Luka 23

NIBAMUSAGARA OWA PILATO. — HERODE NAMUSEKERERA. — YEZU HAMO BARABA. — ELAMU.

1Embaga yabo yona neimuka, nibamusagara hali Pilato. 2Nibatandika kumuchulira, nibagira bati: Onu twamusanga nagomera ihanga lyetu, nazibira kusororeza Kaizari omusoro, kai nayeyeta Kristu Mukama. 3Pilato namubuza nagira ati: Hatyo si oli mukama w’Abayahudi? Wenene nasubamo nagira ati: Wakigamba. 4Mbe Pilato nagambira abakuru b’abasaserdoti n’embaga ati: Tinabonaho ntambala ha muntu onu. 5Bonene nibaguma kugira bati: Akugomesy’embaga, nayolekerera muli Buyahudi yona, kwihirira Galilaya kuhika kunu. 6Pilato ka yahulire ekigambo Galilaya, nabuza okw’ali Munagalilaya. 7Ka yamanyire okw’ali wo mu butware bwa Herode, namusindika hali Herode, ayaliga ali Yeruzalemu mu naku ezo.

8Herode ka yabwene Yezu, nasemererwa muno; kuba yayegongaga kumubona kuruga naku ningi, obwo yaliga yahulire bingi hali wenene, yategezaga kubona ihano kukorwa wenene. 9Namubuza ebigambo bingi; wenene tiyamusubiremo kintu. 10Abakuru b’abasaserdoti n’abandiki baliga baliho nibayomereza kumuchulira. 11Herode namugaya n’embaga ye, namusekerera, namuzweka omwenda gumwera#23, 11 Kara kuti abakama bonka bazwaraga ebizwaro bimwera., mbe namusubya hali Pilato. 12Ha lunaku olwo Herode na Pilato nibaba banwani; kuba kutandika baliga bahatene.

13Pilato nayeta abakuru b’abasaserdoti n’abagurusi n’embaga, 14nabagira ati: Mwandetera omuntu onu, muti: Akugomesy’embaga; mbe lora, ine nkamubuza muliho, tinabonaho ntambala nangu ha muntu onu muli byona ebyo mukumuchulira. 15Na Herode wena pai; kuba nabasindika hali wenene, tihaliho echabonwaho ekihikire kumwitira. 16Nkumutez’ensanzu, nimmusindika kugenda. 17Yaliga ali no kusurumuliraho embohe emo ha lunaku lukuru. 18Embaga yona neyombera hamo negira eti: Sagara onu, otusurumulire Baraba. 19Ogwo yaliga aboherwe obugome obwagwire mu kikale n’obwisi bw’omuntu.

20Pilato nasuba kubafumorera, obwo yayendaga kusurumura Yezu. 21Bonene nibahamuka muno bati: Mulege, mulege ha musalaba! 22Nawe wenene nabagambira lwa kasatu ati: Ahenire ki onu? Tinamubonaho ntambala yo kumwitira; mbe nkumutera, nimmusindika kugenda. 23Nawe bonene nibaguma kuyomba muno nibayenda alegwe ha musalaba; eyombo yabo nekana. 24Aho Pilato nalamura ebyo bayendaga, nibyo bibe. 25Nabasurumulira owe basabire, ayaliga aboherwe obugome n’obwisi bw’omuntu; nawe Yezu namubaha, bamugire nk’okwo bayendaga#23, 25 Lora Matayo 27, 26..

OMUHANDA GW’OMUSALABA. — NALEGWA HA MUSALABA. — OMUSUMA MUZIMA N’OMUBI.

26Ka bamusagere, nibakwat’omuntu ogwo, Simoni Omunasirene, ayarugaga ha musiri, nibamutwekereza omusalaba, agutware enuma ya Yezu. 27Embaga ningi y’abantu n’abakazi bakamuruba, abamuliriraga nibamuterer’empamo. 28Yezu ka yabekebukire, nagira ati: Bahara ba Yeruzalemu, nimuleke kundirira, nawe mwelirire imwe abene n’abana banu; 29kuba haliza enaku ezo balitengeramo bati: Abagumba bali n’omugisa, n’enda ezitatwere n’amabere agatayonkize. 30Aho balitandika kugambir’amabanga bati: Mutugwere; n’emigongo bati: Mutufulire. 31Kuba bakagirira batyo iti ibisi, kai biliba bita ha lyomire?#23, 31 Iti ibisi niwe Yezu wenene. 32Nibasagara n’abandi b’entambala babili hamo nage, baze kubeta.

33Ka bahikire ahantu ahakwetwa Kalvariyo#23, 33 Lora Matayo 27, 33–34., niyo nibamulegera ha musalaba n’abasuma, omo ha bulyo, ondi ha bumoso. 34Yezu yaliga nagira ati: Tata, nobakize, kuba tibakumanya echo bakukora. Bakagabana ebizwaro bye nibabyesa olweso. 35Abantu baliga baliho aho, nibalora, abakuru nibamusekerera na bonene, nibagira bati: Yakiz’abandi; nayekize omwene, raba ali Kristu ayasozirwe Mungu. 36N’abasirikale bona bamusekereraga, niberira hehi nibamuha esala, 37nibagira bati: Raba oli mukama w’Abayahudi, noyekize. 38Haliga haliho n’olwandiko lwandikirwe ha luguru ye mu kigereki na mu kilatini na mu kiyahudi, luti: Onu niwe Omukama w’Abayahudi.

39Omo w’abasuma abo, abaliga basungire, namuzuma nagira ati: Raba oli Kristu, noyechugule, n’etwe. 40Ondi nasubamo namuchahalira nagira ati: N’ewe wena tokutina Mungu, kai n’ewe oli mu kinaranazo echo chonene? 41Kai itwe kihikire, kuba tukunaranazibwa ebyo twakozire; nawe onu tiyakozire kabi n’akati. 42Nagambira Yezu ati: Mukama wange, olanizuka k’olahika mu ngoma yawe. 43Yezu namugambira ati: Koto, nkukugambira, lero okuba n’ene mu Paradizo#23, 43 “Paradizo” nilyo igulu lyonene..

YEZU NAFWA HA MUSALABA. — NIBAMUZIKA.

44Yaliga eli kuti saha mukaga, kai omwirima nigusugana mu nsi yona kuhika saha mwenda. 45Izoba nililala, omwenda gwo mw’eklezia nigutemukira hagati#23, 45 Lora Matayo 27, 51.. 46Yezu nahamuka n’ilaka ihango nagira ati: Tata, nakuha omwoyo gwange mu ngaro zawe. Ka yagambire ebyo, niguhwamo. 47Nawe omukuru w’abasirikale igana ka yabwene ebyagwire, nakuza Mungu nagira ati: Waza! omuntu onu sanga ahikire. 48N’embaga yona eyaliga eliho nelora ebyo, bakabona ebyagwire, baketera ha kifuba, nibagenda. 49Abanwani be n’abakazi abaliga bamurubire kuruga Galilaya, baliga bemerere hara, nibalora ebyo.

50Haliga haliho omuntu ogwo, izina lye Yozefu, yaliga ali wo mu balamuzi, muntu muzima, arongire, 51yaliga atali mu magambo gabo na mu bikorwa byabo, ali w’Arimateya, echaro cha Buyahudi, na wenene wena yalindiriraga obukama bwa Mungu. 52Ogwo nagenda hali Pilato, namusaba omutumbi gwa Yezu; 53ka yagwihireho, nagusemba mu mwenda, naguzika mu kituro echaliga kisimbirwe mw’ibale, ekitakazikwamoga muntu. 54Lwaliga luli lunaku lw’olulaririro, na sabato netandika#23, 54 Lora Matayo 27, 62.. 55Abakazi abarugire nage Galilaya nibalora ekituro n’okwo bazikire engingo ze. 56Nibasuba, nibasemeza ebintu ebikununka kuzima n’amazuta; mbe ha lwa sabato nibahumura, nk’okwo baliga balagirwe.

Currently Selected:

Luka 23: KED1946

Highlight

Copy