Ruuka 23

Yesu ˆaghasëmu ambërë e Bhiraato

(Mataayo 27:1–2, 27:11–14; Maariko 15:1–5; Yohana 18:28–38)

1Bhakamara, abhakangati bhayo bhoose bhakiimeerera, bhakamohira Yesu o‑Bhiraato.#23:1 Bhiraato naare omukangati o Bhuyahuuti. Wiiki niwe are no obhotoro bho koruusi omooto ghwitu. 2Bhaghasëëma komusëma bharabhugha, “Omooto uno, ntomobhwine arasari ase yiito, gho kubha nakurëki abhaato bhatatöbhi erighööti gho Kayisaari. Wiiki nakobhugha kubha iwe niwe Kirisito Omutëmi.”

3Niho, Bhiraato akamobhoori Yesu akabhugha, “Kana, iye niiye uno bhakobhugha, Omutëmi o Bhayahuuti?”

Yesu nawe akabhugha, “N‑iye obhughiri!”

4Ibheere, Bhiraato akabhabhoorera abhakoro bhayo bha bhachaama, haghirohamu no obhoyo bho bhaato akabhugha, “Omooto uno, taanyi ne eriisari ryoryose rino nerooche ghokooche.”

5Abhaato bhayo, bhakahënërëra kobhugha, “Naare araseeghereri abhaato kwo meeghi ghaache! Namariri ghoghasanchi ase yoose e Bhuyahuuti, ꞉naasëëmiire iyo Ghariraaya, ni ibheere ˆakahika hano Yuteya.”

6Hano Bhiraato oghwire ghayo, akabhoori, “Kana omooto uno m‑mwikari o Ghariraaya?” 7Hano amënyiri kubha iwe m‑Mughariraaya o mo‑bhutëmi bho Herote Antibha, akamohira ghokooche. Mo‑chaasiko chiyo, Herote Antibha naare hayo Yerusareemu.

Herote ˆakamobhoori Yesu

8Hano Herote amorooche Yesu, aghachömëru chwee gho kubha naare oghwire amangʼana ghaache. Wiiki naare ariighomba gho chaasiko chaaru komorighi Yesu kwo miisho ghaache omwene, aratëëma ebhiraghe. 9Herote akamobhoori Yesu kwo mabhoori maaru chwee. Amare Yesu tamugharokiiri ngʼana yoyoose. 10Abhakoro bha bhachaama na abheeghi bha meghiro, bhakiimeerera komusëma Yesu gho changuru chwee.

11Herote na abhaashirikare bhaache bhaghasëëma komochebhora, bhakamusëka, bhakamobheeki eriishaghi ichömu re ghitëmi. Bhakamara bhakamugharoki o Bhiraato. 12Korwera orosiko ruyo, Herote na Bhiraato bhaakabha abhasaani, nangabha hayo ekeenyuma bhataare bharoghwana.

Bhiraato ˆaghiishereri kubha Yesu itu

(Mataayo 27:15–26; Maariko 15:6–15; Yohana 18:38—19:16)

13Akamara, Bhiraato akabhakoma abhakoro bha bhachaama, na abhakangati, na abhaato bha moghya o Yerusareemu. 14Akabhabhoorera akabhugha, “Mundëëtiire omooto uno, kinya omuchöngëri o bhaato. Ibheere muntëghëërërë, omooto uno nemobhooriri ambërë yaanyu. Wiiki kwo masëmö ghaanyu ghoose, nterooche eriisari ryoryose ghokooche. 15Koru Herote woose, tarooche eriisari ghokooche, nikyo amugharokiri ghokwito. Mbe, muntëghëërërë, omooto uno taaköriri ngʼana yoyoose, ino eghughëri aku! 16Ibheere nekuhatëka atëmu emicharicho, ndamara nemotighooroke.” [17Bhiraato uyo, ꞉nëëndiiru abhiighorere abhaato omubhöhu umu mo‑chanyangi choose che Bhaasaka.]

18Abhaato bhayo bhoose, bhaghaköra eriireghe haghirohamu bharabhugha, “Omooto uno, ntomwite! Motwighorere Bharaabha.” 19Bharaabha uyo, naare abhöhuru mwighërëcha gho kubha ꞉naarëëtiri anyööri yaaru mo‑moghya o Yerusareemu, na ghwita abhaato.

20Bhiraato, naare arëënda komotighooroka Yesu, aghaye wiiki ghosiikëra na abhaato bhayo. 21Amare ibho bhakahënërëra ghuköra eriireghe bharabhugha, “Mumambe! Mumambe!”

22Aghasiikëra nabho wiiki mara e ghatato, “Aa motighe tooghu! Naköriri amabhe ke? Kana nteekorighi angʼana ghokooche ino eghughëri aku! Ibheere nekomutëma, ndamara nemotighooroke.”

23Amare, abhaato bhayo bhakahënërëra ghuköra eriireghe chwee kubha Yesu amambu mo‑musarabha. Antenero, eriireghe reebho rekamokinda.

24Ibheere, Bhiraato akabhiisherereri Abhayahuuti bhayo ghuköra kinya bhakwënda. 25Akabhiighorera Bharaabha wuure ꞉bhaare bharëënda, nangabha are abhöhuru gho kurëëta anyööri yaaru mo‑moghya, na ghwita. Akamuhaana Yesu, kubha akörëru bhuno bhakwënda.

Yesu ˆakamambu mo‑musarabha

(Mataayo 27:32–44; Maariko 15:21–32; Yohana 19:17–27)

26Hano abhaashirikare ꞉bhaare bharamohira Yesu komumamba, bhaghatëmëërana no omooto umu uno are araru a‑moghondo, eriina reeche Simiyooni, o mo‑moghya o Kireene. Simiyooni uyo, bhakamughööta, bhakamughëghi omusarabha o Yesu. Aghaye awughëghiri, anyi anyuma e Yesu.

27Abhaato bhaaru bhakamoru anyuma Yesu. Ghate yaabho, mbaare‑mu abhakari bhano ꞉bhaare bharamorerera kwo macheeche. 28Yesu akabhiishororeri, akabhabhoorera, “Aa abhaghiikoro bhano bha Yerusareemu! Motanderera! Amare, mwirerere inyu bheene, morerere na abhaana bhaanyu! 29Gho kubha mo‑chaasiko chino chekuucha, abhaato mbakobhugha kubha, ngʼoni abhaghiikoro abhaghomba, bhano bhatibhwire koru ghughööki abhaana. 30Eriibhagha riyo niryo abhaato bhaghusëëma kobhebhoorera ebheghoro, motoghwere, ne eheghoro motokundekeri!#23:30 Mööhi Hoseya 10:8.

31“Aribha abhaato mbawuköriire hangʼu omote omobhese, nibhu ekubha kwo mote omoomu!”#23:31 Egheteemoro keeche n‑kubha, aribha bhaköriri hangʼu kwo mooto omuhëënë, ataanyi ne eriisari Yesu, nibhu ekubha kwo bhaato bha masari?

32Kwo riibhagha riyo, abhaashirikare bhakamohira Yesu, na abhaato abhande bhabhere bha masari, gho ghiri bhiitu haghirohamu. 33Hano bhahikiri ahaghiro hakobherekeru Ekehoore ke Mutu, bhakamumamba Yesu mo‑musarabha, haghirohamu na bhayo bha masari bhabhere, umu mo‑musarabha o kwiro, no owonde mo‑musarabha o kumosi.

34Yesu akabhugha, “Oo Taata! Obhaabhërë, gho kubha bhateeche kino bhaghuköra.”

Bhakamara, abhaashirikare bhayo bhakahööha amaghööti gha Yesu gho ghoghatëmëra akuura. 35Abhaato bhakiimeerera haare bharamööhërëri. Abhakoro bha Bhayahuuti, bhakamochebhora Yesu bharabhugha, “Kana ꞉naatooriri abhande! Ibheere, aribha niwe Kirisito omwahöru o Ryobha, niitoori omwene!”

36Abhaashirikare bhoose, bhakamochebhora, bhakamutambana, gho ghiri bhamuhë adivaayi andoro. 37Bhakamobhoorera, “Aribha iye n‑Omutëmi o Bhayahuuti onyi, wiitoori iye mwene!”

38Ighoro yaache, ngaare ghatooruru amandëkö, ghano ghakobhugha, “uno niwe omutëmi o bhayahuuti.”

39Umu o bhayo bha masari bhabhere, bhano ꞉bhaare bhamamburu mo‑musarabha akamotoka Yesu arabhugha, “Kana iye niiye Kirisito! Mbe, wiitoori iye mwene! Na niitu, ototoori!”

40Amare, omughëndi waache akamoshaangʼi, akabhugha “Kana tooghotiina koru Eryobha? Gho kubha ghoteneru ekiina kuno toteniiru itu, niko kuyo kuyo omooto uno ateniiru. 41Amare itu, ntoteniiru ekiina kwo bhuhëënë, kurëngʼaana na amaköri ghiito, amare uno, taanyi ne eriisari rino aköriri.”

42Achekumara ghayo, akabhugha, “Oo Yesu! Hano oghusöha mo‑bhutëmi bhoocho, na neeni ohiite!” 43Yesu akamugharokeri akabhugha, “ˆNeghakobhoorera obhuhëënë, reero ino nookubha haghirohamu na neeni mo‑Chaasare.”

Yesu ˆaghaku

(Mataayo 27:45–56; Maariko 15:33–41; Yohana 19:28–30)

44Hano rehikiri eriibhagha re chaasa ishaasabhe che mwishe, ase yoose ekangʼuuri mbagha hano ehikiri mo‑chaasa kende, 45eryobha reghatigha kurëngaari. Omwando uno ore oteniini Mwisëngërö oribhiri Ahaghiro Ahatööbhiyu ha Hatööbhiyu, oghachaaruka ghateghate amabhaara abhere.

46Yesu aghakuura kwo riiraka ikoro akabhugha, “Oo Taata! Akörö yaane ˆnekayetoora mo‑mabhökö ghaacho.” Hano amariri kobhugha ghayo, aghatena akörö.

47Omokoro o bhaashirikare bhayo, hano arooche ghayo, akareghongi Eryobha, arabhugha, “Oo! Hëënë, omooto uno m‑muhëënë are!”

48Abhaato bhoose bhano ꞉bhaare bhiikomiine korighi amangʼana ghayo, bhaghagharuka mo‑chaaka cheebho, bhariitëmatëma mo‑bhekubha kwo macheeche.#23:48 Bhariitëmatëma mo‑bhekubha kwo macheeche. Hano Bhayahuuti ꞉bhaare kubha na amacheeche, mbaare bhariitëmatëma mo‑bhekubha. 49Bhoose bhano ꞉bhaare bhamweche Yesu, mbaare bhiimeeriire kurë hasuuhu, bharamööhërëri ghano ghaghuköru. Mo‑bhayo, mbaare‑mu abhakari bhano ꞉bhaamoruure anyuma koru mo‑mukööwa o Ghariraaya.

Yesu ˆakaryeku

(Mataayo 27:57–61; Maariko 15:42–47; Yohana 19:38–42)

50Naare‑ho omooto umu, eriina reeche Yusubhu, o mo‑kyaro ke Arimataaya, mo‑mukööwa o Yuteya. Yusubhu uyo, naare umu o bhakoro bha Bhayahuuti. 51Amare taare ishereriini na abhaghëndi bhaache gho kiina ghe komwita Yesu. Naare omooto omuhöriicho ambërë e Ryobha, wiiki naare aratëngëra obhutëmi bho Ryobha bhuuche.

52Ibheere, Yusubhu uyo aghaye o‑Bhiraato komusabha amuhë erihundughu re Yesu. 53Bhiraato aghiishereri, Yusubhu akariiki erihundughu re Yesu koru mo‑musarabha, akarebhishi asanda e ghitani. Akamara, akariraari mo‑mbeehera ino ere etukuru mwitare. Na mo‑mbeehera iyo, taare‑ho mooto uno are amariri koryeku‑mu. 54Orosiko ruyo, ndoore orosiko ro masëëmö gha Riikane. Orosiko ro Riikane,#23:54 Riikane. Kwo Bhayahuuti ndoore rorasëëma orosiko rwi Ichumaa (ro ghataano) omughörööbha. ndoore ˆroghasëëma ghusöha.

55Abhakari bhano ꞉bhiichiri haghirohamu na Yesu koru Ghariraaya, bhakamoru anyuma Yusubhu. Bhakayerighi ambeehera iyo, na kebhuno erihundughu re Yesu riraariru‑mu. 56Bhakamara bhaghagharuka aka bhaghaköra amaghuta ne ebheneeso gha kuhaka erihundughu re Yesu. Amare bhakaweera singa mo‑rosiko ruyo ro Riikane, kinya emeghiro ghekobhugha.#23:56 Mööhi Kohoroka 20:8–11; Kohiita kwo Meghiro 5:12–15.

Currently Selected:

Ruuka 23: ntk

Highlight

Copy