Lwiikö 12

A nɩ tɩ 'klwɩsɔkäwa glɩnɩ

(Matie 10.26-27)

1‑Lɛ a 'tɛnyɩ 'la 'mö, nɩkpa ‑wa yinɩɛ Zezwii, wa 'kä ‑bhɩɛ 'wluyɔwʋnyukwë. ‑N ‑kä ‑lɛ ɔ yɔwʋ 'ylɩmöö, wa su ‑lɛ ‑pïlii, kple a'bhë a sɛsibhëadɛ 'nɩɛ ‑lɛ ‑wʋ. Wa 'wuë a 'yila 'klʋ, 'n ɔ yiɛ 'ɔ ‑gänɩwaa 'yi gö, ɔ lɛ naa: «A nɩ 'nɛmanɩ Falizɩɛwaa 'a levii 'wʋ. 'Wa 'kwlɩsɔkäkʋʋ 'mö n gaaa. 2‑Maa a ‑yi sɛ nɩɩ, 'saa 'wuë nɩkpɛ zizaa, yɩ yi 'ylɩ ‑bhlʋ 'mö gbëdanguu bhli. 'Saa ɔ ‑kä 'wi 'mö bhïla ‑kë, wʋ yi 'ylɩ ‑bhlʋ 'mö 'klʋ këlio. 3Nza n gbää nɩɩ, abhʋa na ‑nʋa, 'saa a bhïlaa 'wi 'möö, yɩ yi 'ylɩ ‑bhlʋ 'mö 'pɩwʋ 'pɔɔ. 'Saa a lɛtɛnɩɛ ‑mä ‑budu 'mlɩ a 'bhɩa 'yukwli gwëë, wɛlɩpänyɔɔ 'kɩɛ 'ylɩ ‑bhlʋ 'mö bia.»

A nɩ tɩ Zezwii nimï ‑sɛ nɩkpa a nganɔ a za

(Matie 10.28-33; 12.32; 10.19-20)

4'N Zezwii yuë'ɛɛ 'dɩ 'mö zʋ, ɔ lɛ naa: «‑A'bhɩanyɩ, a nɩ tɩ nɩkpa ‑gu. ‑Maa 'n 'lɩbhä wa ‑kaanyɩ 'lɩbhä, a ‑kä 'ku 'wëë, wa'aa'a bhɛnɩ wa 'kanyɩ ‑lu ‑mumuu nʋ. 5‑Maa a ‑pʋnɩ 'yukwli, ‑mɔ a 'kää ‑gu, n 'kanyɔ sʋlʋnɩ: Lagɔ, ‑ɔ ‑kä 'a nyɛmʋʋ 'wʋ 'libhï 'wë, ‑ɔ bhɛnɩ'ɛɛ ɔ 'kä gbä a 'kä ‑kosu 'mö möö, 'mö a nɩ ‑gu.

6A yɩlɩɛ ‑ka 'bhuluyuëa 'wʋ. A'bhï a ‑yi sɛ nɩɩ, ‑n ‑kä fälɛgöya 'sɔ ‑kä, ‑n yuë ngbï pɩa. ‑Maa 'bhuluyuëa ‑waaa sa'a dɛsɛ ‑kää, wa gla'mö a ‑bhlʋ Lagɔ 'nɩɛ ‑yii, ɔ'ɔɔ ‑bhölɩ. 7'A 'wlu a nyukwëa a'bhë, Lagɔ ‑yi ‑zɩmö a yʋʋ ‑bhli. Zaa, a nɩ tɩ ‑gu. ‑Maa Lagɔ a 'yila 'klʋ a dɔ'wʋ a kä dɛsɛ tenyii, a zi 'bhuluyuëa a ‑zɩkpa 'käda 'wʋ. 8Sɛ'ɛ n nyanyɩɛ 'dɩ nɩɩ, ‑ɔ ‑kä nɩkpabhë a 'yila 'klʋ nɩɩ, na ‑nɔ ɔ glɩnɩɛ nʋʋ, Nɩkpɛ a 'Yu, Lagɔ 'a zuzukuu 'yila 'klʋ, ɔ yi'ɛ ɔbhlɩ nɩɩ, ɔ ‑nɔ ɔ glɩnɩɛ nʋ. 9‑Maa ‑ɔ ‑kaa ‑lɛ nɩkpabhë a 'yila 'klʋ nimï ‑sɛnɩɩ, Nɩkpɛ a 'Yu, ‑mä Lagɔ 'a zuzukuu 'yila 'klʋ, ɔ yi nɩɩ, ‑mɔ nɩ, ɔ 'nɔɔ ‑yi nʋ. 10Nɩkpɛ a 'Yu, nɩkpɛ ‑kɔɔ wɛlɩzoku bhïlanɩɩ, Lagɔ yi yɩ gbʋ 'yi 'tatinɩ. ‑Maa nɩkpɛ a ‑mɔɔ ‑kä 'Wugɔmʋʋ 'Wlɩlɩ a dɛ wɛlɩzoku bhïlaa, ‑lɛ a 'nyinyloli 'la a gbʋʋ, Lagɔ 'naa 'kʋ 'yi 'tatinɩ.

11Abhʋa na ‑nʋa, wa 'kanyɩ ‑zijli 'nyɛ a za, wa yeanyɩ ‑mä Zwiiföwa a Lagɔbïdii 'mö kwä ‑kë, wa yeanyɩ'ɛ ‑mä 'kämanɩwa 'kädɩɩ a 'yila 'klʋ kwä ‑kë, wa ‑kaanyɩ ‑mä ‑zijli tunɩ dɔ'wʋ ‑wʋ, wa ‑kä wa 'kanyɩ gbʋ köbhaa, 'saa a 'kää bhïla a dɔ'wʋ, dlɩ nɩ tanyɩ libho. 12‑Maa ‑lɛ a 'tɛnyɩ 'la ‑bhʋlʋ ‑kpɔ 'mö, 'Wugɔmʋʋ 'Wlɩlɩ mɔɔ 'kanyɩɛ sɛ a 'kää gbä sʋlʋnɩ.»

Nɩkpɛ nɩ tɩ 'ɔ wʋlʋnɔɔ dlɩ 'tɛɛnɩ

13Nɩkpa ‑wa suä ‑lɛ Zezwii yɔwʋʋ, wa gla'mö a nɩkpɛ ‑bhlʋ, 'n ɔ yiɛ gbʋ ‑dɩ, ɔ lɛ naa: «‑Atʋ, n ‑nyɛ na ‑daayu 'sɔ, gugbëa ‑aa dɩba tɩɛ ‑lɛ, 'nyɔ 'dɩ ‑a 'ka dlinɩ.» 14Zezwii lɛ naa: «‑Ɔ 'zʋaa bhä a ‑zijlitunyɔ 'wʋ, 'n n 'kä bhä a gugbë dlinɩ 'nɩ?» 15'N Zezwii yiɛ ‑wa ‑wʋä ‑lɛ 'wuë 'dɩ 'nyɛ, ɔ lɛ naa: «A 'nɛmanɩa anyɩ 'wʋ, mä'ä 'pɩwʋ a wʋlʋnɔ a 'tʋ nɩ tanyɩa 'lɩbhä 'lɩlɩlɩ, ‑maa nɩkpɛ yi wʋlʋ, 'ɔ lɩɩ yi ‑zu ‑kë, yɩ'ɩɛ bhɛnɩ yɩ 'kä ‑mä 'ɔ 'pɩwʋ a ylɩɩ 'wʋ gbaanɩ.»

16'N Zezwii yuëë 'nine 'pänɩ, ɔ lɛ naa: «Nɩkpɛ ‑bhlʋ mɔɔ ‑wʋä ‑lɛ. Wʋlʋ ɔ wʋlʋä. 'Ylʋba ‑bhlʋ 'mö, 'ɔ glʋglʋlii tlʋ yɩ tlʋä tenyii. 17'Ɔ ‑lii 'wuë zumanɩ yɩ zumanɩɛ tenyii zaa, ɔ lɛ naa: N'n‑a'a dɛ n 'kä yɩ 'wuë 'zʋä ‑yi. Zaa, sɛ n 'kä bhä 'mözʋmözʋmö 'nɩ? 18Ɔ 'pää dlɩ ‑këë, ɔ lɛ naa: ‑Nn‑n! N ‑yi sɛ n 'kä zʋʋ. 'Na gbɩɩ 'wuë, ghlɛ n 'kɩɛ ghlɛ, n 'kä 'kädɩ 'kädɩ 'sɩbhä, 'na lilea ‑nyɛ 'na ‑lii 'wuë 'sɔ n 'kɩ ‑mä zʋ. 19‑Lɛ a dɔ'wʋ n ‑yia'a sɛ nɩɩ: N yɛ libho nʋ, n yi li ‑këë, 'ylʋbö a ‑bɛ yi 'plɩ. Zaa, n yi nyɛpɛ 'tɩɩ, n yi 'mäna nʋ, n yi 'nɩmä, 'saa n ‑kä 'yɩbhä, n yu li. 20'N Lagɔ yoo 'dɩ 'nyɛ, ɔ lɛ naa: ‑Ɔɔ'nɛɛnɩnyɔ nɩmä, sabɔɔ nɩ a'bhë ‑na'a saa lɛ 'kää 'yli bhɩɛ zaa, ‑li 'la 'wuë, ‑n gbää da'a ‑n 'kä ‑mä gbɩɩ 'wʋ zʋʋ, dɛ ‑n 'kɩ bhäa'a linɩ 'nɩ? 21Zaa, nɩkpɛ a ‑mɔɔ 'yɩbhaa mä'ä 'pɩwʋ a wʋlʋnɔɔ 'wuë 'wlu, ‑ɔnyɩ gbʋʋ 'nɩɛ Lagɔ 'mö ‑wʋʋ, saa ɔ ‑li 'kää 'mö ‑wʋ.»

A dɩba Lagɔ mɔɔ 'zʋnanyɩɛ 'yli

(Matie 6.25-34)

22Zezwii 'pää nine 'la 'wëë, 'n ɔ yi'ɛɛ 'ɔ ‑gänɩwaa 'yi gö, ɔ lɛ naa: «Nza n nyanyɩɛ 'dɩ nɩɩ, 'saa a 'kää li a 'kä ‑bhölɩɩ, wʋ dlɩ nɩ tanyɩ libho. 'Saa a 'kää 'mö ‑pla a dlɩ nɩ tanyɩ'ɛ libho. 23Nyɩasɛ n'n‑ä ‑sɩbhä gbä, ‑maa ‑bhölɩbhölɛɛ zi lile 'wʋ. Kpökpaa kä'ɛ dɛsɛ, a zi ‑banɩ 'wʋ. 24A yɩlɩɛ ‑ka ‑kaanɩmö 'wʋ. Yɩ'ɩ glʋ. Yɩ'ɩ ‑dɩ. Yɩ'ɩ ‑kpëlie ‑kä. Yɩ'ɩ 'gbɩ ‑kä. ‑Sɩbhä yɩ ‑wʋ 'mö, ‑maa Lagɔ nyɩ lile 'yize. N nyanyɩ 'dɩ nɩɩ, Lagɔ a dɔ'wʋ a kä dɛsɛ tenyii, a zi zɩɩ 'wʋ. 25‑Ɔ bhɛnɩ bhä ‑mä 'ɔ 'yʋyʋayʋyʋʋ 'mö, ylɩɩ ɔ 'kä 'kää mä'ä 'pɩwʋ ‑sɛ ‑gömö, ɔ 'kä ‑lɛ 'ylɩ ‑bhlʋ a'bhë 'pä nɩ? 26Zaa, sa'a a ‑lu 'tikëyi ‑kaanyɩ kɛ'mö 'tɛɛnɩɩ, ‑li ‑mi'la 'wuë ‑yɩ ‑wʋmöä ‑sɩbhä ‑mä Lagɔ kä'möö, sɛ yɩ ‑wʋ ɔ 'mö, 'n dlɩ libhëanyɩ bhä yɩ za? 27‑Titii ‑yɩnyɩ fɩfɩɩ nɛnɩɛ tenyii 'ylimö, sɛ yɩ wlʋä, a yɩlɩɛ ‑ka ‑sɩbhä 'wʋ. Yɩ'ɩ nʋ libho, yɩ'ɩ 'kplɛ yɩnyɩ ‑banɩ 'wʋ. ‑Maa n nyanyɩ 'dɩ nɩɩ, 'bhlɩlowli Salomɔɔ a'bhë, ‑mä 'ɔ wʋlʋnɩbanɩɩ 'wuë gla'mö, ‑bäna a ‑maa 'kä 'ylimö nɛnɩ, ‑a 'kä ‑titi 'la a fɩfɩɩ a gla'mö a ‑bhlʋ 'wʋ zii, a'aa ‑bhölɩ. 28Zaa, ‑titii ‑yɩ ‑wʋä zɩ'ɛ ‑mä 'lagblɛ 'mö, wa 'kää 'zɩgblɛ sia, 'n Lagɔ ‑kɩɩ sa'a 'yli 'zʋnɩɩ, 'saa 'kä bhä 'nglɩ ‑kä, 'n ɔ 'naa 'kanyɩ bhä abhlɩ 'yli 'zʋnɩmö, ɔ 'kanyɩ 'wua 'nɩ? 'A Lagɔ a dlɩtɛɛnɩtɛnɛɛ 'nɩɛ ‑zu lɛɛ! 29Nza n gbää nɩɩ, dlɩ nɩ tanyɩ 'kwädlɩ libho 'yize, a nɩ tɩ nɩɩ: Sɛ ‑a 'kä bhä 'mözʋmözʋmö ‑a 'kä li, ‑a 'kä 'nɩmä? 30Mä'ä 'pɩwʋ a nɩkpaa ‑waaa Lagɔ ‑yii, mʋa zʋä ‑sɩbhä, 'mö ‑li 'la a 'yize a gbʋ plɛnɩɛ. ‑Maa abhʋa abhlɩ, a dɩba Lagɔ, ɔ ‑yi 'saa ɔ 'kanyɩ 'nyɛ a 'kä ‑bhölɩ. 31A'bhï, 'pɩwʋ mää Lagɔ 'kämanɩɛ a gbʋʋ mʋʋ nɩ plɛnanyɩ tenyii. ‑Lɛ a dɔ'wʋ, ɔ'bhë ɔ yeanyɩ ‑li 'la 'wuë 'nyɛ. 32Abhʋa na ‑nʋa, a'aa ‑zu, ‑maa a nɩ tɩ ‑gu. Ɛ'ɛ ‑bhö nyɩasɛ, ‑maa a dɩba Lagɔ mɔɔ ‑saanyɩɛ ‑lɛ ɔ 'kanyɩ 'pɩwʋ mä ɔ 'kämanɩɛ 'bhle 'nyɛ. Ɔ'bhë, ‑sɩbhä ɔ 'yɩbhɩɛ.

Sɛ'ɛ Zezwii gbää ‑tiamö a lɩɩ a dɛ

(Matie 6.19-21)

33'Saa 'wuë a kää, a nɩ 'pɩ 'pɛlʋ a 'kä yɩ moni 'pʋäwaa 'nyɛ. A ‑kä ‑sɩbhä zʋʋ, ‑mä Lagɔ yɔwʋ, manyɩ ‑li 'nɩ bhɩɛ 'yli, mää 'wiwa 'nɩɛ ‑wʋ, mää ngɔnʋ 'nɩɛ ‑wʋʋ, ‑mä a yɛɛ da'a kwïlanɩ. 34Ɛ'ɛ ‑bhö nyɩasɛ, ‑maa dɛɛ 'a wʋlʋnɔɔ ‑wʋä, ‑lɛ 'a dilaa ‑wʋä.

A 'nɩ ‑ligba a 'kä ‑lɛ glɩ

35A nɩ ‑gïganɩ 'wlu, a nɩ ‑ligba 'kwädlɩ a 'kä ‑lɛ glɩ. 36Nyɩasɛ n'n‑ä ‑sɩbhä gbä, ‑maa nɩkpa a ‑muë ‑kʋnɩ'ɛ wa 'bhidɩba 'mö n pälanyɩɛ 'wʋ. ‑Sɩbhä a nɩkpa 'la, wa 'bhidɩba ‑kä 'nglɔ 'wʋ 'bhlie möö, swe yi tenyii ylu ‑kë, ‑gä wa ‑gää 'n wa ‑kʋnɔɔ, ɔ ‑kä yi ɔ ‑kä wäzɩɩ, wa 'kä ‑lɛ kälɩ. 37-38‑Sɩbhä a nɩkpa 'la ‑wa ‑gää, wa 'bhidɩba yi zlɩjijo'wʋ yi oo, dɛ ɔ yi yinɩ oo, ‑wa ‑kʋnɔɔ, 'wa ‑jɔlʋ! ‑Maa 'dɩ n nyanyɩɛ dɛ'ɛ nɩɩ: Nɩkpa 'la, 'mäna yuë 'lɩbhä. Wa 'bhidɩba a'bhë, ɔ yuë ‑lɛ linɩdaa sɛ 'gïla, ɔ yi libhonʋbanɩɩ 'mö päla, ɔ yi lile kie mö, ɔ yuënyɩ dilanɩ, wa yi li. Zaa, nɩkpa 'la a saa, ‑sɩbhä a nɩ ‑wʋmö, a ‑kaa ‑kʋnɩ. 39Wɛlɩɩ n 'kanyɩɛ dɛ'ɛ 'nyɛɛ, a nɩ köbhɩɩ sasɛ 'yukwli, ‑maa yɩ kä zɛmö. Sɛ'ɛ n gbää nɩɩ, ‑budulowli ‑kä a ‑zlɩmɛ 'winyɔ 'kɔ 'wi 'wʋ ghli ‑yii, ɔ yi a sasɛ 'ɔ ‑buduu ‑kʋ, 'winyɔɔ tɩa ‑mä plɛ. 40‑Sɩbhä a za, abhʋa na ‑nʋa, a nɩ ‑ligba a 'kä ‑lɛ glɩ, ‑maa Nɩkpɛ a 'Yu, zlɩɩ a'aa ‑tɔnɩɩ 'mö ɔ 'kää 'mö yi.»

A nɩ nʋ sasɛ Lagɔ 'a libhoo

(Matie 24.45-51)

41Zezwii gbää sa'aa, Piɛlɩ lɛ naa: «‑Alowli, ninea ‑n 'pää da'a a dɩɩ ‑n zʋʋnyɩɛ 'möö, ‑a 'yize a ‑li bhä, ‑maa nɩkpa 'wuë a ‑li bhä?» 42Ɔ lɛ naa: «Nɩkpɛ ‑kä libhonʋwa a ‑bɛ ‑kä, ɔ ‑kä lowlu 'mö möä yii, 'ɔ libhonʋwaa a gla'mö a ‑mɔɔ 'nɛɛ, ‑ɔ nʋä sasɛ 'ɔ libhoo, ɔ kää dlɩ 'wʋʋ, 'mö ɔ tɩɛ ‑lɛ. Ɔ'bhë ɔ ‑kä mö 'wëë, zila 'wuë 'mö lilitɛnyɩ ‑kä ghlɛɛ, libhonʋnyɔ 'la 'kä ɔ 'bhɩalibhonʋwaa lilea dilanɩ wa 'kä li. 43‑Lɛ a libhonʋnyɔ 'la, ɔ 'bhidɩba ‑kä lɛ 'bhöö 'lɛ ɔ ‑kä sasɛ libhoo nʋʋ, 'ɔ ‑jɔlʋ. 44‑Maa ‑tiawɛlɩ n nyanyɩɛ dɛ'ɛ nɩɩ, ɔ 'bhidɩba yo 'ɔ ‑lii 'wuë 'yli 'zʋnɩ. 45‑Maa libhonʋnyɔ 'la, ɔ 'bhidɩba ‑kä mö 'wëë, ɔ ‑kä nɩɩ: N ‑yi sɛ, na 'bhidɩba yi ‑mä gwälɛ zaa, na gbʋ 'nɩɛ ‑mä ‑wʋ, ɔ ‑kä ‑sɩbhä nʋʋ, ɔ ‑kä ɔ 'bhɩa 'wʋ 'libhï, ɔ ‑kʋä 'lɩbhä, ɔ 'yize ɔ ‑kä lilea lii, ɔ ‑kä ɔnyɩ nʋ 'wʋ lua, ɔ ‑kä ‑lɛ glɩɩ, 46'ylɩ ‑bhlʋ 'mö dɛ ɔ ‑dlʋnɩɛ 'lɩlɩlɩɩ, ‑lɛ ɔ 'bhidɩba 'kää yinɩ. Ɔ ‑kä yii, libhonʋnyɔ 'la, ɔ yi gbʋ 'kɔdʋ ghlɩ. Ɔ yu 'mö 'ku, Lagɔ 'a ‑gblɩwaa 'wuë, wa ‑kä 'ku a dɛ wa möä, ɔ yi ‑lɛ mö.

47-48Sɛ'ɛ n gbää nɩɩ, libhonʋnyɔ a ‑mɔɔ 'nɩɛ 'saa ɔ 'bhidɩba yɩbhää ‑yii, 'n ɔ ‑kä libhoo nyimaa, ‑sɩbhä a libhonʋnyɔ 'la, ɔ yi gbʋ ghlɩ. ‑Maa libhonʋnyɔ a ‑mɔ ɔ 'bhidɩba 'cɩaa libho 'wuë a saa 'wëë, sɛɛ ɔ 'bhidɩba yɩbhää, 'n ɔ 'nɩ ‑sɩbhä 'zʋʋ, 'ɔ gbʋʋ ɔ 'kää ghlɩɩ, wʋ yi 'mö 'tɛɛ, wʋ yi tɛkänɔɔ a ‑nʋʋ 'wʋ zi. Ɛ'ɛ ‑bhö nyɩasɛ, ‑maa ‑mɔ wa nyɛɛ ‑bɛ yowʋ, 'mö wa 'yɩbhänɩɛ ‑bɛ.»

Zezwii a za nɩkpa yi 'ylimö ‑känɩ

(Matie 10.34-36)

49«‑Kosu a ‑mumuu n yiɛ mä'ä dʋdʋ 'wʋ 'yi ‑dɩɛ. Na dlɩ yɩbhä wʋ nɩ dɩ‑ɩ ‑sɩkaa a'bhë 'yi. 50‑Maa na'bhë 'zwɩ 'kädɛ n kää n 'kä zi 'wë, ‑kosu 'la 'kä bhäla 'yi doo. 'Nyɩɛ na dlɩ libho zwɩ 'la n 'kää zi a za. N ‑kä dlɩ 'pää, ɛ 'kä ‑bhɩɛa'a zwɩ 'la nɩ ‑pölɩ 'wë 'kɩ. 51A nɩ tɩ ‑tɔnɩ nɩɩ, 'na mä'ä dʋdʋ 'wʋ a yiye yi 'nglɩ ‑kä, nɩkpa 'wuë yi ‑wanɩ 'yize. Ɛ'ɛ ‑bhö sa'a ma, ‑maa ɛ yi 'nglɩ ‑kä, nɩkpa yi 'ylimö ‑sɛnɩ. 52Tɛɛnɩa'a dɛ'ɛ, ‑kosu ‑bhlʋ yɔwʋ a ‑nʋä, ngbï wa nɩ ‑kä ‑bhlii, wa yi 'ylimö ‑sɛnɩ. Ta yi 'wa dɛ ‑wʋ, 'sɔ yi wa dɛ ‑wʋ. 53Dɩba ‑nyɛ ɔ yowli yi 'ylimö ‑känɩ. ‑Da ‑nyɛ ɔ yɛnglɛ yi 'ylimö ‑känɩ. 'Yu a 'nglɔ ‑nyɛ ɔ 'luwlida yi 'ylimö ‑känɩ.»

Lagɔ 'a ‑zijlea a zlɩɩ yɛ 'dio

(Matie 16.2-3)

54Zezwii 'zʋä 'ɔ ‑gänɩwaa 'dɩ 'mö 'wëë, 'n ɔ yiɛ nɩkpaa ‑wa soo yɔwʋ 'yi gö, ɔ lɛ naa: «A ‑kä ‑mä ghäyɩ 'wʋ yɩlɩ, zlɩ ‑kä ylumanɩ tititii, a lɛ: 'Nyizakwëë 'kää lɩbhä. ‑Tiamö a ‑tiamö, 'n a lɩbhää. 55Swe ‑kä ylu, zlɩ ‑kä 'mö nɛnɩ, a lɛ: 'Ylʋ yi 'zɩgblɛ 'pʋ. ‑Tiamö a ‑tiamö, 'n wʋ pʋä. 56'Kwlɩsɔkäwanyɩ, a yɩbhlɩnɩ ylʋʋ ‑nyɛ 'nyizakwëa 'sɔ a 'tɛnyɩɩ, ‑maa ‑lii 'wuë ‑yɩ ‑wʋanyɩɛ 'tɛnyɩ nɩ 'mö 'yila 'klʋ 'plɩnɩ dɔ'wʋʋ, sɛ yɩ sɛɛ zɛmöö, a'aa 'yɩbhä a 'kä ‑sɩbhä yɩbhlɩnɩ. 57Sɛ a 'kää 'zʋ a ‑nyɛ Lagɔ 'kä wamanɩ, sɛ yɩ ‑wʋ ɔ 'mö 'n a'a nglu bhä a 'kä ‑sɩbhä yɩbhlɩnɩ 'nɩ? 58‑N ‑nyɛ nɩkpɛ 'sɔ, 'n wɛlɩ ‑kaanyɩ jijo'wʋ ‑wʋʋ, bhälɛ ‑lɛ a wɛlɩ 'la 'nɩɛ ‑bhlɛ ‑zijlitunyɔɔ a 'yila 'klʋ ghlɛɛ, bhibhe nɩkpɛ 'la yɔwʋ, wɛlɩɩ ‑yɩ ‑wʋä ‑lɛ, a 'sɔ ‑kpɔ, a 'kɩ bhïla, a 'kä wamanɩ. Ɛ'ɛ ‑bhö fʋ, ‑maa n‑n 'nɩ ‑sɩbhä 'zʋ, 'n yɩ ‑kä ‑zijlitunyɔɔ a 'yila 'klʋ ghlɛɛ, ‑zijlitunyɔɔ ‑kamö ‑zijle tu 'wëë, ɔ yi gbä, 'slʋja ‑yimö 'wʋ 'libhï, wa ‑yimö ‑jie 'mö 'pä. 59N nyɩamö 'dɩ nɩɩ, ‑mä ‑jie 'la 'mö a dɔ'wʋ, monii wa ‑dɩnɩmöä, n‑n 'nɛ ɛ 'wuë 'pɛnɩ 'wëë, ‑naa 'kä ‑mä 'wlʋ 'lɩlɩlɩ.»

Currently Selected:

Lwiikö 12: bet

Highlight

Copy