Luka 11

YEZU NAYOLEKERERA KULEMBEREZA. — OBUHICHA BWO KWIRUCH’AMASITANI.

1Mbe aho yaliga ali hantu handi nalembereza, ka yamazire, omo wo mu bahemba be namugambira ati: Rugaba, notwolekerere kulembereza, nk’okwo Yohana yayolekerere abahemba be. 2Nabagambira ati: Mwasoma, mwagira muti: Tata, izina lyawe likuzibwe. Obukama bwawe bwize. 3Otuhe lero omukate gwetu gwa lero. 4Otukize ebibi byetu, kuba n’etwe tukukiza buli ali n’ibanza lyetu. Otatuleka kubasibwa mu mitego. 5Nabagambira ati: Mul’imwe ali n’omunwani ni ga, akamukinguza mu kiro mw’itumbi akamugambira ati: Munwani, nompe mikate isatu, 6kuba omunwani wange, akuruga mu lugendo, yanizaho, ine tindi n’echo ndamukumira; 7kai onu mu nzu akagira ati: Leka kunnaza; omulyango gwakingirwe, n’abana bange bamamire nk’ene ha kitabo; tinkuhicha kwimuka no kukuha. 8Kandi wenene akaguma amukingwize, nkubagambira nti: Takwimukibwa kumuha obw’ali munwani we, nawe akwimukibwa akasinya ke, namuha buli echo akenire. 9Ine nkubagambira nti: Nimusabe, mulihabwa; nimuhige, mulibona; nimukinguze, mulikingulirwa. 10Kuba buli akusaba akuhabwa; akuhiga akubona; akukinguza akukingulirwa. 11Mul’ imwe n’oha akusaba ise omukate, kai wenene akamuha ibale? Hamo enfwi, kai wenene akamuha enzoka ha mwanya gw’enfwi? 12Hamo akasaba ihuli, kai akamuha akamina? 13Mbe hatyo imwe, naho muli babi, mukumanya kuha abana banu ebizima, kai kuta Iso wanu wo mw’igulu aliha ata ebizima bye abakumubisaba!

14Yaliga nairucha sitani, nawe lyonene lyaliga lili itita. Mbe ka yerukize sitani, omutita nafumora, ebipipi nibikuma. 15Nawe abandi nibatenga bati: Akwiruch’amasitani n’amani ga Belizebubu, omukuru w’amasitani#11, 15 Lora Matayo 10, 25.. 16Kai abandi nibamuroza nibamusaba olunyamo lwo mw’igulu#11, 16 Lora Matayo 16, 1.. 17Nawe wenene ka yabwene ebitekateko byabo, nabagambira ati: Buli bukama obukwegomera bukuhwaho, kai enzu negwera enzu yezabo. 18Mbe raba isitani nilyerwana, obukama bwalyo buliguma buta? kuba mwagira muti: akwiruch’amasitani n’amani ga Belizebubu. 19Mbe hatyo raba ine niniruch’amasitani n’amani ga Belizebubu, kai abana banu bakugerucha n’amani ga ga? Hatyo bonene baliba balamuzi banu#11, 19 Lora Matayo 12, 27.. 20Nawe raba niniruch’amasitani n’omukono gwa Mungu, koto obukama bwa Mungu bwezire mul’imwe. 21Omuntu w’amani, ali n’ebikwato, k’akulinda eka ye, ebye bikuchulera. 22Nawe akeza ondi amukilize amani, akamusinga, akumwaka ebikwato bye byona ebyo akuba nayesiga, nagaba ebyo yamunyaga#11, 22 Lora Matayo 12, 29.. 23Atali n’ene akungomera; kai atakubika n’ene akunaganaga. 24Omwoyo mulofu ka gwahurukire mu muntu, gukuyengera mu nsi ezyomire, niguronda obuhumuro; ka gwabuzirwe, nigugira guti: Ka nsube mu nzu yange omwo narugire. 25Ka gwezire, nigugisanga ekukumbire, echumire. 26Aho nigugenda nigusubira emyoyo zindi musanzu, ezigukizire obuyaga, nizitahamo nizituramo. Mbe ebikorwa by’omuntu ogwo ebyo kuhereruka nibibiha kukira ebya kara.

27Nihababo, aho yaliga akifumora atyo, omukazi wo mu kipipi natenga n’ilaka ihango namugambira ati: Enda eyakutwere eli n’omugisa, n’amabere ago wayonkire gona gali n’omugisa. 28Nawe wenene nagira ati: Abasingire kugir’ omugisa n’abakuhulira amagambo ga Mungu, bakagagumya.

OLUZARO LW’OBUYAGA. — ABAFARIZAYO NIBACHAHALIRWA.

29Mbe embaga ka yasumbire, natandika kugira ati: Oluzaro lunu ni luzaro lw’obuyaga; lukuhiga olunyamo, nawe tilulihabwa olunyamo lundi, lutali olunyamo lwa Yonasi omulagi. 30Kuba nk’okwo Yonasi akaba lunyamo lw’Abaninivi, nikwo n’Omwana w’omuntu aliba atyo ha b’oluzaro lunu#11, 30 Lora Matayo 12, 40.. 31Omugole wo mu malimbe alimuka mu lamu n’abantu b’oluzaro lunu, kai alibasinga; kuba akaruga mu mbibi z’ensi kwiza kuhulira obwenge bwa Salomoni, kai lora, akukira Salomoni aliho hanu. 32Abantu ba Ninivi balimuka kutongana n’abantu b’oluzaro lunu, kai balilusinga; kuba bakenaranaza ha bwo kwolekererwa Yonasi, kai lora, akukira Yonasi aliho hanu. 33Tihaliho akwach’olumuli akaluta aheserekire, hamo akalufundikira mu kitukuru; nawe akuluta ha mutereko, niho abakutahamo babone olumuli. 34Olumuli lw’engingo zawe ni liso lyawe. Eliso lyawe lili izima, engingo zawe zona zikuba n’omwanga; nawe likaba lirwere, engingo zawe zikugir’omwirima. 35Mbe noyetegereza olumuli oluli mul’iwe lutaba mwirima#11, 35 Lora Matayo 6, 23.. 36Mbe engingo zawe zona zikaba nizyaka, zitali n’ekihinzu mu mwirima, ziliba lumuli zona, zilikumulikira nk’omwanga gw’olulabyo.

37Yaliga akifumora, Omufarizayo ogwo namusaba aze kulya owe; natahamo naikara h’eliro. 38Omufarizayo ogwo akatekateka natandika kugira mu mutima gwe ati: Kubaki akulya atatandikire kunaba? 39Omukama namugambira ati: Imwe Bafarizayo, mukweza ebili ha bweru y’ekisusi n’olunanga; nawe ebyo mu nda yanu bizwire obusaku n’obuyaga. 40Basiru mwe, ayakozire ebya ha bweru takozire si n’ebyo mu nda? 41Nawe muhereze ha bisagire, niho byona bisemere hal’imwe. 42Nawe muligabona, Bafarizayo mwe, obwo mukuhereza emiherezo z’amatiriboga n’ez’emiyobyo n’ez’enganda zona za buli mukubi#11, 42 Lora Matayo 23, 23–24., kai nimuleka obuhikire n’obwenzi bwa Mungu; kilagirwe mukore binu, kai kuleka biliya pai. 43Muligabona, Bafarizayo mwe, kuba mukwenda ebitebe by’obusyo mu masomero no kubwakibwa mw’iguliro. 44Muligabona kuba muli nk’ebituro ebitakubonwa, abantu nibabilibataho batakumanya. 45Mbe omubuya w’ebilagiro omo namugambira ati: Mwolekerezi, k’okugamba ebyo, watugaya n’etwe. 46Wenene nagira ati: N’emwe ababuya b’ebilagiro, muligabona; kuba mukutwekerez’abantu emigugu ezo batakuhicha kutwara, kai imwe abene mutakukusyaho emigugu ezo n’echara chanu kimo. 47Muligabona, imwe abayombeka ebituro by’abalagi; kai baso nibo babesire. 48Nikwo mukumanyisya mutyo okw’ebikorwa bya baso nibibasemereza; obwo nibo babesire, kai imwe mukwombeka ebituro byabo#11, 48 Lora Matayo 23, 32.. 49Nicho obwetegereza bwa Mungu bukugirira buti: Ndibatumira abalagi n’entumwa, balita abandi, balinaranaza abandi; 50niho oluzaro olwo lubuzibwe ensagama y’abalagi bona eyasesekire kuruga obuhangi bw’ensi, 51kuruga ha nsagama y’Abeli kuhika ha nsagama ya Zakariya ayetirwe hagati y’olutare n’eklezia. Nicho nkubagambirira nti: elibuzibwa ha luzaro lunu. 52Muligabona, imwe babuya b’ebilagiro, kuba mukehaho olukinkuzo lw’obumanyi; kai imwe abene nimubura kutahamo, kai n’abaliga nibayenda kutahamo, nimubazibira. 53Ka yagambire ebyo, Abafarizayo n’ababuya b’ebilagiro nibatandika kumwekumiriraho no kumubuliriza bingi, 54nibamutega nibayenda kuhulira ekigambo mu kanwa ke, bahiche kumulega.

Currently Selected:

Luka 11: KED1946

Highlight

Copy