Matayo 14

OMUHARA WA HERODYADI NIBAMUHA OMUTWE GWA YOHANA BATISTA.

1Mu naku ziliya Herode omukama akahuliza Yezu. 2Nagambira abahereza be ati: Ogwo niwe Yohana Batista; yazokire mu bafu, nicho amahano gakukolerwa wenene. 3Kuba Herode yaliga akwasire Yohana, amubohire, amunagire mw’ibohero: aletererwe Herodyadi, muka mutabani wabo, 4kuba Yohana yaliga amugambire ati: Ozibirwe kumuswerwa. 5Mbe yayendaga kumwita, nawe akatin’ abantu, obwo bamulenganisya omulagi. 6Nawe ha lunaku lwo kuzarwa kwa Herode omuhara wa Herodyadi nazina hagati yabo, nasemereza Herode; 7nicho yamulaganisize nataho no kulahira kumuha byona eby’alamusaba. 8Wenene nasoherezibwa nina, namugambira ati: Nompe ha lunanga lunu omutwe gwa Yohana Batista. 9Aho omukama nazuba; nawe obwo yaliga alahire, na ha nsoni z’abo yaliga ali nabo, nalagira kumuha. 10Natuma omuntu kuchwagulaho Yohana omutwe mw’ibohero. 11Nibaleta omutwe gwe ha lunanga, nibaguha omuharakazi, nagusagalira nina#14, 11 Bati: Herodyadi ka yaleterwe omutwe gwa Yohana, natwara olumambo olwaliga luli mw’isoke lye, nafumurafumura atyo olulimi lw’Omwibembezi.. 12Abahemba be nibeza nibatwara omutumbi gwe nibaguzika, nibaza kubikira Yezu#14, 12 Herode ogwo, ayachwagwire omutwe gwa Yohana, niwe mwende Herode ayaisire abana ba Betlehemu. Omwanya tigwarabireho mwingi, Herode batamwihire ha ngoma, nibamuyeza ha bw’omuku gwa Kaizari wa Roma. — Hatyo omuharakazi ayazinire Herode, ogwo akafwa kubi, nibamuchwagula omutwe mw’itunga elyaliga likamibwe embeho..

YEZU NAKANISYA EMIKATE ITANU.

13Yezu ka yahulire ebyo, narugayo okwo mu bwato, naza kwikara wenka mw’iswa; embaga ka yahulire, neruga mu byaro nelibata maguru kumuruba. 14Ka yarugireho, nabona embaga ningi y’abantu, nabasasira, nakiza abarwere babo. 15Mbe ka habere kebazo, abahemba be nibamuzaho nibamugambira bati: Hanu ni mw’iswa igumba, kai izoba lyalagere, nosindik’embaga egende mu maka kwesakira ebilyo. 16Nawe Yezu nabagambira ati: Tibali no kugenda; imwe nimubahe ebyo kulya. 17Nibamusubiramo bati: Tuli n’emikate itanu n’enfwi ibili zonka hanu. 18Wenene nabagambira ati: Nimuzindetere hanu. 19Nalagira embaga kwikara ha manansi, nakwata emikate itanu n’enfwi ibili, nalalamira oluguru, nabarika, nahinzura emikate naha abahemba be, abahemba nibaha embaga. 20Bona nibalya nibeguta. Nibehaho ebihinzu ebyasagire bizwire ebitukuru ikumi na bibili. 21Olubaro lw’abalire baliga bali baseza bihumbi bitanu, kwihaho abakazi n’abana.

YEZU NA PETRO NIBALIBATA HA MENZI. — BENGI NIBAKIZIBWA.

22Aho n’aho Yezu nagambira abahemba be kuza mu bwato kumwebemberera ha mwambu gundi, wenene asindike embaga kutaha. 23Ka yasindikire embaga, nagenda mw’ibanga wenka kulembereza. Nihaba kebazo, aliyo wenka. 24Obwato ka bwahikire mu buziba, nibuterwa amakonzo, kuba gwaliga guli muyaga gw’obutwe. 25Ha bulinzi bwa kana bwa mu kiro#14, 25 Kara bataganisyaga ekiro mu bihinzu bina, buli kubaranwa kwahichaga kuti saha isatu; batandikaga ha izoba kulagala., naiza nalibata ha nanza. 26Ka bamubwene nalibata ha nanza, nibaharamuka nibagira bati: N’itunu, nibaharamukibwa obutini. 27Kachwi n’ako Yezu naba yafumwere nabo, nagira ati: Muchulere; n’ine, muleke kutina. 28Nawe Petro nasubamo nagira ati: Mukama wange, raba n’iwe, nondagire nkwizeho, ndabe ha menzi. 29Wenene nagira ati: Iza. Petro naba wo kuruga mu bwato, nalibata ha menzi, aze hali Yezu. 30Ka yabwene omuyaga gukanire, natina; ka yatandikire kwikira, nayeta nagira ati: Mukama wange, nzuna. 31Aho n’aho Yezu nagorora omukono, namukwata, nagira ati: Iwe wo kwikiriza kuke, watimatimiza ki? 32Mbe ka bahanamire mu bwato, omuyaga nigufwa. 33Abaliga bali mu bwato nibeza nibamuhabudu, nibagira bati: Oli Mwana wa Mungu koto.

34Mbe ka bayambukire, nibahika mu nsi ya Genezari. 35Abantu bayo ka bamumanyire, nibatuma mu charo echo chona, nibamuletera abarwere bona. 36Nibamusaba kukwata ha bumalirizo bw’omwenda gwe chonka. Na buli ayakwatahoga, yakira.

Currently Selected:

Matayo 14: KED1946

Highlight

Copy