Maariko 7

Chaasughara che bhasookoro

(Mataayo 15:1–9)

1Mbe, Amabharisaayo na abheeghi bha meghiro abhamu bhano bharuure Yerusareemu, bhaghiikomana ambërë e Yesu. 2Bhakarighi abhaanabheegha bha Yesu abhamu mbakuraaghëra kwo mabhökö amaghonchu, niko kobhugha, bhatishaabhiri kebhuno ekwëndëru. 3Mo‑chaasiko chiyo, Amabharisaayo na Abhayahuuti bhoose bhataare bhararë egheghiro bhatishaabhiri amabhökö mbagha mo‑changokoro kinya ekwëndëru, kurëngʼaana na chatëëmö che bhiishakoro. 4Wiiki, hano ꞉bhaare bhararu mo‑mitëëra bhataare bhararë egheghiro ghyokyose, mbagha bhishaabhe amabhökö singa. Wiiki mbaare na asughara ayende ino bhasongʼaaniri korwera kare kinya kweghi ebhisënchö, ne ebhehurero ne ebheghiro bhe shabha.

5Mbe, Amabharisaayo na abheeghi bha meghiro bhakamobhoori Yesu bhakabhugha, “Ngwake abhaanabheegha bhaacho bhataaghutambana chaasughara che bhasookoro bhiito, amare mbakuraaghëra na amabhökö maghonchu?”

6Yesu akabhagharokeri akabhugha, “Inyu n‑chaghughuuti moonyi. Eryobha ꞉ndeebhughiri obhuhëënë ighoro yaanyu gho kohetera amandëkö gha murööti Isaaya kubha,

‘Abhaato bhano mbaghonsooka kwo mangʼana agheene hangʼu,

amare emetema gheebho n‑kurë gheenyi na neeni.

7Ghusëngëra koobho n‑kwo bhoowa,

gho kubha mbaheeghi ameeghi gha maraghereri gha bhaato kinya n‑gha Ryobha.’#7:6–7 Mööhi Isaaya 29:13.”

8Yesu akëëndërëra kobhabhoorera akabhugha, “Inyu moghotigha amaraghereri gha Ryobha, moghutambana chaasughara che bhaato.

9“Inyu mweche kwibhareka kwo bhongʼiini emeghiro ghe Ryobha, kubha mubhönë ghutambana chaasughara cheenyu! 10Gho ghetuubhaani, Eryobha ndihatëkiri kohetera kwo Musa kubha, ‘Obhasooke iso na nyako.’#7:10a Mööhi Kohoroka 20:12; Kohiita kwo Meghiro 5:16. Wiiki, akabhugha kubha, ‘Omooto wowoose uno aghotoka ishe hamu nyina, nakwëndëru ghwitu.’#7:10b Mööhi Kohoroka 21:17; Abharaawi 20:9. 11Amare inyu, mokweghi morabhugha kubha omooto niishereriiru komobhoorera ishe hamu nyina kubha, ‘Ebheghiro bhino nengatoriri ghoghusakeri, mbibheere Koribhaani,’ egheteemoro keeche, n‑atuho kwo Waryobha. 12Kweghi koonyu hangʼu koonyi, ngoghughëri omooto atatoori ishe hamu nyina, egheghiro ghyokyose. 13Mbe, gho ghuköra hangʼu ˆmoghatigha ghosooka angʼana e Ryobha, gho ghutambana chaasughara che bhiisokoro. Wiiki moghuköra amangʼana maaru ghano ghatuubhiine na ghayo.”

Amangʼana ghano ghaghoghonchi omooto

(Mataayo 15:10–20)

14Yesu aghakoma erikinda re bhaato wiiki, akabhabhoorera akabhugha, “Inyu bhoose muntëghëërërë, moghamanyë amangʼana ghaane. 15Ghetaanyi‑ho egheghiro kino ghekomusöha omooto kemukörë abhe moghonchu ambërë e Ryobha. Amare, ghano ghaakoru mo‑körö e mooto nigho ghakomuköra aghonche. [ 16Omooto wowoose uno anyi na amatu gha kooghu, no oghu.]”

17Hano aretighiri erikinda re bhaato, na ghusöha mo‑nyumba, abhaanabheegha bhaache bhakamobhoori ighoro e ghetuubhaani kiyo. 18Akabhabhoorera akabhugha, “Koru inyu motaanyi no obhongo bho kumënya eghetuubhaani kiire? Moteeche kubha egheghiro ghyokyose kino ghekomusöha omooto ghetaaghotora komuköra aghonche? 19Ekiinyakurë kino omooto akurë ghetahaayi mo‑körö yaache, nkehaasöha mo‑nda, keramara kehoroka anche e mobhere waache.” Gho kobhugha hangʼu, Yesu ꞉nëërëkiri kubha, ebhiinyakurë bhyose mbiishereriiru koreebhu.#7:19 Ebhiinyakurë bhyose mbiishereriiru koreebhu. Mo‑meghiro ghe Musa, Abhayahuuti bhatiishereriiru kurë ebheghiro ebhende kinya chambeechi ne ebhesusu. Mööhi Abharaawi 11. 20Akëëndërëra kobhugha kubha, “Ghano ghakorwera mo‑körö e mooto, nigho ghaghughëri omooto aghonche. 21Niko kobhugha mo‑körö niho ghahaarwera amiihëëbhö amabhe, no obhutaari, no obhwibhi, no obhwiti, 22no obhusööhu, amiigha amabhe, no bhuröngö, na amangʼana gha chaasoni, ne eriihari, na amatoki, no omutu muköngʼu no obhughëëghë. 23Amabhe ghoose ghayo ghakorwera mo‑körö e mooto, nigho ghaghughëri omooto aghonche.”

Obhokumi bho mukari o matöngö

(Mataayo 15:21–28)

24Yesu na abhaanabheegha bhaache bhaghatanura mo‑mukööwa o Ghariraaya, bhaaghaye mo‑se e Tiiro na Sitooni. Iyo aghasöha mo‑nyumba imu, tëëndiri omooto wowoose amënyë kubha hayo anyi. Amare taatoriri kwibhisa. 25Hayo naare‑ho omukari umu, omuukë waache are no omusambu. Hano oghwire kubha Yesu haghuhe anyi, akamutambana, akabhuna ebheru ambërë yaache. 26Omukari uyo m‑mwikari o Bhoyinike mo‑mukööwa o Siiriya, iwe taare Omuyahuuti. Akamusabha amoruusi omoona waache omusambu.

27Yesu akamobhoorera akabhugha, “Taanyi bhoheene kwimoki ekiinyakurë ke bhaana na ghochiha chaseese.#7:27 Abhaana na chaseese. Abhayahuuti bharabhugha abhaana, egheteemoro keeche n‑Abhayahuuti abheene. Wiiki, hano bhabhughiri chaseese, egheteemoro keeche n‑abhaato bha matöngö. Singa abhaana bhiighote.” 28Amare omukari uyo akamugharokeri Yesu akabhugha, “Omutëmi, m‑mahëënë ghano obhughiri. Amare, hano abhaana bhaharaaghëra, koru chaseese choose nchehaari amatigho ghano ghaghwire haase koru mo‑chameecha cheebho.”

29Yesu akamugharokeri akabhugha, “Hayo nobhughiri bhoheene. Mbe, nooghi, omusambu numariri komoru omuukë waacho.” 30Omukari uyo aghagharuka awaache, akabhöna omoona waache amisiri mo‑bhorere, no omusambu omoruure.

Yesu ˆakamuhöri omokiro

31Niho Yesu aghatanura na abhaanabheegha bhaache mo‑se e Tiiro, akaheta ghateghate e Sitooni, aghaye mbagha mo‑se e Tekabhoori, haghuhe na anyancha e Ghariraaya. 32Iyo ꞉haare no omooto umu, uno are omokiro wiiki naare erimuumu. Abhaato nyarebhe bhakamurëëta o‑Yesu, bhakamusabha Yesu amotoorere amabhökö, amuhöri. 33Yesu akamoruusi mo‑rikinda re bhaato, aghaye nawe omwene chiri haghare. Aghatoora ebhyara bheeche mo‑matu gha mooto uyo. Aghatwera amatë mo‑kyara keeche, akamuhaka mo‑roreme. 34Aghagharaamereri Mwishaaro, aghiiki omwika, akamobhoorera akabhugha, “Ebhata,” egheteemoro keeche, “Ighoka.” 35Hayo hayo, omooto uyo aghatachuka amatu no ororeme, aghasëëma kooghu na ghosiikëra bhoheene.

36Yesu akarihatëka erikinda re bhaato kubha, bhatamobhoorera omooto wowoose ghano aköriri. Amare kinya are arabharëki, nibhu ꞉bhiiköngʼiri chwee kuraghani angʼana iyo. 37Bhakahagha chwee, bhakabhugha, “Ghoose ghano aköriri m‑machömu. ˆAghaghëri abhakiro bhakooghu, na amamuumu ˆghaghasiikëra!”

Currently Selected:

Maariko 7: ntk

Highlight

Copy