যাত্রা 8
8
মিসর উগুরে দ্বিলম্বর্ আঘাত-বেঙর্ তামাজা
1সে পরেদি লগেপ্রভু মোশিরে কলঅ, “ফরৌণরে যেইনে এ কধাগান্ কোই দে, লগেপ্রভু কত্তে, ‘মরে উবোসনা গুরিবাত্যে মঅ মানুচ্চুনোরে যেবাত্তে দে। 2যুদি তুই তারারে যেবাত্তে ন-দুয়োচ্ সালে পুরো দেজ্ছান উগুরে মুই বেঙর্ তামাজা গুরিবাত্তে যাঙর্। 3নীল গাঙান্ বেঙোই ভুরি যেবাক্, আর গাঙত্তুন্ সিগুন্ উদি এবাক্, তঅ ঘরত, তঅ ঘুম্ যেবার্ ঘরত, তঅ বিচ্চোনত্, তঅ কাম্ গুরিয়্যেগুনোর্ ঘরত, তঅ মানুচ্চুনো ঘরত, তঅ চুলোবোত্ আর তঅ মোইদ্যে গুলিবার্ পিলেবোত্ যেইনে উদিবাক্। 4সেই বেঙুনে তঅ উগুরে আর তঅ মানুচ্চুনো উগুরে আহ্ তর্ কাম্ গুরিয়্যেগুনো উগুরে যেইনে কিয়্যেত্ উদিবাক্।’ ”
5সে পরেদি লগেপ্রভু মোশিরে কলঅ, “তুই হারোণরে এই কধাগান্ কবে, ‘মিসর দেজর্ বেক্ গাঙানি, ছড়ানি আর পৌরুনো উগুরে লুদিক্কো সুমুত্তো তর্ আত্তান্ বাবেইনে দেজ্ছানর্ উগুরেত্তুন্ বেঙুন্ তুলি আন্।’ ”
6সেক্কে হারোণে মিসরর বেক্ পানিগান উগুরে তার্ আঢ্তান্ বাবেই দিলো। সেক্কে বেঙুন্ উদি এইনে দেজ্ছানত্ ছিদি পড়িলাক্। 7যাদুকরুনেয়ো তারার্ যাদুমন্ত্রর বলে সেই এক্কুই কাম্ গুরিলাক্। তারায়ো মিসর্ দেজত্ বেঙ্ আনিলাক্।
8ফরৌণে সেক্কে মোশি আর হারোণরে ডাগি আনিনে কলঅ, “তুমি লগেপ্রভু ইধু কোজোলী গরঅ যেনে তে মত্তুন্ আর মঅ মানুচ্চুনো উগুরেত্তুন্ এ বেঙ ভানাগান্ সোরেই নেযায়্। সেক্কে মুই মানুচ্চুনোরে যেবাত্তে দিম যেনে তারা যেইনে লগেপ্রভুর্ নাঙে য়েমান্ উৎসর্ব গুরি পারন।”
9মোশি ফরৌণরে কলঅ, “বেঙুন্ যেনে তরে আর তঅ ঘরান ছাড়ি যেইনে বানা গাঙত্ থান্দোই, সেনত্যে কঅ কক্কে মুই তত্তে, তঅ কাম্গুরিয়্যেগুনোত্তে আর মানুচ্চুনোত্যে কোজোলী গুরিম্। সময়ান তুই ঠিগ্ গুরিচ্।”
10জোবত্ ফরৌণে কলঅ, “সালে সিয়েন কেল্যে ওক্।”
মোশি কলঅ, “সিয়েনই অবঅ। সেক্কে তুই বুঝি পারিবে, আমা গোজেন লগেপ্রভু ধোক্ক্যেন কনজন্ নেই। 11বেঙুনে তরে আর তঅ ঘরত, তঅ কাম্গুরিয়্যেগুন আর তঅ মানুচ্চুনোরে ছাড়ি যেবাক্। সিগুন্ বানা নীল গাঙ ভিদিরে থেবাক্।”
12এ কধাগান্ কোইনে মোশি আর হারোণে ফরৌণ ইত্তুন্ গেলগোই। ফরৌণ উগুরে লগেপ্রভু যে বেঙর্ বানাগান্ আন্যে সে পৌইদ্যেনে মোশি লগেপ্রভু ইধু কানা-কুদি গুরিলো। 13সেক্কে লগেপ্রভু তা কধামজিম কাম্ গুরিলো। ঘর্-দুয়োর, উদোন্ আর জাগা-জোমিত্ যিদুক্কুন্ বেঙ্ এলাক বেক্কুন্ মুরি গেলাক্। 14মানুচ্চুনে সিগুন্ আনিনে নানান্ জাগাত্ এগত্তর্ গুরিলাক্ আর সেক্কে দেজ ভিদিরে এক বাবোত্যে পজাবাজ নিগিলিলো। 15মাত্তর্ বেঙ ভানাগানত্তুন্ রেহাই পেইনে ফরৌনে আরঅ তা মনান্ দর-মর গুরিনে মোশি আর হারোণ কধা কান ন-পাদিলো। লগেপ্রভু যিয়েনি কোইয়্যে সিয়েনই অলঅ।
মিসর দেজ উগুরে তিন্ লম্বর আঘাত-মশার তামাজা
16সেক্কে লগেপ্রভু মোশিরে কলঅ, “হারোণরে তা লুদিক্কো তুলিনে মাদিত্ ধূল্যে উগুরে আঘাত্ গুরিবাত্তে কঅ। সেক্কে সে ধূল্যেগানি মশা ওইনে গোদা মিসর্ দেজ্ছানত্ ছিদি পড়িবাক্।”
17হারোণ আর মোশি সিয়েন গুরিলাক্। হারোণে তা আঢ্তান্ বাবেইনে লুদিক্কোলোই মাদিত্ ধূল্যেগান উগুরে আঘাত্ গুরিলো আর সেক্কে মানুচ্ আর য়েমানুনো ইধু মশা-ভানাগান দেগা গেলঅ। মিসর্ দেজর্ বেক্ ধূল্যেগানি মশা ওই গেলঅ। 18যাদু গুরিয়্যেগুনে তারার্ যাদুমন্ত্রলোই মশা আনিবার্ চেরেস্তা গুরিলাক্ মাত্তর্ ন-পারিলাক্। মানুচ্ আর য়েমানুনো উগুরে মশা পড়া ধুরিলাক্। 19এ অবস্থা দেগিনে যাদুগুরিয়্যেগুনে ফরৌণরে কলাক্, “ইয়েনত্ গোজেন আঙুলো দাগ্ আঘে।” মাত্তর্ তো ফরৌণ মনান্ দর-মর ওই রলঅ; তে মোশি আর হারোণ কধা ন-শুনিলো। লগেপ্রভু যিয়েনি কোইয়্যে সিয়েনই অলঅ।
মিসর দেজ্ছান উগুরে চের্ লম্বর আঘাত-পুগোর্ তামাজা
20পরেদি লগেপ্রভু মোশিরে কলঅ, “তুই বেন্যেপোত্যে উদিবে আর ফরৌণে যেক্কে বারেদি গাঙ্ পার ঘাদত্ যেবঅ সেক্কে তুই তা মুজুঙোত্ যেইনে থিয়্যেবে। তারে কবে, লগেপ্রভু কত্তে, ‘মর্ উবোসনা গুরিবেত্যে মঅ মানুচ্চুনোরে যেবাত্তে দে। 21যুদি যেবাত্তে-দুয়োচ্ সালে মুই তঅ উগুরে, তমা বেক্ কাম্গুরিয়্যেগুনো উগুরে, তমা মানুচ্চুনো উগুরে আর তমা ঘরত্ পাল্ পাল্ পুক্ পাদাঙর্। মিসরীয়গুনোর্ ঘরত আর বেক্ জাগানিত্ নানান বাবোত্যে পুগে ভুরি যেবাক্। 22মাত্তর্ সেদিন্যে গোশন চাগালাগান্ মুই বাদ দিম, কিত্তে মঅ মানুচ্চুনে সিধু বজত্তি গত্তন্। সিদু কনঅ পুগোর্ তোষ্যে ন-থেবঅ। সিয়েনত্তুন্ তুমি জানি পারিবাদে, মুয়ই লগেপ্রভু এ দেজত্ আগং। 23মঅ মানুচ্চুনোরে মুই রেহাই দিম, তঅ মানেইয়ুনোরে নয়। এজেত্যে কেল্যে এ আমক্ অবার বেপারান্ দেগা যেবঅ।’ ”
24লগেপ্রভু সিয়েনই গুরিলো। ফরৌণ রাজঘরত্ আর তা কাম্গুরিয়্যেগুনো ঘরত্ পাল্ পাল্ পুক্ সমিলাক্। এ পুগ্কুনোর্ তোষ্যেই গোদা মিসর্ দেজচান্ শেজ্ অবার পদথ্।
25সেক্কে ফরৌণে মোশি আর হারোণরে ডাগি আনিনে কলঅ, “তুমি এ দেজ ভিদিরে কনঅ এক্কান জাগাত্ যেইনে তমা গোজেন নাঙে য়েমান্ উৎসর্ব গরঅ।”
26মোশি কলঅ, “মাত্তর্ ইয়েন গরানা কি ঠিগ্ অবঅ? আমার গোজেন লগেপ্রভুর্ নাঙে আমি যিয়েনি উৎসর্ব গুরিবোং সিয়েনি মিসরীয়গুনো ইধু ঈচ্ গরেদে জিনিচ্। মিসরীয়গুনে যিয়েনি ঈচ্ গরন্ সিয়েনি যদি আমি তারা চোগো মুজুঙোত্ উৎসর্ব গুরিই সালে তারা কি আমারে পাত্তর্ ন-মারিবাক্? 27সেনত্যে আমা গোজেন লগেপ্রভুর উগুম মজিম ধূল্যেচর-চাগালা ভিদিরে তিন দিনো পথ যেইনে তা নাঙে আমাত্তুন্ য়েমান্ উৎসর্ব গরা পুরিবো।”
28ফরৌণে কলঅ, “তমা গোজেন লগেপ্রভুর্ নাঙে য়েমান্ উৎসর্ব গুরিবাত্তে মুই ধূল্যেচর-চাগালাত্ তমারে যেবাত্তে দিম্। মাত্তর্ তুমি বেশ্ দূরোত্ ন-যেবা। এবেরা তুমি মত্তে কোজোলী গরঅ।”
29মোশি কলঅ, “মুই তত্তুন্ যেইনে লগেপ্রভু ইধু কোজোলী গুরিম যেনে কেল্যে মহারাজ আর তা কাম্গুরিয়্যেগুন্ আর তা মানুচ্চুনো উগুরেত্তুন্ এ পুগোর্ তোষ্যেগানি উদি যাই। মাত্তর্ লগেপ্রভুর নাঙে য়েমান্ উৎসর্ব গুরিবাত্তে যেবাত্তে ন-দিইনে মহারাজে যেনে আমারে আরঅ ন-থগায়্।”
30ইয়েন পরেদি মোশি ফরৌণ ইত্তুন্ যেইনে লগেপ্রভু ইধু কোজোলী গুরিলো, 31লগেপ্রভুয়ো মোশির কধামজিম কাম্ গুরিলো। তে ফরৌণ আর তা কাম্গুরিয়্যেগুন্ আহ্ তা মানুচ্চুনো উগুরেত্তুন্ পুগোর্ তোষ্যেগানি সোরেই নিলো। এক্কো পুগ্অ আর ন-থেলাক্। 32মাত্তর্ এবেরায়ো ফরৌণে তা মনান্ দর-মর গুরিলো আর মানুচ্চুনোরে যেবাত্তে ন-দিলো।
Currently Selected:
যাত্রা 8: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
