मत्ती 16
16
अचम्मौ चीन्ह ङेछ
(मर्कूस ८:११-१३; लुका १२:५४-५६)
1फरीसी र सदुकीको राहा र येशूकी जाँच जाट्की डेम डेया, “इडीक नाको परमेश्वर लकीङ न राछ हो डेनाङ काट चीन्ह टान्हाक्नी।” 2टर होसकै डेया, “जब नाखान कीम्खी पाले, टब सर्घा ग्याच छान्ने र नाखुरीक डेले, ‘अब पीउर्हाक नाखान खान्ल्हे’ 3फेरी गोराक न नाखान ग्याच र छुम्छ छाना डेनाङ ‘छीनी च नामास राल्हे’ डेले। इटजाट्न सर्घाकी ङोसार डीन कुङ्च छान्ले डेम वार्खी य्होक्ले, टर इसे समयाङ छान्च घटनौ चीन्ह चहीँ नाखुरीक मावार्ल्हे। 4दुष्ट र व्यभिचारी पुस्टै अचम्मौ चीन्हको ङोस्की पाले टर नाखुरीककी योनाकी याछ चीन्हबाहेक अरु कुसेर चीन्ह माय्हाले।” होटै येशू होखुरीककी डासार व्हा।
फरीसी र सदुकीकुङ शिक्षौ बारेयाङ
(मर्कूस ८:१४-२१)
5जब येशू र होसकुङ चेलाको टालपारी नुङा, चेलाकै रोटो आल्खी म्य्हाका। 6येशूये होखुरीककी डेया, “होसीयार छान्नी, फरीसी र सदुकीकुङ खमीर लकीङ जोगडीसार ङुनी।” 7अनी चेलाकै मेखुरीक-मेखुरीक डेकी ठाला, “कानै रोटो माराक्च बाटै होसकै काल्हाकी इट डेच औँला।” 8येशूये इसे कुरा थाहा डुपार डेया, “खोइ नाखुरीकुङ विश्वास? नाखुरीकै रोटो माराका डेयार हीजै नाखुरीक कुरा जाट्न ङुच? 9अझै र नाखुरीकै माबुझडीस्ने? बाङा हजार भर्मीकोलाक बाङा रोटोये कास्नाङ नाखुरीकै कुडीक डालो सोट्नन्या? ही होसे म्य्हाका? 10अनी साट वटा रोटोये बुली हजार भर्मीकोलाक कास्नाङ कुडीक डालो सोटा? होसे र म्य्हाका? 11कुङ्च अझै र माबुझडीस्च, ङै नाखुरीककी रोटोओ बारेयाङ डेच होइन? ङै च नाखुरीककी फरीसी र सदुकीकुङ खमीर लकीङ टी होसीयार छान्की डेच ट!” 12अनी बल्ल चेलाकै बुझडीसा, होसकै च रोटो सोकाक्च खमीर लकीङ होसीयार छान्की डेच होइन लेसा टर होसकै च फरीसी र सदुकीकै याछ शिक्षा लकीङ होसीयार छान्की टी डेमनेसा ट।
येशू सु हो?
(मर्कूस ८:२७-३०; लुका ९:१८-२१)
13जब येशू कैसरीया फीलीप्पी डेच इलाकाङ टाहा। होला होसकै लहो चेलाकोलाक गीना, “भर्मीकै भर्मीयो मीजाकी सु हो डेले?” 14चेलाकै जवाफ याहा, “कुडीक जनै बप्तिस्मा याछ युहन्ना, कुडीक जनै एलीया, अनी कुडीक जनै चहीँ यर्मिया वा अरु अगमवक्ताको मध्याङ सुर काट जना हो डेले।”
15येशूये होखुरीककी गीना, “अनी नाखुरीक चहीँ ङाकी सु हो डेले ट?” 16सीमोन पत्रुसै डेया, “नाको जीवाच परमेश्वरौ मीजा मुक्ति याछ ख्रीष्ट हो।” 17येशूये होसकी डेया, “ए योनौ मीजा सीमोन, नाङ कुडीक आसीसीट ले! इसे कुरा नीये भर्मीकै डेच सेयार डेच होइन, इसे च स्वर्गाङ लेच ङौ परमेश्वर बोये न नाङ्की टान्हाक्च हो। 18अब ङा नाङ्की डेले, नाङ पत्रुस हो (इच्यो अर्थ ‘पट्ठर’ हो।) इसे पट्ठर मीटाक ङा ङौ मण्डली#१६:१८ मण्डली मन्डली डेच चहीँ येशूकी बीस्वास जाट्च भर्मीको हो। खडा जाट्ले, अनी नरकुङ गालामको होसे मीटाक बीजय छान्की माय्होक्ले। 19ङा नाङ्की स्वर्गौ राज्यौ साँचाको याल्हे, नीये पृथ्वीयाङ ही छ्याक्ले, होसे स्वर्गाङ र छ्याक्ले, अनी नीये पृथ्वीयाङ ही पीसाक्ले, होसे स्वर्गाङ र पीसाक्ले।” 20टब लाहा मुक्ति याछ ख्रीष्ट हो, डेच कुरा सुकी र माडेकी डेम चेलाकोलाक कडा आज्ञा याहा।
येशूये लाहा सीकी पर्च कुरा डेच
(मर्कूस ८:३१-३३; लुका ९:२२)
21होसको कुटजाट्न यरूशलेमाङ नुङ्की पर्ले अगुवाको, मुख्य पुजाहारीको र धर्मगुरुकुङ मीहुटीङ वास्टै कष्ट भोग्डीकी पर्ले, होसकोकी साट्ले टर सोमयाकाङ जीवाम सोले डेच कुरा होसनीक लकीङ येशूये लहो चेलाकोलाक डेकी ठाला।
22याङ्च कुरा सेयार पत्रुसै येशूकी काट पट्टी आल्हार च्याक्चै डेया, “ए प्रभु! परमेश्वरै होट माजाट्ख्यो, नाको मीटाक याङ्च सेन्र माछान्ले।” 23टर येशू ल्हेसार पत्रुसकी डेया, “ए शैतान, ङौ म्याहासीङ नुङ्की क्योटो! नाङ ङौ लागी बाधा हो। हीजैडेनाङ नुओ मीमनाङ परमेश्वरौ कुरा होइन, टर भर्मीलकीङ राछ कुराको ले।”
चेलाकै जाट्की पर्च ट्याग
(मर्कूस ८:३४–९:१; लुका ९:२३-२७)
24होटै न्हुइङ येशूये लहो चेलाकोलाक डेया, “इडीक सुर ङाकी डुट्च मीमन जाट्ले डेनाङ, होचे लाहाकी इन्कार जाट्ख्यौ र लोहो क्रूस सोटार#१६:२४ क्रूस सोटार क्रुस बुकीओ अर्थ चहीँ येशूओ कारनै डुख भोग्डीकी टयार छान्की अठबा सीकी र टयार छान्की हो। ङाकी डुट्ख्यौ। 25हीजैडेनाङ सुये लहो जीवन जीवाक्च मीमन जाट्ले होचे सेन्र मासीच जीवन गुमडीले। टर सुये ङौ लागी लहो जीवन गुमडीले, होचे सेन्र मासीच जीवन डुप्ले। 26पट्ट संसार मीहुटाङ पार्नाङ र लहो सेन्र मासीच जीवन चहीँ गुमडीया डेनाङ, होसे भर्मीकी ही फाइडा छान्ले र? अठबा भर्मीये लहो सेन्र मासीच जीवनौ सट्ठाङ ही याखी य्होक्ले? 27हीजैडेनाङ भर्मीयो मीजा लहो बोयो महीमाङ लहो स्वर्गदूतको खाटा राल्हे, अनी होडीक बेला होसकै काट-काट भर्मीकी होचे जाट्च काम अनुसार जाट्ले। 28साँच्ची न, ङा नाखुरीककी डेले, इला टोङ्छको मध्याङ कुडीक जनै भर्मीयो मीजाकी लहो राज्याङ राम्हन लेच माडाङ्ठर मासीले।”
Currently Selected:
मत्ती 16: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
