluo nyobhuo kʋ́. 43Mà ŋwnɔ́ a múó kʋ nyʋaá nyièdɩ lé lɩkpɩ kʋ́gbá lɩkpɩ sɔ́ lɛ̀ lé dòlú wlʋ́ɔ́ gɔ̀. Ɔ́ ya moníi sa àààn ɔ́ ya sɩa, ɔ ya ɔ́ kakalɩɛ́ fɩ́ɛ́ nyʋa wlɩ pɛ́lʋ́ ŋwʋ́ ɔ́ ká bhlɛ́ɛ yalɩma, mà ɔ nɩ́ yalɩma. 44Ɔ́mɔ́ ŋwnɔ́ɔ́ la Zozíi bɩ́, lé ɔ́ gbɔ́ dɩgàsa ɔ kotuó a nimnuó, mà ɔ́ gbʋ́ʋ́ kɔ́ɔ̀kʋ́ a, dòlúó wlʋ́ ɔ́ la gɔ̀ a, ʋ́ tɔ́pʋ. 45Lé Zozíi yrá: «Ɔ̀ gbɔ́ mɔ́ɔ áa?» Mà ɔ̀ nɩ̀ kʋ̀ a, ɔ́ɔ sa ɔ nyoku gbʋ́ wlú, bhʋ́ Pɩ́ɛ́lɩ sané: «Másɛɛ̀, bhè nyʋa zù, lé á ya mɔ̀ bhúbhuo!» 46Zozíi anɩ́: «Ná anɩ́, nyɔ ya mɔ́ɔ gbɔ́, fɩ́ wlʋ́ mɔ́ɔ mʋ́.» 47Mà ŋwnɔ́ɔ́ yɩbhlɩ Zozíi a yɩ́ a mnɩ́ a wɔlɩ́ a, ŋanɩmɛ yilo kʋ́, kpɩkpɩ tɩtɛlɔɔ́, lé ɔ́ yi lé ɔ́ bhli Zozíi drɩ̀, lé nyʋaá fɩ́ɛ́ a klʋ́ jɩ̀, wɔlɩ́ɛ́ kà ŋnɩ́ lé ɔ́ gbɔ́ɔ a, bhè cémʋ́ ɔ́ ya kakamnɩ́lɛ́ lɩ̀à yalɩma a, ɔ́ sa mɔ̀ɔ ɩ́ lɔ̀fɩ́ɛ́. 48Ɔ́ bhɩa zɔ̀ a, Zozíi srʋ ɔ́ mà: «Ná yʋ́ʋ̀, mɔ̀ mɔ̀glʋ̀ nàa fádùò ya mɔ̀ pʋ́a. Plɩ́ kà mʋ!»

49Zozíi kʋ cída lé nyɔ a múó wlʋ́ zúfʋcɛcɩwlʋɔ́ a kámanyɔ a gbó lé ɔ́ yio srʋ ka mà: «Nàa bhɩa flɛ́ɛsa Másɛɛ̀ kwlɩ́, mà nà ŋnɩ́keyʋɔ́ ya kú!» 50Mà Zozíi nú wɔlɩ́ɛ́ nyɔɔ́ cí a, ɔ́ srʋ Zayilúsʋ mà: «Ŋanɩmɛ ná bhlá mɔ̀, bhá fádùò mà nà yʋ́ɔ́ yi ʋ́ neé wlʋ́.»

51Zozíi ŋnɩ Zayilúsʋ a gbó a, ɔ́ wle Pɩ́ɛ́lɩ Záan lé Zákɩ lé ɔ wle ŋnɩ́keyʋɔ́ ɔ tʋ́ lé ɔ nɛ́ wlʋ a mnɩ́. 52Mà nyʋaá fɩ́ɛ́ kʋ̀ ʋ́ a, á ŋwíé, á bhɔtɔ yʋ́ɔ́ a zà. Lé Zozíi srʋ á mà: «A ná ŋwí mà ɔ nɩ́ kú, ɔ́ɔ ŋwɔ́mɛ!» 53Tányɩɛ́ mʋ́ ɔ́ cí sɩ́tɛ̀ a, nyʋa yì saá mà yʋ́ɔ́ ya kú a, áa bháa ʋ́ ɔ́ nyɩalɛ kʋ́.

54Lé Zozíi pla wlʋɔ́ a mnɩ́ lé ɔ́ bhli ŋnɩ́keyʋɔ́ a sɔ́ kʋ́ lé ɔ́ bhá niwɔlɩ kʋ́ lé ɔ́ wleó ɔ́ anɩ́: «Ná yʋ́ʋ, soglù!» 55Lé yʋ́ɔ́ la nyobhuo bɩ́, lé ɔ́ soglù. Lé Zozíi srʋ ɔ nɛ́ yà ɔ tʋ́ sɔ́ mà a nyɛ́ yʋ́ɔ́ lelilɩ ɔ́ ká li. 56Nee mna ɔ tinyʋa lé Zozíi nyɛ́ á tába: «Wɔlíɛ́ fɩ́ɛ́ ɩ̀ nilo lɛ́ dɛ́ a, a ná srʋ ɩ́ nyɔ!»

Currently Selected:

Lúkɩ 8: NEY

Highlight

Copy