Matíe 11
11
Zán Batísɩ cíe nyʋa
(Lúkɩ 7.18‑35)
1Tányɩɛ́ mʋ́ Zozíi bhɩa ɔ́ kʋjɩ̀nyʋ̀àà kʋ́gbá sɔ́ɔ́ a cɩ́alɛ zɔ̀ a, ɔ́ mʋ bhlɩ́ a mnɩ́ a dí a mnɩ́ cɩ́a ka lé ɔ ká Lagɔ̀wɔ̀lɩ̀ɛ̀ cí.
2Mà bhʋ́ a tányɩɛ́ Zán Batísɩ kʋ jɩ̀ɩ lé ɔ́ nú wɔlɩ́ɛ́ fɩ́ɛ́ Kláyɩ́sɩ nie a, ɩ́ nɩ lé ɔ́ cíe ɔ́ kʋjɩ̀nyʋ̀àà á zùò Zozíi bɩ́. 3Ɔ́ srʋ á mà a yrá námasa Zozíi, a cí mà: «Mɔ̀ ŋwɔ́ɔ lɛ́ Kláyɩ́sɩɛ́ yie lɛ́ a, mà à gláa àyɩ yígàdà anɔɔ?» 4Bhʋ́ Zozíi srʋ á mà: «A nɩ mʋ a, a srʋ Záan, wɔlɩ́ɛ́ a nú lé a yɛ́ a. 5Nyʋaá yɩ́cucú bhlá a, á yɛ́ yɩ́ kʋ́, nyʋaá à kpɩ́tɩɛ a, á námɛ yɩ́ námasa, kosugɔ̀bhlànyʋa ya kplɔɔ̀, nyʋaá à nɩ́ nú a, á núé, kúdùkuo galɔ lé ŋazɩ̀nyʋa pʋɛ yɩ́ Lagɔ a námadìè nyúkwlí.#11.5 A zɛlɩɩ sáà Eza 35.5‑6; 61.1. 6Nyɔɔ́ nɩ̀ kà ná fádùò lé ɔ̀ nɩ nɩ́ Lagɔ̀nyùzɔ kʋ́ wlʋ́ ná zà a, ɔ́ ya pʋ́!»
Á fa Zán Batísɩ ŋwnú
7Záan a kʋjɩ̀nyʋ̀àà mʋ yɩ́ fɩ́ɛ́, lé Zozíi srʋ yɩ́ nyʋaá fɩ́ɛ́ kʋ̀ jrè gɔ̀ a, Záan a gɔ̀ a wɔlɩ́, ɔ́ anɩ́: «Lɛ́gbá a mʋ lɛ́ ɔ̀ zɩkpa a mnɩ́ dʋdʋ̀ kà a? Zúzùvòò vʋ̀vɔ̀lʋ̀ɔ̀ à vɔ́gɔ lɛ́ a? 8Bhè a mʋ lɛ́ kɛtɛkʋ́ dʋdʋ̀ kà a? Nyɔɔ́ ɔ̀ pla náma kotie mʋ́ a? Nyʋaá à pla náma kotie mʋ́ a, léyuo a gbí mʋ́ á síe à! 9Lɛ́gbá a mʋ lɛ́ kɛtɛkʋ́ nɩ ka áa? A ká Lagɔ a nékʋ́cinyɔɔ́ yɛ́ɛ? Aan, mà náa srʋɛ amɔ cícása mà ɔ́ zi Lagɔ a nékʋ́cinyɔ kʋ́! 10Ɔ ŋnɩ́ mʋ́ á jɩ́jrà Lagɔ̀bɔ̀gʋ a mnɩ́ mà:
Ɩ̀ lɛ́bhɛɛ, ɩ́ yi ná cíecíenyɔɔ́ cíè ɔ ká bhlà plɩ́,
Lé ɔ ká nà nyúzɔ̀ɔ̀ gɩglà. # 11.10 A zɛlɩɩ sáà Mala 3.1.
11Náa srʋɛ amɔ cícása mà yrúkanyʋaá fɩ́ɛ́ a nyièdɩ, nyɔ nɩ́ mɔ̀ɔ kʋ lé ɔ ká Zán Batísɩ kʋ́ zi. Mà sɩ́tɛ̀ ɩ́ kʋ bhè Lagɔ a Léyibhlɩɛ́ a mnɩ́, nyɔɔ́ ɔ̀ ŋwɔ́ɔ mɔ̀ɔ a nyɩ́kpɔtòyilɛ̀ a, ɔ́ ŋwnɔ́ kʋ́#11.11 ɔ́ ŋwnɔ́ kʋ́: Lagɔ a Léyibhlɩɛ́ a mnɩ́ a nyɩ́kpɔtòyilɛ̀ ɔ pɔ́wa ka fɩ́ lé a zi Záan a na kʋ́. lé ɔ́ zi Záan kʋ́. 12Bháa Zán Batísɩ a tányɩɛ́ jɩ̀ lé kà zɩmnɛ́ ŋnɩ a, Lagɔ a Léyibhlɩɛ́, á bhlalɛɛ kʋ́, nyʋaá kà fɩ́ a, ámá pla mɔ̀ɔ. 13Lagɔ a nékʋ́cinyʋaá fɩ́ɛ́ yà Moyízɩ a lɔ̀ɔ̀ sɔ́ kʋ Lagɔ a wɔlɩ́ɛ́ nà kà ŋnɩ a cída àààn, lé Záan a tányɩ ŋnɩ. 14A nɩ yrá lé a kɩ́ɩ́ cícása wle a, náa srʋɛ amɔ mà, ɔ́mɔ́ Záan mɔ́ ŋwɔ́ɔ Elíi nà kà wá yi lé ɔ̀ kɔ̀ɔ̀ wɔlɩ́ á cíé wá a. 15Ɔ̀ nɩ̀ kà nyúkwlí lé ɔ̀ kà nú a, ɔ nú! 16Nyɔ gbá ɩ́ yi lɛ́ jànyɩ̀ɛ̀ lɩ̀à mnɩ́ a nyʋaá pápa áa? Nɩ̀ yɛ́ a, nànɩ́ yúó bɔ́ɔ crɩ́kpaá à wle a lía lé à srʋɛ mà: 17À pá amɔ blɩ̀kwɛ gà bhè a nɩ́ yɛ. À pá nyúgbùwɔ̀lɩ bhè a nɩ́ zɩzrà. 18A lɛ́bhɛɛ, Záan ya yi. Ɔ nɩ́ li, ɔ́ nɩ́ mná, ɩ́ ka ŋnɩ́ lé nyʋa anɩ́ mà: Nyumozùzu kʋ ɔ jɩ̀. 19Nyɔɔ́ a Yuwliyʋɔ́ yi a, ɔ́ lie lé ɔ́ mna, ɩ́ ka ŋnɩ́ lé nyʋa nie sɔ́kʋ́ mà: A dʋdʋ̀ nyɔɔ́ lɩ̀à, lelilíé yà nʋmnánɔnʋ sɔ́ ɔ́ ka a, lapóo a kʋbhlinyʋa yà bhàlʋ̀nyʋa sɔ́ ŋwɔ́ɔ ɔ bheyinyʋa. Mà nɩnɩgbɩ á bhá lé á yɩbhlɩlɛ Lagɔ a fíkeé.»
Zozíi lɩ́kpɩ̀
(Lúkɩ 10.13‑15)
20Zozíi lɩ́kpɩ díé mnɩ́ ɔ́ nɩ lɛ̀wɔ̀lɩ kɔ́kɔ́mnɩ́ a kʋ́, cémʋ́ mɔ̀ a nyʋa nɩ́ ŋwnʋ́ lé a ká a nɩnɩgbɩ cɩ́cɩ a. 21Ɔ́ srʋ mɔ̀ɔ a nyʋaá mà: «Amɔ Kolazɛ́ɛ a nyʋa, kplé ya amɔ kla! Amɔ Besayidáa a nyʋa a sɛ́fʋ sáà, kplé ya amɔ kla! Ɛ̀kʋ̀ʋ̀ a? Lɛ̀wɔ̀lɩ̀ɛ̀ fɩ́ɛ́ ɩ̀ nilo lɛ́ amɔ nyièdɩ a, sɩ́tɛ̀ mʋ́ ɩ nɩ nilo la Tílɩ yà Sidɔ́ɔ sɔ́ a, mɔ̀ɔ a nyʋa ya wá a nyumoé yɩbhlɩ, á ya wá sɩsɩ́ pla, á ya wá bhɛ̀gɩ yrʋ́ʋ̀, á ya wá tʋ́tɔ vli.#11.21 Izrayɛ́lɩbhlɩ kʋ́, wɔlɩ́ nɩ bhlá kpanyɩ nyɔ a, ɔ́ɔ yrʋ́ɛ bhɛ̀gɩ, ɔ́ vlie tʋ́tɔ lé ɔ́ pʋlɛ kleé. 22Aan, náa srʋɛ amɔ mà, Lagɔ a tɩ́tɩ́ plɔyruó, Tílɩ yà Sidɔ́ɔ a nyʋa sɔ́ a nɛɛ́ yi yɔ́lʋma lé ɛ́ yi amɔ kʋ́ zi! 23Bhè mɔ̀ Kapɛnayʋ́mʋ! Nà dùòkʋ́ ɩ̀ yi gblà lé ɩ̀ yi lagɔ gbɔ́ɔ? Kpɔkplá di ɩ̀ wʋ́ɛ́! Glù mʋ́ nà kà pla! Ɩ̀ yi mʋ àààn, lé ɩ̀ yi kúdukʋ́ ŋnɩ. Máà Lɛ̀wɔ̀lɩ̀ɛ̀ fɩ́ɛ́ ɩ̀ nilo mɔ̀ gɔ̀ a, sɩ́tɛ̀ mʋ́ ɩ nɩ nilo la Sɔdɔ́mʋ a, Sodɔ́mʋdùò kʋ àyɩ la ʋ́ lé yi lé ŋnɩ zɩmnɛ́. 24Ɩ́mɩ́ kà ŋnɩ́ lé ɩ́ srʋɛ amɔ lé a ká saá yɩbhlɩ, mà Lagɔ a tɩ́tɩ́ plɔyruo kʋ́, Sɔdɔ́mʋ a nɩɛ́ yi yɔ́lʋma lé ɩ́ yi a nɩɛ́ kʋ́ zi.»
A yi Zozíi mʋ́ bhè a ká pʋ́
(Lúkɩ 10.21‑22)
25Bhʋ́ a tányɩɛ́, Zozíi bháʋ́ niwɔlɩ, ɔ́ anɩ́: «Weé à Tʋ́ʋ̀, lagɔɔ́ yà dʋ̀dʋ kʋ́ sɔ́ a Kanyɔɔ̀, àyúó cémʋ́ ɩ̀ nɩ lé ɩ̀ zízìè wɔlɩ́ɛ́ fɩ́ɛ́ lɩ̀à dɩgàlɩ̀zrɩ̀nyʋa yà fíke nyʋa sɔ́ yɩ́ lé ɩ̀ tʋalɩɩ́ yúó a, ɩ́zà ɩ́ falɛ mɔ̀ ŋnú! 26Aan Tʋ́ʋ̀, cémʋ́ ɩ̀ yrá wá a, sɩ́tɛ̀ mʋ́ ɩ́ plɩ́ɩ. 27Ɩ Tʋ́ nyɛ́ mɔ́ɔ wɔlɩ́ɛ́ fɩ́ɛ́ a cɛ́cɩ. Nyɔ nɩ́ Yuwliyʋɔ́ yì, ɛ̀ nɩ̀ nɩ́ Tʋ́ɔ́ ŋwɔ́ɔ a, nyɔ nɩ́ sáà Tʋ́ɔ́ yì, ɛ̀ nɩ̀ nɩ́ ɔ Yuwliyʋɔ́ ŋwɔ́ɔ a, lé nyʋaá Yuwliyʋɔ́ yrá lé à kà Tʋ́ɔ́ yɩbhlɩ a, ámá ɔ́ pápalɔɔ́.
28A yi mɔ́ɔ mʋ́ amɔ nyʋaá fɩ́ɛ́ sro lé à yà gbɩdɩ̀ɛ̀ sɩa a, lé bhobhoé ya wlú zi a, ká amɔ wlú sa à, bhè a ká nyɔɔ́bhleè. 29Wɔlɩ́ɛ́ ná ká amɔ mʋ́ yrá a, a nií, lé cémʋ́ ná ká amɔ tíe a, a náa sɩ́tɛ̀, mà diwɔta ɩ́ ka a, nɩ́ gbʋgbà kʋ́, nɩ́ ka sáà amɔ kalɩmɛ mʋ́ ŋwʋ́ lé á zizi ká nyɔbhleè! 30Aan, ná nɔnʋzrɩ̀zríɛ́ nɩ́ ka lé bódùò ná ká amɔ gbɩdɩ̀ da nyɛ́ a, ʋ nɩ́ kʋ́ ŋwnɔ́.»
Currently Selected:
Matíe 11: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
