Ruuka 21

Amaruusi gha mosino

(Maariko 12:41–44)

1Yesu hano are Mwisëngërö, akabharighi abhaame kinya ꞉bhaare bhararuusi amaruusi ghaabho mwisandëkö re maruusi. 2Akamorighi no omosino umu omuhabhe aratoora muyo chaachabha ibhere.

3Ibheere, Yesu akabhabhoorera akabhugha, “Mahëënë ˆnekabhabhoorera, omosino uno omuhabhe, niwe aruusiri chambiiri chaaru ghokera abhande bhoose. 4ˆNekabhabhoorera hangʼu gho kubha, amaruusi ghano bharuusiri bhano bhoose, n‑ahaghiro hasuuhu hangʼu ha bheghiro bheebho bhyaru. Amare omosino uno, no obhuhabhe bhooche, naruusiri bhyose bhino are nabhyo.”

Yesu ˆakarööta kuhaanyoru kwo Risëngërö

(Mataayo 24:1–2; Maariko 13:1–2)

5Abhaanabheegha abhamu, mbaare bharasiikëra ighoro e Risëngërö, kebhuno richöchuru na amabhohe machömu, haghirohamu ne ebheghiro ebhende bhino abhaato ꞉bhaaruusiiri Eryobha. Ibheere Yesu akabhugha, 6“Mbe, ghano ghoose mokorighi, chaasiko nchekuucha chino motaakorighi koru eriibhohe rimu rino reghusaagha ighoro e rende. Ghoose ngakuhaanyureru haase!”

Yesu ˆakarööta ighoro e nyaako ino ekuucha

(Mataayo 24:3–14; Maariko 13:1–13)

7Wiiki bhakamobhoori, “Omweghi, amangʼana ghayo ngakorwera nyingake? N‑ekyërëkërëri ke kino ghekuucha kwërëki kubha ghayo haghuhe ghaanyi korwera?”

8Akabhagharokeri akabhugha, “Ibheere mubhe miisho, motaacha kongʼiinu. Abhaato bhaaru mbakuucha kwo riina reene bharabhugha, ‘N‑eni wuure wuure.’ Wiiki, mbakobhugha, ‘Eriibhagha riire, ˆreghatingʼi.’ Abhaato bhayo, motabhatambana! 9Hano mokuucha kooghu amangʼana gha mahë, na anyööri yaaru, motatiina. Ghayo ghoose, ngakwëndëru gharwere singa, amare antenero e ghoose, ekeere.”

10Yesu akëëngëra kobhugha, “Ase imu nekurööna na ase ayende, no obhutëmi bhumu mbokurööna no obhutëmi obhonde. 11Ngeekubha‑ho emerighito mekoro ghe se, na chaase chaaru, ncheghusöhërëru na aghëëcha ihaari chwee. Wiiki ngaakubha‑ho amabhabharu maaru. Mwighoro, mbeekubha‑ho ebhyërëkërëri bhekoro na amangʼana gha ghotiini abhaato.

12“Amare, hano ghaakubha ghayo ghoose ghakeere kwiyërëkani, abhaato mbakobhaghööta na kobhahira mo‑masinaghooghi, na mbakobhabhöha mo‑maghërëcha, bharabhanyaaki. Wiiki mokohiru ambërë e bhatëmi na abhakangati, gho kubha inyu m‑bhaghëndi bhaane moonyi. 13Hayo niho mokubhöna omweya o kuraghani angʼana yaane.

14“Gho ghayo, motiinyaaki ghwisëëmi mo‑metema gheenyu gho ghaare mokuucha ghwitachura mokeere ghusëmu. 15Eni mwene, nekobhaha amangʼiini na amangʼana ghano moghosiikëra, koru abhabhisa bhaanyu bhataaghotora ghoghaanga hamu kobhakinda.

16“Eriibhagha riyo mokwangu na abhiibhori bhaanyu, na bhaömöönyu, na abhahiiri bhaanyu, na abhasaani bhaanyu. Wiiki abhamu ghate yaanyu moghwitu. 17Abhaato bha matöngö ghoose mbakobharëgha, gho kubha moghuntambana eni. 18Amare, rotaakobhora koru orochweri rumu mo‑mitu gheenyu! 19Obhuhöru bhoonyu mboghotooribhu, hano moghoghumereri.

Yesu ˆakarööta kubha Yerusareemu nekuhaanyoru

(Mataayo 24:15–21; Maariko 13:14–19)

20“Hano mokorighi omoghya o Yerusareemu winaariiru na abhakëëya, niho mokumënya kubha eriibhagha ˆreghatingʼi re moghya uyo ghusaribhu. 21Kwo riibhagha riyo, bhaare bhaanyi mo‑mukööwa o Yuteya, bhiitoori gho kungʼösëra mo‑bheghoro. Wiiki bhaare bhaanyi mo‑moghya o Yerusareemu, bharu muyo bhwango, na bhaare bhaanyi anche e moghya o Yerusareemu, bhatagharuka mo‑moghya. 22Mo‑chaasiko chiyo, Eryobha ndekorehani asiire, kubha amangʼana ghoose ghano ꞉ghaandëkuru na abharööti bha kare, ghahikeerane. 23Horeera mbakorighi abhakari bhano bhaanyi inda na bhano bhaakubha bharaghööki mo‑chaasiko chiyo! Mo‑se ino, haakubha na anyaako ihaari chwee, wiiki Eryobha ndekobhatenera ekiina abhaato bha ritöngö rino. 24Abhaato abhande, mbaghwitu gho kinyamiino. Wiiki abhande, mbaghughöötu na kohiru mo‑chaase echende. Mo‑moghya o Yerusareemu, abhaato bha matöngö mbakuucha na kowukangata gho changuru, mbagha chaasiko cheebho chehikeerane.

Kuucha kwo Moona o Mooto

(Mataayo 24:29–31; Maariko 13:24–27)

25“Wiiki haakubha ne ekyërëkërëri koru mo‑ryobha, na mo‑mwëri, na mo‑chanchöta. Wiiki hano mo‑se, chanyancha neekubha cheraruma ne emekunda mihaari chwee. Ibheere kurëngʼaana na amangʼana ghayo, ngaghughëri abhaato bha chaase bhabhe na ahaho na kobhori omurëmbë. 26Ghayo ghoose, hano ghakuucha mo‑se ino, abhaato mbaghotiina chwee. Mbaakubha bharateni kurëngʼaana na ghotiinibhu, gho kubha, ebheghiro bhyose bhe mwishaaro bheghosingisu.

27“Hayo niho abhaato bhakondighi eni Omoona o Mooto, neraacha mwishaaro, neenyi na changuru no obhokumi obhokoro. 28Mbe, amangʼana ghayo hano ghaghusëëmu ghuköru, mwimeerere muköngʼëri, mwitoore omukörö, gho kubha eriibhagha re ghotingoribhu koonyu, ˆreghatingʼi!”

Eghetuubhaani ke mote uno okobherekeru omotiini

(Mataayo 24:32–35; Maariko 13:28–31)

29Akamara, Yesu akabhabhoorera abhaanabheegha bhaache eghetuubhaani kino, akabhugha, “Mumööhi omote uno okobherekeru omotiini, ne emete eghende ghyose. 30Hano okorighi kubha ˆgheghasëëma ghosebhoka, hayo hayo mokumënya kubha ambura ˆeghatingʼi ghutëëka.

31“Hangʼu hangʼu, na niinyu hano mokorighi amangʼana ghayo ghararwera, mumënyë kubha obhutëmi bho Ryobha ˆbhoghatingʼi. 32Mahëënë ˆnekabhabhoorera, orwibhoro runo rotaakoheta, amangʼana ghano ghoose ghakeere kohikeerana. 33Erishaaro na ase mbekoheta, amare amangʼana ghaane ghataakoheta naabha!

Mubhe miisho

34“Mubhe miisho, motaacha ghokeyu no obhohobhaaru, no obhurëëbhi, na anyaako e riimanya rino. Wiiki moraanga kubha miisho, orosiko runo ro ntenero ndokobhahikera bhwango na kobhataki! 35Orosiko ruyo, ndokuucha gho ghutakani abhaato bhoose bha mo‑se yoose. 36Gho ghayo, mubhe miisho eriibhagha ryose! Mwiköngʼi ghusabha Eryobha, kubha rebhatoori ghwisacha ghayo ghoose ghakuucha korwera, muuche motore kwimeerera ambërë yaane eni Omoona o Mooto.”

37Mo‑chaasiko chiyo, Yesu naare areeghi abhaato mwishe moghima Mwisëngërö. Obhotiko, naare araghe komisi mo‑gheghoro ke Miseyituuni. 38Gho chaasiko choose, abhaato bhaaru ꞉mbaamwechiri ghuye Mwisëngërö, kubha bhamutëghëërërë.

Currently Selected:

Ruuka 21: ntk

Highlight

Copy