युहन्ना 14
14
येसुनो ग्यम्, देमेन् ओसेम् जीवन्
1येसुचे थेङ्की डबमात सुङ्ज्यी, “एङ्यीमा सेम्री थछेरो, एङ्यीमाचे पर्मेस्वर्त बीस्वास् स्य्हेङो, ओसेम् ङतएनो बीस्वास् स्य्हेङो। 2ङइ अपइ दीम्री टीबे ग्लामा य्हक्को मुब। होले अरेबल य्हीन्सम् ङचे ङ एङ्यीमाकी लागीरी ग्ला टोप् लबरी ङ्यीटीब बी पङ्स्ये अरेबल। 3एङ्यीमाकी लागीरी ग्ला टोप् लब बीसेम् ङ दोःज्यीम् युस्ये मुब। ओसेम् एङ्यीमात ङइज बोर्स्ये मुब, ओसेम् ङ खन तज्यी हुजुरी एङ्यीमाएनो तस्ये मुब। 4ओसेम् ङ खन ङ्यीटीब, हुजुरी ङ्यीबे ग्यम् एङ्यीमाचे स्येब।”
5थोमाचे पङ्ज्यी, “प्रभु थेङ् खन स्येटीब ङ्यीमाचे अस्ये, झेन् थेङ् स्येबे ग्यम्मी खले स्येब स्यीम्?”
6येसुचे सुङ्ज्यी, “ङनो ग्यम्, देमेन् ओसेम् जीवन् य्हीन्ब। ङ ग्यम्से बीमा खलएनो अपज ङ्यीब अखम्। 7एङ्यीमाचे ङत देमेन्नो स्येबल पङ्सम् ङइ अपतएनो स्येस्ये मुबल। देरे य्हङ्से एङ्यीमाचे ङइ अपत स्येस्ये मुब, तलेपङ्सम् एङ्यीमाचे थेङ्त म्रङ्बल मुब।”
8ओसेम् फीलीप्चे थेङ्त, “प्रभु, ङ्यीमात अप ङोन्पीन्जेतो, ओसेम् ङ्यीमात होतेचेनो यो:ब” बी पङ्ज्यी।
9येसुचे थेत सुङ्ज्यी, “फीलीप, चोत्ते बेलोसम्म ङ एङ्यीमातेङ् बक्च्य मुब, होलेतलेनो एचे ङत स्येबल अरे? ङत म्रङ्बलचे अपत म्रङ्ज्यीन्बल मुब। ङत म्रङ्ज्यीमएनो एचे ङत तले ‘अप ङोन्पीनो’ बी पङ्ब? 10ङ अपतेङ् मुब, ओसेम् अप ङतेङ् मुब पङ्बे तम्त एचे बीस्वास् अस्य्हेङ्? एङ्यीमात पङ्टीबे तम्मा ङचे र्हङ्की तम् पङ्बल अय्हीन्। ङतेङ् मुबे अपचे थेङ्की लक् ङ ग्यम्से स्य्हेङ्जेत्प। 11ङ अपतेङ् मुब, ओसेम् अप ङतेङ् मुब, पङ्बे तम्त बीस्वास् स्य्हेङो। अय्हीन् पङ्सम् ङचे स्य्हेङ्बे लक्मा च्याज्यीम् बीस्वास् स्य्हेङो।
12“ङ एङ्यीमात देमेन्नो पङ्ब, ङत बीस्वास् स्य्हेङ्बलचे ङचे स्य्हेङ्ब र्हङ्बे लक्मा स्य्हेङ्स्ये मुब, ओसेम् हुजु बीम ङ्हच्छ्यङ् लक्माएनो स्य्हेङ्स्ये मुब, तलेपङ्सम् ङ अपज ङ्यीटीब। 13एङ्यीमाचे ङइ मीन्री ता र्हीत्लेनो ज ग्यम्से अपइ महीमा तखइ पङ्ज्यीम् हुजु ङचे टोप् लपीन्स्ये मुब। 14एङ्यीमाचे ङइ मीन्री ता र्हीत्लेनो हुजु ङचे स्य्हेङ्पीन्स्ये मुब।
पबीत्र आत्मा पीत्युजेत्स्ये पङ्बे बाचा
15“एङ्यीमाचे ङत म्होइसम् ङचे कुल्बे अर्तीमा ङ्येन्ज्यीम् ब्रस्ये मुब। 16ओसेम् ङ अपत र्हीत्स्ये मुब, थेङ्चे एङ्यीमात र्होलबरी पबीत्र आत्मा पीत्युजेत्स्ये मुब। ओसेम् थेङ् खेम पङ्लेनो एङ्यीमातेङ् बक्च्य तस्ये मुब। 17थेङ् देमेन्की आत्मा य्हीन्ब, तर जम्बुलीङ्की म्हीमाचे थेङ्त ग्रहन् स्य्हेङ् अखम्, तलेपङ्सम् थेङ्यीमाचे थेङ्त न्ह म्रङ्ब, न्ह स्येब। एङ्यीमाचेम् थेङ्त स्येब, तलेपङ्सम् थेङ् एङ्यीमातेङ् स्य्हुजेत्प, ओसेम् एङ्यीमातेङ्नो तस्ये मुब। 18ङ एङ्यीमात व्हङ्स्य कोलमा र्हङ्ले ख्लेथेन्स्ये अरे, ङ दोःज्यीम् एङ्यीमाज खस्ये मुब। 19देरेम् य्हम्बगी लीप्चे जम्बुलीङ्की म्हीमाचे ङत दोज्यीम् खेमेएनो म्रङ्स्ये अरे, तर एङ्यीमाचेम् ङत म्रङ्स्ये मुब। ङ सोम्बो तबल तज्यीम् एङ्यीमाएनो सोम्बो तस्ये मुब। 20हुजु बेलोरी एङ्यीमाचे ङ अपतेङ्, ओसेम् एङ्यीमा ङतेङ्, ओसेम् ङ एङ्यीमातेङ् मुब पङ्बे तम् गोस्ये मुब। 21ङचे कुल्बे अर्तीमा ङ्येन्ज्यीम् ब्रबलमाचे ङत म्होइब। ओसेम् ङत म्होइबलमात ङइ अपचेएनो म्होइजेत्स्ये मुब। ओसेम् ङचेएनो थेङ्यीमात म्हइस्ये मुब, ओसेम् ङचे र्हङ्त थेङ्यीमाज ङोन्स्ये मुब।”
22यहुदाचे (चुमी यहुदा इस्करीयोत अय्हीन्) थेङ्त पङ्ज्यी, “प्रभु, थेङ्चे र्हङ्त ङ्यीमातकीनो ङोन्जेत्प, तर जम्बुलीङ्की म्हीमात अय्हीन् बी ता सुङ्बल?”
23येसुचे थेत जोहप् न्हङ्ज्यी, “ङत म्होइबलमाचे ङचे पङ्बे तम् ङ्येन्ज्यीम् ब्रब। ओसेम् थेङ्यीमात ङइ अपचे म्होइजेत्स्ये मुब, ओसेम् अपतेङ् ङ थेङ्यीमाज युज्यीम् थेमातेङ् बक्च्य टीस्ये मुब। 24ङत अम्होइबलमाचे ङचे पङ्बे तम् अङ्येन्। एङ्यीमाचे थ्येःबे चु तम्मा ङल अय्हीन्, तर ङत पीत्युजेत्पे अपल य्हीन्ब।
25“ङ एङ्यीमातेङ् बक्च्य मुबे बेलोरीनो ङचे चु तम्मा पङ्बल मुब। 26तर अपचे एङ्यीमात र्हो लबरी ङइ मीन्री पबीत्र आत्मात पीत्युजेत्स्ये मुब। थेङ्चे एङ्यीमात जम्मनो तम्मा लोप्जेत्स्ये मुब, ओसेम् ङचे स्येत्पे जम्मनो तम्मा एङ्यीमात व्हल् खन लजेत्स्ये मुब। 27ङ एङ्यीमात सान्ती पीन्थेन्ब। ङ एङ्यीमात ङइ सान्ती पीन्ब, ओसेम् चु जम्बुलीङ्की सान्ती र्हङ्ब अय्हीन्। एङ्यीमाकी सेम् य्हक्को थछेरो, ओसेम् थलोङो।
28“ङचे एङ्यीमात ‘ङ य्हर्टीब, ओसेम् ङ दोःज्यीम् एङ्यीमाज युस्ये मुब’ पङ्बल एङ्यीमाचे थ्येःबल मुब। एङ्यीमाचे ङत देमेन्नो म्होइबल य्हीन्सम्, ङ अपज ङ्यीबतेङ् एङ्यीमा तङ्स्ये मुबल, तलेपङ्सम् ङ बीमम् अपनो ङ्हच्छ्यङ् मुब। 29ङचे चु तम्मा तब बीमा ङोन्नो एङ्यीमात पङ्ज्यीन्बल मुब, होत्तज्यीम् चु तम्मा टोप् तबतेङ् एङ्यीमाचे बीस्वास् स्य्हेङ्स्ये मुब। 30देरे ङ एङ्यीमातेङ् य्हक्को बेलो तम् पङ्अम्यङ्, तलेपङ्सम् चु जम्बुलीङ्की सासक् खटीबल मुब। य्हीम्बरीम् थेचे ङत तएनो लब खम्स्ये अरे। 31तर जम्बुलीङ्की जम्मनो म्हीमाचे ङचे अपत म्होइब पङ्बे तम् स्येखइ बी थेङ्चे कुल्जेत्प र्हङ्लेनो ङ स्य्हेङ्ब। ब्रे, ङ्य्हङ्मा चु ग्लासे य्हर्के।”
Currently Selected:
युहन्ना 14: WTDG
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
