Ruuka 12

Ameeghi ighoro e bhuröngö

(Mataayo 10:26–27, 16:6, 11–12)

1Eriibhagha riyo, ebheku bhe bhaato mbaare bhiikomiine, kerende bhaakabha bharatachana.

Yesu aghasëëma kobhabhoorera abhaanabheegha bhaache singa arabhugha, “Mubhe amiisho no obhotondoru bho Mabharisaayo, gho kubha obhotondoru bhuyo m‑bhonga aghughuuti. 2Ghyokyose kino ghekundekiiru ngekohunyuru, na kino kebhisuru ngeghotooru haheero. 3Amangʼana ghano ꞉ghaaghamburu mo‑kengʼuuri, ngaghutëghëërëru haheero. Wiiki kino musëmiini mo‑bhenyumba, ngeghosiikëru kwo riiraka ikoro ighoro ebhisara bhe chanyumba.

Ëndërëra ghwitëngʼëra obhochongi bho Ryobha

(Mataayo 10:28–31)

4“Mbe, ˆnekabhabhoorera inyu abhasaani bhaane, motabhatiina bhano bhaghwita omobhere. Bharamara kobhiita, bhataaghotora ghuköra angʼana ayende ghokera iyo. 5Amare, nekobhëërëki uno moghotora ghotiina. Motiine Eryobha, gho kubha reramara ghwita omooto, ndeenyi no obhotoro bho komurëkëra mwiribha re mororo. Mbe, uyo niwe momotiine.

6“Kana, ebhichëghë bhitaano, tigha mbehaaghoru kwo riighori isuuhu chwee? Koru hangʼu, ghetaanyi‑ho koru kimu kino Eryobha rekwebhu. 7Amare kwo ribhaara reenyu, Eryobha ndyeche omubharo o chanchweri choose che mitu gheenyu. Mbe, motabha moratiina gho kubha inyu moonyi no obhwëra ghokera ebhichëghë bhyaru.

Komwishereri Yesu ambërë e bhaato

(Mataayo 10:32–33, 12:32, 10:19–20)

8“Mbe, ˆnekabhabhoorera kubha, omooto wowoose uno akonyishereri ambërë e bhaato, eni Omoona o Mooto woose nekomwishereri ambërë e bhamarayika bha Ryobha. 9Wiiki, omooto woose uno akonyanga ambërë e bhaato, na neeni nekomwanga ambërë e bhamarayika bha Ryobha. 10Wiiki Eryobha ndeghotora kobhaabhëra abhaato bhano bhakonyanga eni Omoona o Mooto, amare retaaghotora kobhaabhëra abhaato bhano bhakwanga Akörö Ahörëëru.

11“Hano mokohiru mo‑masinaghooghi, na ambërë e bhakangati, na bhano bhaanyi no obhotoro, koru hangʼu motanyaaka ighoro e ghano mokobhugha gho ghwitachura. 12Motanyaaka gho kubha, eriibhagha riyo, Akörö Ahörëëru nekobheeghi amangʼana ghano ghakwëndëru mobhughe.”

Eghetuubhaani ke mwame omughëëghë

13Mo‑rikinda riyo re bhaato, omooto umu akamobhoorera Yesu akabhugha, “Oo Omweghi, nobhoorere omwito, ahööhi aghabho ino taata ꞉atotighiire.”

14Yesu akamugharokeri akabhugha, “N‑niwe ꞉antooriri nibhe omoteni o kiina, hamu omuhööhi o ghabho ghate yaanyu?” 15Akamara Yesu akabhabhoorera abhaato bhayo akabhugha, “Mwimööhërëri! Mwichonge na atëëmö e bhwighomberi bho bheghiro, gho kubha, obhuhöru bho mooto, bhotaakorwera mo‑bhwaru bho bheghiro bheeche bhino anyi nabhyo.”

16Akamara Yesu akabhabhoorera eghetuubhaani arabhugha, “Naare‑ho omwame umu, uno omoghondo waache ore unöghiri chwee. 17Akiibhoori mo‑motema waache akabhugha, ‘Nibhu nguköra ibheere? Ntighöötë ahaghiro hohoose hano neghotoora omunöghö waane!’

18“Akamara akabhugha, ‘Neghuköra hangʼu. Nekuhaanyura ebhitara bheene, nyaabhëkë eriitara erende ikoro ghokera bhino. Neghotoora‑mu omunöghö waane woose, ne ebheghiro bheene ebhende. 19Ndamara nekwibhoorera mo‑motema waane, “Ibheere noonyi ne ebheghiro bhyaru ebhichömu bhino witooriire amamba. Mbeghoghwisha kwo meeka myaru! Mbe, noweere, uraaghërë na kunyo, uchömëru!”’

20“Amare, Eryobha rekamobhoorera rekabhugha, ‘Iye mughëëghë onyi! Obhotiko bhuno bho reero, nooghoku! Ibheere ebheghiro bhiyo witooriire, mbeekubha bhyawe?’”

21Yesu akamareereri gho kobhugha kubha, “Hangʼu ekuucha kubha, kwo mooto wowoose uno akwinyaaki gho ghwikomera na ghwitoorera obhwame bho mo‑se ino, amare taanyi gho ghwitoorera obhwame kwo Ryobha re Mwishaaro.”

Ameeghi ighoro e kubha na ahaho

(Mataayo 6:25–34)

22Akamara Yesu, akabhabhoorera abhaanabheegha bhaache akabhugha, “Mbe, ˆnekabhabhoorera, motanyaakera eriimanya reenyu, kubha neke mookurë, hamu kubha neke mokobheeka. 23Wiiki obhuhöru mboghokera ebhiinyakurë, omobhere woose, noghokera changibho.

24“Mwituuri eghetuubhaani ke makoorukooru. Ghataheemi koru ghatahaatu, ghataanyi na amamba koru eghitara, amare Eryobha ndehagharaagheri. Inyu moonyi no obhwëra bhokoro chwee ghokera ebhinyönyi! 25N‑niwe ghate yaanyu uno aghotora gho kwinyaaki kooche, kwiyëngëra obhuhöru bhooche koru gho sa imu?#12:25 Obhuhöru bhooche koru gho sa imu. Egheteemoro ekende ngeghotora kubha, kwiyëngëra obhurë bhooche koru gho kubhökö kumu? 26Mbe! Aribha motaaghotora ghuköra koru angʼana isuuhu ke iyo, ngwake mokwinyaaki ighoro e ghayo aghande?

27“Mwituuri ebhibhari, kinya bhekumëra na kubhari. Bhetaaghuköra omoremo, koru bhetaaghwitumera amaghööti. Amare ˆnekabhabhoorera kubha, koru omutëmi Seremaani mo‑bhokumi bhooche bhoose tabheekuru bhoheene kinya ebhibhari bhiyo. 28Mbe, aribha Eryobha ndehaabheeki amanyaaki ghi ibhara, koru nangabha ghaanyi‑ho reero, na tabhoori ngakurëkëru mo‑mororo, ibheere, nibhu reghuköra retighe kobhabheeki inyu ghokera ebhibhari bhe manyaaki ghayo? Neke abhaato bhano moonyi no obhokumi bhosuuhu?

29“Mbe, motabha moranyaaka kubha, neke mookurë, hamu neke mookunyo, motabha morinyaaki ighoro e ghayo. 30Abhaato bhano bhataryeche Eryobha hano mo‑se, mbahaanyaakera ebheghiro bhiyo. Amare inyu, Taata waanyu uno anyi Mwishaaro neeche bhoheene kubha mokobhyënda. 31Gho ghayo, mutabhare singa obhutëmi bho Ryobha, iryo ndëköbhëëngërëërëri ghayo aghande.

Obhwame bho Mwishaaro

(Mataayo 6:19–21)

32“Motatiina, inyu erikinda isuuhu, gho kubha Iso waanyu uno anyi Mwishaaro nasiighiri kobhaha obhutëmi bhooche. 33Mbe, moghori ebheghiro bheenyu, mobhahë abhahabhe. Mwitoorere amaghöchi ghano ghataaghokunguha, mubhe na agharinga ino etaaghosuuha Mwishaaro, hano omwibhi ataakohika, koru ebhebhongi bhetaakobhongi. 34Ahaghiro hano moghotoora agharinga yaanyu, niho ne emetema gheenyu gheekubha.

Mwikare mwisëëmiri

35“Mwikare mwisëëmiri eriibhagha ryose, ne ebhemore bheenyu, bhibhe bheraaka. 36Mubhe kinya abhasësë bhano bhaghughanya omutëmi waabho agharuke koru mwikwirëra, kubha araacha na ghuköngʼööta eghisëku, bhabhe bhiisëëmiri hayo hayo komwighorera. 37Mbiitabhiiru abhasësë bhano omutëmi waabho akuucha abhönë bharamughanya. Mahëënë ˆnekabhabhoorera kubha, naghwitëma omunaso, na ghusëëma kobhahökëri, na kobhaghënëhi mo‑bhiinyakurë. 38Ngʼoni abhasësë bhano omutëmi waabho aragharuka obhotiko bhooghate, hande atabhoori churi, na kobhabhöna bhiisëëmiri. 39Amare, mumënyë bhoheene angʼana ino, aribha omwene anyumba angamënyiri eriibhagha rino omwibhi akuucha, nangiisëëmiri ghochonga, kubha omwibhi ataacha kuucha na kuhaanyura eghisëku ke nyumba yaache. 40Gho ghayo, na niinyu, mubhe mwisëëmiri eriibhagha ryose, gho kubha eni Omoona o Mooto, nekuucha kwo riibhagha rino motitëngʼiire.”

Eghetuubhaani ke musësë omuhëënë

(Mataayo 24:45–51)

41Ibheere, Bheetero akamobhoori Yesu akabhugha, “Omutëmi, eghetuubhaani kino notobhooriire itu bheene, ghasi na abhaato bhoose?”

42Omutëmi akamugharokeri akabhugha, “Mbe, n‑niwe omusësë omuhëënë wiiki uno anyi na amangʼiini? N‑omusësë uno omutëmi waache akomotoora kubha omwimeerereri o bhatamishi abhande mo‑ka yaache, kubha abhe arabhaha ebhiinyakurë kwo riibhagha rino rirëngʼaaniire. 43Neekubha ngʼoni kwo musësë wuure omutëmi waache aragharuka koru mo‑rughëndö, amubhönë araköra hangʼu. 44Mahëënë ˆnekabhabhoorera, omutëmi uyo nakomotiiri omweya mo‑moremo uyo kubha abhe omwimeerereri o bheghiro bheeche bhyose bhino anyi nabhyo!

45“Amare, omusësë uyo naghwituuri mo‑körö yaache arabhugha, ‘Omutëmi waane naghukëëchëra ghugharuka,’ niho asëëmë kobhatëma abhatamishi bhaghëndi bhaache, abhasubhe kwo bhakari, asëëmë kuraaghëra na kunyo, na kurëëwu. 46Mbe, omutëmi waache uyo naghugharuka orosiko ne eriibhagha rino atitëngʼiire. Niho omutëmi wuure akomurööna na komutëma anchagho inkoro na komurëkëra hano abhaato bhano bhataaghokumi bhaanyi.

47“Omusësë uno amënyiri amënda gha mutëmi waache, amare tiisëëmiri koru ghoghaköra, nakuröönu chwee. 48Amare, omusësë uno ateeche amënda gha mutëmi waache, araköra ghano gharëngʼaaniire kuröönu, iwe nakuröönu hasuuhu hangʼu. Omooto uno ahaabhuru bhyaru, naghusabhu bhyaru wiiki.

Yesu ˆaghaghëri abhaato ghutaana

(Mataayo 10:34–36)

49“Eni, niichiri ghughööti omororo mo‑se. Nëngëëndiri nerighi omororo uyo oraaka! 50Wiiki eni mwene, nirëngʼaaniire nehetere obhubhatiiso#12:50 Obhubhatiiso bhuyo n‑obhubhatiiso bho nyaako. bhuno bhokwëndëru nibhatiisu. Anyaako ino neenyi nayo n‑inkoro chwee, mbagha obhubhatiiso bhuyo bhohikeerane. 51Kana, moghwituuri kubha niichiri mo‑se kurëëta omurëmbë? Mbe, tiyaanyi! ˆNekabhabhoorera kubha, niichiri ghutaani abhaato. 52Korwera ibheere, mo‑nyumba e bhaato bhataano, bhatato mbaghutaana na bhabhere. Bhabhere nabho, mbaghutaana na bhayo bhatato. 53Ishe, naghutaana no omoona waache, no omoona woose, naghutaana ni ishe waache. Nyina, naghutaana no omuukë waache, omuukë naghutaana na nyina waache. Nyinabhiyaara naghutaana no omuku, omuku woose naghutaana na nyinabhiyaara.”

Kumënya eriibhagha re Yesu

(Mataayo 16:2–3)

54Yesu akabhabhoorera obhoyo bho bhaato bhayo ꞉bhaare hayo akabhugha, “Hano mohaarighi erishaaro rerarwera anyancha, hayo hayo mobhugha, ‘Ambura neghutëëka.’ Itëëka. 55Hano mokorighi obhukama bhorarwera bhachuuta, hayo mobhugha, ‘Amaaho ˆeghatora.’ Wiiki hangʼu ekubha. 56Inyu m‑bharöngö moonyi! Mokumënya bhoheene ebhyërëkërëri bhe mwishaaro na bhe se. Mbe! Ngwake kana mokwanga kumënya ekyërëkërëri ke mangʼana ghano ghakorwera chaasiko chino?

Koghwana na bhano bhaghoghusëma

(Mataayo 5:25–26)

57“Ngwake motaaghotora ghwishererani inyu bheene, ghuköra angʼana anchömu ino moghotora ghuköra? 58Hano uno aghoghusëma aghokohira mwibharacha, wiiköngʼi koghwana nawe eriibhagha mokeere mo‑nchëra. Aribha taanyi hangʼu, naghokohiki ambërë e moteni o kiina. Omoteni uyo o kiina, naghokohira mo‑bhaashirikare, ibho mbaghoghusöhi mwighërëcha. 59ˆNeghakobhoorera, tookohoroka moose, mbagha hano asiire yaacho yoose ekorehu!”

Currently Selected:

Ruuka 12: ntk

Highlight

Copy