युहन्ना 16
16
1“एङ्यीमाचे बीस्वास् स्य्हेङ्ब अपीत्खइ बी ङचे एङ्यीमात चु तम्मा पङ्बल य्हीन्ब। 2एङ्यीमात यहुदीमा र्हुब् तबे दीम्माचे तेत्लास्ये मुब। ओसेम् चोतेबे बेलो खस्ये मुब, एङ्यीमात सेत्पे म्हीमाचे पर्मेस्वर्त सेवा स्य्हेङ्टीब बी थेङ्यीमाचे म्हेन्स्ये मुब। 3थेङ्यीमाचे चोतेबे लक्मा स्य्हेङ्स्ये मुब, तलेपङ्सम् थेङ्यीमाचे न्हा पर्मेस्वर् अपत स्येज्यी, न्हा ङत स्येज्यी। 4चु तम्म ङचे एङ्यीमात स्येत्पीन्बल मुब, ङचे पङ्बे तम् एङ्यीमाचे हुजु बेलो खबतेङ् व्हल् लस्ये मुब। ङचे एङ्यीमात चु तम् ङोन्ग्यम्नो अपङ्, तलेपङ्सम् ङ एङ्यीमातेङ्नो मुबल।
पबीत्र आत्माइ लक्
5“तर देरेम् ङ ङत पीत्युजेत्पलइज ङ्यीटीब, तर एङ्यीमा खल्चेएनो ङत, ‘थेङ् खन स्येटीब?’ बी अङ्योत्। 6ङचे एङ्यीमात चु तम्मा पङ्बल तज्यीम् एङ्यीमाकी सेम् दुखचे प्लीङ्बल मुब। 7तर ङ एङ्यीमात देमेन्की तम् पङ्ब, ङ ङ्यीबरीनो एङ्यीमात ज्यब तब, तलेपङ्सम् ङ अङ्यीज्यी पङ्सम् पबीत्र आत्मा ब्योन्युस्ये अरे। तर ङ्यीज्यी पङ्सम् ङ थेङ्त एङ्यीमाज पीत्युस्ये मुब। 8थेङ् ब्योन्युब बीसेम् जम्बुलीङ्की म्हीमात पापतेङ् धार्मीक्त ओसेम् न्यायइ बारेरी दोस् ङोन्जेत्स्ये मुब। 9ङत बीस्वास् अस्य्हेङ्बनो पाप य्हीन्ब बी थेङ्चे म्हीमात ङोन्स्ये मुब। 10थेङ्चे पर्मेस्वर्की धार्मीक्ताकी बारेरी म्हीमात स्येत्जेत्स्ये मुब, तलेपङ्सम् ङ अपज ङ्यीटीब, ओसेम् दोःज्यीम् एङ्यीमाचे ङत म्रङ्स्ये अरे। 11ओसेम् पर्मेस्वर्की न्यायकी बारेरी थेङ्यीमात ङोन्जेत्स्ये मुब, तलेपङ्सम् चु जम्बुलीङ्की सासक् ङोन्नो दोसी तज्यीन्बल मुब।
12“ङचे एङ्यीमात पङ्थोबे तम्मी य्हक्कोनो मुब, तर देरे एङ्यीमाचे हुजु तम्म गोब अखम्। 13लीक्क्यम् देमेन्की आत्मा ब्योन्युब बीसेम् थेङ्चेनो एङ्यीमात देमेन्की ग्यम् ङोन्जेत्स्ये मुब। थेङ्चे र्हङ्की तम् सुङ्जेत्स्ये अरे, थेङ्चे ता सेन्जेत्ज्यी हुजुनो सुङ्जेत्स्ये मुब, ओसेम् लीक्यम् तस्येकी तम्मा सुङ्जेत्स्ये मुब। 14थेङ्चे ङइ महीमा स्य्हेङ्जेत्स्ये मुब। ओसेम् थेङ्चे ङइ तम् कीन्जेत्ज्यीम् हुजु एङ्यीमात स्येत्जेत्स्ये मुब। 15अपतेङ् मुबलमा जम्मनो ङलएनो य्हीन्ब। होत्तज्यीम् देमेन्की आत्माचे ङइ तम् कीन्जेत्ज्यीम् हुजु एङ्यीमात स्येत्स्ये मुब बी पङ्बल य्हीन्ब।”
डबमाकी दुखतेङ् तङ्ब
16येसुचे डबमात सुङ्ज्यी, “य्हम्बगी लीप्चे एङ्यीमाचे ङत म्रङ्स्ये अरे। तर य्हम्बगी लीप्चे देबेएनो एङ्यीमाचे ङत म्रङ्स्ये मुब।” 17ओसेम् थेङ्की डेत् डेत् डबमाचे र्हङ्न्हङ्री गीःचे गीःत, “‘य्हम्बगी लीप्चे एङ्यीमाचे ङत म्रङ्स्ये अरे, तर य्हम्बगी लीप्चे देबेएनो एङ्यीमाचे ङत म्रङ्स्ये मुब’, ओसेम् ‘ङ अपज ङ्यीटीब’ बीएनो सुङ्ब, चु ता सुङ्बल य्हीन्ज्यी?” बी ङ्योत्ज्यी। 18ओसेम् थेङ्यीमा र्हङ्न्हङ्, “‘चु य्हम्बगी लीप्चे’ बी सुङ्बल ता? ङ्य्हङ्माचेम् अगो” बी पङ्ज्यी।
19थेङ्यीमाचे चु तम्की बारेरी ङ्योत्पे सेम् लटीबल मुब पङ्बे तम् खेम्ज्यीम् येसुचे थेङ्यीमात सुङ्ज्यी, “ङचे एङ्यीमात, ‘य्हम्बगी लीप्चे एङ्यीमाचे ङत म्रङ्स्ये अरे। तर य्हम्बगी लीप्चे देबेएनो एङ्यीमाचे ङत म्रङ्स्ये मुब’ पङ्बल ता बी एङ्यीमा र्हङ्न्हङ्री गीःचे गीःत ङ्योत्टीब? 20ङ एङ्यीमात देमेन्नो पङ्ब, एङ्यीमा य्हक्को क्रास्ये मुब, तर जम्बुलीङ्की म्हीमाम् तङ्स्ये मुब। तर एङ्यीमाकी दुख लीक्क्यम्मी तङ्बरी दोःस्ये मुब। 21अमकोलचे कोल न्हयम्बे बेलोरी दुखचे य्हक्को बोलोक्प, तर कोल न्हब बीसेम् जम्बुलीङ्री छार् कोल गी डोङ्ज्यी पङ्ज्यीम् हुजु दुख म्लेत्ज्यीम् थे तङ्ब। 22एङ्यीमातएनो होले तब, देरे एङ्यीमात य्हक्को दुख तब, तर ङचे एङ्यीमात लीक्यम् दोःज्यीम् म्रङ्बे बेलोरी एङ्यीमाकी सेम् तङ्बचे प्लीङ्स्ये मुब। ओसेम् एङ्यीमाकी हुजु तङ्बत खल्चेएनो एङ्यीमा ग्यम्से ब्येन्बोर्ब खम्स्ये अरे। 23हुजु बेलोरी एङ्यीमाचे ङत तएनो ङ्योत्स्ये अरे। ङ एङ्यीमात देमेन्नो पङ्ब, एङ्यीमाचे ङइ मीन्री अपत ता र्हीत्ज्यी, थेङ्चे एङ्यीमात न्हङ्जेत्स्ये मुब। 24देरेसम्म एङ्यीमाचे ङइ मीन्री ताएनो र्हीत्पल अरे। र्हीतो, एङ्यीमाचे यङ्स्ये मुब, ओसेम् एङ्यीमा तङ्बचे प्लीङ्स्ये मुब।
जम्बुलीतेङ् डाबल
25“ङचे एङ्यीमात चु तम्मा अर्थरी पङ्बल मुब, तर बेलो खयम्बल मुब, हुजु बेलोरी ङ एङ्यीमात अर्थरी तम् पङ्स्ये अरे। तर अपइ बारेरी एङ्यीमाचे गोनले स्येत्स्ये मुब। 26हुजु बेलोरी एङ्यीमाचेनो ङइ मीन्री र्हीत्स्ये मुब, ङचे एङ्यीमाकी लागीरी अपत फ्या लथोस्ये अरे। 27अपचे एङ्यीमात म्होइजेत्प, तलेपङ्सम् एङ्यीमाचे ङत म्होइबल मुब, ओसेम् ङ पर्मेस्वर् ग्यम्से युबल य्हीन्ब बी एङ्यीमाचे बीस्वास् स्य्हेङ्बल मुब। 28ङ अप ग्यम्सेनो जम्बुलीङ्री युबल य्हीन्ब। ओसेम् देरेम् ङ जम्बुलीङ्त ख्लेथेन्ज्यीम् अपज दोःज्यीम् य्हर्टीब।”
29हुजु लीप्चे डबमाचे थेङ्त पङ्ज्यी, “देरेम् थेङ् अर्थरी अय्हीन्, ङ्यीमाचे गोनले सुङ्जेत्टीब। 30थेङ्चे जम्मनो तम्मा खेम्जेत्प बी देरेम् ङ्यीमाचे गोज्यी। थेङ्त खल्चेएनो तइ तमएनो ङ्योत्टी अथो। होले तज्यीम् थेङ् पर्मेस्वर् ग्यम्सेनो ब्योन्युबल बी ङ्यीमाचे बीस्वास् स्य्हेङ्ब।” 31ओसेम् येसुचे सुङ्ज्यी, “एङ्यीमाचे ङत देरे बीस्वास् स्य्हेङ्ब? 32ङ्येनो, एङ्यीमाचे ङ गीःकीनो ख्लेथेन्ज्यीम् एङ्यीमा छर्छुर् तज्यीम् र्हङ् र्हङ्की ग्यम्से य्हर्बे बेलो खयम्बल मुब, ओसेम् खज्यीन्बल मुब। तर ङ गीःकीनो तस्ये अरे, तलेपङ्सम् अप ङतेङ् बक्च्य मुब।
33“एङ्यीमाचे ङतेङ् सान्ती यङ्खइ पङ्ज्यीम् ङचे एङ्यीमात चु तम्मा पङ्बल य्हीन्ब। जम्बुलीङ्री एङ्यीमात दुख तस्ये मुब, तर आर् लउ, जम्बुलीङ्त ङचे डाबल मुब।”
Currently Selected:
युहन्ना 16: WTDG
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
