Ruuka 16

Eghetuubhaani ke mwimeereri omongʼiini

1Yesu akabhabhoorera abhaanabheegha bhaache eghetuubhaani arabhugha, “Naare‑ho omwame umu no omwimeerereri waache. Omwimeereri uyo, aghasëmu kubha naare arasari ebheghiro bhe mwame waache. 2Ibheere, omwame uyo akamobherekera omwimeerereri waache, akamobhoorera akabhugha, ‘M‑mangʼana ke ghano nekooghu ighoro yaacho? Onyëërëki omubharo o bheghiro bheene, gho kubha toghotora wiiki kubha mwimeerereri o bheghiro bheene.’

3“Omwimeerereri uyo akiibhoori, ‘Nibhu nguköra ibheere? Omutëmi waane, ꞉naabhughiri nakonduusi mo‑meremo. Nteenyi ni inguru che korema. Wiiki nekorighi chaasoni kubha nerasabhasabha. 4Ibheere! Hano neekubha nimariri kuhëëbhu mo‑meremo ghino, nyeeche kinya neghuköra, abhaato bhaache bhangënëhi mo‑chaaka cheebho.’

5“Ibheere, omwimeereri uyo akabhabherekera abhaato bhoose bhano ꞉bhaare na chasiire che mutëmi waache ke umu umu. Akamobhoori o mumbërë akabhugha, ‘Asiire yaacho kwo mutëmi waane hangʼana hayi?’ 6Akamugharokeri, ‘Asiire yaane, n‑amatiraamu eriighana gha maghuta gha miseyituuni.’ Omwimeereri uyo akabhugha, ‘Imoki eritarataashi rino, ndyandëkuru asiire yaacho. Ikara hano bhwango, oyiigharure, andëka miröngö etaano.’ 7Akamara akamobhoori omosiire owonde, ‘Iye, asiire yaacho hangʼana hayi?’ Akamugharokeri, ‘Amaghönëra eriighana gha ngano.’ Omwimeereri uyo akabhugha, ‘Imoki eritarataashi rino re siire yaacho, andëka miröngö enaane.’

8“Achekumara, omwame akamoghongi omwimeereri uyo ataanyi omuhëënë kwo bhongʼiini bhooche. ˆNekabhabhoorera ghayo gho kubha, abhaato bha ase ino mbaanyi no obhongʼiini chwee, gho kobhihökëri ebheghiro bheebho abheene kwo bheene, ghokera abhaato bha bhwero. 9Eni ˆnekabhabhoorera, muhökëri ebheghiro bheenyu mo‑se ino mwibhönërë abhasaani mo‑bhutëmi bho Ryobha, kubha eriibhagha moghosireru ebheghiro, bhabhaghënëhi mo‑bhwikari bho miishe ghyose.”

10“Omooto woose uno anyi muhëënë kwo mangʼana masuuhu, niwe akubha omuhëënë koru kwo mangʼana amakoro. Hangʼu hangʼu, omooto woose uno ataanyi muhëënë kwo mangʼana masuuhu, wiiki taakubha muhëënë koru kwo mangʼana amakoro. 11Ibheere aribha inyu motabheere abhahëënë gho kuhökëri obhwame bhoonyu bho mo‑se ino, n‑niwe akobhaha obhwame bho hëënë? 12Aribha motabheere abhahëënë gho ghotindëka ebheghiro bhe wonde, n‑niwe akobhaha ebheghiro bheenyu inyu bheene? 13Taanyi‑ho omutamishi uno aghotora kuhökëri abhatëmi bhabhere kwo riibhagha rimu, gho kubha nakomosiigha umu na komurëgha owonde, hamu aghöötane na umu na komutaraaha owonde. Motaaghotora korihökëri Eryobha na chambiiri kwo riibhagha rimu!”

14 Amabharisaayo, hano bhooghwire amangʼana ghayo gha Yesu, bhaghasëëma komusëka gho ghitaraaho, gho kubha mbaare bhasiighiri chwee chambiiri. 15Yesu akabhabhoorera akabhugha, “Inyu, moghwiköri moonyi no obhuhëënë ambërë e bhaato. Eryobha ndyeche amangʼana ghano ghaanyi mo‑metema gheenyu. Wiiki amangʼana ghano abhaato bhasiighiri, ngahaabha amabhe ambërë e Ryobha!

Ameeghi ighoro e meghiro ghe Musa no obhutëmi bho Ryobha

(Mataayo 11:12–13, 5:31–32; Maariko 10:11–12)

16“Emeghiro na Amandëkö gha bharööti, mbeere bhighööturu na abhaato mbagha eriibhagha re Yohana. Korwera eriibhagha riyo, Angʼana Anchömu e bhutëmi bho Ryobha ekabha arasanchibhu, na abhaato bhaaru mbaghwiköngʼi ghusöha. 17Koru hangʼu, n‑kohoho chwee kwo rishaaro na ase koheta, ghokera ekingʼöchö ghesuuhu ke meghiro ghe Musa koruusibhu.

18“Omosubhe, uno akomotigha omukari waache na ghokwira owonde, n‑ghutaara aghutaara nawe. Wiiki arakwira omukari uno ahëëbhuru no omosubhe waache, uyo wiiki n‑ghutaara aghutaara nawe.

Eghetuubhaani ke mwame na Rasaaro

19“Naare‑ho omwame umu, uno are araköra obhughëni chaasiko choose, na kobheeka amaghööti amachömu, wiiki gha riighori ikoro gha sambaraawe. 20Mo‑ghisëku ke mwame uyo, naare‑ho omuhabhe umu, eriina reeche Rasaaro. Rasaaro uyo, omobhere waache woose noore wichwire amaghaati. 21Rasaaro akabha araghiighomba bhamuhë amatigho ghano ꞉ghaare gharagho koru mo‑meecha e mwame uyo. Koru chaseese cheekabha cheramumëësa amaghaati ghaache.

22“Antenero, omuhabhe Rasaaro aghaku. Bhamarayika bhakamohira Mwishaaro, haghuhe na Abhurahamu. Omwame wuure woose aghaku, akaryeku aghaye nyaari. 23Hano omwame uyo are aranyaaka chwee iyo, aghaghëgha amiisho akarighi Abhurahamu gho kurë, na Rasaaro anyi haghuhe nawe. 24Akamobherekera kwo riiraka ikoro, ‘Taata Abhurahamu, ondigheri changori! ˆNekanyaaka chwee mo‑mororo uno! Omotome Rasaaro ache hano neenyi, aköri anyinga e kyara mo‑manche, atonyi mo‑roreme roone gho ghiri romitite.’

25“Amare, Abhurahamu akamugharokeri, ‘Oo omoona waane, ohiite kubha ꞉noobhwine amangʼana amachömu mo‑riimanya reecho, hano ore mo‑se. Rasaaro nawe, ꞉naabhwine amabhe. Amare ibheere, iwe nakuhönibhu hano, na niiye nokunyaaka. 26Ghokera ghayo, ghate yiito na niinyu, hatooruru rirooma ikoro chwee. Ndetooruru kubha, bhaare bhakwënda koru ino kuucha ghokoonyu, bhatatora korekera, na bhaare bhakwënda koru iyo kuucha ino, bhatatora.’

27“Omwame uyo akabhugha, ‘Taata, ˆneghaghusabha omotome Rasaaro aghi awiito o‑taata waane, 28neenyi na bhaomwito bhataano, abhashaangʼi bhataacha kuucha ino mo‑nyaako ahaari.’ 29Amare, Abhurahamu aghagharokeri akabhugha, ‘Bhaömöönyu bhayo, mbaanyi na amangʼana ghano ghaandëkuru na Musa na abharööti. Mbakwëndëru ghoghatëghëërëra ghayo!’

30“Aghagharokeri akabhugha, ‘Tiyaanyi, taata Abhurahamu! Amare, omooto arabha aruure ino mo‑bhaku na akabharwera, niho bhaghotuukuunera amasari ghaabho.’ 31Abhurahamu akamugharokeri akabhugha, ‘Bhaömöönyu bhayo, aribha bhataaghotereera ghano ghaandëkuru na Musa na abharööti, bhataaghotereera koru aribha omooto angaryoka koru mo‑bhaku.’”

Currently Selected:

Ruuka 16: ntk

Highlight

Copy