लुका 12
12
येशूये चेलाकोलाक चेटावनी याछ
(मत्ती १०:२६-२७)
1होला हील्की माय्होक्ङ वास्टै भर्मीको ढुसा-ढुस जाट्चै भेला छानन्या। होटै येशूये पहीला लहो चेलाकोलाक इट डेया, “नाखुरीक फरीसीकुङ कपटी ब्यहोरा लकीङ जोगोडीस्नी। होसे कपट चहीँ खमीर ल्याक्च न हो। 2हीजैडेनाङ माडाङ्ख्यो डेम हुप्च ही-ही ले, होसे पट्ट न डाङ्ले होटै आर्च्युक्च ही-ही ले, होसे पट्ट न थाहा डीन्ल्हे। 3इटजाट्न नाखुरीकै छुम्ठाङ ङाक्च कुराको ट्याङ्ठाङ सेले। इम भीत्री आर्च्युव्हार खास्याक-खुस्युक ङाक्च कुराको इमौ ढुरी लकीङ बाड्को सोरीङ च्याक्नाङ लेखा न पट्टकै सेले।”
परमेश्वर खाटा बीर्हीकी
(मत्ती १०:२८-३३; १२:३२)
4येशूये डेया, “ए ङौ लाफाको, ङा नाखुरीककी डेले, नाखुरीककी साट्की पाच खाटा माबीर्हीनी। होखुरीकै च जीउकी मट्टै साट्ले टर अरु हीर जाट्की माय्होक्ले। 5टर सु खाटा बीर्हीकी पर्ले ङा नाखुरीककी डेले, जीउकी साटार नरकाङ लोम्ह याछ शक्ति लेच खाटा बीर्हीखी पर्ले। हो होसको खाटा न बीर्हीनी। 6ही नीस पैसाङ बाङा भँगेरा माल्हुम्ले र? होसे मढ्याङ काट्की र परमेश्वरै माम्य्हाक्ले। 7टर नाखुरीकुङ च काटकाट मीछाम र हील्नने। होटबाटै माबीर्हीनी, नाखुरीक वास्टै भँगेरा डेनाङ परमेश्वरौ मीमीकाङ नाखुरीक झन मुल्यवान ले।
8“सेनी ङा नाखुरीककी डेले, सु-सुये भर्मीकुङ म्याहासाङ ङाकी मन्डीले, होसकी भर्मीयो मीजै र परमेश्वरौ दूतकुङ म्याहासाङ मन्डीले। 9टर सुये ङाकी भर्मीकुङ म्याहासाङ माचीन्डीले डेले, होसकी ङा र परमेश्वरौ दूतकुङ म्याहासाङ माचीन्डीया डेले। 10होटै ङा भर्मीयो मीजौ विरोधाङ ङाक्च कोलाक क्षमा छान्ले। टर पवित्र आत्मौ विरोधाङ ङाक्च कोलाक क्षमा माछान्ले।
11“नाखुरीककी भर्मीकै घोवार यहूदिकुङ सभा ङुच इम-इमाङ, हाकीम र शासन जाट्चकुङ म्याहासाङ आल्ल्हे। होडीक बेला नाखुरीकै कुटजाट्न जबाफ याखी र ही डेकी पर्ले डेम चीन्टा माजाट्नी। 12हीजैडेनाङ नाखुरीकै ही डेकी पर्च हो, होडीक न बेला पवित्र आत्मै पाहाक्ले।”
येशूये भर्मीकोलाक लोभी माछान्की डेम चेटावनी याछ
13होटै काट जना भर्मीये होसे भीड लकीङ येशूकी डेया, “गुरुज्यु, ङौ भाग सम्पत्ति अङ्सबन्डा जाट्न याखी डेम ङौ डाजेकी डेम यान्ही।” 14टर होसकै डेया, “ए लाफा नाखुरीक डाजे भायो अङ्सबन्डा जाट्न याखी डेम ङाकी सुये लैडीया?” 15होटै न्हुइङ होला लेच भर्मीकोलाक होसकै डेया, “होस जाट्नी! पट्ट खाल्या लोभ जाट्की लकीङ जोगडीस्नी। हीजैडेनाङ धन सम्पत्ति कुडीक न वास्टै लेनाङ र होचे भर्मीकी जीवन चहीँ मायाल्हे।”
16होखुरीककी येशूये काट उदाहरण सेटाक्चै डेया, “काट धनी भर्मीयो य्हाङ साफ्फी अन्नको स्या। 17होटै होचे मीमनाङ डेया, ‘ङौ अन्न डाच ठाउँ र माओल्हा, अब ङा ही जाटीङ?’ 18होचे आर्मीटा ङा इट जाट्ले, इसे मा-मार्जा ढुकुटी कोलाक भट्कडीयार झन बा-बाड्को खास्ले। होटै ङौ पट्ट न अन्न र माल मट्टाको होला डाले।” 19ङा ङाल्हौ प्राणकी डेले, “नाङ्की वास्टै वर्षकी ओल्छ सम्पत्ति ठुपारीस्नने। सुख खाटा ज्यौ, गौ होटै मार्हाङो।”
20टर परमेश्वरै होसकी डेया, “ए मुर्ख भर्मी, छीनीङ नाबीक न नुओ प्राण व्हाले। होटै नीये लाहाकी डेम ही-ही ठोकको ठुपारीमे होसे सुओ छान्ले?” 21इसे कुरा डेम भ्याच न्हुइङ येशूये डेया, “लहो लागी धन सम्पत्ति भेला जाट्च, टर परमेश्वरौ नजराङ धनी माछान्च भर्मीकोलाक याङ्च न छान्ले।”
सुर्टा माजाट्की
(मत्ती ६:२५-३४)
22होटै न्हुइङ येशूये चेलाकोलाक इट डेया, “इटबाटै ङा नाखुरीककी डेले, जीवाकी मट्टै डेम ही जीङ, ही बील्हीङ डेम सुर्टा मालानी। 23हीजैडेनाङ प्राण ज्याच ठोक डेनाङ र जीउ बढीन डेनाङ बाड्को हो। 24काग कोलाक ङोस्नी! होखुरीकै माभेरेट्ले र अन्न र माबटलीले। होखुरीकुङ ढुकुटी र माले। होट छान्नाङ र परमेश्वरै होखुरीककी कास्नने। नाखुरीक च ग्वाजाको डेनाङ वास्टै मुल्यौ ले। 25नाखुरीक मढ्याङ सुये सुर्टा जाटार लहो आयुकी इठर्जा र ठप्डीकी य्होक्ले र? 26होटबाटै नाखुरीक इडीक मार्जा काम ढरी जाट्की माय्होक्ले डेनाङ, अरु कुरौ सुर्टा हीजै जाट्ले? 27जङ्गलाङ वाट्च सारकी ङोस्नी, होखुरीकै काम र माजाट्ले। होटै बढीन बील्खी बढीनको र माडाक्ले। टर ङा नाखुरीककी डेले, सोलोमन राजा लहो पट्ट इजट र धन सम्पत्ति लेनाङ र आसको सारको लेखा मासीङ्गारीस्नन्या। 28टर छीनीङ वाट्च सार पीउर्हाक छोकार म्हेयाङ सीकाक्च की च परमेश्वरै इटजाट्न सीङ्गारीले डेनाङ, होसकै नाखुरीककी झन कुडीक वास्टै सेछ ठोककै सीङ्गारीले डेनाङ नाखुरीकुङ विश्वास खोइ? 29होटबाटै नाखुरीक ही जीङ ही गइङ डेम पाम माङुनी र सुर्टा र माजाट्नी। 30परमेश्वरकी माचीन्डीचकै टी याङ्च कुरौ चीन्टा जाट्ले। इसे पट्ट कुराको नाखुरीककी चहडीस्नने डेयार नाखुरीकुङ परमेश्वर बोये वार्न्हने। 31बरु परमेश्वरौ राज्यकी पानी, होटै इसे पट्ट कुरा र होसकै याल्हे।”
स्वर्गाङ जम्मा छान्च सम्पत्ति
(मत्ती ६:१९-२१)
32येशूये चेलाकोलाक डेया, “ए मार्जा बगाल, माबीर्हीनी! हीजैडेनाङ परमेश्वर बोये मेखोल्हौ राज्यौ अधिकार नाखुरीककी याखी डेम मार्हाङ्नने। 33नाखुरीकुङ सम्पत्ति आर्लार हीर मालेच कोलाक यान्ही। लाहाकी डेम सेन्र माच्याछ ठैली खास्नी। होटै स्वर्गाङ सेन्र माभ्याच स्वर्गीय सम्पत्ति बटलीनी। होला खुस र मार्हाले, डुये र माज्याले। 34हीजैडेनाङ सम्पत्ति लेच ठावाङ न नाकुङ मीमन र छान्ले।”
चङ्ख छानार ङुकी
35होटै न्हुइङ येशूये इट डेया, “लहो कम्मर कसडीयार टयार छान्न ङुनी र बट्टी ढाक्ङ डानी। 36नाखुरीक ब्याहा ज्याकी नुङार ल्हेस्च लहो मालीककी मामीस्न लेन्न ङुच होसे नोकरको ल्याक्च छान्नी। मालीक राहार गालाम ढ्वाक-ढ्वाक जाट्च बीट्टीकै गालाम फोम याल्हे। 37नोकरकै लहो मालीक रान्हाङ मामीस्न न लेन्न ङुच बाटै स्याबास डुप्ले। होटै होखुरीक मार्हाङ्ले। ङा साँच्ची न नाखुरीककी डेले, होसे मालीकै कम्मराङ पटुका छ्याकार पाहुनाकी लेखा न ज्यामा-गामा खासार नोकर कोलाक सेम्ह खाटा डार ज्याकी याल्हे। 38इडीक मालीक ढीलो जाटार नाबीक की ग्वाभाल्या राक्च बेलाङ रान्हाङ र नोकरको मामीस्न न ङुच डुपा डेनाङ झन वास्टै स्याबास डुप्ले।”
39“टर इसे आर्मीट्न डानी, इडीक खुस राल्हे डेम थाहा डुप्नाङ च इमुङ मीमुरुङै रुङ्ङ ङुच लेया र खुसकी इमाङ पर्की न माय्हाछ लेया। 40होटबाटै नाखुरीक सढैँ टयार ङुनी। भर्मीयो मीजा नाखुरीकै थाहा माडीन्ह मोसोमायाङ राल्हे।”
नीस खाल्या नोकरकुङ उदाहरण
(मत्ती २४:४५-५१)
41होटै पत्रुसै येशूकी गीना, “प्रभु, नाकै इसे उदाहरण कानकी मट्टै डेचकी पट्टकी डेच?” 42होखुरीककी प्रभुये इट डेया, “होसे विश्वासीलो र बुद्धिमानी भन्डार्या सु हो, होसकी न होच्यौ मालीकै लहो इमुङ पट्ट न कामको जीम्मा याल्हे र अरु नोकरकोलाक नीस्चीट समयाङ होखुरीकुङ भाकाङ पर्च ज्याच ठोक याखी डेम खटडीले। 43इमुङ मालीक ल्हेसार रान्हाङ होटजाट्न न काम जाट्न ङुच डुपा डेनाङ झन होसकी स्याबास याल्हे। 44साँच्ची न ङा नाखुरीककी डेले, मालीकै होसे नोकरकी मेखोल्हौ पट्ट न धन सम्पत्ति मीटाक अधिकार जाट्की याल्हे। 45टर इडीक नोकरै मेनो मीमनाङ ‘ङौ मालीक ढीलो राल्हे’, डेयार ज्याम-गाम म्होरार नोकर नोकरनी कोलाक डुङ्की ठाला डेनाङ 46होच्यौ मालीक होचे माआरमीट्च डीन र घडीयाङ थाहा माडीन्ह झोस टाराल्हे। होटै होसकी बाड्को दण्ड याल्हे र होच्यौ डसा विश्वास माजाट्चकुङ ल्याक्च न छान्ले।”
47“लहो मालीकौ इच्छा वार्न्ह र टयार माङुच र मालीकै अर्हडीच काम माजाट्च नोकरै वास्टै कोर्रा ज्याले। 48टर मालीकौ इच्छा माव्हारार सजाय डुप्च खाल्या काम जाट्च नोकरै चहीँ चेचेस्जा मट्टै कोर्रा ज्याले। सुकी वास्टै याम्हने होसे खाटा वास्टै न लाले र सुकी वास्टै जीम्मा याम्हने होसे खाटा झन वास्टै ङेल्हे।”
जहानाङ माखाट्ले
(मत्ती १०:३४-३६)
49येशूये डेया, “ङा पृथ्वीयाङ म्हे लैडीकी डेम राछ हो। होसे म्हे च बरु पहीला न सल्कडीस्न भ्यानाङ छान्च लेया! 50काट बाड्को कष्टौ बप्तिस्मा ले होसे ङै लाकी न पर्ले। होसे पुरा माछान्ठर ङा सार्है ब्याकुल ले! 51ङा पृथ्वीयाङ लेच भर्मीकोलाक मेलमीलाप जाटाक्की राछ हो डेम नाखुरीक आर्मीट्ले? टर होइन, ङा भर्मीकोलाक लाहा-लाहाङ फाटो जाटाक्की डेम राछ हो। 52हीजैडेनाङ इटै आलाक बाङा जनौ जहानाङ लाहा-लाहाङ न झगडा छान्ले। सोम जना नीस जनौ विरोधाङ र नीस जना सोम जनौ विरोधाङ सोले। 53बोये लेन्जा मीजाकी लेन्जा मीजै बोइकी विरोध जाट्ले, होटजाट्न न मास्टो मीजै मोइकी मोये मीजाकी र विरोध जाट्ले, होटजाट्न न मीनीमै मेखोनकी मेखोनै मीनीमाकी विरोध जाट्ले।”
समयौ लक्षण
(मत्ती १६:२-३; ५:२५-२६)
54येशूये भर्मीकुङ भीडकी डेया, “पस्चीम लाक डेबु सोच डाङ्च बीट्टीकै नाखुरीक डेले, ‘अब नामास राल्हे’ होटै होङ्च न छान्ले। 55डछीन लकीङ नाम्सु क्योस्नाङ नाखुरीक ‘साफ्फी खान्ल्हे’ डेले, होटै होङ्च न छान्ले। 56ए, कपटीको! पृथ्वी र सर्घाकी ङोसार नामास राल्हे की माराल्हे डेम वार्खी च य्होक्ले, टर इसे समयाङ छान्न राछ घटनौ चीन्ह चहीँ हीजै मावार्ल्हे? 57कुसे कुरा सेम्ह हो डेम नाखुरीक हीजै लहे न भाक्की माय्होक्ले?”
58“सुयेर नाखुरीक मीटाक मुड्डा याहार न्यायाधीश लेठाङ आल्हा डेनाङ होसे खाटा लामाङ न खाट्नी। माखाटा डेनाङ च होचे नाकोकी न्यायाधीश लेठाङ टान्डीयार आल्हे, होटै नाकोकी न्यायाधीशै सीपाहीकी जीम्मा याल्हे। सीपाहीये नाकोकी आल्हार झ्याल खानाङ काम याल्हे। 59ङा नाकोकी डेले, नाकै टेरीकी पर्च पैसा माटेरीठर होटै ख्योखी माडीन्ल्हे!”
Currently Selected:
लुका 12: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
