Maakö 4

Zezwii yɛ glʋglʋnyɔ a 'nine 'pä

(Matie 13.1-9; Lwiikö 8.4-8)

1Ylɩ ‑mɛmɛɛ ‑bhlʋ 'mö, 'n Zezwii yi'ɛɛ ‑mä Galilee a 'nyu 'kɔdʋʋ yɔwʋ nɩkpa Lagɔwɛlɩ 'cɩa. Nɩkpaa ‑wa 'titanɩɛ ‑lɛ ɔ yɔwʋ 'wluu, ‑zu wa ‑zuä tenyii, zaa 'gɔlʋ 'mö ɔ ‑gbälɛɛ. Ɔ glɩ ‑mä wʋ 'mö, ‑lɛ 'nyu 'klʋ, 'n nɩkpaa suä ‑lɛ 'nyunuë 'wʋ. 2'Nini 'mö ɔ 'cɩanuëë ‑li a ‑bɛ. Ɔ 'kʋä 'cɩa dɔ'wʋ ‑wʋʋ, sɛ'ɛ ɔ 'nyʋä 'dɩ nɩɩ: 3«A ‑pʋnɩ 'yukwli. Glʋglʋnyɔ ‑bhlʋ mɔɔ möä lile 'mlɩɛ.#4.3 ‑Mä 'wa mä'a dɔ'wʋ, wa'aa lileyʋʋ glʋ ‑maa 'mlɩ wa mluä. 4Ɔ ‑wʋ 'mlɩ dɔ'wʋ, 'n lileyʋ ‑mumuu yiɛ ‑lɛ 'yioo a ‑kʋkʋ yɔwʋ bhlinɩ. 'N zɩɩ yiɛ yi 'n yɩ yuä li. 5'N yʋ ‑mumuu yi'ɛɛ ‑lɛ kpayi 'klʋ bhlinɩ, daanyɩ dʋdʋʋ 'nɩɛ ‑zu, 'n wʋ yiɛ ‑pa mi. 6Ylʋʋ 'pʋä, 'n wʋ yiɛ ‑gbɔkwälɩɩ 'wʋ sianɩ, 'n yɩ yiɛ yɛ, yɩ'ɩɛ kpïla glu ‑kä a za. 7'N yʋ ‑mumuu yi'ɛɛ ‑mä ‑dɛglaswi a ‑duvï jijo'wʋ bhlinɩ. ‑Duvïï tɛpɔnɩɛ 'wʋʋ, 'n yɩ yiɛ lilea a ‑gbɔkwälɩɩ 'wlumö ‑gbïli. Zaa, yɩ'ɩɛ tlʋ. 8'N yʋ ‑mumuu yi'ɛɛ ‑lɛ dʋdʋ a ‑dʋdʋ 'wʋ bhlinɩ, mʋʋ 'pʋä, 'n wʋ yiɛ fötɩ. 'Gwla ‑bhlʋ kä 'yʋ a glʋ ‑bhlʋ 'yɛya kʋgbä 'yli, ‑mämaa kä gwlɩ ta 'yli, ‑mämaa kä gwlɩ ngbï 'yli. 9Zaa, ‑ɔ ‑kä 'yukwïla 'wlu ‑kä, ɔ nɩ 'nʋa ‑bhlɛ.»

Sɛ'ɛ a za Zezwii bhïlanɩɛ 'nini 'mö

(Matie 13.10-17; Lwiikö 8.9-10)

10Zezwii 'a ‑gänɩwaa kʋgbä 'sɔ ‑kpɔ ‑nyɛ ‑wa ‑gänɩmɔɔ 'kwädlɩ 'sɔ, wa 'yize, wa ‑nyɛ Zezwii 'sɔ wa glɩ ‑lɛ, 'n wa yoo nimï 'yɩbhä, ɔ 'kʋä ninii ɔ pää a zɛmö sʋlʋnɩ. 11'N Zezwii yuëë 'dɩ 'nyɛ nɩɩ: «Abhʋa abhlɩ, Lagɔ slʋnanyɩ, nzɩɩ 'pɩwʋ mä ɔ 'kämanɩɛ a wɛlɩɩ a 'kɩ 'mö 'nʋ. ‑Maa 'pɩwʋ a ‑nʋa wabhlɩ, 'nini a 'yize wa ‑pʋnɩɛ 'yukwli. 12‑Lɛ a dɔ'wʋ,

'wa yilaa yi lɩ, ‑maa wa 'naa 'kä ‑lu 'ylɩmö.

Wa yi 'fʋ ‑ngö, ‑maa wa 'naa 'kä ‑lu 'mö 'nʋ.

Wa tɩa Lagɔ yɩbhlɩnɩ, ɔ tɩa 'wa 'nyinylolii a gbʋ 'yi 'tatinɩ. # 4.12 Ezayii 6.9-10. »

Glʋglʋnyɔɔ a ninea a zɛmösɛsaa

(Matie 13.18-23; Lwiikö 8.11-25)

13'N Zezwii yuëë nimï 'yɩbhä, nɩɩ: «Nine 'la n 'pää, a 'naa 'yɛ 'mö 'nʋä, sɛ a 'kä bhä ‑mi'la 'mö 'nʋ 'nɩ? 14Glʋglʋnyɔɔ, Lagɔwɛlɩɩ 'mö ɔ glʋä. 15‑Lɛ 'yio yɔwʋ dɛɛ lileyʋ ‑mumuu bhlinɩɛ, nɩkpa ‑mumuë ‑nyɛ ‑lɛ 'wlʋnɩ. Wa ‑kä Lagɔwɛlɩɩ 'nʋ 'wë cuu, 'n Sataa yiɛ 'n ɔ sʋänyɩɛ dila zɛmö. 16‑Mumuë ‑nyɛ kpayidʋdʋʋ 'wlʋnɩ. Wa ‑kä Lagɔwɛlɩɩ 'nʋʋ, 'mänasɛ wa ngwliɛ 'wʋ. 17‑Maa wa 'niɛ dila zɛmö 'zʋ. Yɩ gbʋ plɛnuë 'ylɩya 'mö, wa kɩ dlɩ 'wʋ. ‑Maa yɩ za 'klɩyɩyɛ ‑nyɛ ngäzɩ 'sɔ ‑kʋä ghlɩɩ, 'yi wa 'tatiniɛ. 18‑Mumuë ‑nyɛ dʋdʋʋ ‑wʋ kää ‑dɛgla 'wʋ 'wlʋnɩ. Wa nʋ ‑tiamö Lagɔwɛlɩɩ, 19‑maa mä'ä 'pɩwʋ a dlɩpäpʋ ylʋä, wʋlʋnɔ ‑nyɛ ‑lii 'wuë 'sɔ a tʋʋ lɩbhʋä, 'n yɩ gbʋ plɛnuëë tenyii. ‑Li 'la, mɩɩ 'mänanɩɛ Lagɔwɛlɩɩ wa 'zʋ a‑a dlɩ zɛmö 'wlu. ‑Sɩbhä a za yɩ'ɩ tlʋa'a 'bhï. 20Nɩkpa ‑mumuë, wa ‑kä Lagɔwɛlɩɩ 'nʋʋ, ‑mʋa ‑pʋniɛ sasɛ 'yukwli, 'n wa zwiɛ dila zɛmö. Nɩkpa 'la, ‑mʋa ‑nyɛ dʋdʋ a ‑dʋdʋʋ 'wlʋnɩɛ, dɛɛ lileyʋʋ bhlinɩɛ, 'n wʋ yiɛ 'pʋ 'n 'gwla ‑bhlʋ kää 'yʋ a glʋ ‑bhlʋ 'yɛya kʋgbä 'yli, 'n ‑mämaa kää yʋ gwlɩ ta 'yli, 'n ‑mämaa kää 'yʋ a gwlɩ ngbï 'yli.»

Zezwii yɛ Lagɔwɛlɩɩ ɔ 'nyɛɛ ɔ ‑nʋa 'napɛ 'wʋ pälɩ

(Lwiikö 8.16-18)

21'N ɔ yiɛ wɛlɩ ‑mimii 'wʋ pälɩ nɩɩ: «Nɩkpɛ ‑kä 'napɛ 'yi ‑dɩ 'wëë, ‑käka zɛmö ɔ zwe bhä ‑a? ‑Maa ‑bhɛlɛ ‑zɛmö ɔ zwe bhä ‑a? Wa ‑kä 'napɛ 'yi ‑dɩ 'wëë, ghäyɩ wa bizee. 22Sɛ'ɛ n gbää nɩɩ, wɛlɩ 'wuë ‑yɩ ziza‑a, yɩ yi 'ylɩ ‑bhlʋ 'mö zɛmö 'wlʋ, 'saa 'wuë nɩkpa zizaa ‑mä wa dila zɛmö, yɩ yi 'pɩwʋ 'pɔɔ. 23Zaa, ‑ɔ ‑kä 'yukwïla 'wlu ‑kä ɔ 'kä 'nʋʋ, ɔ nɩ 'nʋ.» 24'N ɔ yi'ɛɛ nɩɩ: «A nɩ köbha 'saa a 'nʋä 'yukwli, ‑maa 'saa a 'libhïä 'wʋ 'n a yɛkaa, 'mö wa 'kää a ‑nɩɩ yɛkanɩ. Wa yi a ‑nɩɩ a'bhë ‑gömö 'pä. 25‑Mä yɩ 'mö, ‑ɔ kää, 'mö wa 'kää 'nyɛ. ‑Maa ‑ɔɔɔ ‑kä, 'tikïyiea ɔ kää, 'mö wa 'kɔɔ kä'mö ‑sɛ.»

Lagɔ 'a wɛlɩɩ yɩnyɩgäsɛ 'n yɩ nʋä 'yɩ libhoo

26'N Zezwii yuë'ɛɛ 'dɩ 'nyɛ nɩɩ: «'Pɩwʋ mää Lagɔ 'kämanɩɛ a wɛlɩɩ, sɛ wa glʋ'ɛ 'sɩkaa, ‑sɩbhä ma‑a. 27A glʋglʋnyɔɔ, ɔ yi ngämö oo, ɔ yi ‑gä oo, sabʋ oo, zlɩgä oo, a ‑kä mie yii, sɛ a 'zʋzʋnɩɛ 'mö 'n a miɛ, ɔ'ɔɔ ‑sɩbhä ‑yi. 28‑Bɛ 'naa mia, anyɩgäsɛ 'n a wlʋä, 'n a 'bhʋɔmanɩɛ 'wʋ, 'n a fötɩɛ, 'n a zɛlɩɛ. 29A ‑käa'a zɛlɩɩ, a ‑dɩdɩtɛnyɩɩ yɛ ghlɛ zaa, ‑dɩɛ ɔ ma‑a.»

Suyeyike a ninea

(Matie 13.31-32,34; Lwiikö 13.18-19)

30'N Zezwii yuëë wɛlɩ ‑mimii 'nyɛ. Ɔ lɛ naa: «'Saa ‑a bhɛnɩ bhä a 'kä 'pɩwʋ mää Lagɔ 'kämanɩɛ a wɛlɩɩ yɛkanɩ? Nine ‑ma ‑a ‑nyɛ wɛlɩ 'la mönɩ ɔ yɔwʋ? 31Suyeyike wa laa mutaadɩ, wa ‑kɔɔ glʋ a 'saa ɔ yinɩɛ 'möö, 'mö 'Pɩwʋ mää Lagɔ 'kämanɩɛ ‑nyɛ 'wlʋnɩɛ. Suyeyike 'la ɔ 'tikëtikëyi. Ɔ sɛ a 'tikëyi 'nɩɛ mä'ä 'ylʋ zɛmö ‑wʋ. 32‑Maa wa ‑kɔɔ glʋʋ, ɔ ‑kä 'wlʋʋ, ɔ suu 'bhʋɔmanɩ 'wʋ ‑këë wʋ zi 'lagblɛ 'mö a glʋglʋlii 'wuë 'wʋ. 'N wʋ pää kïla ‑vʋkʋ, 'n 'zɩ 'sɩbhänuä 'wlu.» 33‑Sɩbhä a 'nini a ‑bɛ, 'mö Zezwii 'pää ɔ 'kä nɩkpa Lagɔwɛlɩɩ 'nyɛ a za. Wɛlɩɩ wa bhɛnɩɛ wa 'kä 'mö nʋʋ, 'mö ɔ nyʋää. 34Ɔ'ɔ 'nyʋä 'fʋ Lagɔwɛlɩ 'n ɛ 'nɩ ‑bhö nini möö. Maa ɔ ‑nyɛ 'ɔ ‑gänɩwaa 'sɔ a 'yize wa ‑käa'a ‑lɛ tʋʋ, 'n ɔ sɛnuënyɩɛ zɛmö.

Zezwii yɛ ‑podie 'nigba

(Matie 8.23-27; Lwiikö 8.22-25)

35‑Kidosɛ ghlɛɛ, 'n Zezwii yiɛ 'ɔ ‑gänɩwaa 'dɩ 'nyɛ nɩɩ: «A‑a nɩ 'tʋ nyuu, ‑a 'kä ‑mä kïkë ‑mä'la ‑gömö mö.» 36'N wa yiɛ nɩkpaa a ‑bʋbʋʋ yɔwʋ 'bhöö, 'n wa yiɛ 'gɔlʋ 'mö ‑gbälɛ, wa ‑nyɛ gɔlwɩ ‑mimii 'sɔ, 'n wa yiɛ yɔwʋ mönɩ. 37Wa ‑wʋ mö dɔ'wʋ, 'n 'vuu 'kɔdʋ 'kɔdʋ yiɛ yi, 'n nyuu a ‑gbɔkwälɩ bhlinɩɛ ‑mä gɔlʋʋ 'mö. Nyuu lɛ 'kä gɔlʋʋ wʋ yie. 38Zezwii pö ‑mä gɔlʋʋ a nimï, ɔ pälɩ 'pina 'wlu, ɔ ‑wʋ ngämö dɔ'wʋ. 'N wa yoo gäla, wa lɛ: «‑Atʋ, ‑abhʋaa kuaa! ‑Aa gbʋ ‑nɩmö bhä plɛnɩ ‑a?» 39Zezwii gɔlɔɔ, 'n ɔ yiɛ 'vuu 'wʋ 'kpanɩ, 'n ɔ yiɛ nyuu 'dɩ 'nyɛ nɩɩ: «'Zʋ vlɩɩ!» Ɔ gbää sa'a cuu, 'n 'vuu yiɛ donɩ, 'n saa 'wuë yiɛ vlɩɩ plɛ. 40'N ɔ yia'aa 'ɔ ‑gänɩwaa yi gö nɩɩ: «Sɛ yɩ ‑wʋ ɔ 'mö 'n a ngänɩ ɔ sa'a nɩ? A'a bhä dlɩ'wʋkänɔ ‑kä ‑a?» 41Wa 'wuë, 'n ‑käkö yuëë köbhä, 'n wa 'yɩbhäyɩbhänɩɛ nimï nɩɩ: «'Ɔ! Nɩkpɛ a ‑mɔ bhä dɛ'ɛ 'nɩ? Sɛ ɔ ‑wʋ bhä 'n 'vuu ‑nyɛ nyuu 'sɔ zo bhä 'klʋkpamö 'nɩ?»

Currently Selected:

Maakö 4: bet

Highlight

Copy