Maariko 5

Yesu ˆakamuhöri omooto uno anyi ne emisambu

(Mataayo 8:28–34; Ruuka 8:26–39)

1Yesu na abhaanabheegha bhaache bhakahika amwambuko o nyancha e Ghariraaya, mo‑se e Bhagheraasi. 2Hano Yesu ikiri mo‑bhwato, aghatëmëërana no omooto uno anyi ne emisambu arweriire mo‑chambeehera.#5:2 Chambeehera. Neere asughara e Abhayahuuti koryeka abhaato mo‑chakoobho chino cheere mo‑bheghoro, echende mbaare bharatuka abheene. 3Omooto uyo naare ariikara mo‑chambeehera. Naare na changuru, taare‑ho wowoose uno atoriri wiiki komubhöha koru kwo minyörörö. 4Mbaare bhamubhöhiri mara kaaru ne eminyörörö mo‑maghoro na chambengo mo‑mabhökö, amare aghachetena choose. Taare‑ho omooto uno are na changuru che komokinda. 5Eriibhagha ryose obhotiko no omwishe naare ariinaaranaara mo‑chambeehera na mo‑bheghoro, araköra eriireghe na kwinyeranyera na amabhohe.

6Hano omooto uyo amorooche Yesu gho kurë, aghaye ahönta, akiihiinya gho sooko. 7Aghaköra eriireghe kwo riiraka ikoro arabhugha, “Neke okwënda ghokoone, iye Yesu Omoona o Ryobha Omokoro o Bhyose? ˆNeghakoriishi ariingʼa kwo riina re Ryobha, otanyaaki!” 8꞉Naabhughiri hangʼu gho kubha Yesu naare amobhooriire, “Iye omusambu omoru omooto uno!”

9Yesu akabhoori akabhugha, “Eriina reecho niiye we?” Rekamugharokeri rekabhugha kubha, “Eriina reene n‑Abhakëëya, gho kubha itu m‑bhaaru toonyi.” 10Omusambu uyo ꞉noomusabhiri mara kaaru kubha, ataghihëëbha mo‑se ino.

11Mo‑gheghoro kiyo, ꞉haare ne erikinda ikoro re chambeechi. 12Niho emisambu ghiyo ghekamusasaama Yesu kubha, “Ntoghoghusabha kubha otwisherereri, tusöhë mo‑chambeechi chiire.” 13Yesu aghaghiisherereri. Mbe, emisambu ghiyo gheekamoru omooto uyo, gheghasöhërëra chambeechi. Erikinda ryose re chambeechi rekahiringita rerahe mo‑mohiringito muhaari o gheghoro kiire, reghasöha mo‑nyancha, reghaku. Omubharo o chambeechi chiyo noore kinya ebheku bhibhere (2,000).

14Abhariishi bha chambeechi bhayo bhakayaara, bhaaghaye mo‑moghya na mo‑bhyaro bhe haghuhe na hayo. Hohoose hano bhahikiri, mbaare bharabhabhoorera abhaato amangʼana ghayo. Abhaato bhakaacha, kubha bhiirigheri abheene ghano ghaköruru. 15Hano bhahikiri o‑Yesu, bhaghatiina chwee komorighi omooto uno are ne emisambu, uno are ariibherekera abhakëëya ikeere, abheekiri amaghööti, wiiki anyi no obhongo bhooche bhoheene! 16Abhaato bhano ꞉bhaarooche amangʼana ghayo ghamobhwine uno are ne emisambu na gha chambeechi chiire, bhaakabha bharabhabhoorera abhaato abhande amangʼana ghayo. 17Niho abhaato bhayo bhaghasëëma komusasaama Yesu aru mo‑se yaabho.

18Hano Yesu are arasöha mo‑bhwato, omooto uno are ne emisambu akamusasaama Yesu kubha amwisherereri aghi haghirohamu nawe. 19Amare Yesu taamwishereriiri, akamobhoorera akabhugha, “Nooghi awaacho na kwo bhahiiri bhaacho, obhabhoorere amangʼana amakoro gha changori ghano Omutëmi aghuköriire.” 20Mbe, omooto uyo akaru hayo, aghasëëma ghusanchi amangʼana amakoro ghano Yesu amuköriire mo‑meghya ghe Tekabhoori.#5:20 Tekabhoori. Ekeyunaani ngekobhugha, emeghya ikomi. Abhaato bhoose bhakahagha chwee.

Yesu ˆakamuhöri omukari na komoryoki omuukë

(Mataayo 9:18–26; Ruuka 8:40–56)

21Yesu na abhaanabheegha bhaache bhaghatëënya anyancha no obhwato ghugharuka amwambuko. Hano bhahikiri, erikinda ikoro re bhaato rekamusëëta rubhareka ro nyancha. 22Hayo akaacha omukangati umu o risinaghooghi, eriina reeche Yayiro. Hano amorooche Yesu, akamutambana, akabhuna ebheru ambërë yaache. 23Akamusasaama arabhugha, “Omuukë waane m‑bhabharu, narikeriire. Neghusabha tughëndë, omotoorere amabhökö ghaacho ighoro yaache, kubha ahörë na ëndërërë kubha muhöru.” 24Yesu aghaye nawe awaache.

Erikinda ikoro ndeere reramutambana, bharatughutana chwee. 25Mo‑rikinda riyo, naare‑ho omukari uno are no obhubhabharu bho koru amasaahë kwo meeka ikomi ne ebhere. 26Omukari uyo naare anyaakiri chwee gho ghuye mo‑bhaghabho bhaaru. Naare amariri ebheghiro bheeche bhyose arahira mo‑bhaghabho, amare obhubhabharu bhooche bhotasuuhiri, bhookabha bhoriyëngëra. 27Omukari uyo naare oghwire ghano Yesu are araköra, gho ghayo aghaye anyuma e Yesu aghaturi angibho yaache, 28gho kubha ꞉niituuriri kubha, “Hangʼu neghoturi angibho yaache, nekuhöra.” 29Hano aturiri angibho e Yesu, hayo hayo amasaahë ghaghateneka, akiiyoghu mo‑mobhere waache kubha ˆakahöra.

30Hayo Yesu akamënya kubha changuru cheeche che kuhöri nchiköriri emeremo. Aghiishoorori, akabhabhoori erikinda riire akabhugha, “N‑niwe aturiri angibho yaane?” 31Abhaanabheegha bhaache bhakamobhoorera bhakabhugha, “Nokorighi abhaato bhaaru kinya bhakwinaariiri, mbaghotughutana! Ibheere ngwake okobhoori kubha, ‘N‑niwe anturiri?’ ”

32Amare akamööhi ino na ino, kubha amorighi uno amoturiri. 33Niho omukari uyo aghatiina,#5:33 Omukari uyo aghatiina. Abhayahuuti mbamwahwire omukari uno akoru amasaahë kubha moghonchu. Tiishereriiru ne emeghiro ghe Musa ghwikomana haghirohamu na abhande. Omooto uno angamoturiri, woose nangabheere moghonchu. Mööhi Abharaawi 15:25–33. akaacha na akabhuna ebheru ambërë yaache, ino arasingisa, gho kubha ꞉naamënyiri ghano ghaköruru ghokooche. Akamobhoorera obhuhëënë bhoose. 34Yesu akamobhoorera akabhugha, “Omuukë waane, obhokumi bhoocho ˆbhoghakuhöri! Nooghi kwo murëmbë, uhörë inkongʼorimu obhubhabharu bhoocho.”

35Hano Yesu are akeere arasiikëra no omukari uyo, abhaato bhakaacha koru o‑Yayiro, omukangati o risinaghooghi, bhakamobhoorera bhakabhugha, “Yayiro, tigha komunyaaki Omweghi, gho kubha omuukë waacho nakuure.”

36Amare hano Yesu oghwire amangʼana ghaabho, akamobhoorera Yayiro akabhugha, “Otatiina, ubhe no obhokumi hangʼu.” 37Yesu akabharëki abhaato abhande kubha bhataghöötana nawe. Aghaye na Bheetero, na Yakobho na Yohana ömööbhö Yakobho.

38Hano bhahikiri o‑Yayiro, Yesu akooghu ekerero, abhaato bhararera na kwihiinyërëra. 39Aghasöha mo‑nyumba, akabhabhoorera akabhugha, “Ngwake moghuköra eriireghe ne ekerero? Omuukë uno taamara aku, n‑komisi amisiri okwene.” 40Abhaato bhano ꞉bhaare hayo, bhaghasëëma komusëka gho ghitaraaho, mbe, akabhahoroki bhoose anche. Akamwimoki ishe, na nyina na abhaanabheegha bhaache bhatato, bhaaghaye mo‑kenyumba kino ꞉bhaare bhamotooriri omuukë uyo. 41Akamughööta omuukë uyo okubhökö, akamobhoorera akabhugha, “Tarita, kumi!” egheteemoro keeche, “Omuukë, ˆneghakobhoorera, bhooka!” 42Hayo hayo, omuukë uyo, o meeka ikomi ne ebhere, akiimeerera, aghasëëma ghughënda. Bhakahagha chwee. 43Yesu akabharëki kubha bhatamobhoorera omooto wowoose ghano ghaköruru. Akabhabhoorera abhiibhori bhaache bhamuhë ebhiinyakurë.

Currently Selected:

Maariko 5: ntk

Highlight

Copy