পত্থম 20
20
অব্রাহাম আর রাজা অবীমেলক
1পরেদি অব্রাহামে মম্রিত্তুন্ নেগেভ নাঙে দোগিণে ধূল্যেচর-চাগালা মোক্ক্যেন্দি গেলঅ। সিয়েনত্ তে কাদেশ শঅর আর শূরর সংমোধ্যে এক্কান জাগাত্ বজত্তি গরা ধুরিলো। সিয়েনত্তুন্ তে কয়েক দিনোত্তে গরার শঅরত্ যেইনে থেলঅ। 2সিদু তে তার্ মোক্ সারারে আরঅ নিজোর্ বোন বিলিনে চিনেই দিলো। সেনত্তে সিদুগোর রাজাবো অবীমেলকে মানুচ্ পাদেইনে সারারে তাইধু নেযেল। 3মাত্তর্ রেদোত্ গোজেনে অবীমেলকরে স্ববনত্ দেগা দিইনে কলঅ, “যে মিলেবোরে তুই আন্ন্যস্, তার নেক্ আঘে। তারে আনানার্ কারনে তুই মরণান ডাগি আন্ন্যচ্।”
4মাত্তর্ অবীমেলকে সেক্কেয়ো সারা ইধু ন-যায়; সেনত্তে জোবত্ তে কলঅ, “প্রভু, দুযি ন-অলেয়ো কি এক্কো জাদরে তুই ভস্ত গুরি ফেলেবে? 5সে মানুচ্চো দঅ নিজেই মরে কোইয়্যে, সিবে তার বোন, আর সে মিলেবোয়ো কলঅ, সিবে তার্ ভেই। মুই সরল মনে এ কামান গোজ্যং; সিয়েনবাদে বারেন্দিয়ো মঅ বেবহার ভিদিরে কনঅ দুজ্ ন-এলঅ।”
6গোজেনে স্ববনত্ তারে কলঅ, “অয়, মুই হবর্ পাং তুই সরল মনে এ কামান গোজ্যস্। মুই তরে সেনত্তে তা কিয়্যেনত্ বাঁজিবাত্তে ন-দুয়োং আর মঅ বিরুদ্ধে পাপ কামত্তুন্ তরে দোঙেই রাগেয়োং। 7ইক্কিনে তুই তারে তা নেক্কো ইধু ফিরেই দে। মানুচ্চো এক্কো ভাববাদী। তে তত্তেই তবনা গুরিবো, আর সেক্কে তঅ পরাণান্ রোক্ষ্যে পেবঅ। মাত্তর্ যুদি তারে ফিরেই ন-দুয়োচ্, সালে মনত্ রাগেচ্, তুই আর তঅ মানুচ্চুনে মরন আঢত্তুন্ রেহাই ন-পেবাক্।”
8সেক্কে অবীমেলকে বেন্যেপোত্যে উদিনে তা অধীনোত্ যিগুনে কাম গরন্ তারারে বেক্কুনোরে ডাগিনে বেক্কানি জানেল। এ কধানি শুনিনে তা মানুচ্চুনে অমকদ দোরেলাক্। 9সেক্কে অবীমেলকে অব্রাহামরে ডাগিনে কলঅ, তুই আমা লগে ইয়েন্ কেধোক্ক্যেন বেবহার গুরিলে? মুই তইধু কি দুজ্ গোজ্যং, তুই মরে আর মঅ রেজ্যগানরে এদক্ পাপত্ ফেলেয়োচ্? এধোক্ক্যেন বেবহার গরানা তর্ উচিত্ ন এলঅ। 10অবীমেলকে আরঅ কলঅ, “তুই কি মনে গুরিনে এ কামান্ গুরিলে?”
11জোবত্ অব্রাহামে কলঅ, “মুই ভাবি চেয়োং, এ জাগানর্ মানুচ্চুনোর গোজেন-দর্ বিলিনে কনঅ কিচ্ছু নেই। সেনত্তে মঅ মোক্কোরে পেবাত্তে তারা অয়্ত মরে মারে ফেলেবাক্। 12সিয়েন্ বাদেয়ো তে মর্ বোনঅ অয়্, মাত্তর্ মা যুদো অলেয়ো আমি দ্বিজনে এক্কো বাবঅ ঝি-পুয়ো, যুদিয়ো ইক্কিনে তে মর্ মোক্। 13গোজেনে যেক্কে মরে মঅ বাবঅ ঘরত্তুন্ নিগিলে আনিলো সেক্কে মুই মঅ মোক্কোরে কোইয়োং, তুই যে মরে কোচ্পাজ্ সিয়েন এবাবোত্যেগুরি দেগেচ্। আমি যিয়েনত্ যেদং চাত্, তুই মরে তঅ ভেই বিলিনে চিনেই দিজ্।”
14ইয়েন পরেদি অবীমেলকে কয়েক্কো ভেড়া, গোরু আর চাগর-চাগরানী অব্রাহামরে দিলো, আর সে লগে তা মোক্ সারারেয়ো তাইধু ফিরেই দিলো। 15পরেদি তে অব্রাহামরে কলঅ, “চাহ্, মর্ পুরো দেজ্ছান দঅ তঅ মুজুঙোত্ আঘে। তর্ যিয়েনত্ হুজি সিয়েনত্ তুই বজত্তি গুরিচ্।”
16সে পরেদি তে সারারে কলঅ, “চাহ্, মুই তঅ উগুরে যে অন্যেয় গোজ্যং সিয়েন্ তর্ মানুচ্চুনো ইধু যেনে গুমোর্ থায় সেনত্তে তঅ ভেইবোরে এক আজার্ রুবো কত্তা দোঙর্। ইয়েন্দোই বেক্কুনো মুজুঙোত্ ফগদাঙ্ অবদে, তুই কনঅ দুজ্ ন-গরচ্।”
17ইয়েন পরেদি অব্রাহামে গোজেন ইধু তবনা গুরিলো। সেক্কে গোজেনে অবীমেলকরে, তা মোক্ আর তার অন্য মিলেগুনোরে গম্ গুরিলো। সেক্কে তারা পুয়ো-ছা পেবার্ খেমতাগান্ ফিরি পেলাক্। 18অব্রাহাম মোক্ সারাত্তে লগেপ্রভু অবীমেলক ঘরর্ বেক্ মিলেগুনোরে পুয়ো-পুদেবার খেমতাগান্ এক্কুবারে বন্দ গুরি দিলো।
Currently Selected:
পত্থম 20: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
