लुका 17
17
पाप र माफ
(मत्ती १८:६-७,२१-२२; मर्कूस ९:४२)
1येशूये लहो चेलाकोलाक डेया, “भर्मीकुङ पाप जाट्की लैडीच परीक्षाको च पक्का न राल्हे। अरुकी पापाङ फसडीच होसे भर्मीकी ढीक्कार ले। 2जुन भर्मीये इसे माजा नानीको मढ्याङ काट्की पाप जाट्की लैडीले डेनाङ, होच्यौ मीघाटीयाङ झाँटौ काट पाटा च्योलोकार समुन्द्राङ लोम्ह याखी सेम्ह छान्ले। 3होटबाटै लहो बारेयाङ होसीयार छान्नी! इडीक नाकुङ भाये पाप जाटा डेनाङ होसकी च्याक्नी, इडीक होच्ये लहो पापको डासार परमेश्वर पट्टी ल्हेसा डेनाङ होसकी माफ यान्ही।
4“इडीक नाकुङ भाये कायाकाङ साट खेप नाकुङ विरोधाङ पाप जाटा, होटै साटै खेप होचे नाको लेठाङ राहार ङा पापको डासार परमेश्वर पट्टी ल्हेस्ले डेया डेनाङ होसकी नाकै माफ यान्ही।”
5होटै प्रेरितकै येशूकी डेया, “प्रभु, कानुङ विश्वास बड्डीम यान्ही!” 6होटै प्रभुये डेया, “नाखुरीक खाटा रैगानौ काट डाना खालो मट्टै विश्वास लेनाङ नाखुरीकै इसे कीम्बुओ म्यार्टुङ्की, ‘हुटार नाङ समुन्द्राङ छहो’ डेया डेनाङ होचे मन्डीले।
नोकरै जाट्की पर्च काम
7“नाखुरीक मढ्याङ सुओर नोकर य्हा घोयार की भेडा आर्छार काम लकीङ रान्हाङ, होचे नोकरकी ‘छीटो राहार ज्याकी ङुनी’ डेले र? 8बरु होचे होसकी इट माडेले र? ‘ङौ लागी ज्याट-गान टयार खास्नी। होटै पटुका छ्याकार ङै ज्याम-गाम माभ्याठर लेन्नी। होटै मट्टै नाको ज्यानी।’ 9लहे अर्हडीच अनुसार काम जाट्च बाटै होचे नोकरकी स्याबासी याल्हे र? 10होटजाट्न न नाखुरीककी अर्हडीच पट्ट काम जाट्न भ्यारखीङ नाखुरीकै र डेनी, ‘कान काम मालग्डीस्च नोकर मट्टै हो, कानै च लहे जाट्की पर्च काम मट्टै पुरा जाट्नने’।”
डस जना कुष्ठरोगीको
11जब येशू यरूशलेम नुङ्नाङ सामरीया र गालीलौ सीमाना छानार नुङा। 12होसको काट लाङ्घाङ पर्या। होटै होला डस जना कुष्ठरोगी कोलाक डुपा। होटै चेक पारी टोङ्हार होखुरीकै 13बाड्को सोरै डेया, “ए प्रभु येशू, कानकी दया जाट्नी।” 14होटै होसकै होखुरीककी डाङार डेया, “नाखुरीक पुजाहारी लेठाङ नुङार लाहाकी टान्हाक्नी।” होटै होखुरीक नुङ्नाङ-नुङ्नाङ न गेप्की क्योटा। 15होटै काट जना चहीँ लाहा गेप्च डाङा, र बाड्को सोरै परमेश्वरौ जय-जयकार जाट्चै होसे ल्हेसार राहा। 16होटै येशूकी धन्यवाद याहार होसे येशूओ मीकुवाङ खुखुप छाना। होसे चहीँ सामरी भर्मी लेया। 17होटै येशूये डेया, “ही गेप्चको डस जना होइन र? अरु नौ जना चहीँ कुला ले? 18इसे सामारी बाहेक ल्हेस्न राहार परमेश्वरकी जय-जयकार जाट्च अरु सुर माछाना?” 19होटै येशूये होसकी डेया, “सोनी, नाकुङ विश्वासै नाको गेप्नने, अब नुङ्नी।”
परमेश्वरौ राज्य
(मत्ती २४:२३-२८,३७-४१)
20फरीसीकै परमेश्वरौ राज्य सेन राल्हे डेम येशूकी गीना। येशूये होखुरीककी डेया, “परमेश्वरौ राज्य च डाङ्च जाट्न मार्हाले। 21सुयेर परमेश्वरौ राज्यकी ‘इला ले होला ले’ डेकी माय्होक्ले हीजैडेनाङ सेनी! परमेश्वरौ राज्य नाखुरीक मीघ्याङ न ले।”
22होसकै चेलाकोलाक डेया, “होसे डीन र राल्हे, नाखुरीक भर्मीयो मीजाकी ङोस्की साफ्फी मीमन च जाट्ले, टर नाखुरीकै डाङ्की माडीन्ल्हे। 23होटै भर्मीकै नाखुरीककी डेले, ‘ङोस्नी, होला ले’ ‘इला ले’ टर होखुरीकै डेच मापट्डीनी होटै न्हुङ-न्हुङ र मानुङ्नी। 24हीजैडेनाङ कुटजाट्न पीझ्यानाङ सर्घा काट छेउलकीङ अर्को छेउ सम्म ट्याङ्छ छान्ले। होटजाट्न न भर्मीयो मीजा र लहो डीनाङ होङ्च न छान्ले। 25टर पहीले होचे वास्टै डुख सहडीकी पर्ले होटै इसे पुस्टुङ भर्मीकै होसकी इन्कार जाट्ले। 26होटै नोऔ पालाङ कुङ्च छानन्या, भर्मीयो मीजौ डीनाङ र होङ्च न छान्ले। 27नोआ जहाज भीत्री पर्चै जाट्नाङ र भर्मीको ज्याचै-गाचै र ब्याहाबारी जाट्न न लेया। होडीक न बेला पृथ्वीयाङ जल प्रलय छानार पट्ट ठोक न नास छाना। 28लोटौ समयाङ छान्नाङ लेखान भर्मीयो मीजौ डीनाङ र होङ्च न छान्ले। भर्मीको ज्याम-गाम न लेया। चीजबीचको लोम-आर्लाम न लेया। होटै बाली-नाली लैडीचै इमको र खास्न न लेया। 29टर कुसनीक लोट सदोमीङ खेव्हा, होसनीक न सर्घीङ म्हे र गन्धक झालार पट्टकी नास जाटा। 30ङा भर्मीयो मीजा राछ नीक र होङ्च न छान्ले।
31“होसबेला सु इमौ कौसीयाङ छान्ले, होच्यौ मालमट्टा इम भीत्री ले डेनाङ र होसे लाकी मानुङ्ख्यो। होटजाट्न न य्हाङ काम जाट्न ङुचको इमाङ माल्हेस्ख्यो। 32लोटौ मास्टोकी छान्च कुरा आर्मीट्नी! 33सुये लहो जीवन जीवाक्की पाले, होचे म्हाटाक्ले। टर लहो जीवन म्हाटाक्चये चहीँ जीवन डीन्ल्हे। 34ङा नाखुरीककी डेले, होसे नाबीक काट ठावाङ न मीस्च नीस जना मढ्याङ काट जनाकी आल्ल्हे र अर्कोकी चहीँ डास्ले। 35होटै काट ठावाङ झाँटा नुक्चै जाट्च नीस जना मास्टोवाङ काट्की आल्ल्हे र अर्कोकी चहीँ डास्ले। 36[होटजाट्न न नीस जना भर्मी य्हाङ छान्ले। होटै काट्की आल्ल्हे अर्कोकी चहीँ डास्ले।”]#१७:३६ कुनै-कुनै सोरोट बाइबलमा यो पड छैन
37होटै चेलाकै येशूकी गीना, “कुला प्रभु?” होसकै होखुरीककी डेया, “कुला सीनु ले होला न गीड्ढको छान्ले।”
Currently Selected:
लुका 17: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
