Luka 17
17
KUSITAZA. — KUGOROZANYA. — KWIKIRIZA. — OLUGANI LW’OMWIRU. — AB’OMUBILI IKUMI.
1Nagambira abahemba be ati: Ebyo kusitaza tibukuhicha kuburaho; nawe owe bikurugiriraho aligabona. 2Ekimuhikire ni kukomwa olumengo mu bicha bye no kutubizibwa mu nanza, kukira wenene kusitazaho omo n’omo wo mu banamuto banu#17, 2 Lora Matayo 18, 6..
3Mwelinde abene. Mutabani wanu akakuhenera, omuhane; akefuza, omusasire. 4Naho akakuhenera ngendo musanzu#17, 4 “Ngendo musanzu” ni bucha bucha. lunaku lumo, kai ngendo musanzu akahindukira hal’iwe, nagira ati: Nayefuza, omusasire.
5Entumwa nizigambira Omukama ziti: Notwongere kwikiriza. 6Omukama nagira ati: Mukiba muli no kwikiriza nk’enzuma ya hardali, mwakugambire iti linu muti: Kuka, oyebyare mu nanza, lyakubahulire.
7Nawe mul’imwe haliyo ga ali n’omwiru mulimi hamo mulisya, akaruga ha musiri, akamugambira ati: Roko bwangu, oikare h’eliro? 8si takumugambira ati: Nontekere ebilyo, oyebohe onkolere, mmare kulya no kunwa, mbe niho n’ewe olye, onwe? 9Si omwiru ogwo akumusima, obwo yakola ebyo yamulagira? 10Tinkwikiriza. Mbe nikwo n’emwe, mukamara kukola byona ebyo mukulagirwa, mugire muti: Tuli beru banantagasa; twakola ebyo tuli no kukola.
11Mbe akigenda Yeruzalemu, naraba hagati ya Samariya na Galilaya. 12Mbe ka yatahire mu charo kindi, abaseza ikumi bachwekire omubili nibamwizaho, nibayema hara#17, 12 Lora Matayo 8, 4.; 13nibahamuka n’amalaka mahango, nibagira bati: Yezu Mwolekerezi, notwitirw’ekisa. 14Ka yababwene, nagira ati: Roko, mweyoleke abasaserdoti. Mbe ka bagenzire, nibechura bakizire. 15Nawe omo muli bonene ka yabwene yakizire, nasuba nakuza Mungu n’ilaka ihango. 16Nagwa buzumi mu maguru ge, namukampiza; kai ogwo yaliga ali Munasamariya. 17Aho Yezu nasubamo nagira ati: Si tibakira ikumi, kai abandi mwenda bali hai? 18Tihaliho ayasuba kukuza Mungu, atali omugeni onu. 19Namugambira ati: Imuka, ogende; kuba kwikiriza kwawe kwakukiza.
EBYO KWIZA KW’OBUKAMA BWA MUNGU.
20Nabuzibwa Abafarizayo bati: Obukama bwa Mungu buliza lihi? Ka yasubiremo, nagira ati: Obukama bwa Mungu tibukwiza ha bweru; 21tibaligira bati: Mbubu hanu, hamo bati: Mbubwo kuliya. Kuba obukama bwa Mungu mbubu buli mul’imwe#17, 21 Obukama bwa Mungu tibukubonwa n’ameso, buli mu bantu bazima abetegekire kubuhabwa.. 22Nagira abahemba be ati: Ziliza enaku ezo mulyegongeramo kubona olunaku lumo lw’Omwana w’omuntu, kai timulilubona. 23Kai balibatengera bati: Ngugu hanu, ngugwo kuliya. Muleke kugenda no kubaruba. 24Kuba si nk’okwo olulabyo lukurabiza kuruga ha muhero gw’olutumba, lukamulika kuhika ha muhero gundi, nikwo n’Omwana w’omuntu aliba atyo ha lunaku lwe. 25Nawe ali no kutandika kusasibwa bingi no kwangwa oluzaro lunu. 26Kai nk’okwo habere mu naku za Noe, nikwo haliba hatyo mu naku z’Omwana w’omuntu. 27Baliga nibalya nibanwa, nibaswer’abakazi, nibagabura kuhika olunaku olwo Noe yataha mu bwato; neiza enzula ya kaboza neita bona. 28Nikwo bityo nk’okwo byabere mu naku za Loti: baliga nibalya nibanwa, nibagabura, nibatunda, nibabyara, nibayombeka; 29nawe olunaku olwo Loti yaruga Sodoma, enzula y’omuliro n’ekibiriti negwa, nesingaricha bona. 30Nikwo haliba hatyo na ha lunaku olw’Omwana w’omuntu alisokoka. 31Mu katungu ako aliba ali ha luswi, kai ebintu bye bili mu nzu, atalihanantuka kuza kubihamo; nikwo n’aliba ali ha musiri, atalisuba enuma. 32Mwizuke muka Loti#17, 32 Muka Loti akekebuka kulora echaro cha Sodoma nikiyokibwa, nafwa ahw’aho, n’engingo ze niziba kiswa ch’omwonu.. 33Buli muntu aliba nahiga kukiz’omwoyo gwe, aligunaga; kai buli aliba agunagire, aligubonera kulora. 34Nkubagambira nti: Mu kiro echo baliba babili ha kitabo kimo; alihwaho omo, asigweho ondi. 35Abakazi babili abaliba nibasyera hamo, aihweho omo, asigweho ondi. Abantu babili baliba ha musiri; aihweho omo, ondi asigweho. 36Ka basubiremo, nibagira bati: Ni hai, Rugaba? 37Wenene ati: Honahona ah’omutumbi guliba guli, niyo n’empungu zilyekobanira#17, 37 Lora Matayo ekihinzu cha 24 chona n’ebisombozo byacho..
Currently Selected:
Luka 17: KED1946
Highlight
Share
Copy
Want to have your highlights saved across all your devices? Sign up or sign in
First published in 1946 by the White Fathers. Published online with the permission of the White Fathers.
