পত্থম 41
41
ফরৌণ স্ববনর্ অত্তগান্
1এ ঘটনাগানর্ পুরো দ্বিবজর পরেদি ফরৌণে এক্কান্ স্ববন্ দেগিলো। তে দেগিলোদে, তে য়েল্ রঙ গাঙ পারত্ ঠিয়েই আঘে, 2আর আমক্ অবার্ ইয়েন, সেক্কে গাঙত্তুন্ সাত্তো দোল্, তেল্ তেল্যে গোরু উদি এইনে নল খাগড়া ঝারত্ চড়া ধুরিলাক্। 3এ গোরুগুনো পরেদি সে গাঙানত্তুন্ আরঅ সাত্তো গোরু উদি এলাক্। সিগুন্ এলাক্ দোল্নেয়্যে আর পিড়ে দোজ্যে। সিগুনে এইনে গাঙঅ পারত্ অন্য গোরুগুনো কায়-কুরে ঠিয়েলাক্। 4সে পরেদি উই দোল্নেয়্যে, পিড়েধোজ্যে গোরুগুনে সেই দোল্ তেল তেল্যে সাত্তো গোরুরে হেই ফেলেলাক্। ইয়েন পরেদি ফরৌণ ঘুমান ভাঙিলো।
5পরেদি তে আরঅ ঘুমোত্ পুড়িলো আর দ্বিপল্লা স্ববন্ দেগিলো। তে দেগিলো এক্কো গম গাজ আগাত্ সাত্তো পক্তা আর তাজা শীজে নিগিলিলাক্। 6সে পরেদি নিগিলিলাক্ আরঅ সাত্তো চবা শিজে। ইগুন্ পূগে বোইয়্যেরর্ গরমে শুগেই যেইয়োন। 7সে চ'বা শীজেগুনে উই সাত্তো পক্তা আর দাঙর্ শীজেগুনোরে গিলি ফেলেলাক্। সে পরেদি ফরৌণ ঘুমান ভাঙিলো। তে বুঝি পারিলোদে, তে যিয়েন্ দেক্ক্যে সিয়েন্ বানা স্ববন্।
8মাত্তর্ বেন্যে মাদান্ তা মনান কেন্জান্ চুলুবুল্যে ওই উদিলো। তে মানুচ্ পাদেইনে মিসর দেজ বেক্ যাদুগরুনোরে আর গোণোক্ক্যে গুনোরে ডাগি আনিলো। তে স্ববনত্ যিয়েন্ দেক্কে সিয়েন্ তারা ইধু কলঅ, মাত্তর্ কনজনে সিয়েন অত্তগান কোই দি ন-পারিলাক্। 9সেক্কে ফরৌণর্ পানীয় ভাগগুরি দিয়্যেগুনোর্ নেতাবো তারে কলঅ, “রাজা বাবু, এচ্চ্যে মর্ এক্কান্ দুষো কধা মর্ মনত্ পোজ্যে।” 10একবার রাজা বাবু তা ঘরর্ চাগর-চাগরানীগুনো উগুরে রাগ্ গোজ্যে। তে রোক্ষ্যেদলর্-নেতাবো ঘর জেল্খানাত্ রুটি বানেইয়্যে দল নেতাবো লগে মরেয়ো বন্দি গুরি রাগেয়্যে। 11সেক্কে এক রেদোত্ আমি দ্বিজনে এক্কানত্ ধরে স্ববন্ দেগিলোং। এক এক্কান্ স্ববনর্ এক্কান্ বিশেষ অত্ত এলঅ। 12রোক্ষ্যেদল-নেতাবোর চাগর্ এক্কো ইব্রীয় গাবুজ্যে পুয়ো সিয়েনত্ এলঅ। আমি তারে আমা স্ববনর্ কধা কলং। সেক্কে তে আমা দ্বিজন স্ববনর্ অত্তগান্ আমারে কোই দিলো। 13তে আমা স্ববনর্ যে অত্তগান কোইদিয়্যে ঠিগ্ সেধোক্ক্যেন বেক্কানি ঘুদিলো। রাজা বাবু আরঅ মরে মঅ কামানত্ অদে অদে নেযেল মাত্তর্ রুটি বানেয়্যেবোরে গাজত্ টাঙেই রাগেল।
14সেক্কে ফরৌণ যোষেফরে ডাগি আনিবাত্তে মানুজ্ পাদেল, আর তারা যাদিগুরি জেলখানাত্তুন্ তারে নিগিলেই আনিলাক্। যোষেফে দাড়ি কাবিনে কাবড়-চুগোর্ বুদুলিনে ফরৌণ মুজুঙোত্ যেইনে আঝিল্ অলঅ। 15সেক্কে ফরৌণ যোষেফরে কলঅ, “মুই এক্কান্ স্ববন্ দেক্কোং, মাত্তর্ কনজনে সিয়েনর্ অত্তগান্ কোই ন পার্দন। মুই শুনিলুংগে, তঅ মুজুঙোত্ স্ববন ঘটনাগান্ কলে তুই সিয়েনর অত্তগান কোই দি পারস্।”
16জোবত্ যোষেফে ফরৌণরে কলঅ, “সে খেমতাগান মর্ নেই। মাত্তর্ গোজেনে রাজা বাবুর্ স্ববনর্ অত্তগান্ কোই দিইনে তা মনান্ শান্ত-গুরিবো।”
17সেক্কে ফরৌণে যোষেফরে কলঅ, “স্ববনত্ দেলুং, মুই য়েল্ গাঙ পারত্ ঠিয়েই আগং, 18আর আমক্ অবার্ ইয়েন্, গাঙ ভিদিরেত্তুন্ সাত্তো দোল, তেল্ তেল্যে গোরু উদি এইনে নলখাগাড়া ঝারত্ চড়া ধোজ্যন। 19ইয়েন পরেদি আরঅ সাত্তো গোরু উদি এলাক। সিগুন্ এলাক্ পিড়ে দোজ্যে, বেশ্রী আর দেক্কে মরা ধোক্ক্যেন। গোদা মিসর্ দেজত্ কনজাগাত্ এধোক্ক্যেন বেশ্রী গোরু কনদিন্ মঅ চোগেদি ন দেগং। 20পরেদি সে পিড়ে ধোজ্যে, বেশ্রী গোরুগুনে আগ সাত্তো পক্তা গোরুগুনরে হেই ফেলেলাক্, 21আজলে তারারে দেগিনে মনে ন-অলঅ, সে তেল্-তেল্যে গোরুগুন্ তারা হেই ফেলেয়োন, কিত্তে আগ ধোক্ক্যেন তারা চাদে বেশ্রী এলাক্। সে পরেদি মঅ ঘুমান ভাঙি গেলঅ। 22সিয়েন পরেদি মুই আরঅ স্ববন্ দেগিলুং। মুই দেগিলুং এক্কো গাজ আগাত্ সাত্তো দাঙর্ আর পক্তা গম শিজে নিগিলিলাক্। 23সে পরেদি সাত্তো শুগুনো, চ'বা শীজে নিগিলিলাক্। সিগুন্ পূগে বোইয়্যের গরমে শুগেই যেয়োন। 24এ সাত্তো চ'বা শীজে সেই পক্তা সাত্তো শীজেরে গিলি ফেলেলাক্। মুই এ বেক্ কধানি যাদুকরুনোরে কোইয়োং, মাত্তর্ কনজনে এ অত্তগান্ মরে বুঝেই দি ন-পারিলাক্।”
25সেক্কে যোষেফে ফরৌণরে কলঅ, রাজাবাবু এ দ্বিয়েন্ স্ববন আজলে এক্কুই। গোজেনে যিয়েন্ গুরিবাত্তে যার সিয়েন্ তে রাজাবাবু মুজুঙোত্ ফগদাং গোজ্যে। 26সাত্তো তেল্ তেল্যে গোরু অত্ত সাত বজর্ আর পক্তা সাত্তো গম শীজে অত্তয়ো সাত্ বজর। তর্ দ্বিয়েন্ স্ববন আজলে এক্কুই। 27পরেদি উদি এচ্চ্যে সাত্তো পিড়েধোজ্যে, বেশ্রী গোরু আর পূগে বোইয়্যের গরমে শুগেয়্যে চ'বা সাত্তো শীজে, এ দ্বিয়েনর্ অত্তগান অলঅ সাত্তো ভাদ-রাদ বজর। 28গোজেনে যিয়েন গুরিবাত্তে যার্ সিয়েন্ তে রাজা বাবুরে দেগেইয়্যে, আর সে কধাগান্ মুই রাজা বাবুরে কঙর্। 29গোদা মিসর্ দেজত্ এমন্ সাত্তো বজর এজের্ যেক্কে বোউত্ ফসল জোর্মেব, 30আর সে পরেদি এজের্ সাত্তো ভাদ-রাদ বজর। সেক্কে আগ ধোক্ক্যেন বোউত্ ফসল কধা মান্জো মনত্তুন্ উদি যেব, কিত্তে এ ভাদ-রাদ্তো দেজ্ছানরে শেজ্ গুরি দিবো। 31এ ভাদ-রাদ্তোত্তে দেজর্ গম দিনুনোর কধা মান্জো মনত্ ন-থেবঅ। এ ভাদ-রাদতো অবঅ দর্গরেপারা। 32এ স্ববনান্ রাজা বাবুরে দ্বিপল্লা দেগেয়্যে। ইয়েন অত্তগান অলঅ, গোজেনে এ পৌইদ্যেনে তা মনান্ ঠিগ্ গুরি ফেল্যে আর যাদিমাদি তে সিয়েন্ ঘোদেব।
33“সেনত্তে ইক্কিনে রাজা বাবু, এমন্ এক্কো মান্জোরে তোগেইনে নিগিলা যিবে জ্ঞানী আর বুদ্ধিবলা। তা উগুরে তুই মিসর দেজছান ভারান্ দে।” 34সিয়েনবাদে অন্য চাগরঅ তুই নেযা। দেজত্ উই সাত্ বজরে যেক্কে বোউত্ ফসল অবঅ, সেক্কে তারা সিয়েনির পাঁচ ভাগর্ একভাগ যুগেলেই থবাক্। 35সেই মানুচ্চুনে যেন উই বেক্ সুদিনোত্ উগুজ্যে শজ্য যুগুলেইনে রাজা বাবু উগুমে বেক্ শহরানিত্ আগামিদি হেবাত্তে থুবেই রাগান আর সিয়েনি রোক্ষ্যে গুরিবার্ বেবস্থা গরন। 36সাত বজর মিসর দেজত্ যে ভাদ- রাত্ অবঅ সেক্কেনে হানা ইজেবে যেন শজ্য জমা গুরি রাগা অয়, যেনে ভাদ-রাদত্ দেজ মানুচ্চুনে মুরি ন-যান।
মিসর শাজন্ গুরিয়্যে যোষেফ
37যোষেফ এ বেবস্থার্ কধাগান্ ফরৌণ আর তার বেক্ চাগরুনো মুজুঙোত্ গম্ বিলিনে মনে অলঅ। 38ফরৌণ তা চাগরুনোরে কলঅ, “এ মানুচ্চুনো ভিদিরে এমন্ কিজু আঘে যিয়েন্ এ পিত্থিমীত্ নেই। ইবে ধোক্ক্যেন আর কারে আমি তোগেই পেবং?”
39ইয়েন পরেদি ফরৌণে যোষেফরে কলঅ, “তঅ গোজেনে যেক্কে তঅ মুজুঙোত্ ইয়েনি ফগদাং গোজ্যে সেক্কে তঅ ধোক্ক্যেন জ্ঞানী আর বুদ্ধিবলা আর কন্না আঘে? 40সেনত্তে রাজঘরর্ বেক ভারান তত্তুন লঅ পড়িবো। তঅ মুয়োর্ উগুম্ মানিনে মর্ বেক্ মানুচ্চুনে চুলিবাক্। বানা রাজা ইজেবে মুই তঅ উগুরে থেম্।” 41ফরৌণে যোষেফরে আরঅ কলঅ, “মনত্ রাগেস্, মুই গোদা মিসর্ দেজ উগুরে তরে খেমতা দিলুং।”
42সে পরেদি ফরৌণে নিজো আদত্তুন্ সীলমর দিয়্যে আংদিক্কো খুলিনে যোষেফ আদত্ পিনেই দিলো। তে তারে দোল কাবর্ পিনে দিনেই তা গত্তনাত্ এক্কো সোনার নেগেলেস্ দিলো। 43ইয়েন পরেদি তে যোষেফরে তা রেজ্যর্ দ্বিলম্বর্ রথতানত্ বোজেল। রথ চুলিবার্ সময় যোষেফর্ আগে আগে জানেই দিয়া অলঅ, “আদুগুন্ পাদ্, আদুগুন্ পাদ্।” এবাবোত্যেগুরি ফরৌণে যোষেফ উগুরে বেক্ মিসর্ দেজছান ভারান দিলো।
44পরেদি তে যোষেফরে কলঅ, “যুদিয়ো মুই এজঅ সং রাজা আগং তো গোদা মিসর দেজ মানুচ্চুনে তঅ উগুমে উদোন-বজন্ গুরিবাক্।”
45ফরৌণে যোষেফর নূয়ো নাঙান দিলো সাফনৎ-পানেহ। ওন্ শঅর ধর্মগুরু পোটীফর ঝি আসনতর লগে তে যোষেফর জড়া বানি দিলো। সে পরেদি যোষেফে গোদা মিসর্ দেজ্ছান্ ঘুরি এবাত্তে নিগিলিলো।
46যোষেফে যেক্কে মিসর রাজা ফরৌণ কামত্ মিজেল সেক্কে তা বয়জ্ এলদে ত্রিশ বজর। তে ফরৌণ রাজ তেম্মাঙত্তুন্ নিগিলিনে মিসর দেজ বেক্ জাগানি ঘুরি এলগোই। 47খেতখেত্তিয়্যে সয়সাগজ্যে সেই সাত বজরত্ দেজত্ বোউত্ ফসল অলঅ। 48সেক্কে যোষেফে সেই সাত বজর ধুরিনে মিসরর বেক্ রেজ্যগানির শোজ্যগুন্ শঅর গোলাঘরানিত্ থুবেই রাগেল। তে বেক্ শঅরানিত্ তা চেরোকিত্তে খেত-খেত্তিগানিত্তুন্ ফসল আনিনে থুবেল। 49এবাবোত্যেগুরি তে সাগর ধূল্যেচর ধোক্ক্যেন বোউত্ শজ্য থুবেল। এদক্ বেশ্ শজ্য জমা ওইয়োন, সিগুন্ আর মাবা ন-গেলঅ। সেনত্যে তে সিগুন্ মাবানা মানা গুরি দিলো।
50ভাদ-রাদ আগেদি ওন্ শঅর ধর্মগুরু পোটীফরর ঝি আসনত পেদত্ যোষেফর দ্বিবে পুয়োর জর্ম অলাক্। 51যোষেফে তা দাঙর্ পুয়োবো নাঙান রাগেল মনঃশি (যিয়েনর্ ভেদ্তান্ “মনত্ ন থানা”)। তে কলঅ, “গোজেনে মর্ বেক্ দুঃখানি আর মর্ বাব ঘরর্ কধানি মঅ মনত্তুন্ তুলি ফেলেয়্যে।”
52সে পরেদি তে তার দ্বিলম্বর পুয়োবোর নাঙান্ রাগেল ইফ্রয়িম (যিয়েনর্ ভেদ্তান্ “ফলবান”)। তে কলঅ, “যে দেজত্ মুই দুঘ্ পেইয়োং সে দেজত্ গোজেনে মরে ফলবান গোজ্যে।”
53ইয়েন পরেদি মিসর দেজর সয়সাগজ্যে ফসলর সাত বজর শেজ্ ওই গেলঅ। 54সে পরেদি আরাম্ভ অল ভাদ-রাদর্ সাত বজর। যোষেফ কধা মজিম বেক্কানি অলঅ। কায়-কুরে দেজ্ছানিয়ো এ ভাদ-রাদত্তুন্ রেহাই ন-পেলঅ, মাত্তর্ গোদা মিসর দেজত্ কনঅ জাগাত্ হানার্ অভাব ন-এলঅ। 55পেত্ পরায়্ দুখ্ পেইনে মিসর দেজর মানুচ্চুনে যেক্কে ফরৌণ ইধু যেইনে হানা চেলাক্ সেক্কে ফরৌণে তারারে কলঅ, “তুমি যোষেফ ইধু যঅ । তে তমারে যিয়েন্ গুরিবাত্তে কয়্, তুমি সিয়েন গরঅ।”
56এ ভাদ-রাদ্তো দেজর্ চেরোকিত্যে ছিদি পড়িলো। মিসর দেজত্ ভাদ-রাদ্ যেক্কে দর্গরে পারা ওই উদিলো সেক্কে যোষেফে বেক্ গোলাঘরানি খুলি দিলো আর মিসরীয়গুনো ইধু শোজ্য বেজা ধুরিলো। 57অন্য দেজদঅ ভাদ-রাদ এদক্ বেশ্ ওই উদিলোদে, সিদুগোর্ মানুচ্চুনেয়ো যোষেফত্তুন্ শোজ্য কিনিবাত্তে মিসরত্ এজা ধুরিলাক্।
Currently Selected:
পত্থম 41: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
