Maakö 3
3
Zezwii yɛ nɩkpɛ ‑gwlɛnɩzlɩ yɛmanɩ
(Matie 12.9-14; Lwiikö 6.6-11)
1'N Zezwii yiɛ'ɛ ‑mä Lagɔbuduu 'mö plɛ. Nɩkpɛ ‑bhlʋ ‑wʋmö a ‑mä, ‑kwätasɩɛka ɔ kää. 2Zezwii plɛɛ ‑mää, kä'mö wa yiloo, 'n ɔ ‑käa nɩkpɛ 'la ‑gwlɛnɩzlɩ yɛmanɩɛ yi a za, wa 'kɔ ‑zijle 'nyɛ. 3Nɩkpɛɛ ‑ɔ kää ‑kwätasɩɛkaa, 'n Zezwii yoo wäzɩ. Ɔ lɛ naa: «‑Sɔ 'wʋ ‑n 'kä dɛ'ɛ nɩkpabhë a 'yila 'klʋ yi.» 4'N ɔ yuëë nimï 'yɩbhä nɩɩ: «Wa kä ɔ wa 'kä ‑gwlɛnɩzlɩ ‑li a ‑li nʋ? ‑Maa 'zoku 'mö wa kä ɔ wa kä nʋ ‑a? Wa kä ɔ wa 'kä ‑gwlɛnɩzlɩ nɩkpɛ puë? ‑Maa 'yi wa 'kɔ bhä 'tatinɩ ɔ 'kä 'ku ‑a?» Ɔ 'yɩbhʋää sa'a nimïï, ‑bɛ 'nɩɛ gbʋ ‑dɩ. 5'N ɔ yuëë 'klɛsɛ ‑gömö yɩlɩ, sɛɛ 'wa dilaa 'tunɩɛ 'mö a za, 'n swɩ a'bhë yoo yɔwʋ 'kunɩ, 'n ɔ yiɛ ‑kwätasɩɛkakänyɔɔ 'dɩ 'nyɛ, nɩɩ: «Plu ‑na'a sɔɔ 'mö.» 'N nɩkpɛɛ yiɛ sɔɔ 'mö plu, 'n 'ɔ kätɩkpaa yiɛ yɛmanɩ. 6Falizɩɛwaa ‑wa ‑wʋmö a‑a ‑mä, 'n wa yiɛ ‑mä 'wlʋ. 'N wa yiɛ Eloodɩ 'a ‑zɩkpaa ‑mä ghlɩ, wa ‑nyʋä 'sɔ 'n wa yiɛ ylɩ plɛ. Sɛ wa 'kää 'zʋ wa 'kä Zezwii 'lɩbhä ɔ 'kä 'kuu, wa 'kä ‑sɩbhä sɛ tɛlɩ.
Zezwii yɛ nɩkpa a ‑bɛ yɛmanɩ
(Matie 4.23-25; 12.15-16; Lwiikö 6.17-19)
7Zezwii ‑nyɛ 'ɔ ‑gänɩwaa 'sɔ, wa 'bhööä ‑lɛ, 'n wa yiɛ ‑mä Galilee a 'nyu 'kɔdʋʋ a saa mönɩ. Nɩkpa a 'kɔkɔmlɛ ‑gënuë. ‑Mumuë 'bhöönɩ Galilee‑bhölɩɩ ‑nyɛ Zwidee‑bhölɩ 'sɔ 'mö. 8‑Mumuë 'bhöönɩ Zeluzalɛɛmö, ‑mumuë 'bhöönɩ Yidumee, ‑mumuë 'bhöönɩ ‑mä Zludɛɛ ‑gömö, ‑mumuë 'bhöönɩ ‑mä Tiilɩ ‑nyɛ Sidɔɔ 'sɔ a ‑kʋkʋ yɔwʋ a ‑gwlɩ 'mö. Nɩkpa a 'kɔkɔmlɛ, wa 'nʋä 'saa Zezwii nʋä a 'tɩtɩɩ, 'n wa yoo yinɩ. 9'N ɔ yiɛ 'ɔ ‑gänɩwaa 'dɩ 'nyɛ nɩɩ: «A nɩ mö na 'gɔlʋ kie, wa ‑tɩɩa ‑gbʋgbʋ nuë 'sunɩ.» 10Guzuwaa a ‑bɛ Zezwii yɛmanɩɛ zaa, ‑waaa ‑bhlɛ yɛmanɩɛ 'wʋ wa bhlinɔɔ, wa yɩbhä wa 'kɔ kɛ zɩ. 11‑Wa kää zuzukuzoku ‑gömöö, wa ‑kɔɔ 'ylɩmöö, ‑lɛ ɔ dlɩ 'mö ‑lɛ wa pää ‑kokomïladigbï glu, 'n yɩ kpaa 'mö, 'n yɩ nʋä: «Lagɔ 'a yuu mö ‑n glɩnɩ!» 12‑Maa Zezwii, yɔwʋkanɩsɛ ɔ nyɛɛ zuzuku 'la 'dɩ nɩɩ, yɩ nɩ tɩ nɩkpa 'saa ɔ glɩnɩɛ sʋlʋnɩ.
Zezwii yɛ 'ɔ tietiewaa kʋgbä 'sɔ ‑kpɔ ‑sɛ
(Matie 10.1-4; Lwiikö 6.12-16)
13‑Mi'la 'plɩɛ 'wëë, 'n Zezwii yiɛ ‑gäga ‑bhlʋ 'wlu mö. ‑Muë ɔ yɩbhää 'n ɔ yuëë wäzɩ, 'n wa yoo ‑mä ghlɩ. 14‑Mä wa gla'mö, ɔ ‑sɛ ‑mä nɩkpa kʋgbä 'sɔ, ['mö ɔ laa 'ɔ tietiewaa] wa 'kɔ 'kwädlɩ ‑gänɩ ɔ 'kʋä tie wa 'kä Lagɔ 'a 'Mänatɩtɩɩ bia. 15Wa 'kä ɔ 'nglɩ 'mö nɩkpa zuzukuzoku ‑gömö kpëti. 16Wa kʋgbä 'sɔ ‑kpɔ, 'wa nglɩɩ miɛ dɛ'ɛ: Simɔɔ ɔ 'pää Piɛlɩ mɔ, 17Zebedee ‑yowluwa Zaakö ‑nyɛ ɔ ‑daayu Zaa 'sɔ ɔ 'pää Buanɩzɛɛzɩ. ‑Yɩ sɛɛ zɛmö nɩɩ, ‑gbägbadɛ a 'yuë muë, 18Adlee mɔ, Filiipö, Batlemii, Matie, Tomaa, Alɩfee yowli Zaakö mɔ, Tadee, Simɔɔ ‑ɔ ‑wʋmö a‑a ‑mä ‑zɩkpaa wa laa Zɛlɔɔtɩ#3.18 Zɛlɔɔtɩ: Mɩɩ sɛɛ zɛmö nɩɩ, ‑ɔ gwɩ 'ɔ bhlɩɩ a 'wlumö. 'mö mɔ, 19'n Zwidaa Yisikalio ‑ɔ 'kää zɩkö Zezwii plɩɩ.
Zezwii a ‑lowluwa lɛ ɔ 'wlumö yɛ nyimo
20'N Zezwii yiɛ 'ligbë 'mö mö. 'N nɩkpa 'kɔkɔmlɛ yi'ɛɛ 'sɔ ‑lɛ ɔ yɔwʋ 'wlu 'titanɩ. 'Wa zunɔɔ a za, Zezwii ‑nyɛ 'ɔ ‑gänɩwaa 'sɔ, wa'a ghlɩ 'tɛnyɩ wa 'kä li. 21Zezwii 'a ‑kosu yɔwʋ a ‑nʋa 'nʋä ɔ 'dɩɩ, wa ‑tɔnɩ wabhlɩ ɔ 'wlumö yɛ nyimo, zaa 'n wa yiɛ mö wa ‑nyɔɔ 'kä yi.
Zezwii yɛ Gböö a 'cɩawaa 'a wɛlɩɩ ‑gömö ‑sɛ
(Matie 12.22-32; Lwiikö 11.14-23; 12.10)
22 Gböö a 'cɩawaa ‑wa 'bhöönɩɛ Zeluzalɛɛmö lɛ: «Zuzukuzoku a 'kifi Bɛzebilɩ mɔɔ ‑wɔɔ ‑gömö, mɔɔ nyɔɔ 'mötɛɛnɔ 'n ɔ kpëtie zuzukuzoku nɩkpa ‑gömö.» 23Zaa, n Zezwii yuë wäzɩ 'n ɔ yuë 'nine 'pänɩ. Ɔ lɛ naa: «Sɛɛ Sataa 'kä bhä Sataa kpëti nɩ?» 24'N ɔ yiɛ'ɛɛ nɩɩ: «'Bhlɩ ‑bhlʋ 'mö a nɩkpa ‑kä 'ylimö ‑känɩ, wa ‑kä wa 'yize tʋ gwɩɩ, ‑pa wa saa 'kää 'yli bhɩɛ. 25‑Kosu ‑bhlʋ yɔwʋ a nɩkpa ‑kä 'mö donɩ, ‑pa wa bhɩɛ 'yli. 26Zaa, Sataa ‑kä ɔnyɩ tʋ ‑lɛ, ɔ ‑nyɛ ɔ ‑nʋa 'sɔ wa ‑kä 'ylimö ‑känɩ ɔ 'naa 'kä gwälɛ, 'yli ɔ 'kää bhɩɛ. 27Nɩkpɛ 'nɩɛ bhɛnɩ ɔ 'kä kanɩnyɔ a ‑budu 'mö plɛ nzɩɩ ɔ 'kä ‑mä a ‑lii 'wuë 'wʋ 'libhi 'n ɔ 'nɔ gwa 'wëë. Ɔ ‑kɔɔ gwa 'wëë, ɔ bhɛnɩ ɔ 'kä yɩ 'wuë 'wʋ 'libhï. 28‑Tiamö ‑n nyanyɩɛ 'dɩ nɩɩ, nɩkpɛ yi ‑lizoku a kii 'wuë nʋ oo, ɔ yi Lagɔ a dɛ wɛlɩzoku bhïla oo, Lagɔ bhɛnɩ ɔ 'kä yɩ gbʋ 'yi 'tatinɩ. 29‑Maa nɩkpɛ a ‑mɔɔ ‑kä 'Wugɔmʋʋ 'Wlɩlɩ a dɛ wɛlɩzoku bhïlaa, ‑lɛ a 'nyinyloli 'la a gbʋʋ, Lagɔ 'naa 'kʋ 'yi 'tatinɩ, wʋ yo 'kwädlɩ ‑gömö ‑wʋ 'yize.» 30Nyɩasɛ Zezwii 'nuëë ‑sɩbhä 'dɩ nyɛ, ‑maa wa lɛ zuzukwëzokwë ɔ kää ‑gömö, nza ɔ 'nyʋää ‑sɩbhä 'dɩ.
Zezwii 'a ‑tiamö a waa
(Matie 12.46-50; Lwiikö 8.19-21)
31Zezwii ‑wʋ ‑bhlɛ wɛlɩ 'la bhïla dɔ'wʋ, ɔ ‑daayuë ‑nyɛ ɔ ‑da 'sɔ, 'n wa yiɛ yi. Wa 'nɩgbö ‑mä 'pɩwʋ, 'n wa yoo nɩkpɛ 'wʋ tie. 32Nɩkpa a 'kɔkɔmlɛ ‑binɔɔ, 'n nɩkpɛɛ wa tie a‑a yoo 'dɩ 'nyɛ nɩɩ: «Yɩɛ, ‑na ‑da mɔ, ‑na nyɩbhɛlʋdaayuë muë 'n ‑na nglʋdaayuë, wa 'nɩgbö ‑mä 'pɩwʋ, wa yɩbhä wa ‑kamö 'ylɩmö.» 33Zezwii lɛ naa: «‑Mɔ ‑lɛ bhä na ‑da, 'n ‑muë ‑lɛ bhä na ‑daayuë 'nɩ?» 34Ɔ yɩlɩɛ nɩkpaa ‑wa ‑binɔɔ ‑gömö ‑këë, ɔ lɛ naa: «A yɩɛ, na ‑da ‑nyɛ na ‑daayuë 'sɔ muëë da'a. 35Sɛɛ Lagɔ gbää ‑ɔ nɛmöä ‑sɩbhä mɔɔ glɩnɩɛ na ‑da, mɔɔ glɩnɩɛ na nyɩbhɛlʋdaayu, mɔɔ glɩnɩɛ na nglʋdaayu.»
Currently Selected:
Maakö 3: bet
Highlight
Share
Copy
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.