Ruuka 20

Abhakangati bha Bhayahuuti ˆbhakaanga obhuhëënë

(Mataayo 21:23–27; Maariko 11:27–33)

1Orosiko rumu hano Yesu are areeghi abhaato Mwisëngërö na kobharaghaneri Angʼana Anchömu e Ryobha, niho abhakoro bha bhachaama, na abheeghi bha meghiro, na abhagharuka bha Bhayahuuti bhakamusëëta. 2Hano bhahikiri bhakamobhoori bhakabhugha, “Notobhoorere, ghano iye oghuköra, noghuköra kwo bhotoro bhwa we? Na n‑niwe uno akoheere obhotoro bhuno?” 3Akabhagharokeri akabhugha, “Na neeni nekobhabhoori angʼana imu. Momboorere, 4obhotoro bho Yohana bho kubhatiisa ꞉mboorweriire kwo Waryobha ghasi mo‑bhaato?” 5Hayo, bhakabhoorani bharabhugha, “Torabhugha kubha Eryobha niryo ꞉reemotomiri Yohana kubhatiisa, nakobhugha, ‘Mbe! Ngwake motaamokumiri?’ 6Wiiki toragharokeri kubha ꞉mbooruure mo‑bhaato, abhaato bhano bhoose mbaghoturasa amabhohe, gho kubha mbaanyi no obhuhëënë kubha Yohana m‑murööti are.” 7Antenero, bhakamobhoorera, “Toteeche obhotoro bhooche hayi ꞉bhoorweriire.”

8Yesu akabhabhoorera, “Na neeni nteekobhabhoorera n‑kwo bhotoro ke neghuköra ghano.”

Eghetuubhaani ke bharemi abhabhe

(Mataayo 21:33–46; Maariko 12:1–12)

9Akamara, Yesu akabhabhoorera abhaato eghetuubhaani akabhugha, “Naare‑ho omooto umu, uno aremiri omoghondo waache na kwemi emisabhiibhu. Akamara akabhaha omoghondo uyo abharemi, kwo miishererani gha kuhööha omunöghö. Hano amariri, aghaköra orughëndö ro ghuye mo‑se e kurë, akamara chaasiko chaaru anyi iyo. 10Hano chaasiko che riighësa chehikiri, akamotoma omutamishi waache mo‑bharemi bhayo, kubha bhamuhë eribhaara reeche re munöghö. Amare, hano omutamishi uyo ahikiri, abharemi bhayo bhakamutëma na komugharoki amabhökö bhoowa.

11“Omwene omoghondo, akamotoma omutamishi owonde. Omutamishi uyo woose bhakamutëma bhakamosooki, bhakamara bhakamuhëëbha mabhökö bhoowa. 12Akamotoma omutamishi o ghatato. Uyo woose bhakamunyahaara, bhakamuhëëbha.

13“Antenero, omwene omoghondo akabhugha, ‘Ibheere, nikörë bhu? Kuno, nekomotoma omoona waane omosiighani! Hande abhe uno, mbakomosooka.’ 14Amare, hano abharemi bhayo bhamorooche, bhakabhugha, ‘Uno, niwe omughabhi o bheghiro bhi ishe. Ibheere ntomwite, aghabho yaache ibhe ghokwito.’ 15Mbe, bhakamoruusi anche e moghondo, bhakamwita.”

Niho Yesu akabhabhoori akabhugha, “Ibheere, omwene omoghondo uyo nibhu akobhaköra abharemi bhayo? 16Nakuucha na kobhiita abharemi bhayo, no omoghondo waache, nakobhaha abhande!” Hano abhaato bhooghwire amangʼana ghayo, bhakabhugha, “Amangʼana ghayo ghataacha korwera naabha!”#20:16 Mööhi Isaaya 5. 17Yesu akabhoomeri amiisho, akabhabhoori, “Mbe! Amandëkö ghayo neke ghakwërëki?

‘Eriibhohe rino abhaabhëki ꞉bhaangiri,

niryo ribheere eriibhohe ikoro re bhoroso.’#20:17 Mööhi Sabhuri 118:22.

18“Mbe, omooto wowoose uno akubha aghweriire hano haanyi ne eriibhohe riyo, naghotenekateneka. Wiiki, wowoose uno rekomoghwera, ndekomuse inkongʼorimu.”

19Abheeghi bhayo bha meghiro na abhakoro bha bhachaama, bhakamënya kubha eghetuubhaani kino n‑ghekeebho keere. Ibheere bhakëënda komughööta hayo hayo, amare bhaghatiina obhoyo bho bhaato.

Eribhoori re komutëgha Yesu ighoro e ghutöbhi erighööti

(Mataayo 22:15–22; Maariko 12:13–17)

20Gho ghayo, abhakoro bha Bhayahuuti, bhaakabha bharamwisuncha Yesu chwee, bhaghatoma abhaseghaayi bhano ꞉bhiiköriri kubha n‑abhaato bhachömu. Amare, mbaare bharatabhara bhamughöötë Yesu kwo mangʼana ghaache, kubha bhamohire mo‑mukangati uno atooruru na Kayisaari, bhamusëmë.

21Ibheere, abhaseghaayi bhayo bhakamobhoori bhakabhugha, “Omweghi, ntweche kubha angʼana yoose ino oghosiikëra na kweghi n‑e hëënë. Wiiki nokweghi amangʼana gha Ryobha kwo bhuhëënë, abhaato bhamënyë kinya okwënda, wiiki tookomwikara a‑mughöngö omooto wowoose wuure. 22Mbe! Kana, mo‑meghiro ghe Musa, ntoghwisherereru tomoruuseri Kayisaari erighööti, ghasi tiyaanyi?” 23Hayo hayo Yesu akamënya obhobhe bhoobho, akabhabhoorera akabhugha, 24“Mönyëërëki orobhiiri ro tinaari. Abhicha ino, ne eriina rino, m‑bhya we?” Bhakamugharokeri bhakabhugha, “M‑bhe Kayisaari.” 25Yesu akabhabhoorera akabhugha, “Mbe, momuhë Kayisaari bhino bheenyi bhe Kayisaari, wiiki morihë Eryobha bhino bheenyi bhe Ryobha.”

26Erigharokeri riyo re Yesu, rekabharoghoori chwee, rekabhakiri. Bhataatoriri komughööta kwo mangʼana ghano asiikiire ambërë e bhaato.

Eribhoori ighoro e koryoka kwo bhaato

(Mataayo 22:23–33; Maariko 12:18–27)

27Mbe, Amasatukaayo bhano ꞉bhaare bhareeghi kubha abhaku bhataakoryoka, bhakamusëëta Yesu bhakamobhoori bhakabhugha, 28“Omweghi, Musa ꞉naaturagheriiri mo‑meghiro gheeche kubha, aribha omooto akuure, aghatigha mkaache ataanyi no omoona, nekwëndëru omonyi waache amughabhe omosino uyo, gho ghiri amwibhorere omosiri abhaana.#20:28 Mööhi Kohiita kwo Meghiro 25:5–6. 29Ibheere, tobhughe mbaare‑ho abhabhureni mohungate bha nda imu. O mumbërë aghakwira omukari, aghaku ataanyi no omoona. 30Omosuuhu waache o kabhere, [akamughabha omosino uyo woose aghaku atiibhwire nawe]. 31Akamara o ghatato, woose akamughabha, aghaku. Ekabha hangʼu hangʼu kwo bhoose mohungate. Bhayo bhoose, bhaaghaku bhataatighiri omoona wowoose. 32Antenero, omukari uyo woose aghaku. 33Ibheere notobhoorere, mo‑rosiko runo roghughambu kubha abhaato bhoose mbakoryoka, omukari omosino uyo naakubha muka we? Ntokobhoori hangʼu gho kubha, bhoose mohungate ꞉mbaamokwiriri!”

34Yesu akabhagharokeri akabhugha, “Abhaato bha riibhagha rino mbaghokwira na ghokwiru. 35Amare bhaare Eryobha rerooche mbakurëngʼaanera koryokibhu mo‑bhaku na kumanya mo‑se ahë, bhayo bhataaghokwira, koru ghokwiru. 36Wiiki bhataaghotora ghoku, gho kubha mbaakubha kinya bhamarayika. Mbaakubha abhaana bha Ryobha, gho kubha mbaryokiibhu koru mo‑bhaku.

37“Koru Musa ꞉naabhooriire abhaato kubha abhaku mbakoryoka. Mo‑Mandëkö, hano andëkiri ighoro e ghisaka, Musa ꞉naabhughiri ighoro e Mutëmi kubha n-Eryobha re Abhurahamu, na Isaka na Yakobho.#20:37 Mööhi Kohoroka 3:6. 38Kwo Waryobha abhaato bhano bhakuure na bhano bhaanyi abhahöru bhoose m‑bhabhaache.”

39Hayo, abheeghi abhamu bha meghiro bhakamobhoorera bhakabhugha, “Omweghi, ˆoghagharokeri bhoheene chwee!” 40Korwera eriibhagha riyo, bhaakabha bharatiina komobhoori amabhoori aghande.

Kirisito n‑Omoona o Tawuti no Omutëmi o bhaato bhoose

(Mataayo 22:41–46; Maariko 12:35–37)

41Akamara Yesu akabhabhoori Abhayahuuti bhayo akabhugha, “Ngwake bhakobhugha kubha, Kirisito n‑Omoona o mutëmi Tawuti? 42Tawuti omwene, mo‑ghitabhu ghe Sabhuri, ꞉naabhughiri kubha,

‘Omutëmi Waryobha ꞉naamobhooriire Omutëmi waane,

Wiikare eribhaara re kubhökö koone gho kwiro,

43mbagha neghukörë okinde abhabhisa bhaacho,

na kobhakangata.’#20:42–43 Mööhi Sabhuri 110:1.

44“Aribha Tawuti omwene nakomobherekera Kirisito arabhugha Omutëmi waache, ibheere, Kirisito nibhu aghotora abhe omoona waache wiiki?”

Yesu ˆakabhaanga abheeghi bha meghiro

(Mataayo 23:1–36; Maariko 12:38–40; Ruuka 11:37–54)

45Hano obhoyo bho bhaato ꞉bhaare bharamutëghëërëra, Yesu akabhabhoorera abhaanabheegha bhaache akabhugha, 46“Mwikabhaahe na abheeghi bha meghiro! Mbasiighiri ghughënda bhabheekiri chandachana cheebho indë, na ghukëëribhu gho sooko mo‑mitëëra. Wiiki mo‑masinaghooghi, mbasiighiri ghwikara mo‑bhetumbe bhe mbërë, na aribha bharaghiinu mo‑nyangi, mbasiighiri ghwikara hano abhakangati bhiikeere. 47Mbakobhahöka abhasino chanyumba cheebho! Wiiki, mbaghwiköri n‑abhaato bhaghöröröku gho ghusabha amasabhi marë ambërë e bhaato. Abhaato bhanga bhayo, Eryobha ndekobhatenera ekiina ghokera abhande!”

Currently Selected:

Ruuka 20: ntk

Highlight

Copy