Ruuka 22

Yuuta Isikariyoote ˆaghiishereri komwigharurani Yesu

(Mataayo 26:1–5, 26:14–16; Maariko 14:1–2, 14:10–11; Yohana 11:45–53)

1Anyangi e mighaate ghino ghetaaghotooreru eghetondori, neere ˆeghatingʼi, ino ekobherekeru Abhaasaka. 2Eriibhagha riyo abhakoro bha bhachaama, haghirohamu na abheeghi bha meghiro, mbaare bharatabhara kebhuno bhakomwita Yesu. Amare bhaakabha bharatiina abhaato.#22:2 Mööhi Ruuka 19:47–48.

3Mbe, Erishambu rekamusöhërëra Yuuta, uno akobherekeru Isikariyoote, umu o bhaanabheegha ikomi na bhabhere bha Yesu. 4Ibheere, Yuuta aghaye mo‑bhakoro bha bhachaama, na mo‑bhakoro bha bhachongi bha Risëngërö. Akabhoorani nabho kebhuno akomuhaana Yesu ghokoobho. 5Amangʼana ghayo, ghakabhategheri chwee, bhaghiishererani nawe komuha chambiiri. 6Yuuta aghiishereri, hayo hayo aghasëëma ghutabhara omweya omuchömu o komuhaana Yesu eriibhagha abhaato bhaaru bhataanyi‑ho.

Anyangi e Bhaasaka

(Mataayo 26:17–25; Maariko 14:12–21; Yohana 13:21–30)

7Orosiko ro nyangi e mighaate ghino ghetaaghotooreru eghetondori, rokahika. Orosiko ruyo abhaato mbaare bharasincha omoona o ngʼöndu o Bhaasaka. 8Ibheere, Yesu akabhatoma Bheetero na Yohana, akabhabhoorera, “Mughëndë, motusëëmërë ebhiinyakurë bhe Bhaasaka, gho ghiri turaaghërë haghirohamu.” 9Bhakamobhoori, “Nokwënda toghikörërë hayi?” 10Akabhagharokeri akabhugha, “Hano moghusöha mo‑moghya o Yerusareemu, moghutëmëërana no omosubhe umu, asambekiri anyongo e manche. Momoru anyuma mbagha mo‑nyumba ino aghusöhëra. 11Hano mokohika, momobhoorere omwene aka, ‘Omweghi nakobhoori, “Hayi keenyi ekenyumba ke bhaghëni? Nekwënda koreera‑mu ebhiinyakurë bhe Bhaasaka haghirohamu na abhaanabheegha bhaane.” ’ 12Nakobhahira irëngö, naköbhëërëki ekenyumba ghekoro irëngö, muyo mokubhöna ebheghiro bhyose bheenyi‑mu. Motukörërë‑mu ekiinyakurë ke Bhaasaka.”

13Abhaanabheegha bhayo bhabhere, hano bhooghwire ghayo, bhaaghaye, bhakabhöna ghoose ghaanyi kebhuno Yesu abhabhooriire. Bhaghasëëma ebhiinyakurë bhe Bhaasaka.

Anyangi e meecha e Mutëmi

(Mataayo 26:26–30; Maariko 14:22–26; 1 Abhakorinto 11:23–25)

14Eriibhagha re ndaaghëra rekahika, Yesu aghiikara haghirohamu na abhatomu bhaache mo‑ndaaghëra. 15Akabhabhoorera akabhugha, “Niighombiri chwee kurë ebhiinyakurë bhino bhe Bhaasaka haghirohamu na niinyu nekeere kunyaakibhu! 16ˆNekabhabhoorera kubha nteekurë wiiki ekiinyakurë ke Bhaasaka mbagha kino kyëndiiru na Abhaasaka kehikeerane mo‑bhutëmi bho Ryobha.”

17Yesu akiimoki eghisënchö ke divaayi, aghaghiitabheri, akabhaha, akabhugha, “Mwimoki moghuserane! 18ˆNekabhabhoorera kubha nteekunyo wiiki adivaayi, mbagha obhutëmi bho Ryobha bhuuche.”

19Yesu akiimoki omughaate, aghiitabheri Eryobha, akawosuura, akabhaha abhatomu bhaache, arabhugha, [“Uno niwe omobhere waane, uno okoruusibhu gho ghiri yaanyu. Mubhe moraköra hangʼu, gho kohiita eni!”

20Hano bhamariri kurë ekiinyakurë ke mughörööbha, Yesu akiimoki wiiki eghisënchö kiyo, akabhugha, “Adivaayi ino enyi mo‑ghisënchö kino, n‑amasaahë ghaane gha Eriiraghano Eriihë ghano ghaghwitëka gho ghiri yaanyu.]

21“Amare morighi! Ure akonyiigharurani, ntoghuköri nawe haghirohamu. 22Omoona o Mooto, naaghuye ghwitu, kinya bhuure are ëndiiru. Amare, horeera nakorighi wuure akuucha komwigharurani!” 23Ibheere, abhatomu bhayo, bhaghasëëma kobhoorani abheene kwo bheene, n‑niwe ghate yaabho angatoriri ghuköra angʼana iyo.

Erihakaana ighoro e bhokoro

24Hakarwera erihakaana ghate e bhaanabheegha bha Yesu, kubha n‑niwe ghate yaabho akubha omokoro ghokera abhande. 25Erihakaana riyo reghaghëri Yesu akabhabhoorera akabhugha, “Abhatëmi bha matöngö mbaanyi no obhotoro na abhaato bhaabho, nabho mbahaabhaghongi kubha, n‑Abhatoori bha Bhaato. 26Amare inyu, motabha hangʼu. Ibheere ghate yaanyu, uno anyi omokoro ghokera abhande, abhe kinya omosuuhu. No omukangati, abhe kinya n‑omutamishi. 27Ibheere! N‑niwe omokoro ghokera abhande? N‑uno ikeere mo‑kiinyakurë, ghasi n‑uno akurëëta ekiinyakurë? Neghwituuri w‑wuure ikeere mo‑kiinyakurë. Koru hangʼu, eni neenyi ghate yaanyu, kinya omutamishi.#22:27 Mööhi Yohana 13:1–20.

28“Inyu, hano neere neranyaakibhu, niinyu musaaghiri haghirohamu na neeni. 29Ibheere, nekobhaköra mubhe abhatëmi, kinya bhuure Taata waane ꞉anköriri kubha Omutëmi, 30ntookubha toraraaghëra ebhiinyakurë na kunyo haghirohamu mo‑bhutëmi bhoone. Na moghwikara mo‑bhetumbe bhe bhokumi obhokoro, moratenera ekiina amatöngö ikomi na abhere gha Bhiisiraeri.”

Yesu ˆakamobhoorera Bheetero kubha nakomwanga

(Mataayo 26:31–35; Maariko 14:27–31; Yohana 13:36–38)

31Yesu akabhugha, “Oo Simiyooni, oo Simiyooni! Mööhi, Erishambu ndëköbhëënda, ribhönë kobhahonga inyu bhoose kinya bhahaahonga angano. 32Amare, neghusabhiire kwo Waryobha, kubha otakindu mo‑bhokumi bhoocho. Na hano okubha ungarökiire, obhatoore changuru abhaghëndi bhaacho.” 33Simiyooni akamugharokeri akabhugha, “Oo Omutëmi wiito! Eni niisheriiri ghuye kubhöhu haghirohamu na niiye mwighërëcha. Koru ghwitu, niisheriiri ghoku!” 34Yesu akamugharokeri akabhugha, “Oo Bheetero! ˆNeghakobhoorera kubha reero ino asërëëcha ekeere ghughamba, nookubha onyangiri ghatato.”

Eriibhagha re tabhaaribhaari

35Akamara, Yesu akabhoori abhaanabheegha bhaache, “Hano nehaabhatoma motaanyi ni ighöchi re chambiiri, na motaanyi na asako, na koru bhekwera, kana, ꞉moosuuhiiru na ghyokyose?”#22:35 Mööhi Ruuka 9:3, 10:4. Bhakamugharokeri bhakabhugha, “Tiyaanyi.”

36Yesu akabhabhoorera akabhugha, “Amare ibheere, aribha omooto anyi ne eriighöchi re chambiiri, na asako, abhiimoki. Na aribha tughöötë ekinyamiino, oghori righööti reecho, oghore. 37Yandëkuru, ‘Nabhareriinu haghirohamu na amanyangara.’#22:37 Mööhi Isaaya 53:12. Amangʼana ghano ngaandëkuru ighoro yaane. ˆNekabhabhoorera kubha nekwëndëru ghaköru ghokoone, nagho haghuhe ghaanyi kohikeerana.”

38Bhayo bhakamobhoorera bhakabhugha, “Oo Omutëmi wiito! Mööhi! Hano ngaanyi‑ho amashabha abhere.” Iwe aghagharokeri, “Motighe hangʼu.”

Yesu ˆaghasabha Eryobha Ghetesemaani

(Mataayo 26:36–46; Maariko 14:32–42)

39Yesu akaru Yerusareemu, aghaye mo‑gheghoro ke Miseyituuni, kinya are anariri. Abhaanabheegha bhaache bhakamutambana. 40Hano ahikiri mo‑gheghoro kiyo, akabhabhoorera kubha, “Musabhe Eryobha, motaacha ghusöha mo‑masaki.”

41Mbe, akabhatigha hayo, aghiishuka ambërë hasuuhu. Akabhuna ebheru, aghasabha Eryobha akabhugha, 42“Oo Taata! Örëënda, onduuseri eghisënchö ke nyaako ino enyi ambërë yaane. Amare etabha kinya nekwënda eni, amare amiigha ghaacho ghaköru.” [ 43Hayo hayo, Marayika koru Mwishaaro akamorwera Yesu, akamotoora changuru. 44Eriibhagha riyo Yesu naare mo‑bhororo bhwaru chwee, bhokamuköra iköngʼi ghusabha Eryobha. Hano are arasabha Eryobha, akaru ebhigheri bhetuubhiine na amasaahë, bheekabha bheratoonya haase.]

45Ibheere hano amariri ghusabha Eryobha, akiimeerera, akabhasëëta abhaanabheegha bhaache. Akabhöna bhamisiri gho kubha mbaare na amacheeche. 46Akabhabhoori, “Ngwake momisiri? Mobhooke! Musabhe Eryobha, motaacha ghusöha mo‑masaki.”

Yesu ˆaghaghöötu

(Mataayo 26:47–56; Maariko 14:43–50; Yohana 18:3–11)

47Eriibhagha Yesu are akeere arasiikëra ghayo, abhaato bhaaru bhakamusëëta bhakangaturu na Yuuta, umu o bhaanabheegha bhaache ikomi na bhabhere. Niho, Yuuta akamwishukerera Yesu, akamukëëri gho komutahata.

48Yesu akamobhoori, “Oo Yuuta! Kana nokomwigharurani Omoona o Mooto gho komukëëri gho komutahata?” 49Abhaanabheegha bhayo bha Yesu, hano bhamënyiri ghano ghaghuköru, bhakamobhoori bhakabhugha, “Oo Omutëmi wiito! Kana tobhakenyikenyi na amashabha ghiito?”

50Hayo hayo, umu o bhayo akamunyëra omusësë o Muchaama Omokoro ne ekinyamiino, akamonunga oghotu gho kwiro, to. 51Yesu akabhugha, “Motighe ˆhaghiisha!” Aghaturi oghotu kwo mutamishi uyo, aghakuhöri.

52Mo‑bhaato bhano ꞉bhiichiri komughööta Yesu, mbaare, abhakoro bha bhachaama, na abhakoro bha bhachongi bha Risëngërö, na abhagharuka bha Bhayahuuti. Yesu akabhabhoori, “Aa! Kana, mwichiri ne ebhinyamiino na charungu ghungööta eni kinya erinyangara? 53Chaasiko choose neere haghirohamu na niinyu Mwisëngërö, amare motangöötiri! Amare ibheere, rino niryo eriibhagha reenyu, re bhukangati bho Rishambu.”

Bheetero ˆakamwanga Yesu

(Mataayo 26:57–58, 26:69–75; Maariko 14:53–54, 14:66–72; Yohana 18:12–18, 18:25–27)

54Hayo hayo, abhachongi bha Risëngërö bhakamughööta Yesu, bhakamohira awaache Omuchaama Omokoro. Bheetero akabharu anyuma gho kurë. 55Hano abhaato bhahikiri mo‑riigho re nyumba e muchaama, bhakahemba‑ho omororo bhaghiikara ghwata. Bheetero woose, akaacha aghiikara ghate yaabho. 56Ibheere emirëngaari ghe mororo uyo ghekamomoreka, omutamishi umu o ghikari akamoomeri amiisho akabhugha, “Omooto uno, naare haghirohamu Yesu.” 57Amare Bheetero akaanga akabhugha, “Aa, omukari uno! Ntemweche eni!” 58Eriibhagha isuuhu, omooto owonde akamorighi Bheetero, akamobhoorera akabhugha, “Iye n‑umu o bhaanabheegha bha Yesu onyi.” Amare Bheetero akamugharokeri akabhugha, “Aa, woori! Taanyi eni!”

59Eriibhagha rekaheta kinya asa imu, omooto owonde akahënërëra arabhugha, “Omooto uno hëënë, naare haghirohamu nawe! Ndighi koru, iwe m‑Mughariraaya!” 60Amare Bheetero aghagharokeri akabhugha, “Aa, woori! Ghayo ˆokabhugha, koru ntegheeche!” Hayo hayo akeere arasiikëra ghayo, asërëëcha eghaghamba. 61Omutëmi aghiishoorori, akamumööhi Bheetero mo‑miisho. Hayo hayo, Bheetero aghaghahiita amangʼana ghano Omutëmi are amariri komobhoorera, “Reero ino asërëëcha ekeere ghughamba, nookubha onyangiri ghatato.” 62Hayo hayo, akahoroka anche na ghusëëma korera kwo bhororo chwee.

Abhachongi ˆbhakamuchëëra Yesu

(Mataayo 26:67–68; Maariko 14:65)

63Ibheere abhachongi bhano ꞉bhaare bharamochonga Yesu, bhaakabha bharamuchëëra, na komutëma chwee. 64Bhakamohunya amiisho, bhakamobhoorera bhakabhugha, “Nuröötë! N‑niwe uno aghutëmiri?” 65Bhakamoruuseri amangʼana maaru gha matoki.

Yesu ˆaghasëmu ambërë e bhakangati bha Bhayahuuti

(Mataayo 26:59–66; Maariko 14:55–64; Yohana 18:19–24)

66Hano bhookiire, abhagharuka bha Bhayahuuti bhaghaköra ekiina, mo‑bhagharuka bhayo mbaare‑mu abhakoro bha bhachaama, na abheeghi bha meghiro. Yesu akahiru ambërë e riibharacha riyo, 67bhakamobhoori, “Aribha iye niiye Kirisito, notobhoorere!” Yesu aghagharokeri akabhugha, “Koru nengabhabhoorera, motaaghokumi. 68Wiiki nengabhabhoori eribhoori, motaaghungarokeri. 69Amare korwera ibheere, eni Omoona o Mooto neekubha niikeere mo‑kubhökö gho kwiro kwo Ryobha#22:69 Kubha mo‑kubhökö gho kwiro kwo Ryobha, n‑kuhaabhu obhokoro na asooko. rino reenyi na changuru choose.”

70Abhagharuka na abhakangati bha Bhayahuuti, bhakamobhoori Yesu wiiki, “Kana ibheere, iye niiye Omoona o Ryobha?” Yesu akabhagharokeri akabhugha, “Kana niinyu bheene mobhughiri kubha eni neeni!”

71Hayo hayo, abhakoro bhayo bhakabhugha, “Kana! Ntokwënda bhwibhatereri ke wiiki? Kana ntooghwire arabhugha omwene!”

Currently Selected:

Ruuka 22: ntk

Highlight

Copy