प्रेरीत् 8
8
साऊलचे बीस्वासीमात दुख पीन्बल
1स्तीफनस्त सेत्पे म्हीमातेङ् साऊलएनो डीःबल मुबल। हुजु दीन् य्हङ्से यरुसलेमकी मन्डलीत बीरोद् लज्यीम् य्हक्को दुख पीन्ब तीप्ज्यी। होत्तज्यीम् प्रेरीतमा अय्हर्, तर ल्हो-ल्हो जम्मनो बीस्वासीमा छर्छुर् तज्यीम् यहुदीयातेङ् सामारीया प्रदेस्क्योर् य्हर्ज्यी। 2ओसेम् पर्मेस्वर्त तेन्बे डेत्-डेत् म्हीमाचे स्तीफनसकी स्यीबे ल्हीत बोर्ज्यीम् बुप्ज्यी। थेङ्यीमा स्तीफनस्त व्हल् लज्यीम् य्हक्को क्राज्यी।
3तर साऊलचेमी मन्डलीमात नास् लब छ्येटीब मुबल। ओसेम् दीम्-दीम्री वङ्ज्यीम् अपकोलतेङ् अमकोलमा जम्मतनो इज्यीम् डुत्पोर्ज्यीम् जेलन्हङ् च्युप्लाब मुबल।
फीलीपचे सामारीयारी ज्यबे सम्तर् स्येत्पल
4ओसेम् हुजु छ्र्छुर्ले य्हर्बे बीस्वासीमाचे खनगोदोब्नो ङ्यीज्यीम् ज्यबे सम्तर् स्येत्ज्यी। 5ओसेम् फीलीपचेम् सामारीया प्रदेस्की सहर् गीःरी ङ्यीज्यीम् मुक्ती न्हङ्बे ख्रीस्ट्की बारेरी स्येत्ज्यी। 6फीलीपचे पङ्बे तम्तेङ् थेचे स्य्हेङ्बे तेङेन्की लक् म्रङ्ज्यीम् य्हक्को म्हीमाचे थेइ तम् सेम्री ङ्यीज्यीम् ज्यनले ङ्येन्ज्यी। 7तलेपङ्सम् हुजुरी य्हक्को म्हीमा ग्यम्से अज्यबे आत्मामा क्रीङ्ज्यीम् डोङ्य्हर्ज्यी। ओसेम् या कङ् अचल्तीबे म्हीमाएनो फेन्ज्यी। 8होत्तज्यीम् हुजु सहर्की म्हीमा य्हक्कोनो तङ्ज्यी।
9हुजु सहर्री सीमोन पङ्बे म्ही गीः मुबल। थेचे य्हक्को बेलो ङोन्ग्यम् य्हङ्सेनो हुजु सहर्री जादु ङोन्ज्यीम् सामारीयाकी म्हीमात तेङेन् तनलबल मुबल। ओसेम् थेचे र्हङ्चे र्हङ्तनो ङ्हच्छ्यङ् म्ही म्हेन्ब मुबल। 10ओसेम् सहर्री मुबे ज्यीत ङ्हच्छ्यङ् जम्मनो म्हीमाचे “चु म्हीतेङ् पर्मेस्वर्की ‘गोदोब्न्हङ्की ङ्हच्छ्यङ् सक्ती’ पङ्बे सक्ती मुब” पङ्ज्यीम् थेइ तम् ङ्येन्ब मुबल। 11ओसेम् हुजु म्हीमाचे थेइ तम् ज्येन्ले ङ्येन्टीब मुबल। तलेपङ्सम् थेचे य्हक्को बेलो ङोन्ग्यम् य्हङ्सेनो जादु ङोन्ज्यीम् थेङ्यीमात तेङेन् तनलबल मुबल। 12तर फीलीपचे पर्मेस्वर्की य्हुल्तेङ् येसुइ बारेरी ज्यबे सम्तर्त स्येत्प बीसेम् थेङ्यीमाचे बीस्वास् स्य्हेङ्ज्यी। ओसेम् अपकोलतेङ् अमकोलमाचे बप्तीस्मा कीन्ज्यी। 13सीमोनचेएनो बीस्वास् लज्यीम् बप्तीस्मा कीन्ज्यी। ओसेम् फीलीप्तेङ् बक्च्य ब्रज्यी। ओसेम् फीलीपचे स्य्हेङ्बे ङ्हच्छ्यङ्-ङ्हच्छ्यङ् तेङेन्की लक्मा चीनोमा म्रङ्ज्यीम् थे तेङेन् तज्यी।
14यरुसलेमरी मुबे प्रेरीतमाचे सामारीयाकी म्हीमाचे पर्मेस्वर्की फ्रोइत पतइतीज्यी पङ्बे तम् थ्येःज्यीम् पत्रुसतेङ् युहन्नात थेङ्यीमाज पीत्ज्यी। 15पत्रुसतेङ् युहन्ना सामारीयारी दोखब बीसेम् बीस्वासीमाचे पबीत्र आत्मा यङ्खइ पङ्ज्यीम् प्रार्थना स्य्हेङ्ज्यी। 16तलेपङ्सम् हुजु बेलोसम्म थेङ्यीमा खलइ जोरीएनो पबीत्र आत्मा ब्योन्युबल अरेबल। थेङ्यीमा प्रभु येसुइ छेन्रीकीनो बप्तीस्मा तबल मुबल। 17ओसेम् पत्रुसतेङ् युहन्नाचे थेङ्यीमाइ जोरी या थेन्ज्यीम् प्रार्थना स्य्हेङ्ब बीसेम् थेङ्यीमाचे पबीत्र आत्मा यङ्ज्यी।
18प्रेरीतमाचे या थेन्पीन्बतेङ् म्हीमाचे पबीत्र आत्मा यङ्बल म्रङ्ज्यीम् सीमोनचे थेङ्यीमात टङ पीन्ज्यीम्, 19“ङतएनो चु सक्ती न्हङो, ओसेम् ङचेएनो म्हीमाकी जोरी या थेन्पीन्बतेङ् थेङ्यीमाचे पबीत्र आत्मा यङ्खइ” पङ्ज्यी। 20तर पत्रुसचे पङ्ज्यी, “एइ टङ एतेङ् बक्च्यनो नास् तखइ, तलेपङ्सम् एचे पर्मेस्वर्चे न्हङ्जेत्पे बर्दान्त टङचे ग्लुब खम्ब बी म्हेन्ज्यी। 21एल चु लक्री तइ बोएनो अरे। तलेपङ्सम् पर्मेस्वर्की ङोन्ग्यम् एइ सेम् ज्यब अरेबल टीम्। 22‘एचे म्हेन्बे हुजु अज्यबे तम्’ ग्यम्से पस्चताप् स्य्हेङ्ज्यीम् प्रभुतेङ् प्रार्थना स्य्हेङो। होले स्य्हेङ्सम् थेङ्चे एत क्षमा न्हङ्ल। 23तलेपङ्सम् एइ सेम् र्होत स्हेर्बचे प्लीङ्ज्यीम् पापचे खीःटीबल ङचे म्रङ्ज्यी।” 24ओसेम् सीमोनचे पत्रुसतेङ् युहन्नात, “थेङ् ङ्य्हीचे सुङ्बे तम्मा ङइ जोरी अखखइ बी थेङ् ङ्य्हीचेनो पर्मेस्वर्तेङ् ङइ लागीरी प्रार्थना स्य्हेङ्पीन्जेतो” बी पङ्ज्यी।
25हुजु लीप्चे पत्रुसतेङ् युहन्ना थेङ्हीचे म्रङ्बे येसुचे स्य्हेङ्जेत्पे लक्मातेङ् पर्मेस्वर्की फ्रोइ स्येत्ज्यीम् यरुसलेमरी दोःय्हर्ज्यी। थेङ्हीचे ग्यम्री सामारीयाकी नम्स-नम्समारीएनो ज्यबे सम्तर् स्येत्ज्यीम् य्हर्ज्यी।
फीलीप्तेङ् इथीयोपीयाकी सरकारी म्ही
26प्रभुइ स्वर्गदुत गीःचे फीलीप्त पङ्ज्यी, “ए रेःज्यीम् लो पट्टीरी यरुसलेम य्हङ्से गाजा ङ्यीबे ग्यम्री ङ्यीउ। हुजुरी उजाड-ग्लाइ ग्यम् मुब।” 27होत्तज्यीम् फीलीप रेःज्यीम् य्हर्ज्यी। हुजु बेलोरीनो थेचे इथीयोपीया य्हुल्की नपुंसक गीःत दोज्यी। हुजु नपुङ्सक् इथीयोपीया य्हुल्की रानी कन्दाकी#८:२७ कन्दाकी इथीयोपीया य्हुल्की रानीत कन्दाकी पङ्ज्यीम् ङ्होत्प मुबल।इ जम्म सम्पतीमाकी हाकीम मुबल। थे यरुसलेमरी पर्मेस्वर्त तेन्ज्यीम् दीम्री दोःखटीबल मुबल। 28ओसेम् रथरी टीज्यीम् यसैया अगम्बक्तचे ब्रीबे छ्येः खेत्टीब मुबल।
29हुजु लीप्चे पबीत्र आत्माचे फीलीप्त “ए हुजु रथकी रेइरी ङ्यीज्यीम् थेतेङ् बक्च्य ङ्यीउ” बी सुङ्ज्यी। 30फीलीप छ्योङ्य्हर्ज्यीम् हुजु म्हीइ रेइरी ङ्यीमम् हुजु म्हीचे यसैया अगबक्तकी छ्ये खेत्टीबल थ्येःज्यी। ओसेम् फीलीपचे थेत, “र्हङ्चे खेत्जेत्टीबे हुजु तम् गोजेत्प?” बी ङ्योत्ज्यी। 31ओसेम् हुजु हाकीम्चे “खल्चेएनो अलोपगदे ङचे खले गोस्ये?” बी पङ्ज्यी। ओसेम् हुजु हाकीम्चे फीलीप्त रथरी क्रेत्ज्यीम् थेतेङ् बक्च्य टीबुङ्ज्यी। 32थेचे खेत्टीबे धर्मइ छ्येःरी चोले ब्रीबल मुबल-
“थेङ् सेत्परी बोर्बे ग्यु र्हङ्ब मुबल,
ओसेम् थेङ् पेइ ब्रबतेङ् कुटीले टीबे ग्यु र्हङ्ले
तएनो असुङ्नले कुटीले स्य्हुज्यी।
33थेङ्त पेत्नलज्यी,
ओसेम् थेङ्चे ठीक् न्याय अय्हङ्।
थेङ्की सन्तान्की बारेरी खल्चेएनो स्येत्प अखम्,
तलेपङ्सम् थेङ्की जीवन जम्बुलीङ् ग्यम्से नोम्जेत्ज्यी।”
34ओसेम् हुजु नपुंसक्चे फीलीप्त चोले ङ्योत्ज्यी, “ङत स्येतो, चु तम् अगम्बक्तचे खलइ बारेरी पङ्बल य्हीन्ब? चु तम् र्हङ्की बारेरीनो पङ्बल वुइ ल्हो-ल्हो म्हीइ बारेरी पङ्बल?” 35हुजु लीप्चे फीलीपचे धर्म छ्येःइ हुजु बचन ग्यम्सेनो थेत येसुइ बारेरी ज्यबे सम्तर् स्येत्प तीप्ज्यी।#यसैया ५३:७-८
36“थेङ्यीमा ग्यम्री य्हर्टीमम् यी मुबे ग्लारी दोःज्यी। ओसेम् हुजु नपुङ्सक्चे फीलीप्त, ‘चुरी यी टीम्, देरेम् ङचे बप्तीस्मा कीन्बरी ताचे र्होद्ल?’” बी ङ्योत्ज्यी। 37[फीलीपचे थेत, “र्हङ्की सेम् य्हङ्सेनो बीस्वास् स्य्हेङ्सम् एचे बप्तीस्मा कीन्ब खम्ब” बी पङ्ज्यी। ओसेम् नपुङ्सक्चे, “येसु ख्रीस्ट्नो पर्मेस्वर्की ज य्हीन्ब बी ङ बीस्वास् स्य्हेङ्ब” बी पङ्ज्यी।] 38ओसेम् थेचे रथ र्होद्पुङ्ज्यी। हुजु लीप्चे थेङ्य्हीनो यी मुबे ग्लारी ङ्यीज्यीम् फीलीपचे थेत बप्तीस्मा पीन्ज्यी। 39थेङ्य्हीनो यी न्हङ्से डोङ्ब बीसेम् फीलीप्त प्रभुइ आत्माचे चुङ्ज्यीम् बोर्ज्यी। ओसेम् हुजु नपुङ्सक्चे फीलीप्त दोःज्यीम् अम्रङ्। तर थे तङ्-तङ्ज्यीम् दीम्री य्हर्ज्यी।
40तर फीलीपचे र्हङ् अस्दोद सहर्री दोःबल यङ्ज्यी। ओसेम् कैसरीया अदोगदेसम्म सहर्-सहर्मा तज्यीम् ज्यबे सम्तर् स्येत्ज्यीम् य्हर्ज्यी।
Currently Selected:
प्रेरीत् 8: WTDG
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
