Luka 13
13
KUTAMW’EBIHENO. — OLUGANI LW’OMUTINI. — OMUKAZI NAKIZIBWA HA SABATO.
1Haliga haliho abantu mu katungu ako nibamugambira eby’Abanagalilaya, abo Pilato yatobire ensagama yabo n’ebitambo byabo#13, 1 Ekigambo echo kikumanyisya entungwa mbi za Herode; kai lunaku lundi akatuma abasirikale be kuza kutem’emitwe z’abantu 20,000.. 2Nasubamo nabagambira ati: Mukuchwa muti: Abanagalilaya banu ni baheni muno kukira Abanagalilaya bona, obwo basasibwe obusasi butyo? 3Pai, nkubagambira nti: Ka muliba mutatamirwe, n’emwe mwena mulisingarika mutyo#13, 3 Ebiheno bikunigahaza Mungu, kai kengi amazongoko go mu nsi ni binaranazo bya Mungu. Nicho Yezu atugambirira kutamwa ebiheno byetu.. 4Nka baliya ikumi na munana abagwererwe omunara muli Silo, nigubeta, mukuchwa muti: baliga bali n’entambala kukir’abantu bona ba Yeruzalemu? 5Pai, nkubagambira nti: mukabura kutamw’ebiheno, mulisingarika mutyo mwena.
6Kandi nachwa olugani lunu ati: Omuntu ogwo yaliga ali n’iti ly’omutini gubyerwe mu muzabibu gwe; naiza kuhigaho ebirabo, nabura kubisangaho. 7Mbe nagambira omulimi w’omuzabibu ati: Lora, ni myaka isatu kuruga niza kuhiga ebirabo ha mutini gunu, nabura kubona; mbe noguteme: kai gukumaliraho ki itaka? 8Oliya ka yasubiremo, namugira ati: Nineka, nogulekeho na mwaka gunu, ndagulimirira mu mbazu, nguhumire; 9hamo gukuraba; nawe ka guliba gutarabire, oguteme naku zindi okwo.
10Mbe yaliga nayolekerera mw’isomero lyabo ha lwa sabato. 11Niwe n’omukazi ayaliga ali n’omwoyo ogwamulemahazaga kuruga myaka ikumi na munana, yaliga yenamire, atakihicha kweimucha. 12Yezu ka yamubwene, namweta kumwizaho, namugambira ati: Mukazi we, wakizibwa endwara yawe. 13Namutaho omukono; aho honka nagororoka, nasima Mungu. 14Omukuru w’isomero akabihirirwa, obwo Yezu yakirize ha lwa sabato, nasubiramo, natengera embaga ati: Haliho naku mukaga zo kukoleramo emilimo; mbe nimwizirega muli ezo, nimukizibwa, ha lunaku lwa sabato pai. 15Nawe Yezu namusubiramo nagira ati: Bazigi mwe, si buli muntu mul’imwe tasibul’enumi ye mu kibuga ha lunaku lwa sabato, akagisagara kuhonera? 16Kai omuhara onu wa Ibrahimu, ayabohirwe sitani myaka ikumi na munana, niwe atali wo kusurumurwa mu miguha ezo ha lunaku lwa sabato? 17Ka yatengire ebyo, abahagarikanaga nage bona nibakorw’ensoni; kai n’embaga yona nesemerezibwa ebikorwa by’ikuzo byona ebyakorwaga wenene.
OLUGANI LW’ENZUMA YA HARDARI N’OLW’ITUMBYO. — OMULYANGO GUFUNZIRE. — EBINIGA BYA HERODE.
18Mbe nagira ati: Obukama bwa Mungu bukulenganisibwa na ki? kai ine mbulenganisye na kiha? 19Bukulenganisibwa n’enzuma ya hardari, ey’omuntu yatwere akaginaga mu musiri gwe; nekura, niliba iti ihango; enoni zo mw’igulu nizigwa mu matabi galyo#13, 19 Lora Matayo 13, 32.. 20Nasuba kugira ati: Obukama bwa Mungu mbulenganisye na ki? 21Bukulenganisibwa n’itumbyo, ely’omukazi yatwere nalitobera mu ndengo isatu z’ensyano, kuhika lyona libire#13, 21 Lora Matayo 13, 33..
22Naraba mu byaro na mu nsozi nayolekerera, ali mu muhanda gwa Yeruzalemu. 23Mbe omuntu ogwo namugira ati: Mukama wange, angu balichunguka bake? Wenene nabagambira ati: 24Nimwesinirize kuraba mu mulyango gufunzire; kuba mbagambire, bengi balihiga kutahamo, kai tibalihicha. 25Kanaka k’aliba yatahiremo yakingire omulyango, niho mulitandika kwemerera hanza no kukinguza, nimugira muti: Rugaba, notukingulire. Alibasubamo nabagira ati: Tinkumanya eyo mukuruga. 26Niho mulitandika kugira muti: Tukalya nitunwa mu meso gawe, kai iwe okayolekerera mu maguliro getu. 27Alibagambira ati: Tinkumanya eyo mukuruga; mundugeho mwena abakozire amabi. 28Okwo niyo haliba kulira no kuteranisy’ameno, ka mulibona Ibrahimu, na Izaki, na Yakobo, n’abalagi bona mu bukama bwa Mungu, kai imwe muhurukibwe hanza. 29Baliza kuruga ha buturuka n’obugwa, na mu buhanga na mu malimbe, kwikara mu bukama bwa Mungu. 30Lora, baliho abo kuhereruka abaliba bo kutandika, kai baliho abo kutandika abaliba bo kuhereruka#13, 30 Igulu ni muhero gw’emilimo, abazikozire bonka nibo balitahamo..
31Lunaku olwo lwonene abandi bo mu Bafarizayo nibeza hehi nibamugira bati: Rugaho, ogende handi, kuba Herode akwenda kukwita. 32Nabagambira ati: Roko, mugambire namubwebwe egyo muti: Lora, nkwiruch’amasitani, nkumaliza omulimo gwo kukiza lero na nencha, ha lunaku lwa kasatu nimmara. 33Nawe lero na nencha n’obuchere ndi no kulibata, kuba ti ch’omulagi kufwa, hatali Yeruzalemu. 34Yeruzalemu, Yeruzalemu, iwe akwita abalagi nolasy’amabale abakutumwa hal’iwe, nkayenda kangaha kukumanyisya abana bawe, nk’embuguma y’enkoko nekumanyisya obwanakoko bwayo mu mababa gayo, iwe noyanga! 35Lora, enzu yanu elisingarika, gabe matongo. Nkubagambira okwo mutalimbona kuhika olunaku lwize, olwo muligira muti: Abarikirwe akwiza mw’izina ly’Omukama#13, 35 Lora Matayo 23, 39..
Currently Selected:
Luka 13: KED1946
Highlight
Share
Copy
Want to have your highlights saved across all your devices? Sign up or sign in
First published in 1946 by the White Fathers. Published online with the permission of the White Fathers.
