Aposkạmi 19
19
Ephesus nagrahare Pạul
1-2Apollos Korinthreye tahẽkanre Pạul do Asiạ Prodes talate Ephesusteye hecʼena. Onḍe adom celakoe ńapamketʼkote onkoe kuliketʼkoa, “Probhu Jisurepe pạtiạulenre cetʼ sonot Jiupe ńamledea?”
Metadeako, “Sonot Jiu je menae ona reakʼ katha do bale ańjomakada.”
3Unre Pạule metatʼkoa, “Enḍekhan okaṭakʼ bạptismape ńamleda?”
Adoko metadea, “Johanakʼ bạptismage.”
4 #
Mat 3.11; Mrk 1.4,7,8; Luk 3.4,16; Jhn 1.26,27 Khan Pạule metatʼkoa, “Kại khon mon ạcurkate okaṭakʼ bạptisma ataṅokʼ, ona do Johanakʼ bạptisma kana. Johan do hoṛkoe metatʼko tahẽkana, acʼ tayomte okoeye daraekan unire, metakʼme Jisure jemonko pạtiạukʼ.”
5Ado noa katha ańjomkate onko celako do Probhu Jisu ńutumte bạptismako ataṅkeda. 6Ar Pạul do onkoe capoketʼko khan onkore sonot Jiue hecʼena, ar onko do eṭakʼ eṭakʼ pạrsite roroṛkan ar nạbi leka Isorakʼ katha lạlạiko ehopʼena. 7Onko celako do lekhare gelbar goṭenko tahẽkana.
8Inạ tayom Pạul do sunạgogkoteye boloyena ar pe cando hạbicʼ dil salakʼ kathakoe galmaraoatʼkoa. Uni do Isorakʼ raj reaṅakʼko khode khod galmaraoatʼkote biswạs janam ocoytako lạgitʼe kurumuṭukeda. 9Menkhan onko modren adomkoakʼ mon do goṛdhoge tahẽkante bako pạtiạulena ar sanamko samaṅre Jisuakʼ hor reaṅ ạḍi leka opomanko ehopʼena. Unre Pạul do onko bạgiyatʼkoteye calaoena. Uni do celakoe soṅgeketʼkote Turanus ńutuman mitʼṭecʼ iskulre senkate dinạm hilokʼe lại bujhạuako kan tahẽkana. 10Ado bar bochor hạbicʼ onkage hoy idiyena. Onate okoe Jihudi ar Junạniko Asiạ Prodesreko tahẽkan onko sanamkoge Probhu Isorakʼ kathako ańjomkeda.
11Ar Isor do Pạul hotete ạḍi hahaṛa hahaṛawakʼ kạmikoe ehopʼkeda. 12Uniyakʼ gamcha ar oyonakʼ rugiko ṭhenko idiyetʼ tahẽkanre onkoakʼ ruạ do bogekʼkan tahẽkana ar bạṛicʼ jiuko hõko oḍok calakʼkan tahẽkana.
13Ar adom Jihudiko hõ jhaṛ ar husitʼte bạṛicʼ jiukoko oḍok giḍiyetʼko tahẽkana. Onko do Probhu Jisu ńutumte bạṛicʼ jiu capaṛ akawatʼ hoṛko bogeko reakʼ kurumuṭuko ehopʼena. Onkoko menetʼ tahẽkana, “Pạul okoe reaṅe porcaretʼkan, uni Jisu ńutumte oḍok calakʼ iń hukumam kana.”
14Onko modre Skewa ńutuman mitʼṭen Jihudikoren maraṅ naekeren eae goṭen koṛa do onkako kạmikan tahẽkana. 15Ado mitʼ dhaoko onkayetʼkan tahẽkanre bạṛicʼ jiu do onkoe metatʼkoa, “Iń do Jisu hõń baḍae akadea ar Pạul hõń oromakadea, menkhan ape dope okoekana?” 16Ar okoe hoṛ bạṛicʼ jiue sapʼakade tahẽkan uni do onko eae boehako cetanreye don ladeyente nonkae ghạlketʼkoa je, onko do ghạl akan koṭoge ona oṛakʼ khonko dạṛkeda.
17Ado noa khobor Ephesusre girobas akan Jihudi ar Junạnikoko baḍaeketʼ khan sanamkoge ạḍiko botorena ar Probhu Jisuakʼ ńutum do maraṅentaea. 18Ar okoe do Probhu Jisureko pạtiạu akan tahẽkan nonka ḍher hoṛge hecʼkate akoakʼ bạṛicʼ kạmi reaṅ sodorteko aṅgockeda. 19Ar okoe do jạduko udukʼ baṛayetʼ tahẽkan onko modren ḍher hoṛge akoakʼ puthiko jarwakate jotoko samaṅre onako jeretʼ giḍikada. Ona puthi reakʼ dam hisạbkate ńelena ona reakʼ dam do mõṛẽ gel hajar Dinar hoykokʼa. 20Nonkate Probhu Isorakʼ katha do pasnao idiyena ar hoṛkoakʼ monre uniyakʼ daṛe do arhõ bạ̃ṛti kạmiye ehopʼkeda.
21Ado noako hoy baṛayen khan Pạul do Makedoniạ ar Akhaea secʼte Jerusalemte calakʼ reakʼe goṭawana. Uni doe menkeda, “Jerusalemte calao tayom iń do Rom nagrahate hõ calakʼ hoyokʼtińạ. 22Tayomte Timothi ar Erastus ńutuman acʼren barea goṛokin do Makedoniạteye kolketʼkinạ, ar acʼ do arhõ thoṛa din Asiạreye tahẽyena.
Ephesusre gulmal
23Ona jokhecʼ Jisuakʼ hortetʼ babotre ạḍi gulmal ehopʼena. 24Demetrius ńutuman mitʼṭen sonhar do Artemis reakʼ mundil leka huḍiń huḍiń rupạ reakʼ mundilkoe benaoetʼ tahẽkana. Ar nonkate kạrigolkoakʼ ạḍi lab hoyokʼkan tahẽkana. 25Demetrius do onko kạrigolko ar onko lekan eṭakʼkoe jarwaketʼkoteye metatʼkoa, “E boehako, ape dope baḍaegea je, abo do noa kạmitege bon ạsulokʼ kana. 26Menkhan ar hõpe ńeletʼkana arpe ańjometʼgea, Pạul ńutuman uni hoṛ do aboakʼ noa Ephesusre ar goṭa Asiạ Prodesren ḍher hoṛkoe biswạs ocoyetʼkote bhul horteye idiyetʼkoa. Uni doe metako kana tite benaoetʼko debota do cele hõko baṅkana. 27Noate eken aboakʼ ạsulokʼakʼ rojgar cabakʼa ona do baṅ, bickom maraṅ debi Artemis reakʼ mundil hõ ạuṛiyagokʼa. Ar Asiạ disạmren sanam hoṛko, se dhạrtiren sanamkoge okoe debotako sewawae kan uni hõ maraṅ do bae tahena.”
28Noa kathako ańjomketʼ khan onko do edreteko perecʼena ar ãṭ aṛaṅte memenko ehopʼena, “Ephesuskoren Artemis debgeye maraṅa.” 29Ar goṭa nagraha do ạḍi usạrage ạulạu cabayena. Unre Gạius ar Aristarkhos ńutuman Makedoniạren okoekin hoṛ do Pạul sãotekin calakʼkan tahẽkan, hoṛko do unkinko sapʼketʼkinạ ar sanamkoge bạisiteko gad gadao boloyena. 30Pạul do ṭhạurạ akan hoṛko ṭhen senokʼe menleda, menkhan celako do bako sen ocoadea. 31Ona disạmren rajren adom kạmiyạko do Pạulren gateko tahẽkana. Onko hõ Pạul ṭhen khoborko kolketʼte uniko nehõradea jemon bạisite aloe calakʼ.
32Ar inạkʼtege bạisire gulmal ehopʼena. Unre adomko do mitʼ leka arhõ adomko do eṭakʼ lekako hohoyetʼ tahẽkana. Ar ḍher hoṛge bako baḍaekan tahẽkana cedakʼ bạisireko hecʼakana mente. 33Khange Jihudiko do Aleksander samaṅ secʼko ṭhelao idikede khan, cetʼe roṛa mente adom hoṛko lạiyadea. Unre Aleksander do katha roṛ lạgitʼ titeye isạrawatʼkote thirokʼ lạgitʼe kurumuṭukeda. 34Menkhan hoṛko do Aleksander Jihudi kanae menteko baḍaeketʼ khan sanamkoge mitʼ sãote bar ghonṭa ganko hohokeda, “Ephesuskoren Artemis debgeye maraṅa”
35Ado mucạtʼre nagraharen mitʼṭen sorkari kạmiạyicʼ do hoṛkoe thir ocoketʼkoteye metatʼkoa, “E Ephesusren hoṛko, noa katha do sanam hoṛgeko baḍaea baṅma, maraṅ Artemis debakʼ mundil ar Jupiter khon uniyakʼ oka muṭhạn ńur akan onaren rukhiyạko do Ephesus nagraharenge. 36Ar noa katha sạrikana mentepe aṅgoc khan lelhako leka kạmi baṅkate thir hapekokʼge lek tapea. 37Ente nukin hoṛ do aboakʼ mundil khon kombṛo hõ bạkin kombṛo akada ar aboren deb hõ bạkin neṅghao akadea, enhõ nukin hoṛ do nonḍepe ạguakatʼkinạ. 38Ado Demetrius ar uni sãoten kạrigolko do jãhãe upạrte jãhãn katha menakʼtako khan enḍekhan kacahạrima jhicʼge ar hạkimko hõ coṅ menakʼkoge. Onate onko do onḍeko mambla daṛeakʼa. 39Menkhan arhõ jãhãnakʼ bạ̃ṛti roṛpe menetʼ khan ona do ạn bandhao bạisire chinḍạu hoyokʼtapea. 40Teheńakʼ gulmal babotre abo cetanrege dos paṛaokʼ reakʼ botor menakʼa. Ar nonkage hoylen khan noa gulmal reakʼ cetʼ karonge babon udukʼ daṛeakʼa, ente noa gulmal reakʼ do jãhãn karonge bạnukʼa.” 41Ado nonkae roṛketʼ khan uni do jarwa akan hoṛkoe bidạkatʼkoa.
Currently Selected:
Aposkạmi 19: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
