लुका 19
19
कर सोट्च जखायस
1येशू यरीहो सहर टाहार व्हामन लेनाङ। 2होला जखायस म्यार्मीन लेच काट जना धनी भर्मी लेया। होसे कर सोट्चको मढ्याङ बाड्को हाकीम लेया। 3होचे येशूकी ङोस्की मीमन जाटा। टर होसे टेम्छ लेचबाटै र वास्टै भर्मीकुङ भीडै जाट्नाङ होचे येशूकी डाङ्की माय्होका। 4होटबाटै येशूकी ङोस्की खेरार काट अन्जीरौ म्यार्टुङाङ काल्हा। येशू होसे न लाम छान्चै राम्हन लेया। 5होला टार्हाच न्हुइङ येशूये ढेम्लाक ङोस्चै जखायसकी डेया, “ए जखायस, छीटो म्हाका झाल्नी! छीनी ङा नाकुङ इमाङ बास ङुले।” 6जखायस म्यार्टुङीङ तुरुन्तै म्हाका झाला र मार्हाङ्चै येशूकी लहो इमाङ आल्हा। 7इसे डाङार पट्ट न भर्मीको गन-गन जाट्चै डेकी ठाला, “इसे भर्मी च पापी भर्मीयो इमाङ टी बास ङुकी नुङ्नने ट!” 8टर जखायस प्रभुओ अगाडी टोङ्हार डेया, “सेनी न हजुर, अब ङा लहो सम्पत्तियो आढा भाग गरीबकोलाक पुङ्ङ याल्हे। होटै सुकीर कर लैडीयार हीर लामे डेनाङ ङा होच्यौ बुली गुना ल्हेट्न याल्हे।” 9येशूये होसकी इट डेया, “छीनीङ इसे इमाङ मुक्ति राम्हने, हीजैडेनाङ जखायस र अब्राहामौ न मीजा हो। 10भर्मीयो मीजा म्हाट्च कोलाक पाकी र जीवाटाक्की डेम राछ हो।”
येशूये सुनौ सीक्कौ बारेयाङ डेच
(मत्ती २५:१४-३०)
11होसे भर्मीकै इसे कुरा सेमन लेनाङ येशूये अझै अर्को कुरा डेया हीजैडेनाङ होसको यरूशलेमौ खेरेप टार्हामन्या होटै भर्मीकै चहीँ येशू यरूशलेम टार्हाच बीट्टीकै परमेश्वरौ राज्य तुरुन्तै राल्हे डेम आर्मीट्न न्या। 12होसकै डेया, “सुर काट जना धनी भर्मी लोस देशाङ नुङार राजा छानार ल्हेस्न राछ बीचार जाटा। 13होटै लहो डस जना नोकर कोलाक आर्घार होखुरीककी डस वटा सुनौ सीक्का याहार डेया, ‘ङा ल्हेस्न मार्हाठर इसे सीक्का लकीङ ब्यापार जाट्नी।’ 14टर होच्यौ जनटाकै होसकी माजाक्नन्या। होटबाटै होखुरीकै होच्यौ न्हुङ-न्हुङ इट डेम भर्मी बीर्न्हका, ‘होचे कान मीटाक राज जाट्च कान मामन्डीले।’
15“होसे राजा छानार राहार लहे पैसा याछ नोकर कोलाक लाहा लेठाङ आर्घाकी लैडीया। होटै ब्यापार जाटार होखुरीकै कुडीक नाफा छ्युका डेम वार्खी मीमन जाटा। 16होटै पहीला राछये इट डेया, ‘मालीक, नाकै याछ सीक्कै अर्को डस सीक्का र ङै कमडीमने।’ 17मालीकै डेया, ‘स्याबास! नाको मजुङ नोकर लेसा, नाको चेक्जाङ र विश्वासीलो छाना। अब नाकै डस वटा सहरौ अधिकार जाट्की डीन्ल्हे।’ 18अर्को राहार इट डेया, ‘मालीक, नाकै याछ सीक्कै अर्को बाङा सीक्का ङै कमडीमे।’ 19मालीकै होसकी डेया, ‘नाकै र बाङा सहराङ अधिकार जाट्की डीन्ल्हे।’ 20होटै अर्कोये राहार इट डेया, ‘मालीक, ङोस्नी, नाकुङ सीक्का इला ले। होसे ङै रुमालाङ छ्याकार डामने, इला न ले। 21ङा नाको खाटा बीर्हीया, हीजैडेनाङ नाको कठोर ले। ही माय्हामे होसे न ङेल्हे र ही माभेरेट्न ने होसे न बटुली ले।’ 22मालीकै होसकी डेया, ‘नुओ मेङेरौ बोलीये जाट्न नाङ्की ङा दोष लैडीले, ए दुष्ट नोकर! ही माय्हामे होसे न ङेछ होटै ही माभेरेट्न ने होसे बटुली च ङा कठोर भर्मी हो डेम नीये वार्न्ह र 23ङौ पैसा नीये हीजै ब्याजाङ मालैडीया? ङा राहार होसे ब्याज खाटा डुप्च लेया।’ 24होटै होचे होला खेरेप टोङ्छकोलाक डेया, ‘होसे खाटा लेच सीक्का लार डस सीक्का लेचकी याखी क्योट्नी।’ 25होटै होखुरीकै डेया, ‘हजुर, होसे खाटा च डस सीक्का लेमै ले!’ 26मालीकै डेया, ‘ङा नाखुरीककी डेले, सु खाटा ले होसकी झन वास्टै याल्हे, टर सु खाटा चेक्जा ले होसे खाटा लेच र स्याट्ले।
27“‘टर ङा राजा छान्च मन मापर्च ङौ शत्रुकोलाक इला राक्नी। र होखुरीककी ङौ म्याहासाङ न साट्नी’!”
यरूशलेमाङ येशूकी स्वागत जाट्च
(मत्ती २१:१-११; मर्कूस ११:१-११; युहन्ना १२:१२-१९)
28येशूये इसे कुरा डेम भ्याच न्हुइङ होसको होखुरीकुङ अघी-अघी यरूशलेमलाक नुङा। 29होसको बेथफागे र बेथानियो खेरेप जैटुन डेच डाँडाङ टाहा। होटै होसकै लहो चेलाको मढ्याङ नीस जनाकी इट डेम बीर्न्हका, 30“उ होसे अगाडीयुङ लाङ्घाङ नुङ्नी। होला काट गढौ मीजा छ्याक्ङ डाच नाखुरीकै डुप्ले। होसे मीटाक चाहाँ सम्म कुसे भर्मी र माकाल्न्हने। होसकी पीसाकार राक्नी। 31सुयेर ‘हीजै इसकी पीसाक्च?’ डेयार नाखुरीककी गीना डेनाङ, ‘प्रभुकी चहडीस्नने’ डेकी।”
32होटै होसे बीर्न्हकाचको नुङा। होसकै होखुरीककी कुङ्च डेमन्या होङ्च न डुपा। 33होटै होखुरीकै गढौ मीजा पीसाक्की पानाङ मेन मीमुरुङै होखुरीककी गीना, “नाखुरीक इसे गढौ मीजाकी हीजै पीसाक्च?” 34होखुरीकै डेया, “प्रभुकी इसे चहडीस्नने।” 35चेलाकै गढाकी येशू लेठाङ राका। होटै लाहा-लहो खास्टोको होसे मीटाक टाङा होटै येशूकी काल्हाका। 36होसको नुङ्चै जाट्नाङ भर्मीकै लहो खास्टोको लामाङ टाङ्ङ याहा।
37येशू जैटुन डाँडौ ओर्हालो खेरेप टार्हानाङ होसकोकी डुट्च पट्ट न भर्मीकै येशूये जाट्च शक्तिशाली काम आर्मीटार होसे कामौ लागी मार्हाङा। होटै परमेश्वरौ जय-जयकार जाट्चै बाड्को सोरै च्याक्की ठाला।
38“प्रभु परमेश्वरौ म्यार्मीनाङ राछ
राजा आसीस डुप्च हो।
स्वर्गाङ शान्ति र
प्रभु परमेश्वरौ महीमा अट छानै।”#भजनसंग्रह ११८:२५-२६
39होटै भर्मीकुङ भीड लकीङ फरीसीकै होसकोकी डेया, “ए गुरुज्यु, नाकुङ चेलाकोलाक माच्याक्नी डेम हक्कारीनी।” 40टर येशूये डेया, “ङा नाखुरीककी डेले, इखुरीक माच्याका डेनाङ ल्हुङ्को र च्याक्ले।”
यरूशलेमौ भर्मीकोलाक डाङार येशू राप्च
41येशू यरूशलेम खेरेप टार्हानाङ लहो अगाडी सहरकी डाङा। होटै होसको रापार डेया, 42“सान्टी डुप्की ही जाट्की पर्ले डेम छीनी र नीये वार्न्हाङ छान्च लेया! टर नीये मावार्हा। 43अब नाङ मीटाक याङ्च डीन राल्हे, शत्रुकै नुओ वरीपरी घेरा काले। होटै पट्ट लकीङ न नाङ्की ठुनार डाले। 44होटै नाङ र नाङ भीत्री लेच मीजाकोलाक साट्न याल्हे। होखुरीकै काट ल्हुङ टकी अर्को ल्हुङ्की र बाँकी माडास्ले। हीजैडेनाङ परमेश्वरै नाङ्की जीवाक्की डेम राछ समयकी नीये माचीन्डीया।”
येशू परमेश्वरौ मन्दिराङ
(मत्ती २१:१२-१७; मर्कूस ११:१५-१९; युहन्ना २:१३-२२)
45होटै न्हुइङ येशू परमेश्वरौ मन्दिर भीत्री पर्या। होसकै मन्दिराङ लोम-आर्लाम जाट्चकोलाक इट डेचै बाहीर छ्युका। 46होटै होखुरीककी डेया, “धर्मशास्त्राङ रीक्ङने, ‘ङौ इम प्रार्थनौ इम छान्ले’ टर नाखुरीकै च इसकी ‘डाकुकुङ अड्डा’ खास्नने।”#यशैया ५६:७; यर्मिया ७:११
47होसकै डीनै पीच्छी परमेश्वरौ मन्दिराङ शिक्षा याम्ह न लेया। मुख्य पुजाहारीको, धर्मगुरुको र अरु शासकको खाटार होसकोकी साट्की पाम्या। 48टर होखुरीकै हीर मौका माडुपा। हीजैडेनाङ होला लेच पट्ट न भर्मीको होसकुङ शिक्षा सेकीयाङ मग्न लेया।
Currently Selected:
लुका 19: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
