Ruuka 24

Yesu ˆakaryoka

(Mataayo 28:1–10; Maariko 16:1–8; Yohana 20:1–10)

1Atabhoori mo‑rungʼöörö orosiko ro Chumabhiiri, abhakari bhayo bhaaghaye mo‑mbeehera. Mbaare bhaghëghiri ebheneeso bhino ꞉bhaare bhaköriri. 2Hano bhahikiri, bhakabhöna eriibhohe rino reere rehunyiri ambeehera iyo, rehiringituru kurë na ambeehera. 3Ibheere, bhaghasöha‑mu, amare bhataabhwine erihundughu re Omutëmi Yesu.

4Eriibhagha ꞉bhaare bhakeere bhahahiri ighoro e ghayo, hayo hayo abhaato bhabhere bhakiimeerera haghuhe nabho, bhabheekiri amaghööti gha kubharibhari meero chayi. 5Abhakari bhayo, hano bharooche ghayo, bhaghaghöötu na ahaho chwee. Bhakahiinya obhosho bhoobho haase. Amare, abhaato bhayo bhakabhabhoorera, “Ngwake moghutabhara uno anyi omuhöru mo‑bhaku? 6Taanyi hano! Naryokiibhu! Kana motaakohiita amangʼana ghaare ꞉abhabhooriire hano are akeere mo‑mukööwa o Ghariraaya, 7‘Omoona o Mooto, nakwëndëru aruusibhu mo‑mabhökö gha bhaato bha masari. Nakumambu mo‑musarabha, no orosiko ro ghatato, nakoryoka!’”

8Amangʼana ghayo gha Yesu, abhakari bhayo bhaghaghahiita. 9Hano bharuure mo‑mbeehera, bhaaghaye kobhabhoorera abhatomu bha Yesu ikomi na umwa, na abhaghëndi abhande. 10Abhakari bhayo mbaare, Mariyamu o Maghitara, na Yowana, na Mariyamu nyina Yakobho, na abhakari abhande bhano ꞉bhaaghiire nabho mo‑mbeehera.

11Ibheere, bhaghaghasiikëra amangʼana ghayo ghoose kwo bhatomu bha Yesu. Abhatomu bhayo bhaghaghataraaha, bhataaghakumiri.

12Hayo hayo, Bheetero akiimeerera, aghaye arahe mo‑mbeehera. Hano ahikiri, akiihiinya, aghasongoreri‑mu, akarighi chasanda chino bhamoryekiire Yesu, cheenyi echeene. Akaru hayo, ahaghiri chwee.

Yesu ˆakabharwera abhaanabheegha bhabhere

(Maariko 16:12–13)

13Mbe, orosiko ruyo ruyo ro Chumabhiiri, abhaato bhabhere ghate e bhaanabheegha bha Yesu mbaare mo‑rughëndö ro ghuye mo‑kyaro ke Emaawu. Ekyaro kiyo, nkeere no obhurë bho masa abhere koru Yerusareemu. 14Hano bhaare mo‑nchëra bhaakabha bharasiikëra abheene ighoro e mangʼana ghoose ghano ꞉ghaakörëkiine Yerusareemu.

15Hano ꞉bhaare bhakeere bharaghasiikëra, Yesu omwene akaacha, aghaghënda haghirohamu nabho. 16꞉Mbaamorooche amare Eryobha rekabhaköra bhaange komumënya aribha niwe.

17Akabhabhoori akabhugha, “Mangʼana ke moghughënda morasiikërëra?” Bhakiimeerera, obhosho bhoobho bhwikunyiri bhörëërëki amacheeche. 18Umu o bhayo, eriina reeche Kiroobha, akamugharokeri akabhugha, “Mo‑bhaato bhoose bhano bhamanyiri Yerusareemu, iye m‑mughëni onyi otooghwire ghoose ghano ghakörëkiine Yerusareemu chaasiko chino?” 19Yesu woose akabhoori akabhugha, “Mangʼana ke ghayo?” Bhakamugharokeri bhakabhugha, “Itu ntoghosiikëra ighoro e ghano ꞉ghaakörëkiine o‑Yesu o Nasareeti. Eryobha na abhaato bhoose ꞉mbaarooche kubha, iwe m‑murööti are, wiiki naare no obhotoro bho ghuköra na ghosiikëra. 20Amare, abhakoro bha bhachaama, na abhakangati bhiito, bhakamuhaana kwo bhakangati bha Keruumi, kubha ateneru ekiina ghoku, bhakamumamba mo‑musarabha. 21Itu ntoore toriitëngʼëra kubha iwe niwe akobhatingori Abhiisiraeri. Ibheere, korwera hayo ghakörëkiine, reero n‑orosiko ro ghatato.

22“Wiiki, abhakari abhande bha wiito mbatutakiri gho kubha reero atabhoori churi, ꞉mbaaghiire mo‑mbeehera, 23bhataabhwine‑mu erihundughu re Yesu. ꞉Mbiichiri ghotobhoorera kubha ꞉mbaarweriiru na bhamarayika bhakabhabhoorera kubha Yesu m‑muhöru.

24“Bhakamara, abhaghëndi bhiito bhaaghaye mo‑mbeehera, bhakabhöna ghoose ghaanyi kinya abhakari bhayo ꞉bhaatobhoorire, amare Yesu omwene bhataamorooche.”

25Yesu akabhabhoorera akabhugha, “Aa! Inyu m‑bhaghëëghë moonyi! Neke moonyi bhaköngʼu mo‑chaakörö cheenyu ghokumi koru ghano ꞉ghaasiikiiru na abharööti? 26Kana yëndiiru Kirisito abhönë anyaako ino, akeere kubhöna obhokumi bhooche obhokoro.”

27Niho, Yesu akabhëërëkërëri amangʼana ghoose ghano ghaandëkuru ighoro yaache, korwera mo‑Mandëkö gha Musa, na mo‑Mandëkö ghoose gha bharööti.

28Hano ꞉bhaare ˆbhaghatingʼi mo‑kyaro kino ꞉bhaare ghuye, Yesu aghiiköri kinya akeere mo‑rughëndö. 29Amare, ibho bhakamusasaama chwee bharabhugha, “Nwikare haghirohamu na niitu! Kana ˆbhookiira, ne ekengʼuuri ˆghekaacha.” Niho, Yesu aghasöha mo‑nyumba, aghiikara haghirohamu nabho. 30Ibheere hano bhiikeere kuraaghëra, Yesu akiimoki omughaate, akawiitabheri, akawosuura, akabhaha.

31Hayo hayo, Eryobha rekabhahunyura amiisho, bhakarighi kubha n‑Yesu. Nawe hayo hayo akaru ghate yaabho.

32Bhakabhoorani bhakabhugha, “Aa! Hano asiikiire na niitu mo‑nchëra, gho ghotobhoorera ghaare ghaanyi mo‑Mandëkö Amatööbhiyu, emetema ghiito ꞉ngiichömiiru gho ghaare are aratobhoorera, taanyi hangʼu?”

33Kwo riibhagha riyo riyo bhakabhooka, bhaghagharuka Yerusareemu. Hano bhahikiri bhaghatëmëërana na abhatomu ikomi na umwa bha Yesu, bhiikomiine haghirohamu na abhaato abhande.

34Abhaato bhayo ꞉bhaare bhiikomiine, bhakabhabhoorera, “M‑mahëënë kubha Omutëmi wiito naryokiri! Namorweriire Simiyooni!”

35Niho bhayo bhabhere bhakabhabhoorera abhaghëndi bhaabho ghaare ghoose ꞉ghaakörëkiine mo‑nchëra. Bhakabhabhoorera na kebhuno ꞉bhaamumënyiri Yesu hano abhasuuriire omughaate.

Yesu ˆakabharwera abhaanabheegha bhaache

(Mataayo 28:16–20; Maariko 16:14–18; Yohana 20:19–23; Amaköri gha Bhatomu 1:6–8)

36Abhaanabheegha bhayo bha Yesu, hano bhaare bhakeere bharasiikëra ighoro e ghayo, hayo hayo Yesu omwene akiimeerera ghate yaabho. Akabhabhoorera akabhugha, “Omurëmbë ubhe na niinyu!”

37Bhaghiitaki, bhaghatiina chwee, bhakiihëëbha kubha mbarooche ekehu.

38Amare, Yesu akabhabhoorera, “Neke ˆmoghiitumatera hangʼu? Wiiki ngwake ˆmokahaha chwee mo‑metema gheenyu? 39Mumööhi amabhökö ghaane na amaghoro ghaane, niho mumënyë kubha n‑eni mwene! Mumbabhaate morighi, gho kubha ekehu ghetaanyi ni ighuha no omobhere, kinya bhuure mokorighi neenyi nawe.”

40Hano Yesu amariri kobhabhoorera ghayo, akabhëërëki amabhökö na amaghoro ghaache. 41Abhaanabheegha bhaache, bhaghasiighasiigha na koroghoora chwee, koru bhataakumiri aribha hëënë niwe. Niho Yesu akabhabhoori akabhugha, “Moonyi ne ekiinyakurë ghyokyose hano?” 42Bhakamuha eghitamunyu ghe su kino ghyekiri. 43Aghakiimoki, aghakirë ambërë yaabho. 44Akamara akabhabhoorera akabhugha, “Eriibhagha neere nekeere neenyi haghirohamu na niinyu, ghano, nigho amangʼana ghaane ghano ꞉neebhabhooriire, kubha ghoose ghano ghaandëkuru ighoro yaane ngakwëndëru ghahikeerane. Ibhe mo‑meghiro ghe Musa, na mo‑Mandëkö gha bharööti, na gha Sabhuri.”

45Mbe, Yesu akabhaköra bhamënyë Amandëkö Amatööbhiyu ghoose. 46Wiiki akabhabhoorera akabhugha, “Yandëkuru kubha Kirisito nakunyaakibhu na ghwitu, no orosiko ro ghatato, nakoryoka koru mo‑bhaku. 47Na abhaato bha matöngö ghoose, korwera Yerusareemu, mbakuraghaneru kwo riina reeche kubha, mbakwëndëru bhatuukuunere amasari ghaabho, bhaabhëru. 48Inyu niinyu morooche amangʼana ghayo ꞉ghaakörëkiine wiiki niinyu moghoghasiikëra kwo bhande.”

49“Mutëghëërërë! Nekobharëëtëra ighoro yaanyu eriiraghano re Taata waane, eriiraghano riyo n‑Akörö Ahörëëru. Amare, mughanye mo‑moghya uno o Yerusareemu, mbagha muhaabhu obhotoro koru Mwishaaro.”

Yesu ˆakiimokibhu ghuye Mwishaaro

(Maariko 16:19–20; Amaköri gha Bhatomu 1:9–11)

50Akamara Yesu akabhakangata abhaanabheegha bhaache mbagha mo‑kyaro ke Bhetaniya. Hano bhahikiri hayo, aghaghöröröki amabhökö ghaache ighoro, akabhiitabheri. 51Hano are akeere arabhiitabheri, akabhatigha, akiimokibhu ghuye Mwishaaro.

52Hayo bhakamusëngëra, bhakamara bhaghagharuka Yerusareemu, bharasiighasiigha chwee. 53Bhaghiikara hayo Mwisëngërö, bharareghongi Eryobha.

Currently Selected:

Ruuka 24: ntk

Highlight

Copy