Zaa 3

Nikodɛɛmö yɛ sabʋsɛ Zezwii 'ylɩmöä 'mö

1Zwiiföwaa a 'kɔdɔ ‑bhlʋ 'mö wa laa Nikodɛɛmö. Falizɩɛwaa a ‑zɩkpaa 'mö, ‑mä ɔ ‑wʋmöä. 2'Ylɩ ‑bhlʋ 'mö, sɛ'ɛ sabʋsɛ, 'n ɔ yiɛ ‑mä Zezwii ghlɩ, ɔ lɛ nɩɩ: «‑Atʋ, ‑a ‑yi sɛ nɩɩ, Lagɔ mɔɔ tieamöä, ‑n ‑kanyɩ 'ɔ wɛlɩɩ 'cɩa. Ɛ'ɛ ‑bhö nyɩasɛ, ‑maa zɩzɛɛ ‑n pää, nɩkpɛ 'nɩɛ bhɛnɩ ɔ 'kɛ 'pä, 'n Lagɔ a'bhë 'nɔ ‑gömö ‑wʋʋ.» 3Ɔ gbää sa'aa, Zezwii lɛ naa: «‑Tiamö n nyɩamöä dɛ'ɛ 'dɩ nɩɩ, nɩkpɛ 'nɩ 'wʋ 'sɔ gwëlionɩɩ, 'pɩwʋ mää Lagɔ 'kämanɩɛ, ɔ 'naa 'kä ‑mä 'bhle ghlɩ.» 4Ɔ gbää ‑sɩbhää, Nikodɛɛmö lɛ: «'Ɔɔ! Nɩkpɛ a ‑mɔɔ yɛɛ 'kɔdɔ 'zʋ 'wëë, sɛ ɔ 'kä bhä 'mözʋmözʋmö, ɔ 'kä 'wʋ 'sɔ gwëlionɩ 'nɩ? Ɔ 'kä bhä ‑mä ɔ ‑da a 'mlɩ plɛ ɔ 'kä 'wʋ 'sɔ gwëlionɩ ‑a?» 5Zezwii lɛ naa: «‑Tiamö n nyɩamöä dɛ'ɛ 'dɩ, nɩkpɛ 'nɩ 'nyu ‑nyɛ Lagɔ 'a 'Wugɔmʋʋ 'sɔ a 'nglɩ 'mö nɩkpɛlolo 'zʋʋ, 'pɩwʋ mää Lagɔ 'kämanɩɛ, ɔ 'naa 'kä ‑mä 'bhle ghlɩ 'lɩlɩlɩ. 6Nɩkpɛ ‑kä gwälɩɩ, nɩkpɛ ɔ gwälɩɛ. ‑Maa ‑ɔ 'bhöönɩɛ Lagɔ 'a 'Wʋgɔmʋʋ 'möö, 'wugɔmʋsɛ ɔ ‑wʋä. 7N ‑kä nɩɩ, gwëlionɩ 'wʋ 'sɔ nʋʋ, yɩ nɩ ‑tɩmö ngli yɩa. 8Yɩɛ, 'vuu ‑kä yii, dɛ wʋ yɩbhää, ‑lɛ wʋ ghlɛnɩɛ. ‑N ‑ngö ‑tiamö wʋ ‑jiji, ‑maa ‑nn dɛ wʋ 'bhöönɩ ‑yi, ‑nn'ɛ dɛ wʋ mönɩ ‑yi. Sɛ ‑bhʋlʋ ‑kpɔ 'la ‑sɩbhä Lagɔ 'a 'Wugɔmʋʋ 'zʋaa nɩkpɛ 'lilolo 'wʋ.»

9Ɔ 'nyɔɔ ‑sɩbhä 'dɩɩ, Nikodɛɛmö lɛ: «'Ɔ! Wɛlɩ nɩ ‑n bhïlaa dɛ'ɛɛ, sɛ wa 'kɩ bhä 'mö 'nʋ 'nɩ?» 10Zezwii lɛ naa: «‑Nmö glɩnɩ'ɛ ‑naa Yizlaɛlɩ 'a ngëyii 'mö a ‑nʋa a Lagɔwɛlɩɩ a 'cɩanyɔ 'kɔdɔɔ, wɛlɩ nɩ, ‑n 'niɛ 'wuë ‑yi 'lɩlɩlɩ? 11‑Tiamö n nyɩamöä dɛ'ɛ 'dɩ nɩɩ: 'Saa ‑a ‑yiɛ, mö ‑a bhïlaa, 'saa ‑a 'yɩɛ 'ylɩmöö, yɩ dɩ ‑a nyanyɩɛ. ‑Maa abhʋa abhlɩ, wɛlɩɩ ‑a nyanyɩɛ, a'aa 'yɩbhä a 'kɩ dlɩ 'wʋ ‑kä. 12'Saa plɩɛ mä'ä dʋdʋ 'wʋ 'wʋʋ, n ‑kaanyɩ yɩ 'dɩ 'nyɛ dɔ'wʋ ‑wʋʋ, a 'ni'ɛ dlɩ 'wʋ ‑kää, Lagɔ 'a wɛlɩɩ ‑yɩ plɩɛ ‑mä ghäyɩ 'wʋ 'wʋʋ, yɩ 'dɩ n ‑kaanyɩ 'nyɛɛ, 'mö a 'kä bhä dlɩ 'wʋ ‑kä ‑a? 13Miɛ da'a, ‑maa ‑mä ghäyɩ 'wʋ, ‑mä Lagɔ yɔwʋ, ‑bɛ 'nɩɛ ‑bhlɛ tɛkäsɛ ‑mä mö 'n ɛ 'nɩ ‑bhö Nɩkpɛ a 'Yu, ‑ɔ 'bhöönɩ ‑mä Lagɔ yɔwʋ mɔɔ.

14Sɛɛ Moyizɩ bizaa a‑a leyitɩmɛ ‑lɛ ‑peyi 'yli ‑mä 'muse 'klʋʋ, sɛ ‑bhlʋ ‑kpɔ 'la, Nɩkpɛ a 'Yu, ‑sɩbhä wa kää wa 'kɔ biza. 15Nzɩɩ nɩkpɛ a ‑mɔɔ ‑kɔɔ dlɩ 'tɛɛnɩ, ɔ 'kä 'pɩwʋ mää 'naa 'kää 'yli bhɩɛ ghlɩ. 16‑Maa sɛɛ 'bhlɩbhëa 'wuë ‑glɛɛ Lagɔ dlɩ 'wʋ tenyii a za, nza ɔ 'wlʋä 'ɔ yuu ‑bhʋlʋ ‑kpɔ 'mö, nzɩɩ nɩkpɛ a ‑mɔɔ ‑kɔɔ dlɩ 'tɛɛnɩɩ, ɔ tɩa 'yli bhɩɛ, ‑maa 'pɩwʋ mää 'naa 'kää 'ylɩ bhɩɛɛ, ɔ 'kä ‑mä ghlɩ. 17Lagɔ tiee ɔ yowli mä'ä dʋdʋ 'wʋʋ, ɔ 'kä 'bhlɩbhëa 'wa 'nyinylolii a 'pɛna 'nyɛ a za, nza ɔ 'nɔɔ tie, ‑maa ɔ yowli 'kʋä puë a za, nza ɔ tioo. 18Lagɔ 'a yuu, nɩkpɛ a ‑mɔɔ ‑kɔɔ dlɩ 'tɛɛnɩ, Lagɔ 'naa 'kɔ 'ɔ 'nyinylolii a 'pɛna 'nyɛ. ‑Maa ‑ɔ 'nɔ dlɩ 'tɛɛnɩ, 'ɔ sɛ ɔ 'nɔɔ da'a dlɩ 'tɛɛnɩ a za, ɔ yɛ ɔnyɩ gbʋ köbha 'wë, 'ɔ ‑zijlea ‑tu ɔbhlɩ 'kɩ. 19‑Zijle 'la ma‑a nɩɩ, ‑ɔ ngla nɩkpa 'wʋ, mɔɔ yiɛ mä'ä dʋdʋ 'wʋ. ‑Maa mä'ä dʋdʋ 'wʋ a nɩkpaa, sɛɛ 'wa nʋnʋlii glɩnɩɛ 'zoku a 'yize a za, wa yɩbhä guylukwëa ma‑a nɩ 'kämanuë ‑gömö zaa, wa'aa 'yɩbhä ɔ 'kʋä 'wʋ ngäla. 20Ɛ'ɛ ‑bhö nyɩasɛ, ‑maa nɩkpɛ a ‑mɔɔ nʋä ‑lizokuu, ɔ'ɔɔ 'yɩbhä 'ɔ ‑lizokuu nɩ bhli zɩkpa, ‑sɩbhä a za, ɔ'ɔɔ ‑ɔ ngla nɩkpa 'wʋ ‑wa. 21‑Maa sɛɛ nɛnɩɛ ‑tiamö Lagɔ dlɩ yɔwʋʋ, nɩkpɛ a ‑mɔɔ ‑yiɛ ‑sɩbhä 'n ‑ɔ nɛmöä ‑sɩbhää, mɔɔ yinɩɛ ɔbhlɩ ‑ɔ ngla nɩkpa 'wʋ. Ɛ'ɛ ‑bhö nyɩasɛ, ‑maa ɔ ‑kɔɔ yinɩɩ, sɛ ɔ zʋä 'ɔ nʋnʋlii 'mö Lagɔ 'klʋkpamöö, ‑sɩbhä ma‑a 'yooo 'ylɩmö.»

Zaa Batisɩ lɛ Zezwii a 'nglɩ nɩ mö ɔ ‑nɩɩ 'kä dʋdʋ 'wʋ yi

22Yɩ 'plɩɛ sa'a 'wëë, Zezwii ‑nyɛ 'ɔ ‑gänɩwaa 'sɔ, 'n wa yiɛ 'wʋ ‑sɔ, 'n wa yiɛ ‑mä Zwidee‑bhölɩɩ 'mö mö. Wa gwälɛ ‑mä. 'Tɛnyɩ 'mö wa ‑wʋä ‑mää, Zezwii wɔlʋ nɩkpa 'wlu. 23‑Maa Zaa ɔbhlɩ, ɔ wɔlʋmö 'wlu 'yize. Glɔ wa laa Enɔɔ, ‑wʋ ‑wʋä ‑lɛ Saliimö a ‑kʋkʋyɔwʋʋ, ‑mä 'nyudɔlwɩ a ‑bɛ ‑wʋ a‑a zaa, ‑mä Zaa wɔlʋnɩ a‑a nɩkpaa ‑wa yinɔɔ 'wlu. 24‑Lɛ a 'tɛnyɩ 'la 'mö, wa 'nɔ a ‑bhlɛ ‑jie 'mö 'pä. 25'Ylɩ ‑bhlʋ 'mö, Zaa 'a ‑gänɩwaa, wa gla'mö a ‑mumuë, 'n wa ‑nyɛ Zwiiföyi ‑bhlʋ yiɛ kpɛnɩ. Sɛɛ nɩkpɛ 'kää 'zʋ, ɔ 'kä 'wlɩlɩ plɛ Lagɔ a 'yila 'klʋ a dɔ'wʋʋ, ‑lɛ a wɛlɩɩ, 'mö wa kpɛnɩɛ 'mö. 26‑Sɩbhä a za, 'n wa yiɛ ‑mä wa 'bhidɩba ghlɩ, wa lɛ naa: «‑Atʋ, nɩkpɛ 'la, ‑n ‑nyɛɛ 'sɔ a ‑wʋ a 'yɛ ‑mä Zludɛɛ ‑gömö, ‑ɔnyɩ dɩ ‑n nyɩanyɩɛ'ɛɛ, ‑sɩkaa a dɔ'wʋ, 'wlu ɔ wɔlʋmöa'aa, nɩkpaa 'wuë 'mö wa mönɩɛ.» 27Wa 'nyɔɔ sa'a 'dɩɩ, Zaa lɛ naa: «'Saa Lagɔ ‑nɩmöä 'nyɛɛ, ‑nn‑ä bhɛnɩ ‑n 'kʋ 'wʋ 'libhï. 28A'bhï, sɛ n gbä a‑a, a ‑yi ‑sɩbhä. Sɛ'ɛ n gbä a‑a nɩɩ: Puënyɔɔ Lagɔ ‑sɛɛ ‑lɛ, 'mö n 'nɩɛ glɩnɩ, ‑maa ɔ 'yuku ‑mä Lagɔ tieaaa cuu. 29‑Ɔ kwää 'nglɔɔ, mɔɔ glɩnɩɛ 'nglɔ a 'luwli. Ɔ 'tua ɔbhlɩ, ‑lɛ ɔ yɔwʋ, ‑lɛ ɔ glɩɛ 'n ɔ ‑pʋnɔɔ 'yukwli. Ɔ ‑kä 'ɔ wɛlɩ 'nʋʋ, ɔ 'wuë 'mäna. Zaa, ‑lɛ a 'mäna 'la ma‑a lɩbhaaa dɛ'ɛ, a ‑kaa 'wlu 'mänanɩ. 30Sɛ'ɛ n gbää nɩɩ, Zezwii 'a nglɩɩ, mɩɩ nɩ mö, na ‑nɩɩ 'kä dʋdʋ 'wʋ yi.

‑Ɔ 'bhöönɩɛ ‑mä Lagɔ dlɩ 'möö

31‑Ɔ 'bhöönɩɛ ‑mä ghäyɩ 'wʋʋ, mɔɔ 'ghïliɛ, mɔɔ ziɛ nɩkpaa 'wuë 'wʋ. ‑Ɔ 'bhöönɩɛ nɩkpɛ 'möö, mä'ä dʋdʋ 'wʋ a ‑nɔ ɔ glɩnɩɛ ɔbhlɩ zaa, dʋdʋ 'wʋ a wɛlɩ ɔ bhïlaa. ‑Maa ‑ɔ 'bhöönɩɛ Lagɔ dlɩ 'möö, mɔɔ 'ghïliɛ mɔɔ ziɛ wa 'wuë 'wʋ. 32'Saa ɔ 'yɩɛ 'ylɩmö, 'n 'saa ɔ 'nʋä, yɩ 'dɩ ɔ nyɛɛ nɩkpa, ‑maa wa'aa 'yɩbhä wa 'kɩ 'wʋ nglu. 33‑Maa ‑ɔ ngluä 'ɔ wɛlɩɩ 'wʋʋ, mɔɔ zwiɛ kɛ ‑gömö nɩɩ, Lagɔ 'mö, ‑mä yɩ 'bhöönɩɛ, gbëaa yɩ kää 'mö. 34‑Tiamö, ‑mɔ Lagɔ tiee, Lagɔ 'a 'Wugɔmʋʋ mɔɔ ‑wɔɔɔ tenyii ‑gömö zaa, Lagɔ 'a wɛlɩɩ a 'yize 'mö ɔ bhïlaa. 35Lagɔ, sɛɛ 'ɔ yuu ‑glɛɛ 'ɔ dlɩ 'wʋ a za, nza ɔ 'zooo ‑lii 'wuë a ‑gömökämanɩnyɔ 'wʋ. 36'Ɔ yu 'la, nɩkpɛ a ‑mɔɔ 'tɛɛnɔɔ dlɩɩ, 'pɩwʋ mää 'naa 'kää 'yli bhɩɛɛ, ‑mä Lagɔ yɔwʋ, ɔ yɛ ‑mä ghlɩ 'wë. ‑Maa ‑ɔɔɔ 'yɩbhä ɔ 'kɔ dlɩ 'tɛɛnɩɩ, ɔ 'naa 'kä ‑mä ghlɩ. Lagɔ a 'yila 'klʋ a dɔ'wʋ, gbʋʋ ‑wʋ ‑wɔɔɔ ‑gömöö, wʋ 'naa 'kä bhɩɛ.»

Currently Selected:

Zaa 3: bet

Highlight

Copy