लुका 18
18
र्हेम्बो स्यीबे अमकोलतेङ् न्यायधीस्
1हुजु लीप्चे येसुचे थेङ्की डबमात खेमेनो अपीत्नले प्रार्थना स्य्हेङ्थोब बी अर्थ गीः सुङ्ज्यी। 2“ज्यीत सहर् गीःरी पर्मेस्वर्तेङ् अलोङ्बे ओसेम् खल म्हीतेएनो स्य्हेस अस्य्हेङ्बे न्यायधीस् गीः मुबल। 3हुजु ज्यीत सहर्रीनो र्हेम्बो स्यीबे अमकोल गीः मुबल। थे य्हम्चे य्हम्रीनो न्यायधीस्ज खज्यीम्, ‘ङत ङइ सत्तुर् ग्यम्चे न्याय स्य्हेङ्पीनो’ बी पङ्ब मुबल। 4तोव दीन्सम्म न्यायधीसचे र्हेम्बो स्यीबे अमकोलइ तम् अङ्येन्। तर लीक्यम् थेचे र्हङ्चे र्हङ्तनो पङ्ज्यी, ‘ङ पर्मेस्वर्तेङ्एनो अलोङ्। ओसेम् म्हीमातएनो स्य्हेस अस्य्हेङ्। 5तर चु र्हेम्बो स्यीबे अमकोल य्हम्चे य्हम्रीनो खज्यीम् ङत दुख पीन्बल तज्यीम् ङ थेइ न्याय स्य्हेङ्पीन्ब। अय्हीन् पङ्सम् थे खस्यीनो टीज्यीम् ङत नर्सु लस्ये मुब।’”
6ओसेम् प्रभुचे सुङ्ज्यी, “ङ्येनो, हुजु अधर्मी न्यायधीस्चे ता पङ्बटीम्। 7होलेनो दीन्-म्हुन् क्राज्यीम् पर्मेस्वर्तेङ् प्रार्थना स्य्हेङ्बे र्हङ्की म्हीमात थेङ्चे अन्याय ग्यम्चे थर्न अल स्यीम्? ओसेम् थेङ्चे र्हङ्की म्हीमात न्याय पीन्बरी गेःल स्यीम्? 8ङ एङ्यीमात पङ्ब, थेङ्चे थेङ्यीमात ग्योन्-ग्योन्नो न्याय स्य्हेङ्जेत्स्ये मुब। तर म्हीइ ज ब्योन्युबे बेलोरी जम्बुलीङ्री थेङ्त बीस्वास् स्य्हेङ्बे म्हीमा थेङ्चे यङ्ल?”
फरीसीतेङ् तीरो दुत्पे म्ही
9येसुचे र्हङ्चे र्हङ्त धर्मी म्हेन्बलमा ओसेम् ल्हो-ल्होत ज्यीत म्हेन्बलमात चु अर्थ सुङ्ज्यी। 10“म्ही ङ्य्ही पर्मेस्वर्त तेन्बे दीम्री प्रार्थना स्य्हेङ्बरी ङ्यीज्यी। थेङ्य्ही न्हङ्री गीः फरीसी ओसेम् गीः तीरो दुत्पे म्ही मुबल। 11फरीसी रप्ज्यीम् र्हङ्चे र्हङ्की बारेरी चोले प्रार्थना स्य्हेङ्ज्यी, ‘पर्मेस्वर् ङ थेङ्त ह्वोर्छ्ये पीन्ब, ङ ल्हो-ल्हो म्हीमा र्हङ्बे लोभीतेङ् अर्ती अङ्येन्बे म्ही अय्हीन्। ङचे ब्यभीचारेएनो स्य्हेङ्बल अरे। ओसेम् ङ चुजु तीरो दुत्पे म्ही र्हङ्बएनो अय्हीन्। 12ङ सत गीःरी ङ्य्हीरेत् ङ्यीम्बु टीज्यीम् प्रार्थना स्य्हेङ्ब। ओसेम् ङचे यङ्बे जम्मा स्य्हेइ बो च्यीइ बो गीः थेङ्त पीन्ब।’
13“तर तीरो दुत्पे म्ही थारीङ्क्योर्नो रप्ज्यीम् स्वर्गतोर् च्याकीएनो अच्यानले क्राज्यीम् कुत्तो र्हप्ज्यीम् चोले प्रार्थना स्य्हेङ्ज्यी, ‘पर्मेस्वर्, ङ पापीत दय स्य्हेङ्जेतो।’” 14येसुचे सुङ्ज्यी, “ङ एङ्यीमात पङ्ब, फरीसी बीमम् तीरो दुत्पे म्ही चइ पर्मेस्वर्की ङोन्री धर्मी तज्यीम् दीम्री दोःय्हर्ज्यी। तलेपङ्सम् खल्चे र्हङ्चे र्हङ्त ङ्हच्छ्यङ् म्हेन्ब थे ज्यीत तब। ओसेम् खल्चे र्हङ्चे र्हङ्त ज्यीत म्हेन्ब थे ङ्हच्छ्यङ् तब।”
येसुचे कोलमात मोलम् न्हङ्बल
(मत्ती १९:१३-१५; मर्कुस् १०:१३-१६)
15येसुचे छुज्यीम् मोलम् न्हङ्खइ बी म्हीमाचे कोलमात थेङ्ज बज्यी। तर डबमाचे चु म्रङ्ज्यीम् येसुत नर्सु थलोउ बी म्हीमात बराज्यी। 16तर येसुचे कोलमात ङ्होत्ज्यीम् सुङ्ज्यी, “कोलमात ङइज खपुङो, थेङ्यीमात थरोदो। तलेपङ्सम् पर्मेस्वर्की य्हुल् चु कोलमा र्हङ्बल य्हीन्ब। 17ङ एङ्यीमात देमेन्नो पङ्ब, खल्चे चु कोलमाचे र्हङ्ले पर्मेस्वर्की य्हुल्त बीस्वास् अस्य्हेङ्ज्यी थे खेमेएनो पर्मेस्वर्की य्हुल्री वङ्अखम्।”
बरु म्ही
(मत्ती १९:१६-३०; मर्कुस् १०:१७-३१)
18यहुदीमाकी सासक् गीःचे येसुत “ज्यबे लोप्पोन्, खेमेएनो अबेबे जीवन् यङ्बरी ङचे ता स्य्हेङ्थोब?” बी ङ्योत्ज्यी। 19येसुचे थेत सुङ्ज्यी, “एचे ङत तले ज्यब पङ्ब? पर्मेस्वर्कीनो ज्यब मुब। 20मोसाचे ब्रीबे पर्मेस्वर्की नीयम्मा एचे स्येःबलनो मुब, ‘ब्यभीचार् थस्य्हेङो, थसेतो, य्होथलो, र्होइ बारेरी भ्यु तम् थपङो, ओसेम् एइ अप-अमत स्य्हेस स्य्हेङो।’#प्रस्थान २०:१२-१६; ब्यबस्था ५:१६-२०” 21थेचे येसुत, “पर्मेस्वर्की चु जम्मा नीयम्मा ङचे कोल य्हङ्स्ये ङ्येन्ज्यीम् ब्रबल मुब” बी पङ्ज्यी। 22येसुचे थेइ तम् थेःज्यीम्, “एचे दवम् लक् गीः स्य्हेङ्थोस्ये मुब। एतेङ् मुबे जम्मा स्हेमा चुङ्ज्यीम् प्रङ्नमात पीनो। एचे स्वर्गरी स्हेमा यङ्स्ये मुब। ओसेम् खज्यीम् ङइ लीप्चे ब्रउ” बी सुङ्ज्यी। 23तर चु तम् थ्येःब बीसेम् थे य्हक्को छेर्ज्यी। तलेपङ्सम् थे य्हक्को बरु मुबल।
24हुजु म्ही छेर्बल म्रङ्ज्यीम् येसुचे, “बरु म्हीत पर्मेस्वर्की य्हुल्री वङ्बरी य्हक्को गारो तब बी सुङ्ज्यी। 25देमेन्नो बरु म्ही पर्मेस्वर्की य्हुल्री वङ्ब बीमम् दब्की मीःचे ऊँट वङ्ब देबल तब।” 26चु थ्येःबलमाचे थेङ्त ङ्योत्ज्यी, “होलेपङ्सम् खल म्ही थर्ब खम्ल?” 27येसुचे सुङ्ज्यी, “म्हीमाचे स्य्हेङ् अखम्बे लक्मा पर्मेस्वर्चे स्य्हेङ् खम्ब।”
28ओसेम् पत्रुसचे पङ्ज्यी, “स्हीःगो ङ्यीमाचे ङ्यीमाइ जम्मा स्य्हेमा ख्लेथेन्ज्यीम् थेङ्की लीप्चे ब्रबल मुब।” 29येसुचे थेङ्यीमात सुङ्ज्यी, “ङ एङ्यीमात देमेन्नो पर्मेस्वर्की य्हुल्की लागीरी र्हङ्की दीम्, म्रीङ्, अज्यो-अले, म्हेम्हे ओसेम् कोलमात ख्लेथेन्बलमाचे 30चु बेलोरीनो हुजु बीमम् य्हक्को यङ्स्ये मुब। ओसेम् लीक्यम्की बेलोरीएनो खेमेएनो अबेबे जीवन् यङ्स्ये मुब।”
येसुचे देबेनो र्हङ् स्यीजेत्स्येकी बारेरी सुङ्जेत्पल
(मत्ती २०:१७-१९; मर्कुस् १०:३२-३४)
31येसुचे चुङ्ङ्य्ही डबमात तीच्छङ् नोम्ज्यीम् थेङ्यीमात सुङ्ज्यी, “ङ्येनो, ङ्य्हङ्मा यरुसलेम्क्योर् य्हर्टीब। अगम्बक्तमाचे म्हीइ जइ बारेरी ब्रीबे जम्मा तम् हुजुरी पुरा तस्ये मुब। 32थे यहुदी अय्हीन्बे म्हीमाइ यारी सोप्तीस्ये मुब। थेमाचे थेत ङोःज्यीम् ङ्येत्स्ये मुब। थेमाचे थेत पेत्नलस्ये मुब, ओसेम् थो सास्ये मुब। 33थेमाचे थेत कोर्रचे ग्यङ्स्ये मुब ओसेम् सेत्स्ये मुब। तर थे सोम्रेत्की दीन्री सोज्यीम् रेःस्ये मुब।” 34तर डबमा ग्यम्से चु तम्की अर्थ छुम्बल तज्यीम् थेङ्यीमाचे चु तम्मा गीःएनो अगो। ओसेम् येसुचे ता सुङ्टीब बी थेङ्यीमाचे म्हेन्बेएनो अखम्।
कन म्ही गीःचे म्रङ्ब खम्बल
(मत्ती २०:२९-३४; मर्कुस् १०:४६-५२)
35येसु यरीहो सहरकी रेइरी दोखमम् कन म्ही गीः ग्यम् रेइरी स्योःज्यीम् टीटीब मुबल। 36हुजु कन म्हीचे य्हक्को म्हीमा थेइ रेइसे य्हर्टीबल थ्येःज्यीम्, “चुरी त तटीब?” बी म्हीमात ङ्योत्ज्यी। 37थेङ्यीमाचे थेत पङ्ज्यी, “नासरत्की येसु स्येःटीब मुब।” 38होत्तज्यीम् थेचे क्रीङ्ज्यीम्, “येसु दाऊदकी ज, ङत दय स्य्हेङ्जेतो!” बी पङ्ज्यी। 39ङोन्-ङोन् य्हर्टीबे म्हीमाचे थेत कुटी टीउ पङ्ज्यीम् बराज्यी। तर थेचे झन् बङ्ले, “दाऊदकी ज ङत दय स्य्हेङ्जेतो!” बी क्रीङ्ज्यी। 40येसु थेन्ले रप्जेत्ज्यीम्, “कन म्हीत ङइज बोउ” बी कुल्जेत्ज्यी। कन म्ही थेङ्की रेइरी खब बीसेम् येसुचे थेत, 41“ङचे एइ लागीरी ता स्य्हेङ्खइ बी म्हेम्ब?” बी ङ्योत्जेत्ज्यी। ओसेम् थेचे पङ्ज्यी, “प्रभु, ङइ मीः म्रङ्नलपीन्जेतो।” 42येसुचे थेत, “एचे म्रङ्ब खमो! एइ बीस्वास्चे एत फेन्लबल मुब” बी सुङ्ज्यी। 43हुजु बेलोरीनो थेचे म्रङ्ब खम्ज्यी। ओसेम् पर्मेस्वर्त व्होर्छ्ये पीन्ज्यीम् येसुइ लीप्चे ब्रज्यी। चु म्रङ्बे जम्मा म्हीमाचेएनो पर्मेस्वर्त तोप्ज्यी।
Currently Selected:
लुका 18: WTDG
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
