Yohana 15
15
OMUZABIBU N’AMATABI. — OBWENDANI. — AB’ENSI BALIHATA ABAHEMBA BA YEZU.
1Ine ndi muzabibu gwa kimo, kai Tata niwe mulimi. 2Bul’itabi elitakuraba ebirabo hal’ine, akulihaho; kai buli elikuraba, akulisalira lihiche kuraba kukiraho. 3Imwe na hati mwayezibwe kuber’ebigambo ebyo nabagambire. 4Nimwikare mul’ine, n’ene mul’imwe. Nk’okwo itabi litakuhicha kuraba lyonka, litali ha muzabibu, nikwo n’emwe mutyo, mutali mul’ine. 5Ine ndi muzabibu, imwe matabi. Akwikalira mul’ine, n’ene muli wenene, ogwo akuraba muno: kuba mutali n’ene, timukuhicha kukola kantu. 6Omuntu atakwikara mul’ine, alinagwa h’esazi nk’itabi, alyoma, balimusena, bamute mu muliro, ahye. 7Mukekalira mul’ine, n’ebigambo byange bikaguma mul’imwe, buli chona echo mulyenda mukisabe, mulikihabwa. 8Muli ebyo nimwo Tata akukulizibwa, niho murabe bingi, nimuba bahemba bange. 9Nk’okwo Tata yanenzire, nikwo n’ene nabayenzire. Nimugumire mu bwenzi bwange. 10Ka mulihich’ebilagiro byange, muligumira mu bwenzi bwange, nk’okwo ine nahikize ebilagiro bya Tata, nimbera mu bwenzi bwe. 11Nabagambire ebyo, niho kusemererwa kwange kube mul’imwe, no kusemererwa kwanu kuhike.
12Kinu nicho kilagiro change: mwendane nk’okwo ine nabayenzire. 13Tihaliho muntu ali n’obwenzi bwingi kukira ogwo ateraho abanwani be omwoyo gwe. 14Mukuba banwani bange, ka mulakola ebyo nabalagire. 15Tinkibayeta beru, kuba omwiru takumanya echo isebugeni akora; imwe nkubayeta banwani, obwo byona ebyo nahulire hali Tata nkabibamanyisya. 16Imwe timwansozire; nawe n’ine nabasozire, nimbataho mugende, murabe, kandi ebyo mukuraba bigumeho; niho buli byona byona ebyo mulisaba Tata mw’izina lyange, alibaha. 17Ebyo nkubalagira ni binu: mwendane.
18Ensi ekabahata, mumanye okwo yatandikire kuhata ine. 19Mukiba muli bo mu nsi, ensi yakuyenzire ebyakubere byayo; mbe obwo mutali bo mu nsi, nawe ine n’ine nabasorwere mu nsi, nicho ensi ekubahatira. 20Nimwizuke ebigambo byange ebyo ine nabagambire, nti: Omwiru takukira isebugeni. Raba ine bannaranalize, n’emwe balibanaranaza; raba nibahicha ekigambo change, balihicha n’echanu. 21Nawe ebyo byona balibibagirira ha bw’ezina lyange, kuba tibakumanya ayantumire. 22Nkiba ntezire nkafumora nabo, tibakubere n’ekiheno; nawe hati tibakili n’echo kweyogesya entambala yabo. 23Akumpata akuhata na Tata. 24Nkiba ntakozire muli bonene ebikorwa ebitakakorwaga muntu, tibakubere n’ekiheno; nawe hati babwene, kai bahasire ine na Tata, 25nawe niho bihike ebyandikirwe mu Kilagiro chabo biti: Bampasire chonka. 26Nawe Omusasizi k’aliza, owe ndibatumaho kuruga hali Tata, niwe Mwoyo gw’obukomereza, akuruga hali Tata, ogwo ali mbona yange. 27Kai n’emwe mwena muliba mbona zange, kuba muli n’ene kuruga ha butandikiro.
Currently Selected:
Yohana 15: KED1946
Highlight
Share
Copy
Want to have your highlights saved across all your devices? Sign up or sign in
First published in 1946 by the White Fathers. Published online with the permission of the White Fathers.
