Maariko 8

Yesu ˆakaraagheri abhaato ebheku bhine

(Mataayo 15:32–39)

1Kwo riibhagha riyo, erikinda erende re bhaato ꞉ndiikomiine, na bhataare ne ebhiinyakurë. Niho Yesu akabhabherekera abhaanabheegha bhaache, akabhabhoorera akabhugha, 2“Nekobharigheri changori abhaato bhano gho kubha ntwikeere nabho chaasiko ishato, naho ibheere bhataanyi ne ebhiinyakurë. 3Aribha nerabharagha bhaghëndë bhowaabho na anchëra, mbaghotora ghoteni mo‑nchëra, na abhande mbaruure kurë.”

4Abhaanabheegha bhaache bhakamugharokeri bhakabhugha, “Hano mwiteregho, taanyi‑ho omooto uno aghotora ghoghibhöna emighaate ghe ghwisha abhaato bhano bhoose.” 5Yesu akabhabhoori akabhugha, “Moonyi ne emighaate erenge?” Bhakamobhoorera bhakabhugha, “Hano ntoonyi ne emighaate mohungate.”

6Yesu akahatëka abhaato bhoose bhiikare haase. Akiimoki emighaate ghiire mohungate, aghiitabheri Eryobha, aghaghesuura. Akabha arabhaha abhaanabheegha bhaache, bhabhahööhi abhaato. 7Wiiki, mbaare ne ebhesu bhesuuhu. Yesu akabhugha, “ˆOghachömi, Waryobha,” wiiki, akabhaha abhaanabheegha bhaache bhabhahööhi abhaato.

8Abhaato bhaakarë, bhaghiighota bhoheene. Abhaanabheegha bhaghakoma ebhiinyakurë bhino bhisaaghiri, bhaghiichori ebhetonga mohungate. 9Abhaato bhano bhariire ebhiinyakurë mbaare kinya ebheku bhine (4,000). Yesu akabharagha abhaato bhaare, bhaaghaye bhowaabho. 10Hayo hayo aghasöha mo‑bhwato na abhaanabheegha bhaache, bhaaghaye mo‑se e Tarumanuta.

Amabharisaayo mbakwënda ekyërëkërëri

(Mataayo 12:38–42, 16:1–4)

11Eriibhagha Yesu na abhaanabheegha bhaache bhahikiri Tarumanuta, Amabharisaayo bhakaacha o‑Yesu. Bhaghasëëma ghoshangʼaana nawe kubha bhamutëghë. Mbaare bharamusabha abhëërëki ekyërëkërëri ghe kwërëki kubha ꞉naaruure kwo Waryobha.

12Yesu akabha na amacheeche mo‑körö. Akabhabhoorera akabhugha, “Ngwake inyu abhaato bha rwibhoro runo mokwënda korighi ekyërëkërëri? Mahëënë ˆnekabhabhoorera, eni ntëëköbhëërëki ekyërëkërëri ghyokyose abhaato bha rwibhoro runo.” 13Akabhatigha, aghasöha wiiki mo‑bhwato haghirohamu na abhaanabheegha bhaache. Bhaghasëëma orughëndö ghutëënya amwambuko o nyancha.

Atöngërö ighoro e bhakangati bha Kiyahuuti

(Mataayo 16:5–12)

14Abhaanabheegha bha Yesu mbaare bheebhuru ghughëgha emighaate myaru. Mbaare no omughaate umu hangʼu mo‑bhwato. 15Yesu akabhashaangʼi akabhugha, “Mubhe amiisho no obhotondoru#8:15 Obhotondoru. Yesu narëngʼiini obhotondoru bhuyo no obhoseeghereri obhobhe bhuno Amabharisaayo na Herote Antibha ꞉bhaare bharaköra mo‑bhaato. Obhoseeghereri bho Amabharisaayo mboore na ameeghi gha bhuröngö. Herote Antibha naare omoseeghereri o nchëra ambe. Mööhi Mataayo 16:12. bho Mabharisaayo na bho mutëmi Herote Antibha.”

16Abhaanabheegha bhaache bhaghasëëma kobhoorani abheene kwo bheene. Bhakabhugha, “Nabhughiri hangʼu, gho kubha totiimokiri emighaate.” 17Yesu ꞉naamënyiri ghoose ghano ꞉bhaare bharabhoorani, akabhabhoori akabhugha, “Ngwake inyu moghoshangʼaana kubha, motaanyi ne emighaate? Moteeche koru motaamara mumënya ghyokyose? Ngwake emetema gheenyu ghebheere miköngʼu? 18Moonyi na amiisho, amare motaakorighi egheghiro? Moonyi na amatu, amare motaakooghu? Ibheere, ngwake motaakohiita? 19Eriibhagha riire hano nesuuriri emighaate ghiire etaano na kobhaha abhaato ghokera ebheku bhitaano (5,000), ꞉mookomiri ebhetonga bhirenge bhe bhiinyakurë bhino bhisaaghiri?” Bhakamugharokeri bhakabhugha, “꞉Ntookomiri ebhetonga ikomi na bhibhere.”

20“Hano nesuuriri emighaate mohungate na kobhaha abhaato ebheku bhine (4,000), ꞉mookomiri ebhetonga bhirenge bhe bhiinyakurë bhino bhisaaghiri?” Bhakamugharokeri bhakabhugha, “Ebhetonga mohungate.”

21Akamara akabhabhoori akabhugha, “Koru ibheere motaamara mumënya?”

Yesu ˆakamuhöri omohuku

22Yesu na abhaanabheegha bhaache bhakahika mo‑kyaro ke Bhetisaayita. Abhaato nyarebhe bhakamurëëta omohuku umu. Bhakamusabha Yesu amoturi na komuhöri. 23Yesu akamughööta okubhökö omohuku uyo, aghaye nawe rubhareka ro kyaro kiire. Akamotwera amatë mo‑miisho, aghatoora amabhökö mo‑miisho, akamobhoori akabhugha, “Ibheere, noghotora korighi ghyokyose?” 24Omooto uyo akaramoki, akabhugha, “ˆNekarighi abhaato, amare mbanga kinya emete ghino gheghughënda.”

25Yesu aghatoora amabhökö wiiki mo‑miisho, omooto uyo aghiiköngʼi kumööhërëri. Aghatora korighi ebheghiro bhyose bhoheene. 26Yesu akamobhoorera akabhugha, “Nooghi awaacho, amare otasöha mo‑kyaro.”

Bheetero ˆaghiishereri kubha Yesu niwe Kirisito

(Mataayo 16:13–20; Ruuka 9:18–21)

27Yesu na abhaanabheegha bhaache bhaghatanura Bhetisaayita, bhaaghaye mo‑bhyaro bhe haghuhe na Kayisaariya‑Bhiribhi. Hano bhaare mo‑nchëra, Yesu akabhabhoori akabhugha, “Abhaato mbakobhugha kubha, eni neeni we?” 28Bhakamugharokeri bhakabhugha, “Abhande mbakobhugha iye n‑Yohana Omubhatisaachi, abhande mbakobhugha iye n‑omurööti Eriya, abhande mbakobhugha n‑umu ghate e bharööti abhande bha Ryobha.”

29Akabhabhoori akabhugha, “Amare inyu kana, mokobhugha eni neeni we?” Bheetero akamugharokeri akabhugha, “Iye niiye Kirisito.” 30Yesu akabhashaangʼi bhatasaki kobhoorera omooto wowoose kubha, iwe n‑niwe.

Yesu ˆakarööta ghoku na koryoka kooche

(Mataayo 16:21–23; Ruuka 9:22)

31Akamara Yesu aghasëëma kobheeghi abhaanabheegha bhaache kubha nakwëndëru, Omoona o Mooto, abhönë anyaako ihaari, na kwangu na abhagharuka bha Bhayahuuti, na abhakoro bha bhachaama, na abheeghi bha meghiro, na ghwitu. Amare orosiko ro ghatato korwera ghoku ghokooche, nakoryoka. 32Yesu naare arabhabhoorera abhaanabheegha bhaache angʼana iyo haheero. Amare Bheetero akamobherekera rubhareka, aghasëëma komoshaangʼi. 33Yesu aghiishoorori, akabhamööhërëri abhaanabheegha bhaache. Akamoshaangʼi Bheetero akabhugha, “Nooru ambërë yaane ugharuke anyuma, iye Erishambu! Nokwihëëbha ghano ghataanyi gha Ryobha, amare n‑gha bhaato okwihëëbha.”

Eriighori re komutambana Yesu

(Mataayo 16:24–28; Ruuka 9:23–27)

34Akabherekera erikinda re bhaato haghirohamu na abhaanabheegha bhaache, akabhabhoorera akabhugha, “Omooto wowoose uno akwënda ghuntambana, nakwëndëru iyange omwene,#8:34a Iyange omwene. Egheteemoro keeche, arihökëri Eryobha gho kobhakörëra abhande amachömu. Mööhi Maariko 12:30–31. aghëghë omusarabha waache,#8:34b Aghëghë omusarabha waache. Egheteemoro keeche, n‑komwishereri Waryobha kwo mukörö waache woose na kubha ghwishereri ghoku gho ghiri e Yesu. antambane. 35Gho ghayo omooto uno akwënda kobhuhöni obhuhöru bhooche, nakobhori obhuhöru bho miishe ghyose. Mahëënë wuure akoruusi obhuhöru bhooche gho ghiri yaane na gho ghiri e Ngʼana Anchömu, nakobhotoori. 36Omooto nakubhöna ke, aribha abhwine ebheghiro bhyose bhe mo‑se ino, amare abhori obhuhöru bho miishe ghyose? 37Ghetaanyi‑ho egheghiro ghyokyose kino omooto aghotora koruusi gho ghotingori obhuhöru bho miishe ghyose! 38Eriibhagha Omoona o Mooto neghwika na bhamarayika abhatööbhiyu mo‑bhokumi obhokoro bho Taata waane, nekomorigheri chaasoni omooto wowoose uno akondigheri eni chaasoni na ameeghi ghaane kwo riibhagha rino abhaato bhaghuköra amasari na bhataaghotereera Eryobha.”

Currently Selected:

Maariko 8: ntk

Highlight

Copy