Nʋnʋlii 6

Wa yɛ ‑li a 'yliwʋwa ngbi'sɔ ‑sɛ

1‑Lɛ a 'tɛnyɩ 'la 'mö, Zezwii a ‑nʋa, wa zumanɩ 'kwädlɩ 'yize. ‑Maa wa gla'mö a ‑nʋa ‑wa bhïlaa Glɛkögbʋʋ, 'ngungwa wa 'ngungwaa. Wa lɛ naa: «Bhlɩ nɩ 'mö a Ebleewaa, wa ‑kä 'kwädlɩ ngäzɩwaa lile dilanɩ, ‑a'a 'kuzlengwlɩɩ, wa 'nuëë sasɛ 'nyɛ.» 2‑Sɩbhä a za, Zezwii 'a tietiewaa kʋgbä'sɔ ‑kpɔ, 'n wa yiɛ Zezwii a ‑nʋa a ‑zɩkpaa 'wuë 'wlu 'yɩbha, wa lɛ naa: «‑A'bhɩanyɩ, ‑abhʋa Zezwii 'a tietiewaa, ‑a ‑ka Lagɔ 'a wɛlɩɩ a bhïlabhlu kɛ'mö ‑sɛ ‑a ‑kä lile a 'bɛyɩ yɩlɩɩ, yɩ'ɩɛ nɛnɩ. 3Zaa, ‑atʋayuënyɩ, yɩ ‑kä ‑sɩbhä 'mö ‑wʋʋ, a nɩ ‑sɛ ‑mä a gla'mö nɩkpa ngbi'sɔ, nɩkpa a ‑muë wa zʋä tenyii 'klʋkpamö, 'Wugɔmʋʋ 'Wlɩlɩ ‑wʋä tenyii ‑gömö, ‑wa 'nɛɛ sasɛ, wa 'kä ‑lɛ a libho 'la nʋ. 4‑Lɛ a dɔ'wʋ, ‑a yi 'kwädlɩ 'tɛnyɩ ‑kä, ‑a yi Lagɔ bhibhe, ‑a yi'ɛ 'ɔ wɛlɩɩ bhïla 'yize.» 5Wa gbää ‑sɩbhää, wa 'wuë 'n wa yiɛ ‑lɛ a wɛlɩ 'la 'wʋ nglu. 'N wa yiɛ nɩkpa ngbi'sɔ ‑sɛ: Nɩkpɛ ‑bhlʋ wa laa Etiɛnɩ, 'Wugɔmʋʋ 'Wlɩlɩ ‑wʋä tenyii ‑gömö, ‑ɔ 'tɛɛnɩɛ tenyii Zezwii dlɩ mɔ, Filiipö mɔ, Plʋkɔɔlʋ mɔ, Nikanɔɔlɩ mɔ, Timɔɔ mɔ, Pamenasɩ mɔ, 'n Atiɔsɩ a nɩkpɛ ‑bhlʋ wa laa Nikolaa, ‑ɔɔ a‑a bhla'mö Zwiiföyi glɩnɩ ‑ɔ 'zʋa'aa Zwiiföyii, wa 'wuë, 6'n wa yuëë ‑lɛ Zezwii 'a tietiewaa 'yila 'klʋ zʋ, 'n Zezwii 'a tietiewaa yuëë kätɩkpö 'wlu zʋ, 'n wa yiɛ wa 'wlumö Lagɔ bhibhe ɔ 'kʋä 'nyu 'pä, nzɩɩ wa 'kä sasɛ 'wa libhoo nʋ.

7'Bhöönɩa'a ‑lɛ, 'n Zezwii 'a 'Mänatɩtɩɩ mlɩmanɩɛ saa 'wuë 'yize, ‑mä Zeluzalɛɛmö, Zezwii a ‑nʋa, 'n wa zumanɩɛ. Zwiiföwaa 'a Lagɔbʋbɔwaa a'bhï, wa gla'mö a ‑muëë ngluä Zezwii 'a wɛlɩɩ 'wʋʋ, wa'aa muënɩ.

Zwiiföwaa a 'kädɩɩ yɛ Etiɛnɩ ‑zijle 'nyɛ

8Etiɛnɩ, Lagɔ ‑wɔɔ ‑gömö tenyii, 'n ɔ pɔɔ 'nyu, 'n ɔ nʋä nɩkpabhë a 'yila 'klʋ zɩzɛli. 9Zaa, 'n nɩkpa ‑mumuë yoo ‑mä ghlɩ, wa ‑nyɔɔ 'kä kpɛnɩ. Zwiiföwaa a Lagɔbudu ‑bhlʋ wa laa ‑wa 'bhöö galɛ 'möö, ‑mä a nɩkpaa wa glɩnɩɛ. Wa gla'mö a ‑mumuë, ‑mä Silɛɛnɩ, ‑mä Alɛzadlii, ‑mä Silisii, 'n ‑mä Azii a ‑gwlɩ ‑gömö, ‑mä wa 'bhöönɩɛ. 10‑Maa 'Wugɔmʋʋ 'Wlɩlɩ mɔɔ nyɛɛ Etiɛnɩ 'nɛɛnɔ zaa, ɔ ‑kä bhïlaa, wa'aa mlɩnɩ wa 'kɔ wɛlɩ 'mö lu. 11Zaa, wa möä, 'n wa yiɛ nɩkpa ‑mumuë moni 'nyɛ. Wa lɛ naa: «A nɩ mö a 'kä nɩɩ: Etiɛnɩ yɛ ‑aa dɩba 'kɔdɔ Moyizɩ a dɛ wɛlɩzoku bhïla, 'n ɔ yi'ɛɛ Lagɔ a'bhë a dɛ wɛlɩzoku bhïla.» Sa'a wa 'nyʋää 'dɩ. 12Nɩkpa 'la, wa möä, ‑sɩbhä wa 'zʋä, 'n wa yiɛ ‑glɔɔ glu ‑sɛ. Zwiiföwa 'a 'nɛɛnɩwaa ‑nyɛ Moyizɩ 'a Gböö a 'cɩawaa 'sɔ, 'n wa yuë'ɛɛ glu ‑sɛ. 'N wa yiɛ ‑glasɛ Etiɛnɩ köbhä 'n wa yoo ‑mä ‑zijlituwa 'kädɩɩ kwä wa 'kɔ ‑zijle 'nyɛ. 13'N wa yiɛ nɩkpa ‑mumuë wäzɩ wa 'kä Etiɛnɩ widɩ 'wʋ 'libhïnɩ, wa lɛ naa: «Nɩkpɛ nɩ, Lagɔbudu 'Kɔdʋʋ ‑wʋ glɩnɩɛ Lagɔ a 'yize a ‑nʋ, wʋ ‑nyɛ Moyizɩ 'a Gböö 'sɔ, yɩ dɛ wɛlɩzoku ɔ bhïlaa 'kwädlɩ. 14Sɛ'ɛ ɔ nʋä nɩɩ, Nazalɛɛtɩ a Zezwii 'la, ɔ yi Lagɔbudu 'Kɔdʋʋ wlɛ, 'n ɔ yi'ɛ gbä, Gböö Moyizɩ 'pä a‑a, ‑a yi yɔlʋ 'wʋ plɛnɩ, ‑a yi käbönɩ 'klʋkpamö zʋ. Wɛlɩ 'la, ‑a'bhï ‑a 'nwi.» Sa'a ‑sɩbhä wa gbää. 15‑Zijlituwaa 'wuë, ‑n wa yiɛ Etiɛnɩ 'ylimö glʋnɩ. ‑Maa wa yiloo 'wʋ, 'n 'ɔ klʋʋ yiɛ 'mö lɩ, ɛ 'kä ‑bhɩɛ Lagɔzuzukwë a 'klʋ.

Currently Selected:

Nʋnʋlii 6: bet

Highlight

Copy