Lwiikö 13

A nɩ ligba a 'kä 'a ‑lizokuu kɛ'mö ‑sɛ

1‑Lɛ a 'tɛnyɩ 'la 'mö, nɩkpa ‑yɛya mʋa ghlɩɛ ‑mä Zezwii 'n wa yoo 'tɩtɩ 'nyɛ. Galilee a nɩkpa ‑yɛya, ‑wa ‑wʋ a‑a Lagɔ nɩma bʋbɔnɩ dɔ'wʋ, 'n 'kämanɩnyɔ 'kɔdɔ Pilaatɩ yi a‑a 'slʋja tie, 'n wa yuë a‑a 'lɩbhä, 'n 'wa dluu ‑nyɛ bʋbɔnɩlii a dluu 'sɔ yi a‑a dʋanɩɩ, yɩ tɩtɩɩ 'mö wa mɔɔ 'nyɛɛ. 2Wa 'nyɔɔ 'tɩtɩ 'wëë, Zezwii lɛ naa: «A ‑tɔnɩ bhä nɩɩ, nɩkpa 'la wa 'lɩbhää da'a jɛzlʋsɛ, mʋa glɩnɩ 'nyinylolinʋwa 'kädɩ, mʋa zi Galilee a ‑nʋa 'wuë 'wʋ ‑a? 3N'nn, ɛ'ɛ ‑bhö mi, ‑maa n nyanyɩ 'dɩ nɩɩ: A'bhï, 'n a 'nɩ ligba a 'kä 'a ‑lizokuu kɛ'mö ‑sɛɛ, ‑sɩbhä a yiɛ 'kumöä. 4Nɩkpa kʋgbä‑gbʋäta ‑kpɔ, ‑lɛ Zeluzalɛɛmö a ‑kʋkʋyɔwʋ a dɛ ‑bhlʋ, dɛ wa laa Silowee, ‑lɛ a 'wʋbhʋɔbuduu bhlinɩ'ɛ 'wʋ 'n wa yi'ɛ wa 'wuë 'kuu, a ‑yi wa wɛlɩɩ. Zaa, a ‑tɔnɩ bhä nɩɩ, mʋa glɩnɩ 'nyinylolinʋwa 'kädɩ mʋa zi Zeluzalɛɛmö a ‑nʋa 'wuë 'wʋ ‑a? 5N'nn, ɛ'ɛ ‑bhö mi. ‑Maa n nyanyɩ 'dɩ nɩɩ: A'bhï, 'n a 'nɩ ligba a 'kä 'a ‑lizokuu kɛ'mö ‑sɛɛ, ‑sɩbhä a yiɛ 'kumöä.»

Zezwii yɛ Fiigösuu a wɛlɩɩ 'wʋ pälɩ

6'N Zezwii yuëë 'nine 'pänɩ, ɔ lɛ naa: «Nɩkpɛ ‑bhlʋ a 'lagblɛ 'mö, ‑mä su ‑bhlʋ ‑glʋä. 'Ylɩ ‑bhlʋ 'mö, 'n ɔ yiɛ yi, ɔ 'kʋ ‑sɛ. ‑Maa ɔ lɛ 'bhöö 'lɛ, wʋ'ʋä ‑tlʋ. 7Zaa, 'n ɔ yiɛ 'ɔ libhonʋnyɔɔ 'dɩ 'nyɛ nɩɩ: Yɩɛ, su nɩ a dɔ'wʋ, na 'ylʋba a tanaa dɛ'ɛ, sɛ n yu 'yli yɩlɩɛ 'yize, ‑maa wʋ'ʋ tlʋ. 'Fʋ wʋ bhɩɛɛ bhlea zaa, ‑duu gwë. 8‑Maa libhonʋnyɔɔ lɛ naa: ‑Atʋ, 'ylʋba nɩ 'mö a dɔ'wʋ 'tatinuu ‑bhlɛ 'yi, n 'kä ‑lɛ wʋ yɔwʋ 'bhlu, n 'kä ‑lɛ tilikpëdʋdʋ 'zʋ. 9Lɛ a dɔ'wʋ, wʋ yi ‑kamä 'ylʋba ‑mä'la 'mö tlʋ. ‑Maa 'n wʋ 'nɩa'a tlʋʋ, sɛ ‑n gbää da'a n nɩ 'zuu, n 'kʋa'a ‑sɩbhä zʋ.»

Zezwii yɛ ‑gwlɛnɩzlɩ 'nglɔ yɛmanɩ

10 ‑Gwlɛnɩzlɩ ‑bhlʋ ghlɛɛ, ‑mä Zwiiföwa a Lagɔbudu ‑bhlʋ 'mö, 'n Zezwii yiɛ ‑mä Lagɔwɛlɩɩ bhïlanɩ. 11‑Mä Lagɔbudu 'la 'mö, 'nglɔ ‑bhlʋ ‑wʋmö a ‑mä. Zuzukwëzokwë ɔ kää ‑gömö. A kɔɔ ‑bhlɛ 'ylʋbö kʋgbä‑gbʋäta ‑gömö ‑sɛ. A za, ɔ'ɔ 'pulo 'mö 'lɩlɩlɩ, ‑maa 'mö ɔ ‑kimonɩɛ 'kwädlɩ 'n ɔ nɛmöä. 12Zezwii 'yoo 'ylɩmöö, 'n ɔ yoo wäzɩ, ɔ lɛ naa: «'Nyɩa, ‑na'a guu yɛ zɩ'ɛ bhɩɛ.» 13'N ɔ yoo kɛ zɩ. ‑Gba ‑bhʋlʋ ‑kpɔ 'mö, 'n ɔ yiɛ 'mö zlɔmanɩ 'tɩɩ 'n ɔ yiɛ Lagɔ a 'nglɩ 'ghlimanɩ. 14‑Maa ‑mä a Lagɔbuduu a 'kifii, sɛɛ Zezwii yɛmanɩɛ da'a nglɔ 'la ‑gwlɛnɩzlɩ a za, ɔ'ɔɔ ‑wa 'lɩlɩlɩ. ‑Sɩbhä a za, 'n 'kifi 'la yiɛ 'wʋ ‑sɔ, ‑wa ‑wʋä ‑mä 'wuë, 'n ɔ yuëë 'dɩ 'nyɛ, ɔ lɛ naa: «‑Mä 'dimasi 'mö, 'ylɩ gbʋplʋ ‑wʋ ‑mä, 'mö wa kää wa 'kä libho 'mö nʋnɩ. Zaa, a ‑kä wa 'kanyɩ yɛmanɩ nʋʋ, a nɩ yi ‑lɛ a zila 'la 'mö, ‑maa a nɩ tɩ ‑gwlɛnɩzlɩ yɛmanɩyɛmanɩza yi.» 15Ɔ 'nyʋää sa'a 'dɩɩ, 'n Zezwii yoo 'yi gö, ɔ lɛ naa: «A 'wuë, 'kwlɩsɔkäwa a 'yize a glɩnɩɛ. ‑Gwlɛnɩzlɩ ‑kä yii, 'a bhilaa ‑nyɛ 'a ‑sʋkʋfaniea 'sɔ ‑yɩ ‑glɛɛ linɩdaa, a di 'kpɔ 'n a kwɩɛ ‑mä 'nyibhë 'wʋ yɩ 'kä 'nɩmä. A'a 'zʋ bhä ‑sɩbhä ‑a? 16Zaa, nglɔ nɩ ‑ɔ glɩnɩɛ ‑aa dɩba Ablaamö a 'yu a 'yu, Sataa gwaa sɛ'ɛ klɩklɩ, 'n ɔ yɛɛ 'ylʋbö kʋgbä‑gbʋäta ɔ 'likpï ngli ‑sɛɛ, sɛ yɩ ‑wʋ ɔ 'mö 'n wa'a ‑doo bhä ‑gwlɛnɩzlɩ 'kpɔ 'nɩ?» 17Zezwii gbää sa'a, ‑wa 'pänɔ a‑a 'klɛ yɔwʋʋ, zʋʋ yinuëë 'wʋ. ‑Maa nɩkpa 'wuë ‑wa su a‑a ‑mä Lagɔbudu 'mö, wa 'yɩɛ Zezwii 'a ‑li a ‑li 'kädɩ ɔ nʋä 'ylɩmöö, 'mäna a 'yizee 'lɩbhʋää.

Suyeyike a ninea

(Matie 13.31-33; Maakö 4.30-32)

18Zezwii lɛ naa: «'Pɩwʋ mää Lagɔ 'kämanɩɛ, 'saa ‑mä ‑nyɛɛ 'wlʋnɩ bhä? 'Saa 'n 'kä bhä ‑mä 'wʋ pälɩ? 19Suyeyike ‑bhlʋ wa laa mutaadɩ, 'mö ‑mä ‑nyɛɛ 'wlʋnɩɛ. Suyeyike 'la, 'mö nɩkpɛ ‑bhlʋ glʋä ‑mä 'ɔ 'lagblɛɛ 'mö, ɔ 'wlʋä, ɔ su 'bhʋɔmanɩ 'wʋ ‑këë, 'n wʋ yiɛ kïla 'pä 'n 'zɩ yuä 'wlu 'sɩbhä.»

Levii a ninea

20'N Zezwii yi'ɛɛ nɩɩ: «'Pɩwʋ mää Lagɔ 'kämanɩɛ, 'saa 'n 'kä bhä ‑mä 'wʋ pälɩ? 21Sɛɛ 'nglɔ zʋ'ɛ falinɩ a ‑bɛ 'bëë 'kädaa 'mö 'n ɔ pä'ɛ ‑mä levii a 'tikïyiee, ‑sɩbhä 'pɩwʋ mää Lagɔ 'kämanɩɛ ‑wʋä. Ɔ ‑kä levii a 'tikïyie 'la, ‑mä falinɩ 'mö zʋ ɔ ‑kɔɔnyɩ plɛtanɩɩ, levii 'tikïyie 'la a za, falinɩ 'wuë, 'plu ɛ 'kää 'plu.»

A nɩ 'tɛmanɩ 'yli yɔwʋ a 'kä 'pɩwʋ mää Lagɔ 'kämanɩɛ plɛ

(Matie 7.13-14,21-23)

22Zezwii ‑wʋä ‑mä Zeluzalɛɛmö mö dɔ'wʋʋ, ‑mä ‑gwlɩɩ 'tikïyiea ‑nyɛ gwlɩ 'kädɩɩ 'sɔ 'mö, ‑mä ɔ ghlɛnɩɛ 'n ɔ bhïlanɩɛ ‑mä Lagɔwɛlɩɩ. 23'N nɩkpɛ ‑bhlʋ yoo 'ylɩ ‑bhlʋ 'mö nimï 'yɩbhä, ɔ lɛ naa: «‑Atʋ, nɩkpa ‑wa 'kää ‑mä Lagɔ yɔwʋ 'bhle ghlɩɩ, wa'a bhä ‑tiamö ‑zu ‑a?» Zezwii lɛ naa: 24«Lagɔ yɔwʋ a 'bhleghlɩghlɛɛ, sɛ wa ghlɛnɩ'ɛ ngloluë 'tikëtikëyi 'möö, ‑sɩbhä ma‑a. N nyanyɩ 'dɩ nɩɩ, nɩkpa a ‑bɛ yi ‑li 'mö yɛla wa 'kä ‑mä plɛ, ‑maa wa 'naa 'kä bhɛmanɩ. Zaa, a 'tɛmanɩa 'yli yɔwʋ, a 'kä ‑mä plɛ.

25A yɩɛ, ‑budulowlii ‑kä 'ylɩ ‑bhlʋ 'mö 'wʋ ‑sɔ, ɔ ‑kä ‑lɛ ‑gbaa, ‑mä a yiaa 'pɩwʋ tʋʋä. ‑Lɛ a 'tɛnyɩ 'la 'mö, a 'nɩgbö ‑mä 'pɩwʋ 'n a 'kää ‑buduu bhɔtɔ, a 'kä nɩɩ: ‑Atʋ, ‑yayaya, kälɩ ‑lɛ ‑a 'kä plɛ. ‑Maa sɛ'ɛ ɔ 'kanyɩɛ 'dɩ 'nyɛ nɩɩ: N'n‑ä dɛ a'bhë a 'bhöönɩ ‑yi. 26'N a 'kä'ɛɛ nɩɩ: 'Ɔ! Zaa, ‑a ‑nyɛmö 'sɔ ‑a linɩ yɩ 'wʋ nɩɩ, ‑mä ‑a'a ‑glɔɔ 'mö, ‑n bhïlanɩ yɩ ‑mä Lagɔwɛlɩɩ nɩɩ, sɛ ‑n ‑nɩnyɩ bhä ‑yi 'nɩ? 27'N ɔ 'kanyɩ'ɛɛ 'dɩ 'nyɛ nɩɩ: N'n‑ä maanyɩ nɩkpa a'bhë a glɩnɩɛ ‑yi. 'Saa 'nɩɛ Lagɔ dlɩ yɔwʋ nɛnɩ, abhʋaa nwiɛ, a nɩ 'dionɩɩ gwë! 28‑Lɛ a 'tɛnyɩ 'la 'mö, Ablaamö mɔ, Zakɔɔbö mɔ, Yizaakö mɔ, 'n Lagɔ 'a bhla'mö a 'möbhïlanɩwaa 'wuë, a ‑kʋä 'ylɩmö, wa ‑kä ‑mä 'pɩwʋ mää Lagɔ 'kämanɩɛ ‑wʋ, a ‑kä abhlɩ ‑mä 'pɩwʋ 'nɩgböö, a yi 'wi, a yi 'klʋ 'slu. 29Sɛ'ɛ n gbää nɩɩ, ‑mä dʋdʋʋ a këtiea 'wuë 'wʋ ‑mä nɩkpa 'kää 'bhöönɩ, wa 'kä 'pɩwʋ mää Lagɔ 'kämanɩɛ 'bhle ghlɩ, Lagɔ ‑nyʋä 'kä 'wʋ linɩ. 30‑Sɩbhä a za, nɩkpa a ‑bɛ, ‑wa ‑gää zɩ'ɛ 'yukuu, wa yi nimï 'plɩ, 'n ‑wa ‑gää zɩ'ɛ nimïï, wa yi 'yuku 'plɩ.»

Zezwii yɛ Zeluzalɛɛmö a ‑nʋa a za 'wi

(Matie 23.37-39)

31‑Lɛ a 'tɛnyɩ 'la ‑bhʋlʋ ‑kpɔ 'mö, Falizɩɛwaa a gla'mö a ‑mumuë, 'n wa yiɛ Zezwii yɔwʋ 'dio, wa lɛ naa: «'Bhöö mä'ä ‑n 'kä käböbɛyɩ mö, ‑maa 'bhlɩlowli Eloodɩ, ɔ yɩbhä ɔ ‑kamö 'lɩbhä ‑n 'kä 'ku.» 32-33Zezwii lɛ naa: «Ylʋnyɔɔ, Zaklɔnɩkpɛ 'la, a nɩ mö a 'kɔ 'dɩ 'nyɛ nɩɩ: 'Na 'kukutɛnyɩ 'nɩɛ ‑bhlɛ ghlɛ. 'Tɛnyɩ ‑mɛ nɩ 'wuë 'mö, zuzukuzoku n kpëtiɛ nɩkpa ‑gömö 'n n yɛmanɩɛ guzuwa, libhoo Lagɔ nyɩaaa 'mö n ‑wʋä nʋ dɔ'wʋ, 'ylɩya ‑kä 'plɩɩ n 'kʋ zɛmö bhɩɛ. ‑Maa ‑mä Zeluzalɛɛmö, ‑mä n ‑wʋä mö dɔ'wʋ, ‑mä n 'kää 'kunɩ. Ɛ'ɛ ‑bhö nyɩasɛ, ‑maa Lagɔ 'a 'möbhïlanɩwaa 'wuë, ‑mä wa 'lɩbhänuëë. Zaa, ‑mä wa kää wa ‑kaa 'lɩbhänɩmö.»

34'N Zezwii yia'aa Zeluzalɛɛmö a ‑nʋa 'wʋ 'winɩ, ɔ lɛ naa: «Yeee! Zeluzalɛɛmö a ‑nʋänyɩ, Yeee! Zeluzalɛɛmö a ‑nʋänyɩ, Lagɔ 'a 'möbhïlanɩwaa, abhʋa lɩbhʋä. ‑Muë Lagɔ tianyɩɛ 'wʋ, abhʋaa lɩbhʋää 'kpɩɩ 'möö, sɛɛ ‑kɔkɔ pä'ɛ wʋ 'yuë ‑këpï zɛmö, ɔ 'kʋä 'wʋ kpëti a za‑a, ‑sɩbhä n yɩbhä a‑a nyɩasɛ n 'kanyɩ a 'wuë ‑lɛ na yɔwʋ 'wlu 'yɩbhanɩ, ‑maa a'aa 'wʋ nglu 'lɩlɩlɩ. 35Yeee! A yɩɛ, tɛɛnɩa'a ‑sɩkaa dɛ'ɛ, 'a ‑glɔɔ, Lagɔ yu 'wʋ ylɛ. N nyanyɩ 'dɩ nɩɩ, a 'naa ‑kaaa'a 'ylɩmö ‑këë, 'n a 'kää 'ylɩ ‑bhlʋ 'mö nɩɩ, ‑ɔ yiɛ dɛ'ɛ ‑Alowli Lagɔ a 'nglɩ 'möö, Lagɔ nɩ 'pɔ 'nyu!»

Currently Selected:

Lwiikö 13: bet

Highlight

Copy