Zaa 4

Zezwii ‑nyɛ Samalii a nglɔɔ 'sɔ a wɛlɩɩ

1-3Nɩkpaa ‑wa yinɩɛ Zezwii, ɔ wɔlʋä 'wlu, ɔ 'zʋaa ɔ ‑gänɩwaa 'wʋʋ, wa ‑zu tenyii wa zi Zaa a ‑nʋa 'wʋ, 'n Falizɩɛwaa yiɛ 'nʋ. ‑Maa ‑tiamö a dɔ'wʋ, Zezwii a'bhë mɔɔ 'nɩɛ a nɩkpaa 'wlu wɔlʋ, ‑maa 'ɔ ‑gänɩwaa mʋa wɔluë a‑a 'wlu. Zezwii 'nʋä sɛ wa 'nyɛɛ ɔ 'dɩ Falizɩɛwaa, 'n ɔ yiɛ ‑mä Zwidee‑bhölɩɩ 'mö 'bhöö, ‑mä Galilee‑bhölɩɩ 'mö, 'n ɔ yiɛ ‑mä nimï mö.

4‑Maa bhlɩɩ wa laa Samalii, ‑mä 'yioo ghlɛnɩɛ zaa, ‑mä Zezwii kää ɔ 'kä 'wʋ 'tʋ. 5-6Zwiiföwaa a dɩba 'kɔdɔ Zakɔɔbö mɔɔ 'nyɛ a‑a ɔ yowli Zɩzɛɛfʋ ‑mä 'lagblɛ. 'Lagblɛ 'la, Samalii a glɔ ‑bhlʋ wa laa Sisaa, wʋ ‑kʋkʋyɔwʋ, ‑mä ɛ ‑wʋä. ‑Mä ɛ 'mö, Zakɔɔbö 'bhlu a ‑mä 'nyibhë. Zezwii 'tʋä ‑mä Samalii 'wʋʋ, ɔ yɛ ‑bɛ 'wʋ nɛmö, ɔ yɛ yɔlɔ zaa, 'n ɔ yiɛ ‑lɛ 'nyibhë 'la nuë 'wʋ sɛ glɩ. 'Ylʋ lɛ 'kä 'du 'mö ghlɛ a sɛ, 7-8'ɔ ‑gänɩwaa yɛ ‑mä glɔ 'mö lile pɩaa mö 'wë, ɔ 'yize ɔ glɩ ‑lɛ 'n Samalii a 'nglɔ ‑bhlʋ yiɛ 'nyibhë 'wʋ yi. Ɔ ghlɛɛ ‑lɛ, Zezwii lɛ naa: «Nyɩaa 'nyu n 'kä 'nɩmä.» 9‑Maa 'lɩlɩlɩ a dɔ'wʋ, Zwiiföwaa, wa'aa 'yɩbhä wa ‑nyɛ Samalii a ‑nʋa 'sɔ wa 'kä 'wʋ 'sibhësibhënɩ, zaa, Zezwii nʋä sa'aa, nglɔ lɛ naa: «'Ɔ! ‑Nmö Zwiiföyi, ‑amö Samalii a 'ylikwii ‑amö ‑n zɛla bhä 'nyu ‑a?» 10Ɔ lɛ naa: «'Saa Lagɔ nyɛɛ nɩkpa, ‑n ‑kʋʋ a ‑yii, ‑ɔ zɛlamöä dɛ'ɛ 'nyu a'bhë, ‑n ‑kɔɔ a 'yɛ ‑yii, ‑nmö yonyɩ a‑a zɛlaa, nzɩɩ 'nyu a ‑muu nyɛɛ ‑bhölɩbhölɛɛ, ɔ ‑kamu a 'nyɛ.»

11Nglɔɔ lɛ: «‑Alowli, nyuu ‑n gaaa da'aa, dɛ ‑n 'kʋ bhä ‑sɛ 'nɩ? 'Nyibhëa a'bhë 'mö a 'bhʋɔɔ, 'n ‑nn‑ä 'mölunɩlu ‑su. Zaa, sɛ ‑n 'kä bhä 'mözʋmözʋmö 'nɩ? 12‑Aa dɩba 'kɔdɔ Zakɔɔbö, mɔɔ tɩɩnyɩɛ 'nyibhë nɩ yɔwʋ. Ɔ ‑nyɛ 'ɔ yuëa 'wuë 'sɔ, 'wa 'siasianɩmaa kökä 'nyibhë nɩ 'mö wa nɩmä a‑a. Zaa, ‑nmö 'ghïli bhä n‑n zi ‑aa dɩba 'kɔdɔ Zakɔɔbö 'wʋ ‑a?» 13Zezwii lɛ naa: «Nɩkpɛ ‑kä 'nyibhë nɩ a nyuu 'nɩmä 'wëë, 'nyutʋ yo ‑bhlɛ 'lɩbhä 'yize. 14‑Maa 'na nyuu n nyɛɛ, ‑ɔ ‑kʋʋ 'nɩmää, 'nyutʋ 'naa 'kɔa'a 'kwädlɩ 'lɩbhä, ɛ'ɛ ‑bhö nyɩasɛ, ‑maa 'nyibhë wʋ 'kää ‑mä ɔ 'mö 'mö yinɩ zaa, mʋʋ 'kɔɔ 'pɩwʋ mää 'naa 'kää 'yli bhɩɛ 'nyɛ.» 15Nglɔɔ lɛ: «‑Alowli, nyu 'la, nyɩa'mu n 'kʋ 'nɩmä, 'nyutʋ ‑tɩɩa'a 'lɩbhä n tɩa'a 'kwädlɩ mä'ä 'nyibhë nɩ 'wʋ 'sibhë.» 16Ɔ gbää sa'aa, 'n Zezwii yoo 'dɩ 'nyɛ nɩɩ: «Mö ‑na 'luwli kie.» 17Ɔ lɛ naa: «N'n‑ä 'luwli ‑kä.» Zezwii lɛ naa: «Nn, ‑n ‑kä ‑nn‑ä 'luwli ‑kä nʋʋ, miɛ ‑tiamö. 18Ɛ'ɛ ‑bhö nyɩasɛ, ‑maa ‑n yɛɛ ‑bhlɛ 'luwluwa ngbï kwä. Nɩkpɛɛ ‑n glɩa'aa ‑sɩkaa yɔwʋʋ, ɔ'ɔ ‑bhö ‑na 'luwli. Zaa, ‑tiamö ‑n gbää.»

19Nglɔɔ lɛ naa: «‑Atʋ, n ‑yia'a ‑sɩkaa sɛɛ nɩɩ, Lagɔ a 'möbhïlanɩnyɔɔ ‑n glɩnɩɛ. 20Zaa, n nɛ naa: ‑Aa dɩbawa a dɩbawa, ‑gäga nɩ ‑a ‑wʋä dɛ'ɛ, a 'wlu ‑mä wa bʋbɔnɩ a‑a Lagɔ. ‑Maa abhʋa Zwiiföwaa, a lɛ nɩɩ, ‑mä Zeluzalɛɛmö a 'yize, ‑mä wa kää wa 'kä Lagɔ bʋbɔnɩ.» 21Zezwii lɛ naa: «Na 'yu, kɩ dlɩ 'wʋ nɩɩ, 'tɛnyɩ ‑bhlʋ yi ghlɛ a ‑kä a 'kä ‑aa dɩba Lagɔ bʋbɔɔ, ‑gäga nɩ 'wlu, ‑mä a'aa a 'kä mö, ‑mä Zeluzalɛɛmö a'bhë, ‑mä a'aa a 'kä'ɛ mö. 22Abhʋa Samalii a ‑nʋa, Lagɔ a bʋbɔɔ, a 'nɔɔ ‑yi. ‑Maa, ‑abhʋa Zwiiföwaa ‑abhlɩ, Lagɔ ‑a bʋbɔɔ, ‑a ‑yoo. Nɩkpaa 'wuë a puënyɔɔ, ‑abhʋa Zwiiföwaa, ‑aa jijo'wʋ, ‑mä ɔ 'bhöönɩɛ. 23‑Maa 'tɛnyɩ ‑bhlʋ yi ghlɛ, dɛɛ ‑tiamö a Lagɔbʋbɔwaa 'kää ‑aa dɩba Lagɔ 'wugɔmʋsɛ 'n gbëaa 'mö bʋbɔnɩ. ‑Lɛ a 'tɛnyɩ 'la, ɛ yɛ tɛɛ a'bhë. Ɛ'ɛ ‑bhö nyɩasɛ, ‑maa ‑sɩbhä a Lagɔbʋbɔwa 'la 'mö ‑aa dɩba Lagɔ tɛlɩɛ sɛ. 24Lagɔ, 'Wugɔmʋ ɔ glɩnɩɛ zaa, ‑wa yɩbhää wa 'kɔ bʋbɔɔ, wa nɩ bʋbɔɔ 'wugɔmʋsɛ 'n gbëaa 'mö.» 25Nglɔɔ lɛ naa: «N ‑yi sɛ nɩɩ, Kliisɩ, Puënyɔɔ Lagɔ ‑sɛɛ ‑lɛ, ɔ yi yi. ‑Zlɩ ɔ ‑kä yii, ‑li 'la 'wuë ɔ ‑yinyi sasɛ dlɩ ‑gömö ‑sɛsɛnɩ.» 26Zezwii lɛ naa: «‑Amöö ‑wʋmöä dɛ'ɛ 'dɩ 'nyɛ dɔ'wʋʋ, 'mö n glɩnɩɛ.»

27Wa kä kïbhï 'la ngli, 'n Zezwii 'a ‑gänɩwaa yiɛ yi. Wa ghlɛɛ ‑lɛ, sɛɛ ɔ ‑nyɛ 'nglɔ sɛɛ 'dɩ a za, nglii yʋää. ‑Maa wa gla'mö a ‑nɔ ‑bhlʋ a'bhë, ‑ɔ 'kää Zezwii nimï 'yɩbhä nɩɩ, 'saa ‑n tɛlɔ bhä 'mö sɛ, dɩ ‑mi ‑n ‑nyɔɔ sɛ bhä, ɔ'ɔɔ ‑bhölɩ. 28Nglɔɔ a'bhë, 'ɔ 'nyulakii, ‑lɛ ɔ tee, 'n ɔ yiɛ ‑mä glɔ 'mö nɩkpa 'dɩ kwä nɩɩ: 29«Nɩkpɛ ‑bhlʋ, 'na sɛ n 'zʋä 'wuë, ‑ɔ nyɩaaa ‑sɩbhä 'dɩɩ, a nɩ yi a 'kɔ 'ylɩmö, ɛ'ɛ ‑bhö ɔ ‑kamä Kliisɩ, Puënyɔɔ Lagɔ ‑sɛɛ ‑lɛ mɔ ‑a?» 30Nglɔɔ gbää ‑sɩbhä, 'n wa yiɛ 'wʋ ‑sɔ, mää Zezwii ‑wʋä, 'n wa yiɛ ‑mä mö.

31‑Maa nglɔɔ ‑wʋ ‑mä glɔ 'mö, 'n Zezwii 'a ‑gänɩwaa yoo 'dɩ 'nyɛ nɩɩ: «‑Atʋ, lilee dɛ'ɛ, ‑n 'kä li.» 32Ɔ lɛ naa: «Lile n kää, n 'kää lii, a 'nee ‑yi.» 33Ɔ gbää sa'aa 'n wa yiɛ nimï 'yɩbhäyɩbhänɩ, wa lɛ: «'Ɔ! Zaa, nɩkpɛ ‑mɔmɔɔ 'nyɔ bhä lile 'mö ɔ 'kä bhä li ‑a?» 34Zezwii lɛ naa: «‑Ɔ tieaaa, sɛ ɔ gbää n 'kä ‑sɩbhä 'zʋ, libhoo ɔ nyɩaaa, n 'kʋ nʋ n 'kʋ zɛmö bhɩɛ, mɩɩ glɩnɩɛ 'na lilea. 35Sɛ'ɛ a nʋä nɩɩ: 'Cwɩ ‑mʋänaa tʋʋä ‑mä, lilea a ‑dɩdɩtɛnyɩɩ 'kä ghlɛ. ‑Maa sɛ'ɛ n nyanyɩɛ 'dɩ nɩɩ, 'lagbïlea, a nɩ yɩliɛ ‑ka sasɛ ‑gömö, yɩ yɛ zɛlɩ, yɩ ‑dɩdɩtɛnyɩɩ yɛ ghlɛ. 36‑Ɔ dɩɛ, ɔ yɛ 'ɔ 'pɛnaa ghlɩ 'wë. 'Pɩwʋʋ mää 'na 'kää 'yli bhɩɛ a lilea, 'mö ɔ 'yɩbhaa 'wlu. ‑Sɩbhä a za, ‑ɔ glʋä, ɔ ‑nyɛ ‑ɔ dɩɛ 'sɔ, 'gämö wa nʋnɩɛ 'mäna. 37‑Tiamö wa gbää nɩɩ: ‑Mɔmɔɔ glʋ, 'n ‑mɔmɔɔ dɩ. 38A yɩɛ, abhʋa na ‑nʋa, 'lagblɛ a ‑mɛ a'aa glʋʋ, ɛ 'mö, ‑mä n tieanyɩɛ, a 'kɛ ‑dɩ. ‑Mumuë yɛ ‑mä yɔlɔnɩ 'wë 'n n tieanyɩɛ dɛ'ɛ ‑mä, a 'kä wa ylɔ 'mö nɛmönɩ.»

39‑Glɔ 'la 'mö a nɩkpa a ‑bɛ, sɛɛ nglɔɔ 'nyʋää 'dɩ nɩɩ, nɩkpɛ ‑bhlʋ, 'na sɛ n 'zʋä 'wuë, ɔ ‑kaa ‑sɩbhä 'dɩ 'nyɛ, ‑sɩbhä a za wa kää Zezwii dlɩ 'wʋ. 40Yɩ za, nɩkpa 'la, wa ghlɛɛ Zezwii yɔwʋʋ, 'n wa yoo yɔwʋ bhibhe ɔ 'kʋä yɔwʋ gʋʋ. 'N ɔ yiɛ 'wʋ nglu. Ɔ ‑sɛ ‑lɛ wa yɔwʋ 'ylɩ 'sɔ. 41Ɔ ‑wʋä ‑mä, sɛ ɔ 'nyʋää ɔ'bhë 'dɩ a za, nɩkpa ‑mumuë a ‑bɛ 'n wa yiɛ 'ɔ wɛlɩɩ 'wʋ nglu. 42'N wa yiɛ nglɔɔ 'dɩ 'nyɛ nɩɩ: «‑Na'a ngli a wɛlɩɩ a 'yize a za, nza ‑a 'nɔɔa'a dlɩ 'wʋ ‑kä. ‑Maa ‑a'bhï, ‑a yɛ 'ɔ bhïlawɛlɩɩ 'nʋ zaa, ‑a ‑yi sɛ nɩɩ, mɔɔ glɩnɩɛ ‑tiamö 'bhlɩbhëa 'wuë a puënyɔɔ.»

Zezwii yɛ Libhonʋnyɔ 'kɔdɔ a 'yu yɛmanɩɛ

43'Ylɩ 'sɔ 'plɩɛ, 'n Zezwii yiɛ ‑mä 'wʋ ‑sɔ, 'n ɔ yiɛ ‑mä Galilee‑bhölɩɩ 'mö mö. 44Ɔ'bhë, sɛ'ɛ ɔ gbä a‑a 'ylɩ ‑bhlʋ 'mö nɩɩ: «Lagɔ a 'möbhïlanɩnyɔ, ‑mä ɔ 'bhele a ‑nʋa, wa'a 'zo ‑lɛ.» 45‑Maa ɔ ghlɛɛ ‑mä, ‑mä a nɩkpaa ‑wa 'mämö a‑a ‑mä Zeluzalɛɛmö Galɛ'möwlʋfɛtɩɩ ‑sɛɛ, ‑lii ɔ nʋnɩɛ ‑mä, wa 'yi 'ylɩmö. Zaa, sasɛ wa pälɔɔɔ.

46Zezwii ‑wʋä ‑mä Galilee, ‑mä Kanaa glɔ 'mö mä ɔ 'zʋa a‑a nyuu nʋ 'wʋʋ, 'n ɔ yiɛ ‑mä nimï mö. ‑Mä a ‑glɔ ‑mumuu wa laa Kapɛnaɔmö, nɩkpɛ ‑bhlʋ ‑wʋ a ‑mä. Libhonʋnyɔ 'kɔdɔɔ ɔ glɩnɩɛ. ‑Maa ɔ 'yu ‑bhlʋ 'nɩɛ tenyii ‑yɛ. 47Nɩkpɛ 'la, ɔ 'nʋä nɩɩ Zezwii yɛ ‑mä Zwidee 'bhöö ɔ yɛ ‑mä Galilee yii, 'n ɔ yiɛ 'wʋ ‑sɔ 'n ɔ yoo ‑mä ghlɩ, ɔ lɛ naa: «‑Atʋ, na yowli, ɔ'ɔɔ ‑yɛ, ɔ lɛ 'kä 'ku zaa, ‑yayaya, yi ‑a 'kä mö, ‑n 'kɔ yɛmanɩ.» 48Zezwii lɛ naa: «A 'nɩɛ zɩzɛli 'kädɩ 'ylɩmö 'wëë, a'a bhɛnɩ a 'kä dlɩ 'wʋ ‑kä.» 49Nɩkpɛɛ lɛ naa: «‑Atʋ, ‑yayaya, yi bhälɛ 'na yuu 'nɩɛ ‑bhlɛ 'kuu.» 50Zezwii lɛ naa: «Mö, ‑maa ‑na'a yuu yɛ yɛmanɩ.» Zezwii 'nyɔɔ sa'a 'dɩɩ, nɩkpɛɛ, wɛlɩ 'la 'mö ɔ kää dlɩ 'wʋ cuu, 'n ɔ yiɛ mö. 51Ɔ nɛmö 'yio 'wʋ, 'n 'ɔ libhonʋwaa yoo gbanɩɛ yi, waa lɛ naa: «‑Atʋ, ‑na'a yuu yɛ yɛmanɩ.» 52Ɔ lɛ: «'Gïle ‑mɛ 'mö ɔ ‑lii gämanɩ ɔ kɛ?» Wa lɛ naa: «‑Kido 'wʋ, ylʋʋ 'kää 'tikïyie 'wʋ 'klʋ cɩaa, 'n wëtlokwëa yoo ku 'mö bhɩɛ.» 53Wa gbää sa'aa, 'n nɩkpɛɛ yiɛ sɛ yɩbhlɩmanɩ nɩɩ, ‑lɛ a 'tɛnyɩ 'la ‑bhʋlʋ ‑kpɔ 'mö, ‑lɛ Zezwii 'nyɛnɔ a‑a 'dɩ nɩɩ: «Mö, ‑maa ‑na'a yuu yɛ yɛmanɩ.» ‑Sɩbhä a za, ɔ ‑nyɛ 'ɔ ‑kosu yɔwʋ a ‑nʋa 'sɔ 'n wa yiɛ 'wʋ nglu wa 'kä Zezwii dlɩ 'tɛɛnɩ. 54Zezwii 'bhööä ‑mä Zwidee 'wëë, sa'a ɔ 'zʋä ‑mä Galilee. 'Sɔnazɩzɛɛ ɔ 'pänɩɛ ‑mä mɛɛ da'a.

Currently Selected:

Zaa 4: bet

Highlight

Copy