Ruuka 13

Motuukuunere amasari motasireekerera

1Eriibhagha riyo, abhaato abhande bhakaacha bhakamuha Yesu amangʼana gha Bhaghariraaya bhano Bhiraato itiri hano ꞉bhaare bharaghöögha chaatugho cheebho che koruusi ambërë e Ryobha.

2Yesu akabhabhoorera akabhugha, “Kana, moghwituuri kubha Abhaghariraaya bhayo ꞉mbaakuure hangʼu gho kubha mbaare na amasari ghokera Abhaghariraaya abhande bhoose? 3ˆNekabhabhoorera taanyi hangʼu! Moraanga ghotuukuunera amasari ghaanyu, hangʼu hangʼu koru inyu moghosireekerera bhoose. 4Mohiite abhaato bhaare ikomi na bhanaane bhano ꞉bhaaghweriiru no omunara iyo Sirowamu. Kana, moghwituuri kubha ibho nibho ꞉bhaare na amasari ghokera abhiikari abhande bhoose bha Yerusareemu? 5ˆNekabhabhoorera tiyaanyi! Moraanga ghotuukuunera amasari ghaanyu, hangʼu hangʼu inyu bhoose moghosireekerera!”

Eghetuubhaani ke mote uno otaaghusönga amakorobhese

6Akamara, Yesu akabhabhoorera abhaato bhayo eghetuubhaani, arabhugha, “Naare‑ho omooto umu uno ꞉emiri omote uno okobherekeru omotiini, mo‑moghondo waache. Akamara, akaacha ghutabhara amakorobhese, amare taaghabhwine. 7Ibheere, akamobhoorera omutamishi o moghondo uyo akabhugha, ‘Mööhi! Ibheere neenyi ne emeeka etato neraacha ghutabhara amakorobhese mo‑mote o motiini, koru ntiimara mböna ghyokyose! Mbe, nowonunge, otiikara orasari eriiröbhë bhoowa.’

8“Amare, omutamishi uyo akamugharokeri akabhugha, ‘Omutëmi, nowotighe omooka uno, newoshibhere na kowotoorera asururuuta. 9Ibheere aribha orasönga amakorobhese omooka uno okuucha, n‑kumangi! Oraanga ghusönga, towonunge.’”

Yesu ˆakamuhöri omukari orosiko ro Riikane

10Orosiko rumu ro Riikane, Yesu naare mo‑risinaghooghi rimu, areeghi abhaato. 11Muyo, naare‑mu omukari umu, uno are aghööturu no omusambu kwo emeeka ikomi ne enaane. Omusambu uyo, ꞉noomokumbiri omughöngö, na taatoriri ghughöröröka koru hasuuhu.

12Hano Yesu amorooche, akamobherekera ache ghokooche, akamobhoorera akabhugha, “Yiima, obhubhabharu bhoocho bhookahöra, ibheere m‑muhöru onyi!” 13Yesu aghatoora amabhökö ighoro yaache, hayo hayo aghaghöröröka, aghasëëma koreghongi Eryobha.

14Orosiko runo Yesu ahöriri omooto uyo, ndoore orosiko ro Riikane, eghaghëri omukangati o risinaghooghi aghakarara chwee. Akabhabhoorera abhaato akabhugha, “Ncheenyi‑ho, chaasiko ishaasabhe che kuhöki emeremo. Mbe, muuche muhöru mo‑chaasiko chiyo, amare motaacha orosiko ro Riikane!”

15Omutëmi akamugharokeri, “Inyu m‑bharöngö moonyi! Inyu bhoose moghuköra emeremo mo‑rosiko ro Riikane. Taanyi‑ho mooto wowoose, aghoshookorera angʼömbë yaache hamu atikere yaache koru a‑mowaara, ayehire kunyo amanche, nangabha roonyi orosiko ro Riikane? 16Kana omukari uno, o mo‑rwibhoro ro Abhurahamu, namariri kinya emeeka ikomi ne enaane anyi no obhubhabharu bhooche bhuno Erishambu reere remubhöhiri. Mbe, uyo woose, taakurëngʼaanera asaasoru koru mo‑bhubhabharu nangabha roonyi orosiko ro Riikane?”

17Hano Yesu abhughiri ghayo, hayo hayo abhabhisa bhaache bhoose, bhakarighi chaasoni. Amare abhande bhoose, bhaghasiighasiigha chwee gho ghiri e mangʼana amachömu ghano aköriri.

Eghetuubhaani ke hëkë e harataari no obhotu bho kimëra

(Mataayo 13:31–33; Maariko 4:30–32)

18Akamara Yesu akabhoori akabhugha, “Obhutëmi bho Ryobha mbotuubhiine na ke? Nekobhotuubhaani na ke? 19Mbotuubhiine na ahëkë e harataari,#13:19 Ahëkë e harataari. Abhayahuuti ꞉mbaayimënyiri kubha n‑ahëkë isuuhu chwee, ghokera echende. Orayeemi imëra ibha omote mokoro. ino omooto ꞉emiri mo‑moghondo waache. Ahëkë ekamëra, ekabha omote mokoro. Ebhinyönyi bhekaacha bhekaabhëka ebhenyumba bheebho mo‑chaasa cheeche.”

20Yesu akabhugha wiiki, “Nekobhotuubhaani na ke obhutëmi bho Ryobha? 21Mbotuubhiine no obhotu bho kimëra bhuno omukari ahiimoki, aghasangerani mo‑matebhe atato gha bhotu, kerende obhotu bhuyo bhoose bhoghatöta.”

Ghusöha mo‑bhutëmi bho Ryobha

(Mataayo 7:13–14, 17:21–23)

22Hano Yesu are mo‑rughëndö ro ghuye Yerusareemu, akabha areeghi abhaato mo‑meghya na mo‑bhyaro bhino ꞉ahetiire. 23Orosiko rumu, omooto akamobhoori, “Omutëmi, abhaato bhano bhaghotooribhu, mbaakubha bharëngʼaaneru hangʼu?”

Yesu akabhugha, 24“Mwiköngʼi bhoose ghusöha gho kohetera ekehita egheghute. ˆNekabhabhoorera kubha, abhaato bhaaru mbaghusaki ghusöha, amare bhataaghotora. 25Hano omwene aka aghwighara ekehita, inyu moghusaagha mwimeeriire anche, moghusëëma ghuköngʼööta ekehita na ghusabha morabhugha, ‘Oo Omutëmi, notwighorere.’ Amare nakobhagharokeri abhughe, ‘Ntebheeche inyu! Ntyeche hayi morweriire!’

26“Inyu mokomugharokeri mobhughe, ‘Kana ꞉ntuuraghiire na kunyo haghirohamu na niiye! Wiiki niiye ꞉weeghiri mo‑bhyaro bhiito!’ 27Amare nakobhagharokeri abhughe, ‘Nimariri kobhabhoorera, ntebheeche na ntyeche hayi morweriire! Mondwere hano, inyu abhaköri bha mabhe!’

28“Niho mokorera na ghukararaati amiino, hano mokomorighi Abhurahamu, Isaka, na Yakobho, na abharööti bhoose bhaanyi mo‑bhutëmi bho Ryobha. Amare inyu mookubha mwighariiru anche! 29Abhaato mbakuucha koru chambaara choose che se, mbaghwikara mo‑ndaaghëra mo‑bhutëmi bho Ryobha.

30“Mutëghëërërë! Abhaato bhano bhaanyi abhaanyuma ibheere, mbakuucha kubha a bhambërë. Wiiki bhano bhaanyi a bhambërë ibheere, mbaakubha abhaanyuma.”

Yesu ˆakabhatöngëra abhaato bha Yerusareemu kubha mbakuröönu

(Mataayo 23:37–39)

31Eriibhagha riyo riyo, Amabharisaayo abhande ꞉mbaamutambiine Yesu bhakamobhoorera bhakabhugha, “Nooru hano, oghi ahaghiro ahande, gho kubha Herote Antibha nakwënda ghoghwita.”

32Yesu akabhagharokeri, “Herote uyo n‑ambwe!#13:32 Herote uyo n‑ambwe. Hano bhakobhugha n‑ambwe taanyi itoki, ambwe n‑omooto mongʼiiningʼiini. Mughëndë momobhoorere, ‘Mööhi! Reero na tabhoori, nekuhëëbha emisambu koru mo‑bhaato, na kobhahöri amabhabharu ghaabho, no orosiko ro ghatato, nekohikeerani omoremo waane.’ 33Nekwëndëru nighöötë orughëndö roone ro ghuye Yerusareemu reero na tabhoori na bhasiire, mbagha nehike‑ho, gho kubha teenyi bhoheene omurööti ghokwera ahaghiro ahande, anche e Yerusareemu!

34“Inyu abhaato bha Yerusareemu! Inyu abhaato bha Yerusareemu! Mokobhiita abharööti na kobharasa amabhohe abhaato bhano Eryobha ꞉reetomiri. Kwo riibhagha ryaru nyëndiri kobhakoma inyu, kinya angökö ehaakoma ebhechuri bheeche mo‑mabhabha ghaache, amare mötëëndiri. 35Mumööhërëri! Ibheere Eryobha ndebhatighiri inyu na anyumba yaanyu! Mbe, ˆnekabhabhoorera kubha motaakondighi wiiki mbagha hano mokobhugha kubha, ‘Niitabhiiru uno akuucha kwo riina re Mutëmi Waryobha!’#13:35 Mööhi Sabhuri 118:26.”

Currently Selected:

Ruuka 13: ntk

Highlight

Copy