লূক 16
16
এক্কো অসৎ চাগর্
(মথি ৫:৩১,৩২; ১১:১২,১৩; মার্ক ১০:১১,১২)
1যীশু তা শিচ্চ্যগুনোরে কলঅ, কনঅ এক্কো থাগোইয়্যে মান্জ্যর আজল্ চাগর্বোরে ইয়েন কোইনে দুচ্ দিয়্যে অলঅ যে, তে তার গিরোজর্ ধন-সোম্বোত্তিগানি বর্বাদ্ গরের্। 2সেক্কে থাগোইয়্যে মানুচ্চো তারে ডাগিনে পুজোর্ গল্ল, তঅ পৌইদ্যেনে মুই ইয়েনি কি শুনঙর্? তঅ কামঅ ইজেব্পান দে, কিয়া তুই আর আজল্ চাগর্ ইজেবে থেই ন-পারিবে।
3সেক্কে সে চাগর্বো মনে মনে কলঅ, মুই ইক্কে কি গুরিম্? মঅ গিরোজ্সো দঅ মরে চাগরিত্তুন্ ধাবেই দের্। মাদি কাবিবার বল্ মত্তুন্ নেই, আরঅ ভিক্ষ্যে মাগিবার্-অ লাজ্ গরে। 4যিয়েন অবার্ ওক্, চাগরিত্তুন্ ধাবেই দেনার্ পর মান্জ্যে যেন মরে তারা ঘরত্ থেবাত্তে দুয়োন্ সেনত্তে মুই কি গুরিম্ সিয়েন মুই কোই পারং।
5ইয়েন কোইনে যিগুনে তা গিরোজত্তুন্ উদোর্ লোইয়োন সিগুনোরে পত্তিজনরে তে ডাগিলো। সে পরেদি তে পৌইল্যেবোরে পুযোর্ গল্ল, মঅ গিরোজ্সো ইধু তর্ উদোর্ কুদুক্কুন্? 6তে কলঅ, দ্বি আজার্ চেরশ লিটার তেল্। সেই চাগর্বো তারে কলঅ, যে কাগোজত্ তর্ উদোর কধা লেগা আঘে সিয়েন্ লঅ আর যাদিমাদি বৈইনে এক আজার্ দ্বিশঅ লেগ্। 7সেই চাগর্বো সে পরেদি আর একজনরে কলঅ, তর্ উদোর্ কুদুক্কুন্? তে কলঅ, আদার টন্ গম্। চাগর্বো কলঅ, তঅ কাগোজত্ সাড়ে চৌদ্দো টন্ লেগ্। 8সেই চাগর্বো অসৎ অলেয়ো বুদ্ধি গুরি কাম্ গুরিলো বিলি গিরোজে তারে নাঙ্ গিনিলো।
ইয়েন্দোই বুঝো যায় যে, এ জগদর্ মানুচ্চুনে নিজো ধোক্ক্যেন্ মানুচ্চুনো সমারে আচার-বেবহারে পঅর্ রেজ্যর্ মানুচ্চুনোত্তুন্-অ বেশ্ বুদ্ধিবলা। 9মুই তমারে কঙর্, এ ভান্ন্যেই জগদর্ ধন্দোই মানুচ্চুনো সমারে দাংগুত্ব গরঅ, যেন সেই ধনানি ফুরেই যানার্ পরেদি চিরকালত্যে থেবার্ জাগাত্ তমারে গুজি লুয়ো অয়।
10সামান্য পৌইদ্যেনে যে বিশ্বেজ্ গরে তে দাঙর্ পৌইদ্যেনেয়ো বিশ্বেজ্ গরে। সামান্য পৌইদ্যেনে যিবেরে বিশ্বেজ্ গরা ন-যায় তারে দাঙর্ পৌইদ্যেনেয়ো বিশ্বেজ্ গরা ন-যায়। 11এ জগদর্ ধন-সোম্বোত্তি পৌইদ্যেনে যুনি তমারে বিশ্বেজ্ গরা ন-যায় সালে কন্না তমারে বিশ্বেজ্ গুরিনে আজল্ ধন্ দিবো? 12অন্য মান্জ্যর অধিকার যিয়েন আঘে সিয়েন বেবহার গরানা পৌইদ্যেনে যুনি তমারে বিশ্বেজ্ গরা ন-যায়, সালে তমার্ নিজো অধিকারত্যে কেঅ কি তমারে কিজু দিবো?
13কনঅ চাগরে দ্বিজন্ গিরোজরে সেবা গুরি ন-পারে, কিয়া তে একজনরে ঘিনেব আর অন্যজনরে কোচ্পেব, নয়ত তে একজন উগুরে মনযোগ্ দিবো আর অন্যজনরে ঈচ্ গুরিবো। গোজেন আর ধন-সম্বোত্তি এ দ্বিয়েনর্ সেবা তুমি এক সমারে গুরি ন-পারঅ।
14এ বেক্ কধানি শুনিনে ফরীশীগুনে যীশুরে ঠাট্টা গরা ধল্ল্যাক্, কিয়া তারা টেঙা-পৌইজ্যে বেশ্ কোচ্পেদাক্। 15সেক্কে যীশু তারারে কলঅ, তুমি মান্জ্য মুজুঙোত্ নিজোরে ধার্মিক দেগেই থাগঅ, মাত্তর্ গোজেনে তমা মন কধা কোই পারে। মান্জ্যে যিয়েন সর্মানি মনে গরন্ গোজেন চোগোত্ সিয়েন ঘিনাইদ্যে জিনিস।
16মোশির আইন-কানুন্ আর ভাববাদীগুনোর্ লেখ্যে কধানি বাপ্তিষ্মদিয়্যে যোহন সং চুলিদো। সে পরেত্তুন্ ধুরি গোজেন রেজ্যর্ গম্ হবর্ ফগদাং গরা অর্ আর বেক্কুনে আয়োজি ওইনে জুরেসুরে সেই রেজ্যত্ সমদন্। 17মাত্তর্ রীদি-সুদোমর্ এক ফুদো বাদ্ পড়ানাত্তুন্ বরং আগাজ্ আর পিত্থিমীগান্ শেজ্ অনা সহজ।
18যে কনজনে নিজো মোক্কোরে ছাড়ি দিইনে আর অন্য মিলেরে লয় তে বেভিচের্ গরে। নেগে যিবেরে ছাড়ি দিয়্যে সেবাবোত্যে মিলেরে যে লয় তেয়ো বেভিচের্ গরে।
লাসার আর এক্কো তাগোয়্যে মানুচ্
19এক্কো থাগোইয়্যে মানুচ্ এলঅ। তে বিগুনী কাবর্ আর নানান্ বাবোত্যে মংগা মংগা কাবর্-চুগোর্ উরিদো। পত্তিদিন্ খুব দুমধাম্ গুরি ফুত্তি গুরিদো। 20সেই থাগোইয়্যে মানুচ্চোর্ দুয়োর ইধু লাসার নাঙে এক্কো ভিখারীরে প্রায় আনিনে থুয়ো অদঅ। লাসারর্ গোদা কিয়্যেনত্ ঘা এলঅ। 21সেই থাগোইয়্যে মানুচ্চোর টেবিলোত্তুন্ যে হানাগানি পত্ত সিয়েনি হেইনে তে পেট্ ভরেবার্ চেদঅ, আর কুগুরুনে তার ঘা গানি লিয়্যেই দিদাক্।
22“একদিন্ন্যে সেই ভিখারীবো মুরি গেলঅ। সেক্কে স্বর্গদূত্তুনে এইনে তারে অব্রাহাম ইধু নেযেলাক্। সে পরেদি একদিন্যে সেই থাগোইয়্যে মানুচ্চোয়ো মুরি গেলঅ আর তারে কবর্ দিয়্যে অলঅ। 23মরণ জাগাত্ অমকদ যন্ত্রণাত্ থেইনে তে উগুরেদি রিনি চেলঅ আর দূরোত্তুন্ অব্রাহাম আহ্ তা কুরে লাসাররে দেগিলো । 24সেক্কে তে রঅ ছাড়িনে কলঅ, বাবা অব্রাহাম, মরে দোয়্যে গর্। লাসাররে পাধেই দে যেন তে তা আঙুলো মাঢাগুন্ পানিত্ ভুরেইনে মঅ জিলান্ ঠান্ডা গরে। এই আগুনোত্ মুই অমকদ দুঘ্ পাঙর্।”
25মাত্তর্ অব্রাহামে কলঅ, ইদোত্ তুলি চাহ্, তুই যেক্কে বাঁজি এলে সেক্কে কদক্ সুগ্ ভোগ্ গোজ্যস্ আর লাসারে কদক্ দুঘ্ পেইয়্যে। মাত্তর্ ইক্কিনে তে ইধু সান্তনা পার্ আর তুই দুঘ্ পর্। 26ইয়েন বাদেয়ো তমার্ আর আমা ভিদিরে এমন্ এক্কান দাঙর্ ফারগ্ আঘে যেনে আওজ্ গুরিলেয়ো কেঅ ইয়োত্তুন পার্ ওইনে তমা সিধু যেই ন-পারে আর সিয়োত্তুন পার্ ওইনে আমা ইধু এই ন-পারে।
27সেক্কে সেই থাগোইয়্যে মানুচ্চো কলঅ, সালে বাবা, দোয়্যে গুরিনে লাসাররে মঅ বাব ঘরত্ পাধেই দে, 28যেন তে মর্ পাচ্চো ভেইয়োরে উজিয়ার্ গুরি পারে; সিয়েন্ ন-গল্ল্যে তারায়ো দঅ এ দুঘো জাগাত্ এবাক্।
29মাত্তর্ অব্রাহামে কলঅ, মোশি আর ভাববাদীগুনোর্ লেখ্যে বোই দঅ তারা ইধু আঘে। সিগুনে তারা কধাত্ মনযোগ্ দেদোক্।
30সেই থাগোইয়্যে মানুচ্চো কলঅ, না, না, বাবা অব্রাহাম, মরাগুনোত্তুন্ কেঅ তারা ইধু গেলে তারা পাপত্তুন্ মন্ ফিরেবাক্।
31“সেক্কে অব্রাহামে কলঅ, মোশি আর ভাববাদীগুনোর্ কধা যুনি তারা ন-শুনোন্ সালে মরাগুনোত্তুন্ কেঅ উদিলেয়ো তারা বিশ্বেজ্ ন-গুরিবাক্।”
Currently Selected:
লূক 16: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
