পত্থম 35
35
যাকোবর বর্ পানা
1ইয়েন পরেদি গোজেনে যাকোবরে কলঅ, “তুই ইক্কিনে বৈথেলত্ যেইনে থাক্। তর্ ভেই এষৌ কায়-কুরেত্তুন্ ধেই যেবার অক্তত যে তঅ লগে দেগা দিয়্যে সে গোজেন নাঙে তুই সিয়েনত্ এক্কান্ ডালিঘর বানা।”
2সেক্কে যাকোবে তা নিজো মানুচ্চুনোরে আর সমারে অন্য মানুচ্চুনোরে কলঅ, “তমা ইধু যিদুক্কুন্ দেবেদামুত্তি আগন্ সিগুন্ ফেলে দুয়ো আর নিজোরে সিজি গরঅ আর তমা কাবড়-সুগোরানি বুদুলি ফেলঅ। 3যঅ, আমি বৈথেলত্ যেই। সিয়েনত্ মুই গোজেন নাঙে এক্কো ডালিপুজো বানেম্ যে মঅ দজাত্ সাহায্য গোজ্যে আর আমিঝে মঅ লগে লগে এলঅ।” 4সেক্কে তারা ইধু যিদুক্কুন্ দেবেদা মুত্তি এলাক্ সিগুন্ তারা যাকোব আঢত্ তুলি দিলাক্। সে লগে কান সনাগানিয়ো দিলাক্। যাকোবে সিয়েনি নিইনে শিখিম শঅর ইধু দাঙর্ গাজ তলে মাদিত্ গারে রাগেল।
5সে পরেদি তারা যাহ্ ধুরিলাক্। তারা যেবার্ পদথ্ গোজেনে চেরোকিত্তে শঅর মানুচ্চুনো ভিদিরে এক বাবোত্যে দর্ বুগ্ লাগেল যিয়েনত্তে যাকোব পিজেদি কনজনে আর্ ন-লোড়েলাক্। 6যাকোবে আর তা লগে অন্য বেক্কুনে কনান দেজর্ লূস শহরত্, অত্তাৎ বৈথলত্ যেইনে লুমিলাক্। 7সিদু তে এক্কো ডালিপুজো বানেল। তে সেই জাগায়ান নাঙান দিলো এল্-বৈথেল (যিয়নর্ ভেদ্তান্ “বৈথেলর গোজেন”), কিত্তে ভেইয়ুনো কায়-কুরেত্তুন্ ধেই এবার্ অত্তত্ গোজেনে সিধু তা মুজুঙোত্ নিজোরে ফগদাং গোজ্যে।
8এ ভিদিরে রিবিকা ওঝাবো দবোরা মুরি যেইয়্যে। তারে বৈথেল কায়কুরে এক্কো দাঙর্ গাজ তলে গোর্ দিয়্যে অলঅ। সেনত্তে সেই জাগায়ান নাঙান রাগা অলঅ অলোন্-বাখুৎ (যিয়েনর্ ভেদ্তান্ “কানেদে-গাজ”)।
9-10যাকোবে পদ্দন-অরামত্তুন্ এজানার্ পরেদি গোজেনে আরঅ তারে দেগা দিইনে বর্ দিইনে কলঅ, “তর্ নাঙান এলঅ যাকোব, মাত্তর্ তরে আর্ যাকোব বিলিনে ডাগা ন-অবঅ; তঅ নাঙান্ অবঅ ইস্রায়েল।” ইয়েন্ কোইনে তে তা নাঙান দিলো ইস্রায়েল।
11গোজেন তারে আরঅ কলঅ, “মুয়ই বেগত্তুন্ খেমতাবলা গোজেন। তুই ভালোক্কুন্ পুয়ো-ছার্ বাপ্ ওইনে জনেদি বাড়ি উদ্। তঅ ভিদিরেত্তুন্ এক্কো জাদ্ উদিবো, আর উদিবো এক্কো ভালোক্ গুট্টির্ জাদ্। তঅ বংশত্ ভালোক্কুন্ রাজার্ জর্ম অবঅ। 12যে দেজ্ছান্ মুই অব্রাহামরে আর ইস্হাকরে দুয়োং সে দেজ্ছান্ মুই তরে দিম। সে দেজ্ছান্ মুই তঅ পরেদি তঅ বংশর্ মানুচ্চুনোরে দিম্।”
13গোজেনে যে জাগানত্ যাকোব সমারে কধা কোইয়্যে পরেদি তে সিয়েনত্তুন্ উগুরেন্দি উদিলো। 14ঠিগ্ সে জাগানত্ যাকোবে এক্কো পাত্তর খুদো ধোক্ক্যেন অজল্ গুরিলো আর সিবে উগুরে তে পানীয়-উৎসর্ব গুরিলো। সিবে উগুরে তে তেলঅ ঢালি দিলো। 15গোজেনে যিয়েনত্ তা লগে কধা কোইয়্যে যাকোবে সে জাগান নাঙান রাগেল বৈথেল।
রাহেলর মরানা
16সে পরেদি যাকোবে আর তা পরিবারবো বৈথেলত্তুন যাহ্ ধুরিলাক্। তারা ইফ্রাথ পদ্তানথ্ এক্কেনা দূরোত্ যেইনে রাহেল পুয়ো ফুদেবাত্তে পিড়ে আরাম্ভ অলঅ আর তার্ অমকদ চিগুত্ চাগাত গরা ধুরিলো। 17ফুদেবার্ অক্তত্ তা পিড়েগান যেক্কে অমকদ বাড়িলো সেক্কে ওঝাবো তারে কলঅ, “নঅ দোরেচ্, এবেরায়ো তর্ এক্কো মরদ পুয়ো অবঅ।”
18মাত্তর্ রাহেলে মুরি গেলঅ। মুরি যেবার অক্তত্ তে পুয়োবো নাঙান রাগেল বিনোনী (যিয়েনর্ ভেদ্তান্ “মঅ দুঘোর্ পুয়ো”)। মাত্তর্ তা বাপে তা নাঙান্ রাগেল বিন্যামীন (যিয়েনর্ ভেদ্তান্ ভাগ্যত্তে পুয়ো)। 19রাহেলে মুরি যানার পরেদি ইফ্রাথত্, অত্তাৎ বৈৎলেহমত্ যেবার পদথ্ তারে গোর্ দিয়্যে অলঅ। 20যাকোবে তা গোরান উগুরে খুদো ধোক্ক্যেন গুরি এক্কান পাত্তর্ গারে রাগেল। সিয়েন্ এজঅ রাহেল গারানার্ চিহ্নো ইজেবে সিয়েনত্ আঘে।
21ইয়েন পরেদি ইস্রায়েল, অত্তাৎ যাকোবে আরঅ যাহ্ ধুরিলো। তে মিগ্দল-এদর নাঙে জাগায়ান পিজেদি ফেলে এইনে তা তাম্বুলান তাঙেল। 22ইস্রায়েলে যেক্কে সে চাগালাত্ বজত্তি গরের্ সেক্কে রূবেণে তা বাপ আর এক্কো মোক্ বিল্হার সমারে ভান্ন্যেই কাম্ গুরিলো। কধাগান্ ইস্রায়েল কানত্ গেলঅ।
যাকোব পুয়োগুন
যাকোবর বারজন পুয়ো এলাক। 23লেয়ার পেদত্ যাকোবর পত্তম পুয়ো রূবেণর জর্ম ওইয়্যে। সে পরেদি জর্ম ওইয়্যে শিমিয়োন, লেবি, যিহূদা, ইষাখর আর সবূলূন। 24রাহেল পেদত্ জোর্মেল যোষেফ আর বিন্যামীনে। 25রাহেল চাগরানী বিল্হার পেদত্ জোর্মেল দান আর নপ্তালি। 26লেয়ার চাগরানী সিল্পার পেদত্ জোর্মেয়্যে গাদ আর আশের। পদ্দন-অরামত্ যাকোবে এ বেক্ পুয়োগুনোর্ জর্ম ওইয়্যে।
27যেরেদি যাকোবে কিরিয়ৎ-অর্বর, অত্তাৎ হিব্রোণ ইধু মম্রি শহরত্ তা বাপ্পো ইস্হাক ইধু এলঅ। এ চাগালাত্ অব্রাহাম আর ইস্হাকে বজত্তি গুরিদাক্। 28ইস্হাকে একশঅ আশি বজর্ বাঁজি এলঅ। 29এক্কান্ পরিপূরোন জিংকানি কাদেইনে তে বুড়ো বয়জত্ মুরি যেইনে তা আগ মানুচ্চুনো ইধু গেলগোই। তার পুয়ো এষৌ আর যাকোবে তারে গোর্ দিলাক্।
Currently Selected:
পত্থম 35: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
