পত্থম 33
33
এষৌ আর যাকোবর্ মিলেমিলি অনা
1পধেদি যাদে যাদে যাকোবে দেগিলোদে, এষৌ চের্শঅ মানুচ্ লগে গুরিনে তা মুজুঙেদি উজেই এজের্। তে সেক্কে লেয়া, রাহেল আর সে দ্বিবে চাগরানীরে পুয়ো-ছাগুন ভাগ গুরি দিলো। 2চাগরানী আর তারা পুয়োছাগুনোরে তে লুগেই রাগেল। সে পরেদি লুগেই রাগেল লেয়া আর তা পুয়ো-ছাগুন আর শেজদি রাগেল রাহেল আর যোষেফরে। 3মাত্তর্ তে নিজে তারা আগে আগে গেলঅ। যাদে যাদে তে মাদিত্ মাদা নিগিরিনে সাতবার ভেইবোরে জু জু জানেল আর এবাবোত্যে গুরি তাইধু যেইনে লুমিলোগোই। 4সেক্কে এষৌ তাইধু ধাবা এইনে তারে আজাবোদে ধুরি তা কানাত্ মাদাবো রাগেল আর তারে সুমিলো। সে পরেদি তারা দ্বিজনে কানাকুদি গরা ধুরিলাক। 5পরেদি এষৌ মুয়োন্ তুলিনে সে বেক্ মিলেগুন্ আর পুয়ো-ঝিগুনোরে দেগিনে পুযোর্ গুরিলো, “তঅ লগে ইগুন্ কন্না?”
যাকোবে কলঅ, “গোজেনে দোয়্যে গুরি তঅ চাগর্বোরে এ পুয়ো-ঝিগুন দিলো।”
6পত্তমে চাগরানীগুনে তারা পুয়ো-ছাগুন্দোই মুজুঙেদি উজেই যেইনে এষৌরে জু জু জানেলাক্। 7সে পরেদি লেয়া তা পুয়ো-ছাগুনোরে নিইনে উজেই যেইনে তারে জু জু জানেলাক্। যেরেদি রাহেলে আর যোষেফে মুজুঙেদি যেইনে তারে জু জু জানেলাক্। 8সেক্কে এষৌ কলঅ, “যে দলবলুনো লগে পদথ্ মর্ দেগা অলঅ সিগুন্ কিত্তে?”
যাকোবে কলঅ, “সিগুন মঅ গিরোজ্সো ইত্তুন দোয়্যে পেবাত্তে।”
9মাত্তর্ এষৌ কলঅ, “ভেই, মর্ যদেষ্ট আঘে। তর্ যিয়েনি আঘে সিয়েনি তর থোক্।”
10যাকোবে কলঅ, “না, না, মুই তরে কোজোলী গুরি কঙর্, যুদি মঅ উগুরে তর্ দোয়্যে থায়্ সালে মর্ দিয়্যে এ বক্শিজ্চান তুই লঅ। যেক্কে তুই আমারে হুজি মনে মানি লোইয়োচ্ সেক্কে মঅ মুজুঙোত্ তর্ মুয়োন্ দেগানা গোজেন মুয়োন দেগানা ধোক্ক্যেন। 11গোজেনে মঅ উগুরে দোয়্যে গোজ্যে, আর মর্ যদেষ্ট আঘে। সেনত্তেই এ যে বক্শিজ্চান তইধু আনা ওইয়্যে সিয়েন্ তুই মানি লঅ।” যাকোবে এবাবোত্যেগুরি বোউত্ কোজোলী গরানার্ পর্ এষৌ সিয়েন্ মানি-ললঅ।
12পরেদি এষৌ কলঅ, “আদিচ্, এবেরা আমি যেই। মুই তঅ লগে লগে যেম্।”
13যাকোবে তারে কলঅ, “মাত্তর্ প্রভু, তুই দঅ হবর্ পাজ্, এ বেক্ পুয়ো-ঝিগুনোর বয়জ বেজ্ ন-অয়। সিয়েনবাদে যিদুক্কুন গোরু আর ভেড়া তারা ছঅগুনোরে দুধ দেদন্ তারা কধায়ো মত্তুন্ ভাবা পুড়িবো। যুদি একদিনঅ ইগুনোরে তড়াতাঙজ্যা গুরি নেযা অয়্ সালে বেক্কুনে মুরি যেবাক্। 14না প্রভু, তাত্তুন্ বরং তুই মঅ আগে আগে যাহ্। সেয়ীরত্ তঅ ইধু যেইনে ন-লুমোনা সং মুজুঙো য়েমান ঝাক্ আর পুয়ো-ছাগুনোরে আদিবার্ খেমতাগান বুঝিনে মত্তুন লারে লারে যাহ্ পুড়িবো।”
15সেক্কে এষৌ কলঅ, “সালে মঅ সমারে থেইয়্যে কয়েক্কো মান্জোরে মুই তঅ ইধু ফেলে যাং।”
যাকোবে কলঅ, “সিয়েনর কি দরকার? মঅ গিরোজত্তুন্ মুই যে দোয়্যে পেয়োং সিয়েনোই যদেষ্ট।”
16সেনত্তে এষৌ সেদিন্যে সেয়ীর মোক্ক্যে যাহ্ ধুরিলো, 17পরেদি যাকোবে যাহ্ ধুরিনে সুক্কোদত্ যেইনে লুমিলেগোই। তে নিজোত্তে সিয়েনত্ এক্কান্ ঘর্ বানেল আর তা য়েমানুনোত্তে কয়েক্কান্ আশ্রয়-ঘর্ বানেই দিলো। ইয়েনত্তে সে জাগাগান নাঙান ওয়্যেদে সুক্কোৎ (যিয়েনর্ ভেদ্তান “নাঢা মানজ্য-ঘর”)।
যাকোবর শিখিমোত্ বজত্তি গরানা
18-19পদ্দন-অরামত্তুন্ নিগিলি এজানার পরেদি যাকোবে গমেডালে কনান দেজ শিখিম শঅরত্ লুমিলোগোই। তে শঅর কায়-কুরে তাম্বুল তাঙেল আর সে ভুইয়ান্ পরেদি শিখিমো বাপ্পো হমোর পুয়োগুনোত্তুন্ একশঅ কট্টা রূবোলোই কিনি নিলো। 20সিয়েনত্ তে এক্কান ডালিঘর বানেইনে সিয়েন নাঙান দিলো এল্-ইলোহে-ইস্রায়েল (যিয়েনর্ ভেদ্তান “ইস্রায়েলর্ গোজেনে আজল্ গোজেন”)।
Currently Selected:
পত্থম 33: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
