পত্থম 50
50
যাকোবরে গোর্ দিবাত্যে যুক্কোল্ অনা
1সেক্কে যোষেফে তা বাবঅ মুয়ো উগুরে পড়িনে কানা ধুরিলো আর তারে চুমিলো। 2পরেদি তে তা তলেদি ডাক্তরুনোরে উগুম্ দিলো যেনে তারা তা বাবঅ কিয়্যেগান্ তুম্বাস্ মজলা দিইনে ঠিগ রাগেবার্ বেবস্থা গরন্। তারা সিয়েন গুরিলাক্। 3এধোক্ক্যেনগুরি তারার্ চোল্লিশ্ দিন গেলঅ। এ কামানত্ চোল্লিশ্ দিন লাগিদো। মিসরীয়গুনে ইস্রায়েলত্তে সত্তুর দিন সং আবিলেচ্-গুরিবার্ অনুষ্ঠান্ গুরিলাক্।
4এই আবিলেচ্-ফগদাঙর্ অক্তবো পার্ ওই যানার পরেদি যোষেফে ফরৌণ ঘরর্ কাম্গুরিয়েগুনোরে কলঅ, যুনি তুমি মঅ উগুরে হুজি থাগ সালে ফরৌণরে যেইনে মর্ এ কধাগান্ জানেয়ো, 5বাব্পো মুরি যেবার্ অক্তত্ মরে ইয়েন কোইনে শমক্ খাবেয়্যে, মুই যেন কনান দেজত্ তার্ ঠিগ্ গুরি রাগেয়্যে জাগানত্ তারে গোর্ দুয়োং। তারে এ কোজোলীগান গরঅ যেনে তে সেই কামানত্তে মরে যেবাত্তে দে। তারে কঅ কামানি থুম্ গুরিনে মুই আরঅ ফিরি এইম্।
6ইয়েন জোবত্ ফরৌণে কোই পাদেল, “তে তরে যে শমক্কান্ খাবেয়্যে সেবাবোত্যেগুরি তুই যেইনে তারে গোর্ দেগোই।”
7সেক্কে যোষেফে তা বাবরে গোর্ দিবাত্তে গেলঅ। ফরৌণর বেক্ কামগুরিয়েগুনে, অত্তাৎ তা ঘরর্ আর মিসর বেক্ মানি-সর্মানি মানুচ্চুনে যোষেফ লগে গেলাক্। 8ইয়েনবাদে যোষেফর নিজোর আর তা বাবর্ পরিবারর্ বেক্কুনে আর তা ভেইয়ুনেয়ো তা লগে গেলাক্। গোশনত্ তারার্ চিগোন্ পুয়ো-ছাগুনোরে আর তারার্ গোরু-ভেড়া ছাগল পালুন্ থোই গেলাক্। 9ভালোক্কানি রথ আর ঘোড়াবাহিনী লোইনে তারা এক্কো দাঙর্ দল ওইনে যোষেফ লগে গেলাক্।
10যর্দন গাঙ উই পারত্ আটদ খামার সং যেইনে যোষেফ সাত দিন সং তা বাব নাঙে আবিলেচ্-গুরিবার্ অনুষ্ঠান গুরিলো। মানুচ্চুনেয়ো গুজুরি গুজুরি কানা-ধুরিলাক্। 11আটদ গুনোর খামারত্ তারা এধোক্ক্যেনগুরি আবিলেচ্-গুরিবাত্তে দেগিনে সেই দেজ আদাম্মেগুনে, অত্তাৎ কনানীয়গুনে কলাক্, “মিসরীয়গুনোর্ ইবে এক্কো জদবদে আবিলেচ্-গুরিবার্ দিন।” সেনত্তে যর্দন গাঙ উই পারত্ এ জাগায়ান নাঙান্ দিয়া ওইয়্যে আবেল্-মিস্রয়ীম (যিয়েনর্ ভেদ্তান্ “মিসরীয়গুনোর আবিলেচ্-গরানা”)।
12ইস্রায়েল তা পুয়োগুনোরে যিয়েনি গুরিবাত্তে কোইয়্যে সিয়েনি তারা গুরিলাক্। 13তারা তা কিয়্যেগান্ কনান দেজত্ নেযেলাক্ আর মম্রি ইধু মক্পেলার্ ভূইয়ো গাত্তোত্ তারে গোর্ দিলাক্। গোর জাগা বানেবাত্তে ভুইয়ান্ সমুত্ত এ গাত্তো অব্রাহামে হিত্তীয় ইফ্রোণত্তুন্ কিনি নেযেল। 14বাব্পোরে গোর্ দেনার পরেদি যোষেফে, তা ভেইয়ুনে আর যিদুক্কুন্ মানুজ্ তা বাবরে গোর্ দিবাত্তে যেয়োন তারা বেক্কুনে মিসরত্ ফিরি গেলাক্।
যোষেফ ভেইয়ুনোরে বুঝেল
15বাপ্পো মুরি যেইয়্যে দেগিনে যোষেফ ভেইয়ুনে তারা নিজে কুয়ো-কি গত্তন্, “যোষেফ মনত্ যুনি আমা উগুরে হেনা উগুরেবার্ মন্ থায়, আর আমি তা উগুরে যে অন্যেয় গোজ্যেই যুনি তে হেনা উগুরোই, সেক্কে আমি কি গুরিবোং?”
16-17ইয়েন ভাবিনে তারা যোষেফরে কোই পাদেলাক্, “বাবা মুরি যেবার্ আগেদি তে আমারে এ কধাগান্ তরে কবাত্তে কোই যেইয়্যে, আমি তঅ উগুরে যে অন্যেয় গোজ্যেই তুই যেনে সেই অন্যেয় বেবহারানি আর পাপ্পানি মাপ্ গুরি দুয়োজ্। সেনত্তে আমার কোজোলী তুই তঅ বাব গোজেন চাগরুনোর ভান্ন্যেই বেবহারানি মাপ্ গর্।” তারা কধানি শুনিনে যোষেফে কানিলো। 18ইয়েন পরেদি তা ভেইয়ুনে তা মুজুঙোত্ এইনে মাঢা নিগিরিনে কলাক্, “আমি তঅ চাগর্।”
19মাত্তর্ যোষেফে তারারে কলঅ, “তুমি ন-দোরেয়ো। গোজেনর্ জাগানত্ ঠিয়েদুং মুই কন্না? 20তুমি মর্ অমংগল চেইয়ো, মাত্তর্ গোজেনে সিয়েনর্ ভিদিরেদি মংগল গুরিবার সল্লা গোজ্যে যেন ভালোক্কুন মান্জোর্ পরাণ রোক্ষ্যে পায়; আর এচ্চ্যে সিয়েনোই অর্। 21সেনত্তে তুমি ন-দোরেয়ো। মুই তমারে আর তমা পুয়ো-ঝিগুনোরে হাবানার্ বেবস্থা গুরি দিম্।” এ কধাগান কোইনে তে তারারে বুঝেল।
যোষেফর্ মুরি যানা
22যোষেফ আর তা বাব পরিবার মানুচ্চুনে মিসরত্ বজত্তি গরা ধুরিলাক্। যোষেফে একশঅ দশ্ বজর্ বাঁজি এলঅ। 23তে ইফ্রয়িম তিন গুট্টি সং চেই যেইয়্যে। ইয়েনবাদে মাখীরোর্ পুয়ো-ঝিগুনোরেয়ো জর্মর্ পরেদি যোষেফ ইধু রাগা ওইয়্যে। মাখীরে এলঅ মনঃশির্ পুয়ো।
24পরেদি এক সময়ত্ যোষেফে তা ভেইয়ুনোরে কলঅ, “মর্ মুরিবার্ অক্ত ওই এচ্চ্যে, মাত্তর্ ইয়েন্ ঘেচ্চেকগুরি, গোজেনে তমারে দেগাশুনো গুরিবো। তে অব্রাহাম, ইসহাক আর যাকোবরে যে দেজ্সান্ দিবো বিলি শমক্ গোজ্যে সে দেজ্সানত্ তে তমারে ইয়োত্তুন্ নেযেব।”
25সে পরেদি যোষেফে ইস্রায়েলীগুনোরে শমক্ খাবেইনে কলঅ, “গোজেনে হামাক্কায়্ তমারে দেগাশুনো গুরিবো। ইয়োত্তুন্ যাদে তুমি মঅ আরুন্ তুলি নেযেয়ো।” 26একশঅ দশ বজর্ বয়জত্ যোষেফে মুরি গেলঅ। সেক্কে তার্ কিয়্যেগান্ তুম্বাস্ মজলা দিইনে মরাকিয়্যেগান্ রাগেবার্ এক্কো বাক্সুত্ গুরি মিসরদই রাগা অলঅ।
Currently Selected:
পত্থম 50: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
