Málɩ́kɩ 15

Á fa Zozíi Pilátɩ drɩ̀

(Matíe 27.1‑2,11‑14; Lúkɩ 23.1‑5; Záan 18.28‑38)

1Zrɩ̀ɩ zɩ kɔ́ɔ̀kʋ́ a, Lagɔ̀bʋ̀bɔ̀nyʋ̀àkádàà, lɔ̀ a másɛnyʋaá yà dɔ̀panyʋaá sɔ́, nyʋaá fɩ́ɛ́ kʋ̀ la tɩ́tɩ́plɔjrèè a mnɩ́ a, á yɛ́yɛ fɩ́ɛ́ lé á gʋa Zozíi, lé á fɔɔ́ Pilátɩ a gbó.

2Lé Pilátɩ yrá Zozíi, ɔ́ anɩ́ mà: «Mɔ̀ ŋwɔ́ɔ lɛ́ Zúfʋnyʋa a lóo?» Zozíi anɩ́: «Ɩ́mɩ́ ɩ̀ cí lɛ́.» 3Lagɔ̀bʋ̀bɔ̀nyʋ̀àkádàà gʋalɔɔ́ wɔlɩ́ kɔ́kɔ́mnɩ́ jɩ̀, 4ɩ́ ka ŋnɩ́ a, Pilátɩ yrɔ́ɔ́ sɔ́kʋ́, ɔ́ anɩ́: «Dʋdʋ̀, gbʋ́ á ŋwʋ́lɛ kɔ́ɔ̀kɔ́ mɔ̀ wlʋ́ lé nɩ́ sa née?» 5Mà Zozíi nɩ́ srɔɔ́ né, neé ya Pilátɩ mna.

6Flíiflíiglɩ̀sɩ́sɩ̀ɛ̀ fɩ́ɛ́ Pilátɩ sa jɩ̀ŋwʋ̀nyɔ a múó jɩ̀ɩ. Mà jɩ̀ŋwʋ̀nyɔ̀ɔ̀ nyʋa yrá lé ɔ̀ nɩ sá jɩ̀ɩ a, ámá à zɛlɔɔ́ ŋnɩ́. 7Nyɔ a múó ɔ́mɔ́ á wlele Balabásɩ, nyʋaá yà gɔ̀mnànyʋ̀àà sɔ́ dúlo wá mʋ́ lé yrè klue wá a, ɔ́mɔ́ Balabásɩ kʋ wá mɩ́ mʋ́ lé á bhlá wá nyɔ. 8Zúfʋnyʋaá lɔ̀fɩ́ɛ́ yi Pilátɩ a dɛ́, lé á srʋ ɔ́ mà cémʋ́ ɔ́ nie wá kɔ́ɔ̀kɔ́ lé ɔ́ sa wá jɩ̀ŋwʋ̀nyɔ jɩ̀ɩ a ɔ nɩ yɩ́ saá 9Á cí a, Pilátɩ anɩ́: «Naa a yrá lé ɩ cíe Zúfʋnyʋa a lóo sáà?» 10Pilátɩ yì la saá mà waza kà ŋnɩ́ lé Lagɔ̀bʋ̀bɔ̀nyʋ̀àkádàà lɔɔ́ Zozíi drɩ̀. 11Zɩ̀glàmà Lagɔ̀bʋ̀bɔ̀nyʋ̀àkádàà ya la nyʋaá fɩ́ɛ́ sú a ká Balabásɩ jɩ̀ɩ sa. 12Lé Pilátɩ yrá á sɔ́kʋ́, ɔ́ anɩ́: «Bhè ɔ̀lɩa, á wlele lɛ́ Zúfʋnyʋa a lóo a, cégbá a yrá lé nɩ nió áa?» 13Bhè á ŋwʋ́ ɔ́ yrè, á anɩ́: «Kʋ ɔ́ kúsu jɩ̀!» 14Pilátɩ anɩ́: «Bhè nyumoé a cégbá ɔ́ nɩ á?» Bhè á klu, á anɩ́: «Kʋ ɔ́ kúsu jɩ̀!» 15Naa, Pilátɩ ká yɩ́ má lɔlɔ duo kʋ́ ŋwʋ́ a, ɔ́ cíe Balabásɩ sá lé, ɔ́ nɩ lé á sɩ́á fɩ́ɛ́ Zozíi, lé ɔ́ srʋ sʋ́jàà mà a kʋlɔɔ́ kúsuó jɩ̀.

Sʋ́jàà nyɩa Zozíi

(Matíe 27.27‑31; Záan 19.2‑3)

16Á fa Zozíi gɔ̀mnàwlʋ̀ a mnɩ́ lé á wle mɔ̀ɔ a sʋ́jàà fɩ́ɛ́ 17Á plɔɔ́ bànɩ̀zàla mʋ́ lé á nɩ nyníci wlùgblè lé á ŋwʋ́ ɔ̀ má wlú 18Á pɔ́ɔ́ yúó, á nie: «Àyúó Zúfʋnyʋa a lóo!» 19Á klálɔɔ́ bhlà zìzi wlú. Á ŋwnalɔɔ́ dàdɩ klʋ́, lé á sralɔɔ́ drɩ̀ koti sá. 20Á nyɩalɔɔ́ yɩ́ fɩ́ɛ́ lé á sɔɔ́ bànɩ̀zàlàà mʋ́, lé á plɔɔ́ ɔ kótié mʋ́. Á fle ɔ́ zɔ̀ lé á fɔɔ́ kúsuó jɩ̀ kʋ ka.

Á kʋ Zozíi kúsu jɩ̀

(Matíe 27.32‑44; Lúkɩ 23.26‑43; Záan 19.17‑27)

21Mà nyɔ a múó kʋ ʋ́, ɔ́mɔ́ a wlele Simɔ́ɔ. Ɔ́ ŋwɔ́ɔ dúó a wlele Sɩlɛ́nɩ a nyɔ. Ɔ́mɔ́ ŋwɔ́ɔ Alɛzádrɩ yà Wlúfusɩ sɔ́ a tʋ́. Ɔ́ wlʋ́ɛ́ la lágbaá ɔ́ plɩ́ɛ́ lé á vídèlò kʋ́ lé á bhlio kʋ́ mà, ɔ gbɩdɩ̀ Zozíi a kúsuó. 22Dɛ́ɛ́ á wlele Glɔgɔtáa a, mɔ̀ɔmɔ̀ á fa Zozíi. Glɔgɔtáa ŋnɩɛ́ ɩ́ gba ŋwɔ́ɔ mà wlúkofó a dɛ́. 23Nyʋa bhli gɔ́zɩ̀kàlɩ lé á la mílɩ lé á bhlábhlalɩ nʋ́ mʋ́, lé á nyɛ́ Zozíi mnáada, mà ɔ nɩ́ mná. 24Áa bhli yɩ́ mɔ́ kʋ lé á kʋlɔɔ́ kúsu jɩ̀. Lé á pá nɩ̀gbɩ lé á bhábha ɔ kótié.

25Geglìà a glíi fɛna a tányɩɛ́ bhʋ́ á kʋlɔɔ́ kúsuó jɩ̀. 26Á jɩ́jrà kplipá jɩ̀, wɔlɩ́ɛ́ kà ŋnɩ́ lé á na kɔ́ɔ́ bhlá a: «Zúfʋnyʋa a lóo.» 27Tányɩɛ́ mʋ́ á kʋ lɛ́ Zozi kúsuó jɩ̀ a, á kʋ sáà nyɩ́kpɔbhlanyʋa a sɔ́ kúsu jɩ̀. Múó kʋ la ɔ́ lilie kʋ́ lé ànɔ̀ɔ̀ kʋ la ɔ́ kɔmɩa kʋ́. [28Cémʋ́ ɩ́ jɩ́jràlɔ̀ wá Lagɔ̀bɔ̀gʋ a mnɩ́ mà, á zɛlɔɔ́ sáà mónyùmònyʋa nyièdɩ, ɩ́ mɩ́ nilo.#15.28 A zɛlɩɩ sáà Eza 53.12. Á má wɔlɩdrèè lɩ̀à, bhlagɔ̀gɔ̀bɔ̀gwɩ̀ɛ̀ fɩ́ɛ́ a mnɩ́ a nɩ́ jɩ́jràlɔ̀.]

29Mà plɩ́plɩ́nyʋa trʋlɔɔ́. Á bíbie wɛ́ lé á nie: «Ééé! Mɔ̀ cí wá mà ɔ̀ yi Lagɔ̀gbìkádàà wla lé ɔ́ yi a yrií ta pá a, 30sa yɩ́ ʋ́ ɩ̀ nyoku neé à! Wlʋ́ yɩ́ kúsuó jɩ̀ lé kwlíi yɩ́!» 31Lagɔ̀bʋ̀bɔ̀nyʋ̀àkádàà lé lɔ̀ a másɛnyʋaá sɔ́ nyɩalɔɔ́ la sáà, lé á nie á pʋpʋ́ a nyièdɩ mà: «Ɔ́ sa ʋ́ nyʋa neé, bhè ɔ nɩ́ míi ɔ ká ʋ́ ɔ nyoku neé sa à! 32Ɔ́mɔ́ ɔ̀ anɩ́ ɔ̀ ŋwɔ́ɔ la Kláyɩ́sɩ a, lé ɔ̀ ŋwɔ́ɔ la Zúfʋnyʋa a lóo a, ɔ wlʋ́ yɩ́ kúsuó jɩ̀ ɔ kwlíi bhè à ka yɛ́! Bhʋ́ à yi ɔ́ fádùò ka à.» Nyʋaá ɔ yàsɔ́ kʋ kúsié jɩ̀ a, a sɛ́fʋɔ́ á trʋlɔɔ́ sáà.

Zozíi ya kú

(Matíe 27.45‑56; Lúkɩ 23.44‑49; Záan 19.28‑30)

33Yrɩ́zàbhlà kʋ̀ la ʋ́ mà sɩ́tɛ̀ ɩ́ kʋ̀ bhè cúcú kʋ bhlɩ́ɛ́ fɩ́ɛ́ jɩ̀ a plaàda lé glíiyi a ta kla. 34Kosúgbo a glíiyi ta kla yɩ́ a, bhʋ́ Zozíi sa né lé ɔ́ wleè: «Eloyíi! Eloyíi! Lama sabatani?» Ɩ́ gba ŋwɔ́ɔ mà: «Ná Lagɔ! Ná Lagɔ! Lɛ́gbá kʋ̀ʋ bhè ɩ̀ sà mɔ́ɔ nà glɔ̀gbá jɩ̀ a?»#15.34 A zɛlɩɩ sáà Lɔlɔ 22.1. 35Bhlɔ̀bhlɔ̀nyʋ̀àà à kʋ̀ la ʋ́ a, á anɩ: «A pʋ nyúkwlí mà ɔ́ wle Elíi!» 36Múó fa sóo lé ɔ́ mʋ, lé ɔ́ ŋwʋ́a sápla bhʋ́gʋ̀nʋ a mnɩ́, lé ɔ́ gʋalaá zìzie yɩ́ lé ɔ́ nyɛ́ ɔ̀ má mnáada. Ɔ́ anɩ́: «À gláa lé à dʋdʋ̀, lé Elíi ɔ́ pá lɛ́ wɔlɩ́ a, ɔ kɔ́ɔ́ kúsuó jɩ̀ sa à.» 37Zozíi bhɩa wɔlɩ́ lé, ɔ́ nyobhuo bhɩa mɔ̀ɔ.

38Tányɩɛ́ a múó a mnɩ́ɛ́, Lagɔ̀wlʋ̀kádʋ̀ɔ̀ a mnɩ́ a lɔkwɩ kádɛ̀ɛ̀ ɛ́ ghlalɔ mʋ́ pɩ́ sɔ́. Ɛ́ bháa lagowlú lé ɛ́ jɩ́ dʋ̀dʋ kʋ́. 39Wlɔmɛ́ɛnyʋa a sʋ́jàà cífɩɛ́ kʋ̀ la ʋ́ a, ɔ́ yɛ́ cémʋ́ Zozíi kú a, bhʋ́ ɔ́ sa né, ɔ́ anɩ́: Cɩ́cása lé, nyɔɔ́ lɩ̀à ŋwɔ́ɔ la Lagɔ a Yuwliyʋ.

40Ŋwná kʋ la ʋ́, á wlʋ́ʋ la ʋ́ gwá lé á dʋdʋɛ. Á nyièdɩ̀ɛ̀, múó ŋwɔ́ɔ la Malí Madɩlɛ́nɩ, lé múó ŋwɔ́ɔ la Malíi. Ɔ́mɔ́ ŋwɔ́ɔ Zákɩ tòyilɛ yà Zozée sɔ́, a nɛ́. Lé múó ŋwɔ́ɔ la sáà Salomée. 41Ŋwnáá lɩ̀à nɔnʋɔ́ fɩ́ɛ́ Zozíi zrɩ Galilée bhlɩɛ a mnɩ́ a, á yɛ́ɛ ʋ dá. A yɔ̀sɔ́ námɛ la lé á zrɩlɔɔ́ la gà. Ŋwná àna kʋ la ʋ́ lé á jɩ́ɛ́ la Zozíi kʋ́ lé á yi la sáà Zelízalɛ́mʋ.

Á zízìè Zozíi a gàzɛ̀ɛ̀

(Matíe 27.57‑61; Lúkɩ 23.50‑56; Záan 19.38‑42)

42Kosúgbòtànyɩ̀ɛ̀ ya la yiosa ŋnɩ lé a ká la Zúfʋnyʋa a nyɔbhleyru a dʋ̀dʋ kʋ́ gɩglà. 43Mà Alimatée a nyɔ a múó á wlele Zɔ̀zɛ́fʋ a, ɔ́ ŋwɔ́ɔ tɩ́tɩ́plɔjrè a mnɩ́ a nyɩ́kpɔkádɔ, lé ɔ́ gláa sáà Lagɔ a Léyibhlɩɛ́ a yiyitanyɩ. Ɔ́mɔ́ ɔ̀ bhli ɔ́ duo kʋ́ lé srʋ Pilátɩ mà ɔ nyɛ́ ɔ́ Zozíi a gàzɛ̀ɛ̀. 44Pilátɩ nú mà Zozíi ya la kú a, ɩ́ mnɔɔ́ neé. Ɩ́ ka ŋnɩ́ a, ɔ́ wle sʋ́ja a kámanyɔɔ́ lé ɔ́ yrɔ́ɔ́ lé tányɩɛ́ mʋ́ ɔ́ kú a, ɛ́ nɩ ya mʋ́ trʋma a, ɔ ká saá yɩbhlɩ. 45Á srʋ ɔ́ a bhʋ́ ɔ́ ŋwnʋ́ʋ lé Zɔ̀zɛ́fʋ bháʋ́ gàzɛ̀ɛ̀. 46Zɔ̀zɛ́fʋ mʋ lé ɔ kla cʋ́crʋ́ɛ pápɛ́ lé ɔ́ sa gàzɛ̀ɛ̀ kúsuó jɩ̀ lé ɔ́ pɩpɩɛ́. Ɔ́ ŋwʋ́ Zozíi lésuó ʋ̀ kʋ̀ cɔ́kʋ a mnɩ́ a. Lé ɔ́ bhísie cɔ́bhikáda lé ɔ́ sú lésuó né. 47Tányɩɛ́ mʋ́ á zizìè Zozíi a, Malí Madɩlɛ́nɩ yà Zozée ɔ nɛ́ Malíi sɔ́ kʋ la ʋ́, lé a ká la dɛ́ á na kɔ́ɔ́ la zízìè a yɛ́.

Currently Selected:

Málɩ́kɩ 15: NEY

Highlight

Copy