मर्कूस 1
1
बप्तिस्मा याछ युहन्नौ प्रचार
(मत्ती ३:१-१२; लुका ३:१-१८; युहन्ना १:१९-२८)
1परमेश्वरौ मीजा येशू ख्रीष्टौ सेछ समचार इटजाट्न सुरु छाना। 2यशैया अगमवक्तौ कीताबाङ इटजाट्न रीक्ङने,
“ङोस्नी, ङा परमेश्वर, ङौ दूतकी नाकुङ अगाडी-अगाडी बीर्न्हकाले,
अनी होचे न नाकुङ लाम तयार खास्ले। #मलाकी ३:१
3उजाड ठावाङ काट जना भर्मी बाड्को सोरै डेमन ले,
‘परमप्रभुओ लाम तयार खास्नी,
होसकुङ लाम सोझो खास्नी।’” #यशैया ४०:३
4बप्तिस्मा याछ युहन्ना उजाड ठावाङ राहा र इट डेम प्रचार जाटा, “नाखुरीक पापको डासार परमेश्वर पट्टी ल्हेस्नी र बप्तिस्मा लानी अनी परमेश्वरै नाखुरीकुङ पाप क्षमा जाट्न याल्हे।” 5होटै यहूदिया क्षेत्र र यरूशलेम सहरुङ पट्ट न भर्मीको युहन्ना लेठाङ राहा र होखुरीकै लाहा लहो पाप स्वीकारीचै आसको खाटा यर्दन नदियाङ बप्तिस्मा ला। 6युहन्नै चहीँ उँटौ भुट्ला लकीङ जाछ बढीन बील्न्हन्या र कम्मराङ छालौ पटुका छ्याक्ङन्या, सलह डु र जङ्गलुङ घोसौ मह ज्यामन्या। 7होटै युहन्नै इट डेम प्रचार जाटा, “ङा न्हुइङ राछ होसको ङा डेनाङ शक्तिशाली ले। ङा घुकुरुक छानार होसकुङ चपलौ फीट्टा पीसाक्की र ज्योस्च माले। 8ङै च नाखुरीककी डीये बप्तिस्मा याम्हन ले, टर होसकै चहीँ नाखुरीककी पवित्र आत्मै बप्तिस्मा याल्हे।”
येशूये बप्तिस्मा लाच
(मत्ती ३:१३–४:११; लुका ३:२१-२२; ४:१-१३)
9अनी होस बेला येशू गालीलौ नासरत सहरलकीङ राहा र यर्दन नदियाङ युहन्नालकीङ बप्तिस्मा ला। 10होटै डीइङ ख्योछ बीट्टीकै होसकै स्वर्ग फोस्च र पवित्र आत्माकी लाहा मीटाक ढुकुरौ रुपाङ म्हाका राछै जाट्च डाङा। 11होटै स्वर्ग लकीङ याङ्च आवाज राहा, “नाको ङौ जाक्ङ सेच मीजा हो, नाको खाटा ङा साप्फी मार्हाङने।”
12होटै न्हुइङ पवित्र आत्मै येशूकी तुरुन्तै उजाड ठावाङ आल्हा। 13होला शैतानै होसकोकी चालीस याक सम्म परिक्षा जाटा र पापाङ पार्कीपा। अनी येशू जङ्गलुङ जनावरको खाटा ङुवा, होटै स्वर्गदूतकै होसकुङ सेवा जाटा।
येशूये बुली जना जाल ङाप्चकोलाक आर्घाच
(मत्ती ४:१२-२२; लुका ४:१४-१५; ५:१-११)
14होटै युहन्नाकी झ्यालखानाङ ठुन्रखीङ परमेश्वरौ सेछ समचार सेटाक्चै येशू गालीलाङ राहा। 15अनी होसकै डेया, “अब समय पुरा छान्न ने र परमेश्वरौ राज्य खेरेप टार्हामने। पापको डासार परमेश्वर पट्टी ल्हेस्नी र सेछ समचाराङ विश्वास जाट्नी।”
16होटै येशू गालील टालौ छेवैछेउ नुङ्चै जाट्नाङ येशूये सीमोन र होच्यो भाइ अन्द्रियासकी टालाङ जाल ङाप्चै जाट्च डाङा। होखुरीक नीस न जाल ङाप्चको लेया। 17अनी येशूये होखुरीककी डेया, “रान्ही ङाकी डुट्नी, ङा नाखुरीककी भर्मीकोलाक जाल ङाप्चको खास्ले।” 18होखुरीकै तुरुन्तै लहो जालको डासार होसकोकी डुटा।
19होटै चेक पार्लाक टाछ पछी होसकै जब्दियौ नीस लेन्जा मीजाको याकुब र युहन्नाकी डुङ्गाङ जाल रुप्म ङुच डाङा।
20अनी होखुरीककी तुरुन्तै येशूये आर्घा र होखुरीक लहो बोइ जब्दियाकी ज्यामी काम जाट्चको खाटा डुङ्गाङ न डासार होसकोकी डुटा।
येशूये काट जना भूत लग्डीस्च भर्मीकी गेपाक्च
(लुका ४:३१-३७)
21होटै येशू चेलाको खाटा कफर्नहुम सहराङ नुङा। होला टारखीङ म्हुङ बाट्च याकाङ होसकै यहूदीकुङ सभाङुच इमाङ नुङार परमेश्वरौ शिक्षा पाहाक्की ठाला। 22होसकुङ शिक्षा सेयार भर्मीकै अचम्म मन्डीया। हीजैडेनाङ होसकै होखुरीककी धर्मगुरुकै लेखा होइन, टर अधिकार खाटा पाहाका। 23होडीक बेला होसे सभा ङुच इमाङ भूत आत्मा लक्डीस्च काट भर्मी राहा। होटै होचे इट डेचै च्याका, 24“ए नासरतुङ येशू, कानुङ नाको खाटा ही काम ले र? ही नाको कानकी नास जाट्की डेम राछ हो? ङा नाकोकी चीन्डीले, नाको परमेश्वरौ काट पवित्र जन हो।” 25टर येशूये होसकी इट डेचै हक्कारीया, “माच्याको! र होसे लकीङ खेव्हार नुङ्ना।” 26होटै होसे भर्मीकी लछारपछार जाट्चै होसे भूत आत्मा बाड्को सोरै च्याक्चै होसे लकीङ ख्योव्हार नुङा। 27इसे डाङ्च पट्ट न भर्मीको अचम्म मन्डीया र होखुरीक मेखुरीक-मेखुरीक गीन्की ठाला, “इसे ही हो? इसे च अधिकार लेच नयाँ शिक्षा टी लेसा। इचे च भूत आत्माकोलाक र आज्ञा जाट्ले र होखुरीकै इच्यो आज्ञा र मन्डीच लेसा।” 28होटै येशूओ म्यार्मीन तुरुन्तै गालीलौ वरीपरी पट्ट ठावाङ न फैलडीसा।
येशूये वास्टै छाच कोलाक गेपाक्च
(मत्ती ८:१४-१७; लुका ४:३८-४१)
29होटै येशू यहूदीकुङ सभाङुच इमीङ ख्योव्हार याकुब र युहन्ना खाटा सीमोन र अन्द्रियासौ इमाङ नुङा। 30अनी होला सीमोनौ गुमा जर राहार ठला पर्नन्या र होखुरीकै येशूकी तुरुन्तै होसे कुरा सेटाका। 31र येशू खेरेप नुङार होच्यो मीहुटाङ घोवार सोटा। होडीक न बेला होसकी जरै डास्की क्योटा र होचे होखुरीककी सेवा जाटा।
32अनी होसनीक नाबीलाङ नाखान कीम्छन्हुइङ भर्मीकै येशू लेठाङ छाचको र भूत आत्मा लग्डीस्च भर्मीकोलाक राका।#१:३२ नाखान कीम्छ न्हुइङ: यहुडीकै म्हुङ बाट्चनीक कुसेर काम जाट्की माछान्नन्या, टर नाखान कीम्छ न्हुइङ चहीँ लहे मीमन जाट्च काम जाट्की छान्नन्या। जस्टै छाच भर्मीकी बुवार येशू लेठाङ आल्खी। 33सहरुङ पट्ट न भर्मीको होला इमौ गालामटुङाङ भेला छानन्या। 34होला खालखालुङ रोग लडीस्च वास्टै छाच कोलाक येशूये गेपाका। वास्टै भूत आत्मा कोलाक येशूये छ्युका टर भूतकै होसकोकी चीन्डीच बाटै होसकै होखुरीककी ङाक्की माय्हा।#१:३४ लाहा सु हो डेम भूतकै भर्मीकोलाक डेम व्हाच कुरा येशूये माजाक्नन्या।
सुर मालेच ठावाङ येशूये जाट्च प्रार्थना
(लुका ४:४२-४४)
35होटै गोराक ट्याङ्खी डेनाङ अगाडी सोवार येशू सुर मालेच ठावाङ नुङा र प्रार्थना जाटा। 36सीमोन र मेन लाफाको येशूकी पाम नुङा। 37होसकोकी डुप्चपछी होखुरीकै डेया, “नाकोकी पट्टकै पामन ले।” 38टर येशूये होखुरीककी डेया, “रान्ही, काल्हाको खेरेपुङ अरु सहराङ नुइङ, होला र ङै सेछ समचार सेटाक्की डीन्हीङ, हीजैडेनाङ ङा इसे कामौ लागी न राछ हो।” 39होटै होसको गालील भरी होखुरीकुङ सभाङुच इम इमाङ सेछ समाचार सेटाक्चै र भूतकोलाक छ्युक्चै व्हा।
कुस्ठरोगीकी गेपाक्च
(मत्ती ८:१-४; लुका ५:१२-१६)
40अनी काट कुष्ठरोग लग्डीस्च भर्मी येशू लेठाङ राहा र घुँडा टुस्चै इट डेम बिन्ती जाटा, “नाकै मीमन जाटा डेनाङ ङाकी गेपाक्की#१:४० गेपाक्की सुड्ढ खास्की य्होक्ले।”#१:४० गेपाक्की: गीरीक भासाङ इट डेम रीक्ङने, “नाकै मीमन जाटा डेनाङ नाकै ङाकी सुड्ढ खास्की य्होक्ले।” यहुडीकुङ ब्यावस्ठाङ जो भर्मी याङ्च बीरामी छान्नन्या होसकी असुड्ढ मन्डीम्या; होटै होसे अरु भर्मी खेरेप नुङ्की माय्होक्नन्या। 41होटै होसकुङ मीमन डयै न्हेपा र लहो मीहुटै होसकी छुचै डेया, “ङा मीमन जाट्ले, नाको गेप्की क्योट्नी।” 42अनी होडीक न बेला होसे कुष्ठरोग लकीङ गेप्की क्योटा। 43होटै येशूये होसे भर्मीकी कडा आज्ञा याछै इट डेम तुरुन्तै बीर्न्हका, 44“नाकै इसे कुरा सुकीर मासेटाक्की टर नुङार नाकै लाहाकी पुजाहारी लेठाङ टान्हाकी होटै नाको गेप्च बाटै भर्मीकोलाक प्रमाणौ लागी मोशौ आज्ञा अनुसार भोग यान्ही।”#१:४४ होसबेला यहुडी चलनाङ, इडीक सुकीर कुस्ठरोग लग्डीस्नाङ होसे भर्मी अरु भर्मीको खाटा ङुकी माय्होक्नन्या। याङ्च भर्मी लाङ्घा बाहीर न ङुकी पर्च खासाक्नन्या। पुजाहारीकै मट्टै होङ्च भर्मीकी जाँच जाटार नाङ गेपा डेकी य्होक्न्या, होटै होसे भर्मी ल्हेस्की य्होक्न्या अनी अरु भर्मीको खाटा ङुकी डुप्नन्या। होसे भर्मीये मोशौ ब्यावस्ठा अनुसार पहीला हीर ठोकौ बलीडान याखी पर्नन्या। पडाङ इसे कुरा रीक्ङने। #लेवी १४:२-३२
45होटै होसे ख्योव्हार नुङा टर होचे होसे मेल्हा गेप्च कुरा खुल्लमखुल्ला भर्मीकोलाक सेटाक्की ठाला। होटबाटै येशू फेरी कुसेर सहराङ खुल्ला छानार नुङ्की माय्होका र सुर मालेच ठावाङ ङुकी नुङा। टर भर्मीको चहीँ पट्ट लकीङ होसको लेठाङ राहा।
Currently Selected:
मर्कूस 1: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
