लुका 4
4
येशूओ परीक्षा
(मत्ती ४:१-११; मर्कूस १:१२-१३)
1बप्तिस्मा लाच न्हुइङ येशू पवित्र आत्मै न्हेपार यर्दन नदि लकीङ ल्हेसा। होटै पवित्र आत्मै होसकोकी उजाड-ठाँवाङ आल्हा। 2होला शैतानै येशूकी चालीस याक सम्म परीक्षा जाटा होटै पापाङ पार्की पा। चालीस याक सम्म येशूये हीर माज्या। होटबाटै होसकोकी साफ्फी मीटुक रन्छीया। 3होसे बेला न शैतानै येशूकी डेया, “नाको परमेश्वरौ मीजा हो डेनाङ इसे ल्हुङ्की आज्ञा जाट्नी र होसे रोटो छान्ख्यो” 4येशूये होसकी जबाफ याहा, “धर्मशास्त्राङ इट डेम रीक्ङने, ‘भर्मी रोटोये मट्टै माजीवाले।’”#व्यवस्था ८:३
5होटै शैतानै येशूकी घाङ्च ठाउँवाङ आल्हार संसारौ पट्ट राज्य कोलाक काचुटीयाङ टान्हाक्चै इट डेया, 6“ङा इसे पट्ट न अधिकार र इच्यो गौरब नाकोकी याल्हे इसे पट्ट न ङाकी याम्हने र ङा सुकी याखी मीमन जाट्ले होसकी न याल्हे। 7नाकै झोरा डेनाङ नाकोकी इसे पट्ट न याल्हे।” 8होटै येशूये शैतानकी डेया, “धर्मशास्त्राङ रीक्ङने, ‘नीये लहो परमेश्वरकी मट्टै झोरो र होसकुङ मट्टै सेवा जाट्की।’”#व्यवस्था ६:१४
9शैतानै येशूकी यरूशलेमाङ आल्हा र परमेश्वरौ मन्दिरौ मीचुटाङ टाहाकार डेया, “नाको परमेश्वरौ मीजा हो डेनाङ इटै म्हाका फाल ङाप्नी। 10हीजैडेनाङ धर्मशास्त्राङ रीक्ङने,
‘नाकोकी जोगडीकी डेम परमेश्वरै स्वर्गदूतकोलाक अर्हडीले,
11नाकुङ मीहील ल्हुङाङ माथोक्ख्यौ डेम,
होखुरीकै नाकोकी मीहुट-मीहुटाङ न ढान्ले।’”#भजनसंग्रह ९१:११-१२
12येशूये शैतानकी डेया, “धर्मशास्त्राङ रीक्ङने, ‘नीये परमप्रभु लहो परमेश्वरकी परीक्षा माजाटो।’”#व्यवस्था ६:१६ 13शैतानै येशूकी पट्ट परीक्षा जाट्रखीङ अनुकुल समय माछन्ठर होसकोकी डासार व्हा।
गालीलाङ येशूओ काम सुरु
(मत्ती ४:१२-१७; मर्कूस १:१४-१५)
14होटै येशू पवित्र आत्मौ शक्तिये गालीलाङ ल्हेस्न राहा, र होसकुङ बारेयाङ वार्लाक-पार्लाकुङ पट्ट देशाङ सेछ कुरा फैलडीस्चै नुङा। 15येशूये यहूदिकुङ सभाङुच इमकोवाङ नुङार शिक्षा याखी ठाला र पट्ट भर्मीकै होसकुङ प्रशंसा जाट्न्या।
नासरताङ भर्मीकुङ अविश्वास
(मत्ती १३:५३-५८; मर्कूस ६:१-६)
16येशू मेखोल्हा होर्च सहर नासरताङ टाराहा, सढैँ लेखा न होसको म्हुङ बाट्च नीक शिक्षा याछ इमाङ नुङा र धर्मशास्त्र परेस्की डेम सोवा। 17येशूकी यशैया अगमवक्तै रीक्च कीताब परेस्की डेम याहा। होसकै कीताब खोल्हा र इट डेयार रीक्च खन्डकी परेसा,
18“परमप्रभुओ आत्मा ङा मीटाक ले।
हीजैडेनाङ गरीबकोलाक सेछ समाचार सेटाक्की डेम होसकै ङाकी अभिषेक जाट्नने।
बन्धनाङ लेच कोलाक फोसाक्की र
मीमीक माडाङ्च कोलाक डाङ्च खास्की,
ठीचोमीचोवाङ पर्च कोलाक स्वतन्त्र जाट्कीयो लागी,
19र परमप्रभुओ प्रसन्नतौ वर्ष घोसना जाट्कीयो नीम्टी होसकै ङाकी बीर्न्हकामने।”#यशैया ६१:१-२
20होसकै ङाक्ङ भ्याच न्हुइङ कीताबकी बन्द जाटार ल्हेट्न याहार ङुवा। होटै होला सेच वास्टै भर्मीकै येशूकी छक्क पर्यार ङोस्न ङुवा। 21होटै होसकै होखुरीककी डेया, “छीनी धर्मशास्त्राङ रीक्च इसे पट्ट न बचन नाखुरीकै सेनाङ-सेनाङ न ओल्न्ह भ्यामने।”
22पट्ट न भर्मीकै येशूओ प्रशंसा जाटा। होसकै डेच कुरा सेयार होखुरीक छक्क पर्चै मेखुरीक-मेखुरीक न कुरा जाट्चै इट डेया, “होसको च योसेफौ मीजा होइन र?” 23होसकै होखुरीककी डेया, “पक्का र नाखुरीकै ङाकी इसे न उखान डेले औँला, ‘ए बैड्य!#४:२३ बैड्य उसा जाट्च भर्मी लाहाकी न गेपाक्नी।’ नाखुरीकै ङाकी कफर्नहुमाङ जाट्नाङ लेखा लहो लाङ्घाङ सेन्र थाहा माढीन्च काम जाट्नी डेले औँला।” 24होटै होसकै कुरा टुर्हाक्चै डेया, “साँच्ची ङा नाखुरीककी डेले, कुसेर अगमवक्ताकोलाक लहो लाङ्घाङ स्वागट माजाट्ले।
25“ङा नाखुरीककी अर्को काट कुरा र डेले, एलीयो पालाङ साँढे सोम वर्ष सम्म नामास माराहा होटै पट्ट देशाङ बाड्को अनीकाल पर्या। होस बेला इस्राएलाङ वास्टै बीढुवाको लेया। 26टर सीदोन देशुङ सारपाट डेच लाङ्घुङ बीढुवा लेठाङ मट्टै परमेश्वरै एलीयाकी बीर्न्हका टर अरु सु लेठाङ र बीर्न्हमाका। 27होटजाट्न न एलीसा अगमवक्ता लेच बेलाङ इस्राएलाङ वास्टै कुष्ठरोगीको लेया। टर होखुरीक मध्याङ सीरीया देशुङ नामान डेच भर्मीकी बाहेक अरु सुकीर मागेपाका।”
28येशूये डेच इसे कुरा सेयार, यहूदिकुङ सभाङुच इमाङ लेच पट्ट न भर्मीको मीरीसै चुर छाना। 29होटै होखुरीक जाराक-जुरुक सोवार येशूकी आर्ढुस्चै सहर लकीङ बाहीर छ्युका। होसे भर्मीकै खास्च सहर घाङ्च डाँडाङ लेया होटै येशूकी आल्हार होसे डाडौं मीचुटीङ झालाक्की पा। 30टर होसको होखुरीकुङ मीघीङ खेव्हार नुङा।
दुष्ट आत्मा लक्डीस्च भर्मी गेप्च
(मर्कूस १:२१-२८)
31होटै येशू गालीलौ काट सहर कफर्नहुम डेठाङ झाल्न राहा। होला होसकै म्हुङ बाट्च नीक भर्मीकोलाक शिक्षा याम्हन लेया। 32येशूये पाहाक्च शिक्षा सेयार होला लेच भर्मीको छक्क पर्या; हीजैडेनाङ होसकै अधिकार खाटा पाहाक्न्या।
33यहूदिकुङ सभाङुच इमाङ दुष्ट आत्मा लग्डीस्च काट भर्मी लेया। होचे बाड्को सोरै च्याकार डेया, 34“ए नासरतुङ येशू, नाकुङ कानखाटा ही काम? ही नाको कानकी नास जाट्की डेम राछ? ङाकी थाहा ले नाको परमेश्वरै बीर्न्हकाच पवित्र भर्मी हो।” 35इसे कुरा सेयार येशूये होसे दुष्ट आत्माकी हकारीयार डेया, “माच्याको र इसे भर्मीलकीङ ख्योव्हार नुङ्ना।” होसे भर्मीकी पट्टौ म्याहासाङ कुरुकार दुष्ट आत्मा खेव्हार नुङा। टर भर्मीकी चहीँ हीआङ र चोट मापर्या।
36पट्ट भर्मी छक्क पर्यार कुरा जाट्की ठाला, “इसे भर्मीये ङाक्च बोलीयाङ कोङ्च अधिकार र शक्ति लेसा? होसकै च्याक्नाङ दुष्ट आत्माको र खेव्हार व्हाले!” 37इसे कुरा होसे इलाकुङ पट्ट ठावाङ फैलडीसा।
येशूये वास्टै भर्मीकोलाक गेपाक्च
(मत्ती ८:१४-१७; मर्कूस १:२९-३४)
38येशू यहूदिकुङ सभा ङुच इमीङ खेव्हार सीमोनौ इमाङ नुङा। होसे बेला सीमोनौ गुमा साफ्फी जर राहार ठला पर्न ङुमन्या। भर्मीकै, “इसकी गेपाक्ङ यान्ही” डेम येशूकी बिन्ती जाटा। 39होटै येशू सीमोनौ गुमा खेरेप टोङ्हार ज्वरोकी हक्कारीया र होस बेला न ज्वरै डास्की क्योटा र तुरुन्तै सोवार होचे होखुरीककी ज्यामा-गामा खासार याहा।
40होटै नाङ्खान कीम्खी पानाङ भर्मीकै अरु खाल-खालुङ बीरामी कोलाक येशू लेठाङ राका। र येशूये होखुरीक मीटाक मीहुट डाम पट्टकी गेपाका। 41होला लेच वास्टै भर्मीको लकीङ दुष्ट आत्माको च्याक्चै, इट डेचै खेव्हा, “नाको परमेश्वरौ मीजा हो।” टर येशूये होसे दुष्ट आत्मा कोलाक हक्कारीयार ङाक्की माय्हा। हीजैडेनाङ होखुरीकै होसको मुक्ति याछ ख्रीष्ट हो डेम चीन्डीमन्या।
येशूये प्रचार जाट्च
(मर्कूस १:३५-३९)
42होटै गोराक ट्याङ्छ बीट्टीकै येशू सुर मालेच ठावाङ नुङा। टर भर्मीको होसकोकी पाचै नुङा र होसकोकी डुप्रखीङ इट डेया, “कानकोलाक डासार मानुङ्नी” डेम रोकडीकी पा। 43टर येशूये होखुरीककी डेया, “ङै परमेश्वरौ राज्यौ सेछ समाचार वास्टै भर्मीकोलाक ठाँउ-ठाँवाङ नुङार सेटाक्की न पर्ले। हीजैडेनाङ ङाकी इसे न काम जाट्की डेम बीर्न्हकाच हो।” 44इटजाट्न होसकै पट्ट न यहूदिया डेच ठाउङ सभाङुच इम-इमाङ नुङार प्रचार जाट्की ठाला।
Currently Selected:
लुका 4: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
