युहन्ना 6
6
येसुचे हजार ङ्ह म्हीमात ख्वाजेत्पल
(मत्ती १४:१३-२१; मर्कुस् ६:३०-४४; लुका ९:१०-१७)
1हुजु लीप्चे येसु गालील ग्ये तार्तीज्यीम् क्योम्सङ् स्येःजेत्ज्यी। (हुजु ग्येत तीबेरीयस् ग्येएनो पङ्ब।) 2ओसेम् य्हक्को म्हीमा थेङ्की लीप्चे ब्रज्यी, तलेपङ्सम् थेङ्चे नबे म्हीमात फेन्नलबे अचम्मइ चीनोमा थेङ्यीमाचे म्रङ्बल मुबल। 3ओसेम् येसु गङ्जोरी स्येःज्यीम् डबमातेङ् बक्च्य स्य्हुजेत्ज्यी। 4हुजु बेलोरी यहुदीमाकी नीस्तार पर्व खय्हम्टीब मुबल।
5ओसेम् येसुचे कोरोरो स्हीजेत्मम् य्हक्को म्हीमा थेङ्ज खटीबल म्रङ्जेत्ज्यी, ओसेम् थेङ्चे फीलीप्त ङ्योत्जेत्ज्यी, “चु म्हीमात ख्वाबे लागीरी ङ्य्हङ्माचे ग्येङ् खन ग्लुब?” 6थेङ्चे फीलीपकी सेम् य्होलबे लागीरी चोले सुङ्बल मुबल, तर थेङ्चे ता स्य्हेङ्ब छ्येःटीबल मुब हुजु थेङ्त था मुबल। 7फीलीपचे पङ्ज्यी, “जम्मतनो ग्येङ् चेक-चेक्कीनो पीन्लेएनो मन ङ्ही म्हुइकी टङ#६:७ मन ङ्ही म्हुइकी टङ मन ङ्ही म्हुइकी टङ म्ही गीःचे ल ब्रेत् लक् स्य्हेङ्बतेङ् यङ्ब मुबल। चेएनो ग्लुबरी योस्ये अरे।”
8हुजु लीप्चे येसुइ ल्हो-ल्हो डब गीः सीमोन पत्रुसकी अले अन्द्रीयासचे पङ्ज्यी, 9“चुरी, ठीट गीः मुब, थेतेङ् जौकी ग्येङ् ङ्हतेङ् तर्ङ ङ्ही मुब। तर चोत्ते म्हीमाकी लागीरी होदेचेकीनो यो:ल स्यीम्?”
10येसुचे डबमात सुङ्ज्यी, “म्हीमात टीबुङो।” हुजुरी छ्यी मुबे ङ्हच्छ्यङ् पङ्गर् मुबल ओसेम् म्हीमा हुजुरी टीज्यी। हुजु म्हीमा न्हङ्री हजार ङ्हइ था अपकोलमा मुबल। 11ओसेम् येसुचे ग्येङ् कीन्जेत्ज्यीम् पर्मेस्वर्त व्होर्छ्ये न्हङ्ज्यीम् हुजुरी टीबे म्हीमात जुपीनो बी डबमात न्हङ्ज्यी। ओसेम् तर्ङएनो कीन्जेत्ज्यीम् पर्मेस्वर्त व्होर्छ्ये न्हङ्ज्यीम् जुपीनो बी थेङ्यीमात न्हङ्ज्यी। ओसेम् थेङ्यीमा जम्मचेनो म्रेन्ब सम्म चज्यी। 12थेङ्यीमाचे म्रेन्ब सम्म चब बीसेम् येसुचे डबमात सुङ्ज्यी, “ल्हाबे ग्येङ्मा र्हुबो, ओसेम् चेकेएनो खेर अय्हर्खइ।” 13ओसेम् थेङ्यीमाचे जौकी ग्येङ् ङ्ह ग्यम्से चज्यीम् ल्हाबलमा डलो चुङ् ङ्ही नङ्-नङ् र्हुब् लज्यी।
14थेङ्चे स्य्हेङ्जेत्पे चु अचम्मइ लक् म्रङ्ब बीसेम् म्हीमाचे पङ्ज्यी, “देमेन्नो थेङ्नो जम्बुलीङ्री ब्योन्युस्येकी अगम्बक्त य्हीन्ब।” 15ओसेम् म्हीमाचे थेङ्त नासेन्लेनो थेङ्यीमाकी ग्यल्बो स्य्हेङ्बरी खब म्हइटीबे तम् खेम्ज्यीम् येसु देबेएनो र्हङ् गीःकीनो गङ्तोर् स्येजेत्ज्यी।
येसु यी जोसे ब्रजेत्पल
(मत्ती १४:२२-३३; मर्कुस् ६:४५-५२)
16ङ्येसे तब बीसेम् येसुइ डबमा ग्येइ यमोर् ङ्यीज्यी। 17ओसेम् थेङ्यीमा दोङ्ग क्रेत्ज्यीम् कफर्नहुम् लीङ्स्री ङ्यीबरी ग्येइ क्योम्सङ् य्हर्ज्यी। म्हुन्दुङ् तज्यीन्बल मुबल, ओसेम् येसु दवम् सम्म थेङ्यीमाज ब्योन्खबल अरेबल। 18ओसेम् लाब लुङ् स्यङ्टीबल तज्यीम् छाल् खब म्हइज्यी। 19डबमा दोङ्ग स्यङ्ज्यीम् कीलोमीटर ङ्हते डुःते र्हङ्ब य्हर्ज्यीन्बल मुबल। हुजु बेलोरीनो थेङ्यीमाचे येसुत ग्येजोसे ब्रजेत्ज्यीम् दोङ्गइ रेइरी ब्योन्खटीबल म्रङ्ज्यी। ओसेम् थेङ्यीमा लोङ्ज्यी। 20तर येसुचे थेङ्यीमात, “थलोङो, ङ य्हीन्ब” बी सुङ्ज्यी। 21हुजु लीप्चे थेङ्यीमा तङ्ज्यीम् थेङ्त दोङ्गरी थेन्ज्यी, ओसेम् ग्योनेनो थेङ्यीमा य्हर्टीबे ग्लारी दोःज्यी।
22ग्येइ क्योम्सङ् टीबे म्हीमाचे ग्येइ यरी दोङ्ग गीःकीनो म्रङ्बल मुबल। ओसेम् थेङ् हुजु दोङ्गरी अक्रेत्जेत्पलतेङ् थेङ्की डबमाकीनो दोङ्गरी क्रेत्ज्यीम् य्हर्बल म्हीमाचे न्हम्स्य्होर्हङ् व्हल् खज्यी। 23ओसेम् प्रभुचे व्होर्छ्ये न्हङ्ज्यीम् म्हीमात ग्येङ् ख्वाजेत्पे ग्लाकी रेइरी तीबेरीयस् ग्यम्से खबे ल्हो-ल्हो दोङ्गमा दोखज्यी। 24ओसेम् येसुतेङ् थेङ्की डबमा हुजुरी अम्रङ्ज्यीम् हुजु म्हीमा दोङ्गमा क्रेत्ज्यीम् कफर्नहुम्क्योर् थेङ्त म्हइबरी ङ्यीज्यी।
येसु जीवन न्हङ्बे ग्येङ्
25म्हीमाचे येसुत ग्येइ क्योम्सङ् खतु तब बीसेम्, “लोप्पोन्, थेङ् चुरी खेम ब्योन्खबल?” बी ङ्योत्ज्यी।
26येसुचे थेङ्यीमात जोहाप् न्हङ्ज्यी, “देमेन्नो ङ एङ्यीमात पङ्ब, एङ्यीमाचे ङत ङचे ङोन्बे चीनोमा म्रङ्ज्यीम् अय्हीन्, तर म्रेन्बसम्मा ग्येङ् चबरी पीन्बल तज्यीम् म्हइबल य्हीन्ब। 27क्रम्ज्यीम् य्हर्बे चबइ लागीरी लक् थस्य्हेङो, तर खेमेएनो अबेबे जीवनसम्म टीबे चबइ लागीरी लक् स्य्हेङो। हुजु एङ्यीमात म्हीइ जचे पीन्स्ये मुब, तलेपङ्सम् पर्मेस्वर् अपचेनो थेत हुजु लक् स्य्हेङ्बे हक् न्हङ्बल मुब।”
28हुजु लीप्चे म्हीमाचे थेङ्त, “पर्मेस्वर्चे थुः लजेत्पे लक्मा स्य्हेङ्बरी ङ्यीमाचे ता स्य्हेङ्थोब?” बी ङ्योत्ज्यी।
29येसुचे थेङ्यीमात, “पर्मेस्वर्चे थुः लजेत्पे लक्मा चुनो य्हीन्ब, थेङ्चे पीत्युजेत्पलत बीस्वास् स्य्हेङो” बी जोहाप् न्हङ्ज्यी।
30थेङ्यीमाचे थेङ्त पङ्ज्यी, “थेङ्चे ङ्यीमात खतेबे अचम्मइ चीनोमा ङोन्जेत्प, ओसेम् हुजु च्याज्यीम् थेङ्त बीस्वास् स्य्हेङ्ब? थेङ्चे ता स्य्हेङ्जेत्प? 31ङ्य्हङ्की म्हेमेमाचे उजाड ग्लारी मन्न चज्यी। हुजुइ बारेरी धर्म छ्येःरी, ‘थेङ्चे थेङ्यीमात स्वर्गइ ग्येङ् चपुङ्जेत्ज्यी’#प्रस्थान १६:४,१५; भजनसंग्रह ७८:२४ बी ब्रीबल मुब।”
32येसुचे थेङ्यीमात सुङ्ज्यी, “ङ एङ्यीमात देमेन्नो पङ्ब, एङ्यीमात स्वर्गइ ग्येङ् पीन्बल मोसा अय्हीन्, तर ङइ अप य्हीन्ब, थेङ्चे एङ्यीमात स्वर्गइ देमेन्की ग्येङ् न्हङ्ब। 33पर्मेस्वर्चे न्हङ्बे ग्येङ्मी थेनो य्हीन्ब, थे स्वर्ग ग्यम्से युज्यीम् जम्बुलीङ्त जीवन् पीन्ब।”
34थेङ्यीमाचे थेङ्त, “लोप्पोन्, हुजु ग्येङ् ङ्यीमात खेमपङ्लेनो न्हङ्जेतो” बी पङ्ज्यी।
35हुजु लीप्चे येसुचे थेङ्यीमात सुङ्ज्यी, “जीवन पीन्बे ग्येङ् ङनो य्हीन्ब। ङइज खबल ख्रेन्स्ये अरे ओसेम् ङत बीस्वास् स्य्हेङ्बल खेमेएनो फीःस्ये अरे। 36तर ङचे एङ्यीमात पङ्ज्यीन्बल मुब, एङ्यीमाचे ङत म्रङ्ज्यीमएनो बीस्वास् अस्य्हेङ्। 37अपचे ङत न्हङ्जेत्पलमा जम्मनो ङइज खस्ये मुब, ओसेम् ङइज खबलमात ङचे खेमेएनो ख्लास्ये अरे। 38तलेपङ्सम् ङ ङचे म्हेन्बल टोप् लबरी अय्हीन् तर ङत पीत्युजेत्पलइ थुः टोप् लबरी स्वर्ग ग्यम्से युबल य्हीन्ब। 39ङत पीत्युजेत्पलइ थुः चुनो य्हीन्ब, थेङ्चे ङत न्हङ्जेत्पलमा खलतएनो खेमेएनो म्हन अलखइ, तर ज्युःकी दीन्री थेङ्यीमात सोन लखइ। 40तलेपङ्सम् ङइ अपइ थुः चुनो य्हीन्ब, थेङ्की जत च्याबलतेङ् बीस्वास् स्य्हेङ्बलमा जम्मचेनो खेमेएनो अबेबे जीवन् यङ्खइ, ओसेम् ज्युःकी दीन्री ङचे थेङ्यीमात सोन लस्ये मुब।”
41हुजु लीप्चे यहुदी अगुवामाचे थेङ्की बारेरी गन्गन् लब तीप्ज्यी, तलेपङ्सम् थेङ्चे, “ङ स्वर्ग ग्यम्से युबे ग्येङ् य्हीन्ब” बी सुङ्बल मुबल। 42थेङ्यीमाचे पङ्ज्यी, “चु योसेफकी ज येसु अय्हीनो स्यीम्? थेइ अप अमत ङ्य्हङ्माचे अस्येउ स्यीम्? चुजे खले, ‘ङ स्वर्गचे युबल’ बी पङ्ब?”
43येसुचे थेङ्यीमात सुङ्ज्यी, “एङ्यीमा र्हङ्न्हङ्री गन्गन् लब पीतो। 44ङत पीत्युजेत्पे अपचे ङइज खबे सेम् अन्हङ्सम् खलएनो ङइज खअखम्, ओसेम् ङइज खबलमात ङचे ज्युःकी दीन्री सोन लस्ये मुब। 45ओसेम् ‘पर्मेस्वर् ग्यम्सेनो जम्मनो म्हीमात लोप्जेत्स्ये मुब’ बी अगम्बक्तमाचे ब्रीबल मुब। अप ग्यम्से थ्येःबलमातेङ् लोप्पलमा जम्मनो ङइज खब। 46पर्मेस्वर् अपत खल्चेएनो म्रङ्बल अरे। पर्मेस्वर् ग्यम्से युबलचेकीनो अपत म्रङ्बल मुब। 47ङ देमेन्नो एङ्यीमात पङ्ब, बीस्वास् स्य्हेङ्बलतेङ् खेमेएनो अबेबे जीवन् मुब। 48जीवन्की ग्येङ् ङनो य्हीन्ब। 49एङ्यीमाकी म्हेमेमाचे उजाड-ग्लारी मन्न चज्यी, तर थेङ्यीमा स्यीज्यीम् य्हर्ज्यी। 50तर स्वर्ग ग्यम्से युबे ग्येङ् चुनो य्हीन्ब, खल्चे चु ग्येङ् चब हुजु स्यीस्ये अरे। 51स्वर्ग ग्यम्से युबे जीवन पीन्बे ग्येङ् ङनो य्हीन्ब। खल्चे चु ग्येङ् चज्यी हुजु खेम पङ्लेनो सोस्ये मुब। ङचे पीन्स्येकी ग्येङ् ङइ ल्ही य्हीन्ब। ङइ ल्ही जम्बुलीङ्की म्हीमाचे जीवन् यङ्खइ पङ्ज्यीम् पीन्स्ये मुब।”
52चु तम्चे लज्यीम् यहुदीमान्हङ् तम् ज्योप्ज्यी। ओसेम् थेङ्यीमाचे, “खले चु म्हीचे ङ्य्हङ्मात थेइ ल्हीः चबरी पीन्ब खम्ब?” बी ङ्योत्ज्यी। 53येसुचे थेङ्यीमात सुङ्ज्यी, “देमेन्नो ङ एङ्यीमात पङ्ब, एङ्यीमाचे म्हीइ जइ ल्हीः अचज्यी, ओसेम् थेइ का अथुङ्ज्यी पङ्सम् एङ्यीमातेङ् जीवन् अत। 54ङइ ल्हीः चबलतेङ् ङइ का थुङ्बलचे खेमेएनो अबेबे जीवन् यङ्ब, ओसेम् ज्युःकी दीन्री ङ थेत सोन लस्ये मुब। 55तलेपङ्सम् ङइ ल्हीः देमेन्की चबे स्य्हे य्हीन्ब, ओसेम् ङइ का देमेन्की थुङ्बे स्य्हे य्हीन्ब। 56ङइ ल्हीः चबलतेङ् ङइ का थुङ्बल ङतेङ् तब, ओसेम् ङ थेतेङ् तब। 57खले सोम्बो अपचे ङत पीत्युजेत्ज्यी, ओसेम् थेङ्चे लज्यीम् ङ सोब, होलेनो ङत चबलएनो ङचे लज्यीम् सोस्ये मुब। 58चु ग्येङ् स्वर्ग ग्यम्से युबल य्हीन्ब, चु ग्येङ् एङ्यीमाकी म्हेमेमाचे चबल र्हङ्ब अय्हीन्, थेङ्यीमाचे हुजु ग्येङ् चज्यीमएनो स्यीज्यी, तर चु ग्येङ् चबलमा खेम पङ्लेनो सोस्ये मुब।”
59चु फ्रोइमा येसुचे कफर्नहुम्की यहुदीमा र्हुब् तबे दीम्री लोप्जेत्पे बेलोरी सुङ्जेत्पल मुबल।
खेमेएनो अबेबे जीवन्की फ्रोइ
60चु तम् थ्येःब बीसेम् येसुइ य्हक्को डबमाचे र्हङ्-र्हङ्न्हङ्, “चु तम्मी य्हक्को गारो मुब, चु तम्त खल्चे ङ्येन्ब खम्ब?” बी पङ्ज्यी।
61तर थेङ्की डबमा चु तम्री गन्गन् स्य्हेङ्टीबल खेम्जेत्ज्यीम् थेङ्चे थेङ्यीमात सुङ्ज्यी, “ता चु तम्चे एङ्यीमात गारो तटीब? 62होलेपङ्सम् एङ्यीमाचे म्हीइ जत ङोन्ग्यम् थे टीबे स्वर्गरी दोःबल म्रङ्ज्यी पङ्सम् ता लब? 63आत्माचेकीनो खेमेएनो अबेबे जीवन् पीन्ब, म्हीइ बङ्चे तएनो स्य्हेङ् अखम्। ङचे एङ्यीमात पङ्बे तम्मानो आत्मातेङ् जीवन् य्हीन्ब। 64तर एङ्यीमान्हङ्री गदेचे ङत बीस्वास् अस्य्हेङ्।” (तलेपङ्सम् बीस्वास् अस्य्हेङ्बलमा खल-खल य्हीन्ब, ओसेम् थेङ्त खल्चे चुङ्न लपीन्स्ये मुब पङ्बे तम् येसुचे थेङ्की लक् चुःब य्हङ्सेनो खेम्जेत्पल मुबल।) 65ओसेम् देबेएनो येसुचे सुङ्ज्यी, “होत्तज्यीम् ङचे एङ्यीमात पङ्बल य्हीन्ब, ङइ अपचे ङइज खबे सेम् अन्हङ्गदे खलएनो ङइज खब अखम्।” 66हुजु लीप्चे थेङ्की डबमान्हङ्री य्हक्को दोःज्यी, ओसेम् थेङ्की लीप्चे ब्रब पीत्ज्यी।
67होत्तज्यीम् येसुचे चुङ्ङ्य्ही डबमात, “ता एङ्यीमाएनो ङत पीत्थेन्ज्यीम् य्हर्ब?” बी ङ्योत्जेत्ज्यी। 68सीमोन पत्रुसचे पङ्ज्यी, “प्रभु, ङ्यीमा खन, खलइज ङ्यीब? खेमेएनो अबेबे जीवन् यङ्बे फ्रोइ थेङ्तेङ् मुब। 69थेङ्नो पर्मेस्वर्की पबीत्र म्ही य्हीन्ब बी स्येःज्यीम् ङ्यीमाचे थेङ्त बीस्वास् स्य्हेङ्बल मुब।” 70ओसेम् येसुचे थेङ्यीमात जोहाप् न्हङ्ज्यी, “एङ्यीमा चुङ्य्हीत ङचेनो दम्बल य्हीन्ब। तर एङ्यीमान्हङ्री गीःचे सैतान्की तम् ङ्येन्ज्यीम् धोक पीन्स्ये मुब।” 71येसुचे चु तम् सीमोन इस्करीयोतकी ज यहुदाकी बारेरी सुङ्बल मुबल, तलेपङ्सम् चुङ्ङ्य्हीन्हङ्री गीः तज्यीमएनो थेचे थेङ्त लीक्यम् चुङ्न लपीन्स्ये मुबल।
Currently Selected:
युहन्ना 6: WTDG
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
